Rəhman və Rəhim Allahın adıyla

1. Güclü olan, müdrik olan Allahın dərgahından nazil olmuş bu Kitab.

2. Haqq olaraq göndərmişik sənə bu Kitabı. Təkcə Allaha ibadət eləyin, təkcə Ona könül verin [dininizdə təgcə Onun adını Tanrı olaraq anın].

3. Xalis din məhz Allahın dinidir. O kəslər ki, Onu qoyub ayrılarını özlərinə dost arayırlar, «Bizləri Allaha yaxınlaşdıralar deyə bunlara ibadət eləyirik» deyərlər. Şübhəsiz, mübahisə elədikləri şeylərin barəsində onlara Öz hökmünü verər Allah. Yalançını, kafiri doğru yola çəkməz Allah.

4. Allah istəsəydi Özünə bir övlad götürə, yaratdıqlarından istədiyi birisini seçərdi. Ancaq bundan ucadadır O. Odur vahid qəhhar Allah.

5. Göylərlə yeri haqq olaraq yaratmış. Gecəni gündüzə bükər, gündüzü də gecəyə. Günəşlə ayı Özünə tabe eləmiş. Müəyyən bir vaxta qədər hər biri axıb gedər. Güclü, günahlardan keçən Allah təkcə Odur.

6. Sizi tək bir candan yaratmış. Sonra da bu candan tayını var eləmiş. Sizə dişili-erkəkli səkkiz heyvan göndərmiş. Sizi analarınızın bətnində, üç zülmətin içində xilqətdən xilqətə keçirərək yaratmış. Rəbbiniz Allahdır sizin. Hər şey Onun əlindədir. Ondan başqa tanrı yoxdur. Elə isə Ondan başqasına siz necə tapınırsız?

7. Onu dansanız, bilin, sizdən varlıdır Allah. Razı olmaz bəndələri küfr eləyə. Ona şükr eləsəniz, sizdən razı qalar O. Heç bir günah yiyəsi özgəsinin günah yükünü daşıyan deyil. Rəbbinizin dərgahına dönəcəksiz axırı. Və O da bildirər sizə nə iş tuturdunuzsa. Yrəklərin içini biləndir O, şübhəsiz.

8. Bir sıxıntı üz verəndə insana, yalvararaq üz tutar o Rəbbinə. Bir ne'mət aldımı Allahın dərgahından, öncə kimə yalvardığını unudar və Allahın yolundan adamları azdırmaq üçün Ona şəriklər qoşmağa başlar. De ki, «Öz küfrünlə azacıq baş girləyib dolan sən. Cəhənnəmliksən, şübhəsiz».

9. Gecələr əyilərək, qalxaraq ibadətlə məşğul olan, axirətdən qorxan, Rəbbinin rəhmətini uman kimsə kafir olan bir kəsə bərabərmi tutular? De ki, «Bilənlərlə bilməyənlər birmidir?» Ancaq ağıl yiyələri bunu düşünüb anlar.

10. De ki, «Ey mənim mö'min bəndələrim! Qorxun Rəbbinizdən. Bu dünyada yaxşı işlər görənləri yaxşılıqlar gözləyir. Genişdir Allahın torpağı. Hesabsız veriləcək əcri səbrlilərin».

11. De ki, «Mənə əmr olunub təkcə Allaha ibadət eləyim, təkcə Ona könül verim.

12. Və mənə əmr edilib müsəlmanların ilki olum».

13. De ki, «Rəbbimə qarşı çıxsam qorxuram böyük günün əzabına düçar olam».

14. De ki, «Təkcə Allaha ibadət edərəm, təkcə Ona könül verərəm.

15. Siz də Ondan başqa kimlərə istəyirsiz ibadətdə olun». De ki, «Zərərdidələr o kəslərdir ki, itirərlər özlərini, ailəsini qiyamət günü. Baxın, açıq-aşkar itki budur».

16. Başları üstündə, ayaqları altında oddan təbəqələr var. Bununla bəndələrini qorxuzar Allah. Ey Mənim bəndələrim, qorxun Məndən!

