Rəhman və Rəhim Allahın adıyla

1. Ha mim.

2. Hər şeyi bəyan eləyən Kitaba and olsun,

3. anlayasız deyə [Məkkə əhlinə müraciətlə] ərəbcə Biz var elədik Qur'anı.

4. Şübhəsiz, bu Qur'an dərgahımızda olan Ana Kitabda mövcuddur, ucadır, hikmətlidir.

5. Sizdən bu Qur'anı uzaqmı tutmalıyıq, nə var nə var həddinizi aşırsız?

6. Neçə-neçə peyğəmbərlər göndərmişdik öncəki nəsillərə.

7. Məsxərəyə qoymuşdular hər gələn peyğəmbəri.

8. Və Biz də məhv eləmişdik onların içində ən qüvvətli olanları. Öncəki ayələrdə bildirilmiş aqibəti belələrinin.

9. Onlardan «Göyləri, yeri kim yaratmış?» soruşsan, «Güclü olan, hər şeyi bilən yaratmış göyləri, yeri!» deyərlər.

10. Yer üzünü sizin üçün beşik eləmiş, doğru olan yolunuzu tapasız deyə burada sizin üçün yollar açmış.

11. Göydən su göndərər bir qədər. Ölü bir ölkəni bu su ilə dirildərik. Siz də qəbirlərdən çıxaraq dirilərsiz beləcə.

12. Hər şeydən cüt-cüt yaratmış. Gəmiləri, heyvanları sizinçün minik eləmiş.

13. Eləmiş ki, bunlara minən zaman anasız Rəbbinizin ne'mətini, deyəsiz: «Ucalardan ucadır bunları buyruğumuz altına vermiş Rəbbimiz. Yoxsa gücümüz çatmazdı bizim tabe edək əmrimizə bunları.

14. Şübhəsiz, Rəbbimizin dərgahına dönəcəyik axır hamımız».

15. Ona övlad caladılar bə'zi bəndələrini. Açıq-aşkar nankorun biridir insan.

16. Deməli, yaratdıqlarından qızları Özünə götürmüş, oğlanları da sizə vermiş, eləmi?

17. Ancaq Rəhmana caladıqlarının müjdəsini verəndə onlardan bir kimsəyə, hirsindən qaralar o, qəm-qüssəylə dolar o.

18. Zər-ziynət içində bəslənənimi, haqqını qoruya bilməyənimi Allaha övlad olaraq calayırsınız?

19. Allahın bəndələri mələkləri də qadın cinsindən sanmış onlar. Mələklər yaradılan zaman buna şahidlikmi eləmişdilər? Mütləq qeydə alınacaq onların bu şəhadəti və buna cavab verməli olacaqlar.

20. «Rəhman istəsəydi əgər, ibadət eləməzdik mələklərə» deyərlər. Yox onların bu barədə bir biliyi. Yalnız yalan olar onların dediyi.

21. Bəlkə Biz onlara Qur'andan öncə bir kitab vermişik, o kitabda Allahdan başqasına ibadəti caiz bilmişik və həmin kitaba bağlanıb qalmış onlar?

22. Xeyr, özləri deyirlər, «Öz dini vardı atalarımızın, biz onların iziylə gedirik».

23. Səndən öncə Biz hansı bir şəhərə peyğəmbər göndərmişdiksə, onun varlı başçıları, «Öz dini vardı atalarımızın, biz onların yoluyla gedirik» demişdilər.

24. «Atalarınızın dinindən daha doğru bir din gətirmişəmsə, necə?» demişdi hər peyğəmbər. «Sizinlə göndəriləni biz danırıq» demişdilər.

25. Və Biz də intiqam aldıq onlardan. Bax necə olmuş axırı elçiləri dananların.

26. Bir zamanlar İbrahim atasına və qövmünə demişdi: «Sizin tapındığınız şeylərdən mən uzağam.

27. Yalnız məni yaradana tapınaram. Şübhəsiz, doğru yola O da yönəldəcək məni».

28. İbrahim bu sözləri özündən sonrakılar üçün qoydu getdi. Dedi bəlkə haqq dininə dönələr sonra gələn nəsillər.

29. Haqq gələnə qədər, haqqı bəyan eləyən bir elçi gələnə qədər ömür verib yaşatdım Mən onları və atalarını.

30. Haqq gəlib yetişəndə isə onlara, «Bu bir cadudur, biz bunu danırıq» dedilər.

31. «İki şəhərin birində olan bir böyük adama nazil olmalı deyildimi bu Qur'an?» dedilər.

