Rəhman və Rəhim Allahın adıyla

1. Yə sin.

2. And olsun hikmətli Qur'ana

3. göndərilmiş elçilərdən birisən,

4. doğru yoldasan.

5. Güclü olan, Rəhim olan Allah göndərmiş bu Qur'anı.

6. Göndərmiş ki, atalarına xəbərdarlıq edilməmiş olan, qəflətdə olan bir qövmə xəbərdarlıq eləyəsən.

7. Dediyimiz o əzab artıq vacib görülmüş çoxlarına. Hələ də gəlməyirlər imana.

8. Boyunlarını, çənələrini qollarına zəncirləmişik, dik tutarlar başlarını.

9. Sədd çəkmişik onların önünə, arxasına, pərdə salmışıq gözlərinə. Heç nəyi görməzlər daha.

10. Onlara xəbərdarlıq eləsən də, eləməsən də nə fərqi, gələn deyillər imana.

11. Sənin xəbərdarlığın yalnız o kəsə fayda verər ki, Qur'ana tabe olar və Rəhmanı görməyə-görməyə Ondan çəkinər. Yetir o kimsəyə məğfirətin, səxavətlə veriləcək bir əcirin müjdəsini.

12. Ölüləri dirildən, onların işləklərini, özlərindən sonra qoyub getdikləri izlərini qeydə alan Bizik, Biz! Aşkar bir Kitabda aparırıq hər şeyin hesabını.

13. Camaatına elçilər göndərilmiş olan o şəhərin əhvalatını nümunə göstər hamıya.

14. İki elçi göndərmişdik onlara. İkisini də dandılar. Yardım üçün üçüncü bir elçini də göndərdik onlara. «Biz sizdən ötrü göndərilmiş elçilərik» söylədilər.

15. «Siz də bizim kimi bəşərsiniz sadəcə. Rəhmansa bizə heç nəyi göndərməmiş. Yalandır dedikləriniz» dedi şəhər əhli.

16. «Göndərilmiş elçilər olduğumuzu bilir Rəbbimiz» dedi elçilər.

17. «Onun hökmlərini açıqdan-açığa bəyan eləməkdir yalnız bizim borcumuz».

18. «Gəlişinizlə siz bizə nəhs gətirdiniz. Bu işdən əl çəkməsəniz daşa basacağıq sizi, ağrılı bir əzab dəyəcək sizə» dedi şəhər əhli.

19. «Nəhs gətirən işinizin səbəbini özünüzdə arayın. Sizə öyüd verildiyinə görəmi işiniz gətirməmiş? Xeyr, siz həddinizi aşan kimsələrsiniz» dedi elçilər.

20. Şəhərin o başından bir adam qaça-qaça gəlib dedi: «Ey qövmüm, tabe olun göndərilmiş elçilərə.

21. Tabe olun sizdən bir umacağı olmayan o kəslərə. Doğru yoldadır onlar.

22. Məni yaradana niyə də tapınmayım. Onun da dərgahına axır dönəcəksiniz.

23. Onu qoyub başqalarınamı tanrılar olaraq tapınmalıyam? Əgər mənə bir zərər vermək istərsə Rəhman, məndən ötrü bunların iltiması da faydasız olar. Qurtara bilməzlər məni Allahın əzabından.

24. Ondan başqasına tapınsam əgər, açıq-aşkar bir sapqınlıq içindəyəm deməli.

25. Mən sizin Rəbbinizə artıq iman gətirmişəm. Dinləyin məni».

26. «Buyur cənnətə gir» deyiləndə ona, söylədi: «Kaş biləydi soydaşlarım,

27. bağışlamış məni, möhtərəm kimsələrdən eləmiş məni Rəbbim».

28. Ondan sonra göydən əsgərlər [can almağa gələn mələklər] belə göndərmədik soydaşları üstünə. Heç bunları göndərmək də istəmirdik.

