Rəhman və Rəhim Allahın adıyla

1. Ey Peyğəmbər! Zövcələrinin rəğbətini qazanasan deyə Allahın sənə halal bildiyini niyə özünə yasaq eləyirsən? Günahlardan keçəndir, Rəhimdir Allah.

2. Andlarınızı geriyə götürmək üçün kəffarə tə'yin eləmiş sizə Allah. Sizin dostunuzdur Allah. Hər şeyi biləndir, müdrikdir O.

3. Zövcələrindən birinə [Aişəyə] Peyğəmbər gizlicə söz demişdi. Gizli deyilən sözü sirr saxlamayıb faş elədi o qadın. Bunu Peyğəmbərə bildirdi Allah. Peyğəmbər də ona vəhy olunanın bir qismini söylədi, bir qismini söyləmədi. Gizli sözü faş eləyən zövcəsini sorğuya tutdu. «Bunu sənə kim bildirdi?» söylədi o qadın, «Hər şeyi bilən, hər şeydən xəbərdar olan Allah bildirdi mənə» dedi Peyğəmbər.

4. [Aişəyə, Hifsəyə, daha sonra Peyğəmbərin bütün zövcələrinə müraciətlə] İkiniz də Allaha tövbə eləyin. Günaha batmış ürəkləriniz. Peyğəmbərin əleyhinə çıxsanız, bilin, Allahdır onun dostu, Cəbraildir, yaxşılardan olan mö'minlərdir, mələklərdir ona yardım edənlər.

5. Sizi boşayarsa Peyğəmbər əgər, özlərini Allaha təslim eləmiş mö'min, itaətkar, tövbə və ibadət eləyən, oruc tutan və sizdən daha yaxşı olan dul qadınları, bakirə qızları verər ona Rəbbi.

6. Ey iman gətirənlər! Özünüzü, arvad-uşağınızı yanacağı insanlar və daşlar [bütlər] olan oddan qoruyun. Daşürəkli, qoluzorlu mələklər məs'uldur bu odun yanmağına. Bu mələklər Allahın əmrindən çıxan deyillər, onlara deyiləni dərhal eləyərlər.

7. «Ey kafirlər! Daha üzr diləmək dəmi deyil. Bu gün yalnız gördüyünüz işlərə əvəz olaraq sizə cəza verilər».

8. «Ey iman gətirənlər! Ürəkdən tövbə eləyin, tutun üzünüzü Allaha. Bəlkə suçlarınızdan keçə, içindən çaylar axan cənnətlərə sala sizi Rəbbiniz». Peyğəmbəri və onunla birgə iman gətirənləri Allahın xəcil eləməyəcəyi gün onların önünə, sağına iman nuru işıq salar. «Nurumuzu kamala yetir, suçumuzdan keç bizim, Sən hər şeyə qadirsən, Rəbbimiz!» deyər onlar.

9. Ey Peyğəmbər! Kafirlərə, münafiqlərə qarşı cihad elə. Sərt davran onlarla sən. Gedəcəyi yer cəhənnəmdir onların. Pisdən pis yerdir ora.

10. Nuhun arvadıyla Lutun arvadını kafirlərə misal çəkər Allah. Əməli saleh bəndələrmizlə nigahda ikən ərlərinə xəyanət eləmişdi hər ikisi. Allahın bunlara verdiyi əzabın qarşısını ala bilməmişdi ərləri. «Cəhənnəmə girənlərə qoşulun» deyilmişdi o qadınlara.

11. İman gətirənlər üçünsə Fir'onun arvadını nümunə çəkər Allah. «Rəbbim! Öz yanında cənnətdə mənimçün bir ev düzəlt, Fir'onun əlindən, onun əzabından qurtar məni, zalımların əlindən al məni» demişdi bu qadın.

12. Məhrəm yerini qorumuş olan İmran qızı Məryəm də bir nümunədir. Onun məhrəm yerinə ruhumuzdan üfürmüşdük. Təsdiq eləmişdi Rəbbinin kəlamını, Kitablarını. Allaha ürəkdən itaət edənlərdən idi bu qadın.