Sual 301: Namazdan əl çəkənlərlə
namaza başlamayanlar dində eynidirmi?
Cavab: Kimi nə qədər
haqq-hesaba çəkəcəyini Allah bilir.
Sual
302: Quranda Nostradamusun adı keçirmi?
Cavab: Xeyr.
Sual
303: “Müqəyyəbati-xəmsə” nədir?
Cavab: Mənası “beş
bilinməz” deməkdir. Quranın Loğman surəsinin 34-cü ayəsindəki
bilinməzlərlə bağlı işlədilir. Bu ayədə beş yox, üç bilinməzdən
söz açılır: “34. Təkcə Allah bilər qiyamətin vaxtını. Yağışı
da göndərən, bətnlərdə olanı da bilən Odur. Heç kim bilməz sabah
onu nə gözləyir. Heç kim bilməz o harada öləcək. Hər şeyi bilən,
hər şeydən xəbərdar olan yalnız Allahdır”. Burada yağışı Allahın
yağdırdığı, bətnlərdəkini bildiyi deyilir. Amma 3 şeyi təkcə
Onun bildiyi vurğulanır: 1. Qiyamətin vaxtı,
2. Sabah fərdi nə gözləməsi, 3. Fərdin nə vaxt öləcəyi.
Sual
304: Rəssamlıq və heykəltəraşlığın yasaq olduğunu iddia edən
hədis tərəfdarları deyirlər ki, hər peyğəmbərin öz şəriəti var.
Süleyman peyğəmbərə heykəl və rəsm icazəsi verilmişdi, müsəlmanlara
yasaq edilb. Bu məsələyə aydınlıq gətirərsinizmi?
Cavab: Allah bütün
peyğəmbərlərə eyni qanunları vəhy edib. Allahın dini birdir.
Prinsipləri vahiddir. Şura surəsinin 13-cü ayəsində deyilir:
“Nuha qanun bildiyini sizə də din olaraq buyurmuş Allah”. «Dininizdə
bütöv olun, bölünməyin!» deyə vəhy elədik sənə, buyurduq İbrahimə,
Musaya və İsaya.”
Sual
305: Suallara cavablarda hədis yox, Qurana müraciət etməyinizin
səbəbi nədir?
Cavab: Din mövzusunda
bütün suallar Qurana verilməli, cavablar Qurandan alınmalıdır.
Bu barədə Nəxl surəsində deyilir: ”64.Biz sənə Kitabı nazil
elədik ki, mübahisə etdikləri mətləbi açıqlayıb bildirəsən onlara.
Və iman götirənlər üçün yol göstərsin, rəhmət versin bu Kitab”.
Sual
306: Nəxl surəsində İbrahim peyğəmbərdən bir ümmət deyə bəhs
edilir. Bir şəxs necə ümmət ola bilər?
Cavab: Tövhid yolunda
insanlığa etdiyi xidmətə görə, böyük şəxsiyyətlər bir ümmət
dəyəri ala bilər. İbrahim peyğəmbər belə analoqu olmayan ruhlardan
biridir.
Sual
307: Quran xəsislik barədə nə deyir?
Cavab: İnsanlıq və
Allah sevgisi ilə dolu olan bir ruh Allahın ona comərdcəsinə
verdiyi neməti başqalarına comərdliklə verməlidir. İsrafçılıq
kimi xəsislik də bəyənilməyən bir hərəkətdir. Ali İmran surəsində
deyilir: “180. O kəslər ki, xəsislik eləyirlər Allahın bol ne'mətinə,
elə bilməsinlər xeyir gətirər bu onlara. Xeyr, şər gətirər bu
onlara. Xəsislik elədikləri şeylər dolanar boyunlarına qiyamət
günü. Göylərin və yerin mirası Allahındır. İşləklərinizdən xəbərdardır
Allah”.
Sual
308: Quran övlad götürmə barədə nə deyir?
Cavab: Əhzəb surəsinin
4-5-cı ayələrinə görə, övladlığa götürmə qəbul edilməzdir: “Allah
heç bir kişinin sinəsində iki ürək yaratmamış. «Sən mənə anamın
kürəyi kimisən» deyə xitab etdiyiniz zövcənizi sizə ana eləməmiş,
oğulluğa götürdüyünüz kimsəni sizə oğul eləməmiş. Bunlar mə'nasız
sözlərdir çıxar sizin ağzınızdan. Haqq sözü Allah deyər, adamları
haqq yoluna O yönəldər. Öz atasının adıyla çağırın oğulluğa
götürdüyünüz kimsəni. Bu daha ədalətli bilinər Allahın dərgahında.