29. Sadəcə bir gurultu bəs elədi onlara. Həlak olub söndülər.

30. Yazıqlar olsun bəndələrə! Yanlarına bir peyğəmbər gəldimi, onu lağa qoymağa başlardılar.

31. Məgər görməzmidilər, onlardan öncə neçə-neçə nəsilləri yox eləmişik. Bu nəsillər onların yanına bir də dönən deyillər.

32. Hamılıqla cəm edərək onları, gətirərlər hüzurumuza.

33. İnsanların diriləcəyinə dair bir dəlil: ölmüş ikən dirildirik torpağı, ondan dən çıxardırıq, bu dəni də yeyirlər.

34. Dirilən torpaq üstə xurmalıqlar, üzümlüklər salarıq, çağlayan bulaqlar axıdarıq. Axıdarıq ki,

35. bu bağların meyvəsindən, özlərinin becərdiyi məhsullardan yesinlər. Bunamı naşükürlük edirlər?

36. Yerin yetirdiyindən, insanların öz canlarından və bilmədikləri şeylərdən cüt-cüt yaradan Allah ucalardan ucadır.

37. Onun böyüklüyünə onlar üçün bir dəlil də gecədir, Gecədən gündüzü ayıran zaman qaranlıqda qalarlar.

38. Günəş də öz qərarınca axıb gedər qərar tutuncaya qədər. Güclü, biləyən Allahın qoyduğu qanun belədir.

39. Ay üçün də hər günü mənzil elədik. Köhnə xurma budağı tək nazilər dönəndə ilk mənzilinə.

40. Aya çatıb yetişə bilməz günəş. Gündüzü də ötüb keçə bilməz gecə. Fələyin çarxı ilə üzür bunların hamısı.

41. Allahın qüdrətinə dair başqa bir dəlil: onların soyundan olan bir nəsli gəmiyə doldurub xilas elədik.

42. O gəminin bənzəri neçə-neçə gəmilər yaratdıq insanlara.

43. İstəsəydik əgər, sulara qərq edərdik onları. Bir kimsə belə tapılmazdı yetişəydi köməyinə onların. Xilas ola bilməzdilər.

44. Fəqət rəhmətimizdən pay verdik onlara, macal verdik bir müddət dolanalar.

45. «Olmuşdan, olacaqdan qorxun, bəlkə sizə rəhmət edilə» deyilən zaman insanlara, bundan üz döndərərlər.

46. Rəblərindən elə bir ayə onlara gəlməzdi ki, bundan üz döndərməyələr.

47. «Allahın verdiyi ruzidən sərf eləyin» deyilən zaman, kafirlər mö'minlərə deyərlər: «O kəsi ki, Allah istəsəydi Özü yedizdirərdi, bizmi yedizdirməliyik? Açıqdan-açığa sapqınlıq içində vurnuxursuz, şübhəsiz».

48. «Doğru sözlü, düz əməlli kimsələrsinizsə, deyin, o və'din və'dəsi nə vaxt gələcək?» deyərlər.

49. O bir gurultunu gözləyirlər deməli. Mö'minlərlə çəkişmədə olduqları bir zaman qəfildən haqlayacaq onları o gurultu.

50. Nə vəsiyyət eləməyə, nə ailəsinin yanına qayıtmağa macal tapmayacaqlar.

51. Sur çalınantək qəbirlərdən qalxaraq Rəblərinin hüzuruna qoşarlar.

52. Deyərlər: «Yazıqlar bizə! Kim bizi qaldırdı yatağımızdan? Rəhmanın və'd elədiyi demək bu imiş, göndərilmiş elçilər həqiqəti söyləmiş».

53. Surun bircə kərə səslənişilə hamılıqla cəm edərlər onları, sonra gətirərlər hüzurumuza. 54. Heç kimin haqqından kəsməzlər bu gün. Başqa şeyə görə yox, yalnız gördüyünüz işlərə qarşılıq olaraq cəzanızı alarsız.