17. Tağuta ibadətdən əl çəkib Allaha üz tutanlara müjdə var. Ver müjdəni bəndələrimə,

18. o kəslərə ki, sözlərə qulaq asar və eşitdiyinin ən yaxşısına tabe olarlar. Doğru yola yönəltmiş onları Allah. Ağıl yiyələridir onlar.

19. Və'd verilən o əzab haqlayanda bir kəsi, sənmi onu od içindən qurtaracaqsan?

20. Rəblərindən qorxanlarısa üst-üstə qurulmuş mənzillər gözləyir. Altından çaylar axar bunların. Bu, Allahın və'didir. Və'dini pozmaz Allah.

21. Allah göydən su göndərir, yerdəki bulaqlara yerləşdirir bu suyu. Bununla rəngarəng bitkilər bitirir. Görməzmi oldun bunları? Sonra da qurudur bitkiləri, saralıb solurlar. Çör-çöpə döndərir sonra onları. Şübhəsiz, bunlardan öyüd alar ağlı olanlar.

22. Kimin ürəyini İslama açmışsa və Öz nuru ilə doğru yola yönəltmişsə onu Allah, ürəyi bağlı olan kimsə ilə birmi tutular beləsi? Vay halına o kəslərin ki, qəddar ürəklərilə Allahı anmaqdan ayrı düşüblər. Aşkar bir sapqınlıq içində vurnuxar onlar.

23. Ən gözəl kəlamları Qur'an olaraq göndərmiş Allah. Bə'zi ayələr və sözlər bir-birinin oxşarıdır, bir-birinin tayıdır. Onun təhdidini eşidən zaman Rəblərindən qorxanların tükləri biz-biz durur. Allahın müjdəsini eşidən zaman isə yumşalır dəriləri, yüngülləşir ürəkləri. Allahın göstərdiyi yoldur Qur'an. Bu Qur'anla istədiyi kimsəni doğru yola yönəldər O. Allahın azdırdığı kimsəyəsə yol göstərən tapılmaz.

24. Qiyamət günü o pis əzabdan üzünü yan çevirmək istəyən kəs arxayınçılıq keçirən kimsəylə birmi tutular? «Dadın qazancınızı» deyilər zalımlara.

25. Onlardan öncəkilər də danmışdılar göndərilmiş elçiləri. Közləmədikləri yerdən əzab gəlib haqlamışdı onları.

26. Dünyada rəzilliyi daddırdı onlara Allah. Axirət əzabı isə daha böyükdür. Bunu bilsəydilər!

27. Hər şeydən bir nümunə gətirdik insanlara Biz bu Qur'anda. Dedik bəlkə öyüd alalar.

28. Ərəbcə, əyərsiz-əskiksiz nazil elədik Qur'anı. Dedik bəlkə çəkinələr küfrdən.

29. Bir kişini nümunə gətirir Allah. Bunun bir-birilə çəkişən çoxlu ağaları var. Başqasını da nümunə gətirir. Onunsa tək bircə aqası var. Məgər taymı tutular onlar biri-birinə? Təkcə Allahı həmd edərlər. Amma bunu bilməyir onların çoxu.

30. Şübhəsiz, sən də öləcəksən, onlar da.

31. Sonra qiyamət günü Rəbbinizin hüzurunda deyişəcəksiz.

32. Allahın adına yalan yaxandan, Qur'anı görəndən sonra onu danandan daha zalım kim ola? Kafirlərə cəhənnəm yuva deyilmi?

33. Doğruluq gətirən şəxs [Muhamməd] və ona inananlarsa müttəqilərdir.

34. Rəblərinin dərgahında nə istəsələr varlarıdır. Yaxşılara verilən mükafatdır bu.

35. Gördükləri işlərin ən pisindən keçər, ən yaxşısına qarşılıq olaraq mükafat verər Allah.

36. Bəndəsinə Allah xofu bəs deyilmi ki, hələ səni Ondan başqalarıyla da qorxutmaq istəyirlər? Allahın azdırdığı kimsəyə yol göstərən tapılmaz.

