Rəhman və Rəhim Allahın adıyla

1. And olsun əsdikcə əsən yellərə,

2. and olsun yağış yüklü buludlara,

3. and olsun su üstə süzən gəmilərə,

4. and olsun hər şeyi bölüşdürüb-paylaşdıran mələklərə,

5. sizə və'd edilənlər doğrudur.

6. Və şübhəsiz, cəza günü gələcəkdir.

7. And olsun fələklərin yürüyərək yol getdiyi o göyə,

8. Peyğəmbər barədə dedikləriniz bir-birindən fərqlidir.

9. Yalnız doğru yoldan yayınan kəs dindən-imandan yayınar.

10. Ölüm olsun cürbəcür sözlər danışan yalançılara,

11. o kəslərə ki, cəhalət və qəflət içindədirlər.

12. «Cəza günü bəs nə vaxt gələcək?» deyə rişxəndlə soruşarlar.

13. Cəhənnəm odunda əzab çəkəcəkləri gündür onların cəza günü.

14. «Dadın əzabınızı. Bunu siz özünüz tələsdirirdiz».

15. Bağlar içindədir, bulaqlar başındadır müttəqilər, şübhəsiz.

16. Rəblərinin verdiyilə barınırlar. Bundan öncə dünyada da yaxşılardan idilər.

17. Gecələr az yatardılar,

18. səhərlər Allahdan məğfirət diləyərdilər.

19. Əl açana, ehtiyacı olana mallarından pay verərdilər.

20. Şübhəsiz, dərindən inananlar üçün ayələr var yer üzündə

21. və sizin öz xilqətinizdə. Görməzmisiz bunları?

22. Ruziniz də göydən gələr, sizə və'd verilənlər də.

23. And olsun göyün, yerin Rəbbinə, sizin dillənib-danışmağınız haqq olduğu kimi sizə verilən o qorxunc və'd də haqdır.

24. İbrahimin möhtərəm qonaqlarının əhvalatı gəlib çatmışmı sənə?

25. Gəldilər yanına, dedilər: «Salam!» İbrahim də «Salam!» dedi. Və düşündü namə'lum adamlardı bu kimsələr.

26. Ailəsinin yanına getdi, yağlı buzov əti gətirdi,

27. qoydu qabaqlarına. «Buyurun yeyin bundan» dedi.

28. Gördü ki, yemirlər, qorxuya düşdü. «Qorxma!» dedilər və ona biləyən bir oğlan uşağının müjdəsini verdilər.

29. Bunu eşidəntək üz-gözünə döyərək hıçqıra-hıçqıra gəldi arvadı. «Mən sonsuz bir qarıyam» dedi.

30. «Dediyimiz kimi olacaq. Belə söyləmiş Rəbbin. Şübhəsiz, müdrikdir, hər şeyi biləndir O» dedilər.

31. «Ey elçilər! İşinizin adı nədir?» dedi İbrahim.

32. «Suç yiyəsi bir qövmün üstünə göndərilmişik» dedilər -

33. «Göndərilmişik ki, odda bişmiş daş yağdıraq üstlərinə.

34. Həddini aşanlar üçün Rəbbinin dərgahında birər-birər nişanlanmış bu daşlar».

35. Mö'minləri çıxartdıq o şəhərdən.

36. Orada tək bircə evdə Allaha təslim olmuş kimsələr [Lut və onun iki qızı] yaşayırdı.

37. Kafirlərin məhvindən o şəhərdə bir əlamət saxladıq əzabdan qorxanlar üçün.

38. Musanın da əhvalatında belə bir əlamət var. Aşkar bir dəlillə göndərmişdik onu Fir'onun yanına.

39. Ə'yanlarıyla birgə imandan üz döndərdi Fir'on. Dedi: «Bu cadubazdır, ya da dəlinin biridir».

40. Biz də onu əsgərləriylə birgə yaxaladıq, atdıq dənizə. Qınanmış bir kimsə idi Fir'on.

41. Ad qövmünün məhvi də ibrət alınası bir əhvalatdır. Acı külək göndərmişdik üstlərinə.

42. Qabağına çıxanı toz eləyib sovururdu göyə.

43. Səmud qövmünün məhvi də ibrət alınası bir əhvalatdır. «Bir müddət dolanın» deyilmişdi onlara.

44. Rəblərinin əmrindən boyun qaçırmışdılar. İldırım vurdu onları, baxa-baxa qaldılar.

45. Nə ayağa qalxa bildi, nə bir yardım gördü onlar kimsədən.

46. Daha öncə Nuh qövmünü məhv eləmişdik. Onlar da yolsuzlar idi.

47. Göyü qüdrətimizlə Biz qurduq. Böyük qüdrət yiyəsiyik, şübhəsiz.

48. Yer üzünü Biz düzəldib döşədik. Gözəl döşəmişik, deyilmi?

49. Hər şeydən öz tayını da yaratdıq ki, bəlkə ibrət alasız.

50. De ki, «Allaha pənah aparın. Mən Onun tərəfindən sizə açıq-aşkar xəbərdarlıq eləyənəm.

51. Başqasını tanrı olaraq şərik qoşmayın Allaha».

52. Onlardan öncəki qövmlər də hər gələn peyğəmbərə «Cadubazdır», ya «Dəlidir» demişdilər.

53. Yoxsa bunumu vəsiyyət eləmişdi onlara öncəkilər? Yox, onlar da öncəkilər tək azğın kimsələrdir sadəcə.

54. Sən onlardan üz çevir, qınanası deyilsən, Allahın kəlamını artıq onlara demisən.

55. Mö'minlərə Qur'an ilə öyüd ver. Yarar gətirər onlara öyüd.

56. Mən cinləri, insanları yaratmışam təkcə Mənə ibadət edələr.

57. Mən onlardan bir ruzi diləyən deyiləm. Məni doyurmalarını diləyən deyiləm.

58. Əbədilik ruzi verən, güc yiyəsi, mətin olan təkcə Allahdır.

59. Öncəki yoldaşlarıtək bu zalımların da nəsibinə əzab düşər. Cəzalarını Məndən tələsik istəməsinlər.

60. Və'd verilən o gün gəlib çatdımı, vay halına kafirlərin!