Rəhman və Rəhim Allahın adıyla

1. Olacaq oldumu,

2. heç kəs daha dana bilməz olacağı.

3. Alçalan kim, ucalan kim o zaman.

4. Elə ki, yer titrəm-titrəm titrədi,

5. elə ki, dağlar dağım-dağım dağıldılar,

6. toza-dumana döndülər,

7. o zaman üç dəstəyə bölünərək ayrılacaqsız.

8. Əməl dəftəri sağ əldən verilən kimsələr - nə xoşbəxtdir bu sağçılar.

9. Əməl dəftəri sol əldən verilən kimsələr - nə bədbəxtdir bu solçular.

10. Və yaxşılıq eləməkdə qabağa düşən kimsələr –

11. bunlardır Allaha daha yaxın olanlar,

12. ne'mət cənnətlərində qərar tutanlar.

13. Bu üçüncülərin çoxu öncəki nəsillərdən,

14. azı sonrakı nəsillərdəndir.

15. Zər-ziynətdən düzəldilmiş taxtların üstündə qərar tutmuş onlar.

16. Yzbəüz əyləşmiş onlar.

17. Qocalmayan cavanlar dolanırlar onların ətrafına

18. əllərində şərab bulağından doldurulmuş qədəhlər, lüləkli, lüləksiz kasalar, kuzələr.

19. Nə başağrısı verəndi, nə də ağlı başdan çıxarandı bu şərab.

20. Dolaşır bu cavanlar cənnət əhli içində əllərində onların seçib istəyəcəyi meyvələr dolu qablar,

21. meyl salacağı quş əti dolu qablar.

22. İri gözlü hurilər var orada.

23. Sədəf içində incidirlər elə bil.

24. Gördükləri işlərə qarşılıq olaraq bunlar cənnət əhlinə əcir verilmiş.

25. Mə'nasız söz, günah söz eşitməzlər orada.

26. «Salama» cavab olaraq «Salam» sözü eşidərlər yalnız orada.

27. Budur əməl dəftəri sağ əldən verilən kimsələr. Nə xoşbəxtdir sağçılar!

28. Tikansız sədr ağacları altında,

29. salxımları sallanan banan ağacları arasında,

30. qollu-budaqlı ağacların əbədilik kölgəliyində,

31. axar sular kənarında,

32. növ-növ meyvə ağaclarının arasında, -

33. o ağacların ki, tükənməzdir, haram deyil meyvəsi –

34. uca döşəklər [taxtların üstünə sərilmiş] üstündə qərar tutmuş onlar.

35. İri gözlü huriləri Biz özümüz yaratmışıq.

36. Bəkarətli eləmişik onları.

37. Taylarını sevən yaratmışıq, yaşıd yaratmışıq onları

38. sağçılara.

39. Bu sağçıların bə'zisi öncəki nəsillərdən,

40. bə'zisi də sonrakı nəsillərdəndir.

41. Əməl dəftəri sol əldən verilən kimsələr. Nə bədbəxtdir bu solçular.

42. Odlu küləyin, qaynar suyun əzabında qovrularlar.

43. Qapqara bir dumanın kölgəsində durarlar.

44. Bu kölgənin nə bir sərinliyi, nə də bir gözəlliyi var.

45. Öncələr naz-ne'mət içində üzürdülər.

46. Böyük günah işləməkdən üzülmürdülər.

47. Deyirdilər: «Öləndənmi sonra, sümüyümüz torpağa qarışandanmı sonra diriləcəyik?

48. Yoxsa atalarımız da dirilməli olacaq?»

49. De ki, «Öncəkilər də, sonrakılar da,

50. hamı o mə'lum günün və'dəsi yetişəndə yığılacaq bir yerə.

51. Sonra da siz, ey yolsuzlar, qiyaməti dananlar,

52. zəqqum ağacının meyvəsindən yeyəcəksiz.

53. Qarnınızı dolduracaqsız bununla.

54. Ystündən də qaynar su içəcəksiz,

55. susuz qalmış dəvə kimi acgözlüklə içəcəksiz.

56. Budur onların cəzası haqq-hesab çəkilən gün.

57. Sizi yoxdan var elədik Biz axı. Diriləcəyinizə niyə inanmırsınız?

58. Söyləyin, o nutfəni ki, siz axıdırsız,

59. ondan insanı yaradan sizmisiniz, Bizmiyik?

60. Sizin taleyinizə ölümü yazan Bizik. Kəsən olmaz qarşımızı

61. əgər Biz istəsək ki, yerinizə sizin kimi kimsələri gətirək, bilmədiyiniz şəklə salıb sizi bir daha var eləyək.

62. Siz ki, bilirsiniz ilk dəfə necə yaranmısınız. Yenə dəmi dərs olmamış bu sizə?

63. Söyləyin, o şeyləri ki, siz əkirsiniz,

64. onları yerdən bitirən sizmisiniz, Bizmiyik?

65. Qupquru çör-çöpə çevirərik bitənləri istəsək, mat-məəttəl qalarsınız.

66. Deyərsiniz: «Borca düşdük.

67. Ruzidən də məhrum olduq üstəlik».

68. Söyləyin, içdiyiniz o su ki var,

69. onu buludlardan endirən sizmisiniz, Bizmiyik?

70. İstəsəydik əgər, acı eləyərdik bu suyu. Yenə dəmi naşükürlük eləyirsiz?

71. Söyləyin, qaladığınız o od ki var,

72. onun ağacını, odununu var eləyən sizmisiniz, Bizmiyik?

73. Bu odu Biz ibrət üçün cəhənnəm odunu andıran elədik, çöllü-biyabanda yolçuların halına yanan elədik.

74. Elə isə uca tut Rəbbinin adını!

75. And içirəm ulduzların tutduğu məqamlara –

76. bunun nə ulu and olduğunu kaş biləydiniz, -

77. Qur'ani Kərimdir sizə bu oxunan Kitab.

78. O ilahi yazıda təsbit edilmiş, qorunur bu Kitab.

79. Yalnız pak kimsələr buna toxuna bilər.

80. Aləmlərin Rəbbinin dərgahından göndərilmədir bu Kitab.

81. Bu haqq kəlamınamı siz biganə qalırsız?

82. Sizə ruzi verdiyinə görəmi Ona küfr eləyirsiz?

83. Bir kimsə canını tapşıran zaman

84. baxa-baxa qalırsız.

85. O zaman Biz ona sizdən yaxınıq. Ancaq bunu bilməzsiniz.

86. Buna inamınız yoxdursa

87. və doğru sözlü, düz əməlli kimsələrsinizsə əgər, di qaytarın görüm necə qaytarırsız onun çıxan ruhunu.

88. Canını tapşıran kəs Allaha yaxınlardan olarsa,

89. rahatlıq, gözəl-gözəl ruzilər, ne'mətli cənnət gözləyər onu.

90. Əməl dəftəri sağ yöndən gətirilən kimsə olarsa bu ölən,

91. «Salam deyir sənə sağçılar» [yə'ni, əzabdan salamat qurtarmısan] deyərlər ona.

92. Qiyaməti dananlardan, sapmışlardan olarsa canını tapşıran kəs,

93. qonaq olar qaynar suya,

94. vasil olar cəhənnəmə.

95. Şübhəsiz, budur haqq olan olacaq.

96. Uca tut ulu Rəbbinin adını!