37. Allahın doğru yola yönəltdiyi kimsəni də heç kim azdıra bilməz. Güclüdür, intiqam alandır Allah.

38. Onlardan «Göyləri, yeri yaradan kimdir?» soruşsan, «Allahdır» deyəcəklər. De ki, «Elə isə deyin, əgər mənə bir zərər vermək istərsə Allah, Onu qoyub tapındığınız bütlərmi qaldırarlar bu zərəri aradan? Əgər mənə rəhmətindən pay vermək istərsə Allah, onlarmı kəsə bilər rəhmətinin qarşısını?» De ki, «Təkcə Allah mənə yetərlidir. Qoy Allaha güvənsin güvənmək istəyənlər».

39. De ki, «Ey qövmüm, siz öz işinizdə olun, mən də öz işimdəyəm. Bir vaxt biləcəksiz

40. kimlər düçar olacaq alçaldıcı əzaba, əbədilik əzaba.

41. Şübhəsiz, insanları deyib bu Kitabı haqq olaraq sənə nazil etmişik. Kim tutmuşsa doğru yolu, bu onun öz xeyrinə, kim sapmışsa - əleyhinə. Sən onlara vəkil olan deyilsən.

42. Allah ölənlərin canını ölümləri gələndə, ölməyənlərinsə canını onlar yuxuda olarkən alar. Ölüm hökmü verilən kimsələrin canını tutub saxlayar, o biri kəslərinsə canını yazılı bir əcələ qədər sərbəst buraxar. Şübhəsiz, bunda ayələr var düşünən kəslər üçün.

43. Allahı qoyub başqa iltimasçılarmı seçmiş özlərinə bütpərəstlər? De ki, «Heç nəyin yiyəsi olmaya-olmayamı, düşüncəsiz ola-olamı sizdən ötrü iltimas edər onlar?»

44. De ki, «Allahın iznilə mümkün olar hər cür iltimas. Odur göylərin, yerin yiyəsi. Onun da dərgahına axır dönəcəksiniz».

45. Allah anılarkən adı tək çəkiləndə ürəkləri nifrətlə dolar axirətə inanmayan kəslərin. Allahdan başqaları adına tapındıqdıqları anılarkən isə sevinər onlar.

46. De ki, «Ey göyləri, yeri yaradan, görülməzi, görüləni bilən Allah! Mübahisə etdikləri şeyləri barəsində hökmü sən verəcəksən bəndələrinə».

47. Yer üzündə nə varsa və bir o qədər də üstəlik zalımların ola və qiyamət gününün pis əzabından qurtulmaq üçün bunları fidyə verələr, qəbul buyurulmaz fidyələri. Gözləmədikləri şeylər görünər onlara Allahın dərgahında.

48. Gördükləri pis işlər görünər onlara, lağa qoyduqları şeylər haqlayar onları.

49. İnsana bir sıxıntı üz verən zaman yalvarar Bizə. Bir ne'mət verdikmi ona dərgahımızdan, «Bunu öz biliyimlə qazanmışam» deyər. Sınaqdan keçirərik insanları beləcə. Ancaq bunu bilməyir onların çoxu.

50. Öncəki nəsillər də belə söyləmişdilər, ancaq qazanclarının bir faydası olmamışdı onlara.

51. Başlarına gəlmişdi gördükləri pis işlər. Aciz qoya bilməz onlar Allahı.

52. Məgər bilməzmidirlər, ruzini istədiyi kimsəyə bol-bol verər, istədiyi kimsəyə də müəyyən miqdarda verər Allah. Şübhəsiz, bunda ayələr var iman gətirənlər üçün.

53. De ki, «Ey Mənim bəndələrim, özlərinin əleyhinə olaraq hədlərini aşanlarım! Ymidinizi Allahın rəhmətindən üzməyiniz. Bütün günahları bağışlar Allah. Günahlardan keçən, Rəhim olan təkcə Odur.

54. Yzünüzü Rəbbinizə tutun. Təslim olun Ona nə qədər ki, üz verməyib o əzab sizə. Yoxsa yardım görməzsiniz.

55. Sizə Rəbbinizdən nazil olan ən gözəl kəlamın, Qur'anın ardınca gedin nə qədər ki, özünüz də gözləmədən haqlamayıb sizi əzab qəflətən».

