Rəhman və Rəhim Allahın adıyla

1. Elə ki, büküldü günəş,

2. elə ki, töküldü ulduzlar,

3. elə ki, yerindən oynadı dağlar,

4. elə ki, yiyəsiz qaldı ikicanlı dəvələr,

5. elə ki, bir yerə cəm oldu bütün vəhşilər,

6. elə ki, aşdı-daşdı dənizlər,

7. elə ki, bədənlərlə birləşdi canlar,

8. elə ki, diri-diri basdırılan körpə qızlar barədə soruşdular

9. günahları nə imiş öldürüblər onları,

10. elə ki, açıldı əməl dəftərləri,

11. elə ki, dartılıb yerindən qopdu səma,

12. elə ki, alovlandı cəhənnəm,

13. elə ki, yaxınlaşdı cənnət,

14. o zaman hər kimsə agah olar nəyi hazırlamış özünə.

15. And olsun göydəki cisimlərə [planetlərə]

16. məcrasını dəyişərək gözdən itən cisimlərə,

17. and olsun düşən gecəyə,

18. and olsun açılan səhərə,

19. bir Elçinin gətirdiyi kəlamdır bu Qur'an. Möhtərəm sanılandır,

20. güclüdür. Onun öz yeri var ərş yiyəsi Allahın dərgahında.

21. Sözü keçəndir, e'tibarlıdır.

22. Yoldaşınız Peyğəmbər dəli deyil.

23. And olsun, Cəbraili açıqdan açığa bir üfüqdə görmüş o.

24. Qeybin xəbərlərini söyləməyə xəsislik eləyən deyil.

25. Qovulmuş şeytan kəlamı deyil bu Qur'an.

26. Bu nə yoldur, siz haraya gedirsiz?

27. Bu Qur'an yalnız bir öyüddür, aləmlərdən ötrüdür.

28. O kəsdən ötrüdür ki, düz bir yola düzəlib getmək istər.

29. Bir şeyi istəmədikcə aləmlərin Rəbbi Allah, siz də onu istəyə bilməzsiniz.