Atasının kimliyini bilməsəniz, onda onu din qardaşınız və qohumunuz
kimi qəbul eləyin. Bilmədən səhv eləmək günah deyil, bilərəkdən
səhv eləmək günahdır. Günahlardan keçəndir, Rəhimdir Allah”.
Sual
309: Hud surəsinin 5-ci ayəsində “paltara bürünərək gizlənmə”
dedikdə nə nəzərdə tutulur?
Cavab: Ayədə deyilir:
“Gözünüzü açın! Ondan gizlənələr deyə ikiqat bükürlər sinələrini.
Bilin, geyimlərinə bürünüb örtünən zaman nəyi gizləsələr də,
nəyi aşkar desələr də bilir O. Tanrı gerçəkdən tanıyan sinələrin
zatını”. Burada xarici görünüşü bəyənilən şəklə salmağın daxildəki
çirki aradan qaldırmadığına diqqət çəkilir. Bu ayə həm də “dini
geyim” geyib özünü müqəddəsin təmsilçisi kimi qələmə verən,
amma iç dünyası qaranlıq olanlara bir xəbərdarlıqdır.
Sual
310: Mən solaxayam. Yeməyi sol əlimlə yeyirəm. Deyirlər bu,
dini cəhətdən düzgün deyil. Doğrudurmu?
Cavab: Sağ əl, sol
əllə bağlı deyilənlərin dinə heç bir dəxli yoxdur.
Sual
311: Möminlərədn Allaha daha yaxın olanların cəsədlərinin çürümədiyi
deyilir. Bu barədə nə deyə bilərsiniz?
Cavab: Ölənlərin çürüməməsi
dinə və ağıla zidd bir səfəsətədir. Bəzı cəsədlər basdırıldığı
torpağın xüsusiyyətləri ilə bağlı gec çürüyə bilər. Bunun üstün
insan olmaqla heç bir əlaqəsi yoxdur.
Sual
312: Qurandakı cihad anlayışına aydınlıq gətirərsinizmi? Terrorçuların
intihar hücumlarını necə izah edərsiniz?
Cavab: Terrorun Qurandakı
cihadla heç bir əlaqəsi yoxdur. Qarşıya qoyduğu hədəf nə qədər
məşru olsa da, terror bir zülmdür. Quranda cihad deyəndə Allahın
iradəsinə uyğunluq üçün bütün qeyrətini ortaya qoymaq nəzərdə
tutulur.
Sual
313: Quranı anlamaq üçün riyaziyyat, fizika və s. elmləri bilmək
vacibdirmi? Adi insan Quranı necə anlaya bilər?
Cavab: Biliyin çoxluğu
Qurandan daha çox faydalanmağa yardım edir. Amma Quran biliksiz
insanlara bir şey vermir demək olmaz.
Sual
314: Ata-ananın övladlar arasında ayrı-seçkilik etməsi doğrudurmu?
Cavab: Qətiyyən olmaz.
Bu, günahdır.
Sual
315: Quranda bir sıra ayələrdə Kitab əhlindən bəzilərinin Allahın
sevimli bəndələri olduğu deyilir. Necə olur ki, bəzi dövlətlər
və din adamları islam adına cihad açıb yəhudi və xristianları
öldürməyə təşviq edirlər?
Cavab: Onlar Quranı
yox, öz məqsədlərini izləyirlər.
Sual
316: Təcəlliyyat nədir?
Cavab: İlahi gözəlliyin
varlıq aləmində üzə çıxmasına təcəlli etmək deyilir.
Sual
317: Xütbələr təkcə dini mövzudamı olmalıdır?
Cavab: Xütbədə hər
sahədə məlumat vermək olar.
Sual
318: Bir şəxs içki içirsə, qıldığı namaz qəbul olunarmı?
Cavab: Namaz vaxtı
sərxoş deyilsə, namazı keçərlidir. Amma alkoqol haramdır.
Sual
319: Qəlblərin möhürlənməsi nədir?
Cavab: Qəlbin möhürlənməsi
yaramazlıqlar üzündən qəlbin pas tutmasıdır. Allaha sığınıb
lazımi tədbirlər görülsə, pası təmizləmək olar.
Sual
320: Səfər namazları neçə rükətdir?
Cavab: Səfər namazı
iki rükət qılınır.