56. «Əfsuslar olsun, Allaha qarşı həddimi aşmışdım, Onun Kitabına gülənlərdən idim» deyər bir kəs o zaman.

57. Yaxud da deyər: «Doğru yola çəksəydi məni Allah, mütləq müttəqilərdən olardım».

58. Yaxud da əzabı görüb deyər: «Kaş ki, mən dünyaya dönə biləydim, dönsəydim yaxşılardan olardım».

59. «Sənə ayələrim gəlmişdi axı. Dandın onları, təkəbbürlük elədin, kafirlərdən oldun» deyər Allah.

60. Görərsən qiyamət günü necə qaralır Allahın adına yalan yaxan kimsələrin üzləri. Cəhənnəm deyilmi məgər təkəbbürlü kimsələrin yuvası?

61. Ona şərik qoşmaqdan çəkinənləri uğur qazandıqlarına görə xilas eləyər Allah. Bir pislik dəyməz onlara, üzülməzlər qəm əlindən.

62. Allahdır hər şeyin xaliqi. Hər şeyə vəkildir O.

63. Göylərin, yerin açarları Ondadır. Allahın ayələrini dananlar itkiyə uğrayanlardır.

64. De ki, «Ey cahillər, Allahdan başqalarınamı tapınmağı siz mənə buyurursuz?»

65. Sənə də, səndən öncəki peyğəmbərlərə də vəhy olunmuş: «Allaha şərik qoşsan, işlərin boşa çıxacaq, itkiyə uğrayanlardan olacaqsan.

66. Təkcə Allaha ibadət elə, Ona şükr eləyənlərdən ol!»

67. Allahı dəyərincə tanımadılar. Qiyamət günü Onun ovcunda olar bütün yer üzü, Onun qüdrətiylə bükülər göylər. Ona qoşduqları şəriklərdən ucadadır, ucalardan ucadır O.

68. Elə ki, çalındı sur, Allahın istədiyi kimsələrdən savayı göylərdə kim varsa, yerdə kim varsa yıxılıb ölər hamısı. Bir daha çalınanda isə bütün ölənlər qalxıb ayağa gözləyərlər olacağı.

69. O gün Rəbbinin nuruyla işıqlanar yer üzü. Haqq-hesab kitabı açılar, peyğəmbərlər və şahidlər gətirilər. Hamının haqqında hökm haqq ilə verilər, heç kimə bir haqsızlıq edilməz.

70. Hər kəsə öz əməlinə görə cəza verilər. Allah hamıdan yaxşı bilər hər kəsin işləklərini.

71. Dəstə-dəstə sürülər cəhənnəmə küfr eləyən kimsələr. Çatdılarmı oraya, üzlərinə açılar qapılar. «Rəbbinizin ayələrini oxuyan, bu günlə üzləşəcəyinizi öncədən bildirən peyğəmbərlər gəlməmişdilərmi sizə öz içinizdən?» deyər onlara cəhənnəm mə'murları. «Bəli, gəlmişdilər» deyər onlar. Desələr də, o deyilən əzab haqq olub haqlayar kafirləri.

72. «Cəhənnəmin qapılarından içəri girin. Əbədilik qalacaqsız orada. Pisdən pis imiş təkəbbürlü kimsələrin yuvası!» deyilər.

73. Dəstə-dəstə apararlar cənnətə Rəblərindən qorxanları. Çatdılarmı oraya, üzlərinə açılar qapılar. «Salam olsun sizlərə, xoş gəldiniz! Buyurun içəri. Əbədilik qalacaqsız orada» deyər onlara cənnət mə'murları.

74. «Həmd olsun Allaha, gerçəyə çevirmiş bizə verdiyi və'di, bizi cənnət torpaqına varis eləmiş. Cənnətin harasında istəsək qala bilərik. Əməli salehlərin əcri nə gözəl imiş!» deyər onlar.

75. O zaman görərsən, ərşi hər tərəfdən dövrəyə almış və həmd oxuyur Rəblərinə mələklər. Artıq hamının işi haqq ilə həll olunmuş. «Həmd olsun Allaha, aləmlərin Rəbbinə» deyər mələklər.