Rəhman və Rəhim Allahın adıyla

1. Göylərdə nə varsa, yerdə nə varsa həmd oxuyar Allaha. Odur hər şeyin yiyəsi. Təkcə Onu həmd etməli. Hər şeyə qadirdir O.

2. Sizi yaradan Odur. Kiminiz kafirdir, kiminiz mö'min. İşləklərinizi görəndir Allah.

3. Göyləri, yeri haqq olaraq yaratmış. Sizə görkəm vermiş, görkəminizi gözəl eləmiş. Onun da dərgahına axır dönəcək hamı.

4. Göylərdə nə varsa, yerdə nə varsa, bilir O. Yrəklərin içini biləndir Allah.

5. Daha öncə kafirlik eləmişlərin və kafirliyin bəlasını dadmışların əhvalatı çatmamışmı sizə? Ağrılı bir əzab gözləyir onları.

6. Aşkar dəlillərlə gələn peyğəmbərləri barədə «Bir bəşərmi yönəltməli bizi doğru yola?» deyərdilər, küfr eləyərdilər, imandan dönərdilər. Onların imanına möhtac olmamış Allah. Varlıdır, öyülməlidir Allah.

7. Kafirlər iddia eləyirlər bir daha diriləcək deyillər. De ki, «Rəbbimə and olsun diriləcəksiz, sonra da gördüyünüz işləri sizə bildirəcəklər. Bu Allaha asan olar».

8. İman gətirin Allaha, Rəsuluna, nazil elədiyimiz nura. Gördüyünüz işlərdən xəbərdardır Allah.

9. Kimlərin aldandığının bəlli olacağı gündür Allahın hamını bir yerə cəm edəcəyi o toplanış günü. Allaha iman gətirmiş, saleh bir iş görmüş olan kimsələrin suçlarından keçər Allah. İçindən çaylar axan cənnətlərə salar onları. Oralarda əbədilik qalarlar. Budur o böyük qurtuluş!

10. Küfr eləyib ayələrimizi dananlarsa od əhlidir. Pisdən pis yerdir onların gedəcəyi yer!

11. Hər gələn müsibət Allahın iznilə gələr. Allaha iman gətirənin ürəyini səbrə öyrədər Allah. Hər şeyi biləndir Allah.

12. Allaha itaət eləyin, Rəsula itaət eləyin. Eləməsəniz, bilin, Elçimizin borcu yalnız aşkar bəyan eləməkdir haqq kəlamını.

13. Odur Allah. Ondan başqa tanrı yoxdur. Allaha güvənsin mö'min kimsələr.

14. Ey iman gətirənlər! Zövcələrinizdən, övladlarınızdan sizlərə düşmənçilik eləyənlər də olur. Həzər belələrindən! Onları əfv eləsəniz, bağışlasanız, suçlarından keçsəniz, bilin, günahlardan keçəndir, Rəhimdir Allah.

15. Mallarınız, övladlarınız sizləri imtahana çəkmək üçündürlər. Böyük əcir isə Allah dərgahındadır.

16. Bacardığınız qədər qorxun Allahdan, buyruğuna qulaq asın, Ona itaətdə olun, malınızı Allah yolunda xərcləyin. Bu sizə xeyir gətirər. Uğura uğrayanlardır nəfsinə güc gələnlər.

17. Allaha gözəl bir borc versəniz, qat-qat artıq qaytarar O borcunu, keçər suçlarınızdan. Qədirbiləndir, həlimdir Allah.

18. Görülməzi, görüləni biləndir, güclüdür, müdrikdir O.