32. Rəbbininmi rəhmətini bölüşdürdülər? Biz onların arasında artıq bölüşdürmüşük dünya həyatının güzəran ne'mətlərini. Biri digərinə muzdla iş gördürsün deyə onlara verdiyimiz məqamlarla birini o birindən üstün tutmuşuq. Rəbbinin rəhmətisə daha yaxşıdır onların yığdığı dünya malından.

33. Əgər bütün insanlar vahid bir ümmət halında kafirlik etməsəydi, gümüşdən düzəldərdik Rəhmanı dananların evlərinin tavanını, evlərinə qalxan pillələri,

34. evlərinin qapılarını, söykənəcəkləri taxtları

35. və qızıldan bəzəklər vurardıq bunlara. Bunların hamısı dünya həyatının gəldi-gedər şeyləridir. Axirət evisə Rəbbinin dərgahında müttəqilər üçündür.

36. Rəhmanı anmaqdan kim çəkinirsə, ayrılmaz yoldaş edərik ona şeytanı.

37. Çıxarar yolundan şeytan belələrini. Bunlarsa doğru yolda olduqlarını zənn eləyərlər.

38. Və axır yanımıza gəldimi, «Şərqlə qərb arası bir uzaqlıq olaydı kaş bizim aramızda, nə pis yoldaş imişsən» deyər öz yoldaşına.

39. Bu gün peşmançılığın sizə heç bir faydası yox. Öncə haqsızlıq eləmişdiz, indi də yoldaşınızla bir yerdəsiz, əzab içindəsiz.

40. Sənmi söz eşitdirəcəksən karlara, sənmi yol göstərəcəksən korlara və açıq-aşkar bir sapqınlıq içində vurnuxanlara?

41. Ya səni öldürüb onlardan axirətdə intiqam alacağıq,

42. ya da onlara və'd elədiyimizi sənə göstərəcəyik. Onlara gücümüz çatar.

43. Sənə vəhy olunana bağlanıb qal. Doğru yolun üstündəsən, şübhəsiz.

44. Sənə və qövmünə şərəf gətirmiş bu Qur'an. Siz də cavab daşıyırsız Qur'ana.

45. Səndən öncə göndərilmiş elçilərdən soruşsana, Rəhmandan başqa tanrılarmı var etmişik ki, onlara bir ibadət də edələr?

46. Ayələrimizlə birgə göndərmişdik Musanı Fir'onun və ə'yanlarının yanına. «Mən, şübhəsiz, aləmlərin Rəbbinin elçisiyəm» demişdi.

47. Ayələrimiz görünəndə onlara gülmüşdülər bunlara.

48. Onlara göstərdiyimiz ayələrin biri digərindən böyükdü. Və əzaba uğratdıq Biz onları, dedik bəlkə əl çəkələr küfrdən.

49. «Ey cadubaz! Sənə verdiyi o əhdə görə bizdən ötrü dua elə Rəbbinə, dua elə doğru yolu tapaq biz» dedilər.

50. Elə ki, əzabdan xilas etdik onları, sözlərindən döndülər.

51. Qövmünü səslədi Fir'on: «Ey qövmüm, Misir hökmdarlığı, onun axar çayları mənimki deyilmi, deyin? Məgər görmürsünüzmü mənim böyüklüyümü?

52. Ağzı söz tutmayan bu zavallı kimsədən mən üstün deyiləmmi?

53. Ona qızıl bilərziklər verilməli deyilmiydi, yaxud onunla birgə mələklər gəlməli deyilmiydilər?»

54. Qövmünü yumşaltdı Fir'on. Onun dediyinə boyun əydilər. Sapmışlardı onlar.

55. Bizi qəzəbləndirdilər. İntiqam aldıq onlardan. Hamısını qərq elədik sulara.

56. Bir məsələ çevirdik onların axırını, bununla dərs verdik sonrakılara.

57. Nümunə çəkiləndə adı Məryəm oğlunun, sənin qövmün gülərdi,

58. deyərdi: «Bizimmi tanrılarımız, omu daha yaxşıdır?» Yalnız mübahisə xatirinə bu cür sözlər deyərdilər. Davakar bir qövmdülər.

