Rəhman və Rəhim Allahın adıyla

1. Ey peyğəmbər, qadınları boşayanda gözləyin onların iddələrini. Hesablayın iddəni. Rəbbiniz Allahdan çəkinin, çıxarmayın evlərindən onları. Onlar da çıxmasınlar. O başqa ki, açıq-aşkar bir yavalıq edələr. Bu, Allahın hədləri. Kim Allahın hədlərini aşırsa zülm eyləmiş canına. Nə biləsən, bəlkə Allah bundan sonra bir iş saldı ortaya.

2. Iddələri bitdimi, ya onları qaydaya uyğun olaraq saxlayın, yaxud da qaydaya uyğun olaraq onlardan ayrılın. Içinizdən iki adil tanıq tutun. Şahidliyi Allah üçün eyləyin. Bu, bir öyüddür verilir o kəsə ki, inanır Allaha, axır günə. Kim çəkinsə Allahdan, var eyləyər beləsinə bir çıxış yolu.

3. Saymadığı bir yerdən ona ruzi yetirər. Kim güvənsə Allaha beləsinə Onun Özü yetərli. Allah Öz işini yerinə yetirəndir. Bir ölçü var eyləmiş Allah hər bir nəsnəyə.

4. Əgər şübhələnsəniz..., aybaşından kəsilən qadınlarınız üçün iddə üç aydır. Və aybaşı keçirməmiş olanlar… Boylu qadınlara gəlincə isə, vaxtları doğuşdan azad olunca gələr. Kim çəkinsə Allahdan, işini avand edər.

5. Allahın sizə göndərdiyi əmri belədir. Əmrinə qarşı çıxmayan kəslərin günahlarından keçər, əcrini artırar Allah.

6. Boşadığınız qadınlara iddələri bitməyincə evinizdə yer verin qalsınlar. Onları bir sıxıntıya, çətinliyə salmayın. Hamilə olsalar əgər, çəkin xərclərini doğuşa qədər. Körpəni sizinçün əmizdirərsə onlar, verin ücrətlərini. Yaxşılıqla dil tapın öz aranızda. Alınmasa, çətinliyə düşsəniz, körpəni başqa bir qadın da əmizdirə bilər.

7. Varlı olan öz varından xərcləsin, ruzisi az verilənsə Allahın verdiyindən. Verdiyindən artıq şeyi heç kəsə yük etməz Allah. Hər çətinlikdən sonra yüngüllük gətirər Allah.

8. Rəblərinə, Onun peyğəmbərlərinin əmrinə qarşı çıxan neçə-neçə şəhərlərlə çəkmişik haqq-hesabımızı, göstərmişik gücümüzü onlara, ağır bir əzaba uğratmışıq onları.

9. Dadmışlar işlərinin bəlasını və axır itkiyə uğramışlar.

10. Şiddətli bir əzab hazırlamış onlara Allah. Ey iman gətirən ağıl yiyələri, qorxun Allahdan. Allah nazil eləmiş sizə bu Qur'anı,

11. Allahın aşkar ayələrini sizə oxuyan bir Elçini. Nazil eləmiş ki, iman gətirənləri, əməli salehləri qaranlıqlardan aydınlığa çıxara Rəsul. Allaha inanan, yararlı işlər görən kimsəni içindən çaylar axan cənnətlərə salar Allah. Oralarda əbədilik qalar o. Beləsinə gözəl ruzi tə'yin eləmiş Allah.

12. Yeddi göyü, bir o qədər də yeri Allahdır yaradan. Göylərin, yerlərin tabe olduğu Allahın əmri sizə bildirilir biləsiniz, hər şeyə qadirdir Allah, hər şeyi almış içinə Allahın elmi.