Rəhman və Rəhim Allahın adıyla

1. And olsun Tur dağına,

2. and olsun o Kitaba ki, sətir-sətir

3. düzülmüş vərəqlərin üstünə,

4. and olsun ziyarətgah olan Evə,

5. and olsun uca tavanlı göyə,

6. and olsun coşan-daşan dənizə,

7. Rəbbinin əzabı mütləq gələcək.

8. Bunun qarşısını heç kim ala bilməyəcək.

9. O gün titrəm-titrəm titrəyəcək göy,

10. oynam-oynam oynayacaq yerindən dağlar.

11. O gün vay halına qiyaməti dananların,

12. o kəslərin ki, batilin içində vurnuxub qalmış onlar.

13. O gün onları itələdikcə itələyərlər cəhənnəm oduna.

14. «Sizin dandığınız o od bu idi.

15. Bumu cadudur, gözünüzmü yaxşı görmür?

16. Di girin od içinə. İstəyirsiz səbr eləyin, istəyirsiz eləməyin, sizin üçün bir olar. Yalnız gördüyünüz işlərin əvəzidir bu cəza».

17. Cənnət bağlarındadır, naz-ne'mət içindədir müttəqilər.

18. Rəblərinin verdiyi ne'mətlərdən zövq alıb barınırlar. Qorumuş onları cəhənnəm əzabından Rəbləri.

19. «Nuşcanlıqla yeyin, için. Gördüyünüz işlərin əvəzidir bu verilənlər».

20. Yanbayan düzülmüş taxtlara söykənmişlər. İri gözlü huriləri tay etmişik onlara.

21. O kəslər ki, iman gətiriblər, ailələri, övladları da iman gətirərək qoşulublar onlara, cənnətdə bir-birinə qovuşdurarıq onları. Onların əməllərinin savabından heç nəyi əskiltmərik. Gördüyü işə görədir hər kəsin öz qazancı,

22. İstədiyi meyvədən, istədiyi ətdən veririk onlara.

23. Bir-birinə ötürərlər qədəhləri orada. İçəndən sonra boş-mə'nasız danışmazlar, günaha batmazlar orada.

24. Ağ libaslı cavanlar yanlarında dolaşırlar, sədəf içində incidirlər elə bil.

25. Hal-əhval tuturlar bir-birindən, söhbətləşirlər.

26. «Dünyada olan zaman qorxardıq Allahın əzabından.

27. Lütf eləmiş bizə, cəhənnəm istisinin əzabından qorumuş bizi Allah.

28. Əvvəllər də təkcə Ona yalvarardıq. Şübhəsiz, yaxşılıq eləyən, Rəhim olan təkcə Odur».

29. Sən öyüd verməyində ol mö'minlərə. Rəbbinin ne'mətiylə sən nə kahinsən, nə də dəli [müşriiklər Peyğəmbərə «dəli kahin» deyərdilər].

30. Yaxud da sənin üçün deyirlər qoy desinlər: «Şairdir, gözləyək görək taleyin gərdişi onu nə vaxt aşırır».

31. De ki, «Siz gözləməyinizdə olun, mən də sizinlə birgə gözləməkdəyəm».

32. Ağıllarımı əmr eləyir onlara belə sözlər deyələr? Yox, elə əslində azğın kəslərdir onlar.

33. Yaxud da «Qur'anı uydurmuş o» deyirlər. Belələri iman gətirən deyillər.

34. Doğru sözlü, düz əməlli kimsələrdilərsə, Qur'anın bənzəri bir kəlam gətirsinlər dinləyək.

35. Heçlikdənmi yaranmışlar? Xaliqlərdimi onlar?

36. Yoxsa özlərimi yaratmış göyləri, yeri? Allaha inanan deyillər.

37. Bəlkə onlardadır Rəbbinin xəzinələri, onların əlindədir hər işin hakimliyi?

38. Yoxsa dırmaşıb vəhy dinlədikləri nərdivanları var? Belə vəhy dinləyən varsa, aşkar bir dəlil gətirsin onda.

39. Yoxsa qızlar Allaha aiddir, oğlanlar sizə?

40. Yoxsa sən onlardan bir mükafat umursan və onlar da borclarının altından çıxa bilmir?

41. Bəlkə onlardır görülməzi təkcə bilən və Peyğəmbər barədə hər şeyi yazır onlar?

42. Sənin başına bir iş açmaq istəyirlər? Elə isə kafirlər özlərini işə salarlar.

43. Bəlkə Allahdan başqa bir tanrısı var onların? Ona qoşduqları şəriklərdən ucalardadır Allah.

44. Görəndə ki, göyün bir parçası onların üstünə düşür, «Yst-üstə qalanmış bulud topalarıdır bu» deyərlər.

45. Tərk elə onları ta ildırım vura bir gün onları.

46. Görmək istədikləri iş yarar gətirməz o gün, yardım da görməz onlar.

47. Daha neçə əzaba düçar olar zalımlar. Ancaq bunu bilən deyil çoxları.

48. Ta yerinə yetənədək Rəbbinin hökmü, səbr elə! Gözümüz səndədir. Qalxdınmı yerindən, həmd oxu Rəbbinə.

49. Həmd oxu Ona gecənin bir vaxtında da, ulduzlar batanda da.