59. Ne'mət verdiyimiz bir bəndədir, İsrail oğullarına bir nümunədir Məryəm oğlu sadəcə,

60. İstəsəydik Biz əgər, sizi aradan götürərdik, yer üzündə yerinizə mələkləri gətirərdik.

61. Qiyamətin qopacağının bir əlamətidir Məsih İsanın özü. Şübhə eləməyin, gələcək o gün. Mənə tabe olun. Doğru olan yol budur.

62. Ayıq olun, ayırmasın şeytan sizi öz yolunuzdan. Açıqca düşməndir sizə, şübhəsiz.

63. Aşkar dəlillər gətirmişdi İsa, demişdi: «Sizə hikmət gətirmişəm. Gəlmişəm açıqlayım ixtilafda olduğunuz şeylərin bir qismini. Qorxun Allahdan. İtaət eləyin mənə.

64. Allah mənim də Rəbbimdir, sizin də Rəbbinizdir. Ona ibadət eləyin. Doğru olan yol budur».

65. Firqələrə bölündülər, çəkişməyə başladılar aralarında. Vay halına zalımların! Qiyamət gününün ağrılı əzabına düçar olacaqlar.

66. Qiyamət saatınımı gözləyirlər? Bir də baxacaqlar özləri də duymadan qəflətən haqlamış bu saat onları.

67. Müttəqilərdən savayı bütün dostlar bir-birinə düşmən kəsilər o gün.

68. «Ey Mənim bəndələrim! Bu gün sizə zaval yoxdur. Daha üzülməzsiniz qəm əlindən» deyər Allah.

69. Ayələrimizə iman gətirmiş, özlərini Bizə təslim eləmiş kimsələrdir bu kəslər.

70. Taylarınızla birgə şad-xürrəm olaraq girin cənnətə».

71. Yrəklərinin istədiyi və göz oxşayan şeylərlə dolu qızıl qablarla, büllur kasalarla dolanarlar başlarına. Əbədilik qalarsız orada.

72. Gördüyünüz işlərin qarşılığında sizlərə irs olaraq verilən cənnət budur.

73. Bol-bol meyvələr var sizinçün orada, bunlardan yeyərsiniz.

74. Cəhənnəm əzabında əbədilik yeri var günah yiyələrinin.

75. Yumşaldılmaz əzabları, ümidsiz-ümidsiz sükut içindədirlər.

76. Onlara zülm eləyən Biz deyildik. Özləri zalımlar idi.

77. «Ey cəhənnəm yiyəsi! Rəbbinə söylə öldürsün bizi!» deyər cəhənnəm əhli. «Burada əbədilik qalacaqsınız» deyər cəhənnəm yiyəsi.

78. Biz sizə haqq gətirmişdik. Ancaq çoxlarınızın haqdan xoşu gəlməyir.

79. Yoxsa qərarlaşıblar qurğu quralar Bizə? Olsun, Biz də Öz qərarımızı artıq vermişik.

80. Yoxsa elə bilirlər onların sirlərini, gizli söhbətlərini Biz eşitmirik? Hər şeyi qeydə alar yanlarında dolaşan elçilərimiz.

81. De ki, «Rəhmanın övladı olsaydı əgər, buna tapınanların ilki olardım».

82. Dediklərindən ucadadır göylərin, yerin Rəbbi, o uca ərşin Rəbbi.

83. Nə qədər ki, və'd edilən o günə hələ qovuşmayıblar, qoy vurnuxsun, oynasın onlar öz aləmində.

84. Göydə olan Tanrı Odur, yerdə olan Tanrı Odur.

85. Uludan uludur göylərin, yerin, bunların arasında olanların yiyəsi. Təkcə O bilər qiyamət saatı nə vaxt gələcək. Onun da dərgahına axır dönəcəksiniz.

86. Allahı qoyub tapındıqları bütlər iltimas eləyə bilməzlər onlardan ötrü. Yalnız haqqı bilən və haqqa şəhadət verən kimsələrin iltimas eləməyə çatar haqları.

87. Soruşsan kim yaratmış onları, «Allah» deyəcəklər. Elə isə bəs niyə aldanaraq imandan yayınarlar?

88. «Rəbbim mənim! Bunlar imana gəlməyən kimsələrdir!» dedi Peyğəmbər.

89. «Sən onlardan üz çevir, sülh arzula onlara. Axır biləcəklər nə imiş küfrün axırı» buyurdu Allah.