55. Bu gün şadyanalıq eləyir, əylənir cənnət əhli.

56. Kölgəliklərdə qurulan taxtlar üstündə taylarıyla bərabər mütəkkələrə söykənmişlər.

57. Meyvələr var, istədiklərindən hər nə desən var orada onlar üçün.

58. Rəhim Rəbbin dərgahından salam vardır onlara.

59. O gün Allah belə buyurar: «Ey günah yiyələri! Mö'min bəndələrimdən ayrılın bu gün.

60. Mən sizə demədimmi, ey Adəm oğulları, şeytana ibadətdə olmayasız, açıqdan-açığa düşməndir sizə.

61. Mən sizə demədimmi təkcə Mənə ibadət eləyin, doğru olan yol budur?

62. Sizlərdən neçə-neçə nəsli öncələr azdırmışdı axı. Ağlınız başınıza gəlməzmi yenə?

63. Budur sizlərə və'd verilən cəhənnəm.

64. Kafirlik elədiyinizə görə vasil olun bu gün oraya».

65. Biz o gün yumarıq ağızlarını, bizimlə əllər danışar, ayaqlar şəhadət verər onların qazandığı günahlar barəsində.

66. İstəsəydik kor edərdik gözlərini. Yollarını tələsərək başa vurardı onlar. Gözləri görməzdi axı.

67. İstəsəydik yerlərində dondurardıq onları. Nə irəliyə, nə geriyə addım ata bilməzdilər.

68. Tərs üzünə çeviririk uzun ömür verdiyimiz kimsənin ne'mətlərini [gəncliyi qocalıqla, gücü zəifliklə, şuxluğu belin bükülməyi ilə əvəz edirik]. Bəlkə ağıl işlədələr?

69. Biz ona [Muhammədə] şe'r öyrətməmişik. Bu ona lazım da deyil. Onun söylədikləri sadəcə bir öyüddür, aydın anlamlı Qur'andır.

70. Allah bu Qur'anı göndərmiş ki, sağ olan kimsələrə Peyğəmbər xəbərdarlıq eləsin və o deyilən əzab haqq olsun kafirlər üçün.

71. Məgər görməzmidirlər, Biz öz əllərimizlə insanlar üçün mal-qaranı yaratmışıq, bunlara insanları sahib etmişik.

72. Minikləri ola deyə, ətlərindən yeyələr deyə bunları insanlara tabe etmişik.

73. Südlərindən içilər, başqa işlərdə də gələrlər insanların karına. Şükr eləməzlərmi Ona?

74. Allahı qoyub başqalarına tanrılar olaraq tapındılar. Düşündülər bəlkə onlara yardım eləyə tanrıları?

75. Yardım eləyən deyillər axı. Əksinə, bu tanrılardan yardım umanların özləri bir orduda birləşərək bunları qoruyarlar.

76. Onların sözlərindən üzülməyəsən. Onların içini də, çölünü də, şübhəsiz, bilirik Biz.

77. Bilməzmi insan məgər, Biz onu nutfədən yaratmışıq. Bilmədiyinə görəmi düşmən kəsilir Bizə açıqca.

78. Nədən yarandığını unudub Bizə nümunə çəkdi, dedi: «Çürümüş sümükləri kimdir axı dirildən?»

79. De ki, «Onları ilk dəfə kim yaratmışsa O da dirildər. Hər şeyi xəlq etməyi bacarandır O».

80. Yaş ağacdan od çıxaran Odur. Bu odla da ocaq qalayırsız.

81. Göyləri, yeri yaradan məgər qadir deyilmi ki, yaratdıqlarının bənzərini bir də yarada. Şübhəsiz, qadirdir. Hər şeyin xaliqidir, hər şeyi biləndir O.

82. Hər nəyi istəsə, «Ol» desə olasıdır.

83. Ucalardan ucadır hər şeyin yiyəsi Allah. Onun da dərgahına dönəcəksiz axırı.