Sual
241: Zülmə məruz qalana pis söz danışmaq olarmı?
Cavab: Olar. Nisə surəsinin
148-ci ayəsində deyilir: “Zülm çəkən kimsədən savayı bir özgəsinin
açıqca pis söz söyləməsini sevməz Allah. Hər şeyi eşidəndir,
hər işi biləndir Allah”.
Sual
242: Quran oxuyanda elə başa düşürəm ki, o, kişilərə xitabən
yazılıb. Bu, belədirmi?
Cavab: Quran ümuma
xitab edəndə ərəb dilində kişi cinsinə aid qrammatik əlamətlər
işlənir. Bu, cinsiyyət fərqi ifadə etmir.
Sual 243: Əgər şeytan Adəmə səcdə etsəydi,
dünyadakı azğınlıqlar olmayacaqdımı?
Cavab: Bunun cavabını
yalnız Allah bilir.
Sual
244: Cənnətdə kişi hurilər varmı?
Cavab: Qadının olduğu
yerdə kişi olması varlıq qanunlarının gərəyidir. Bu qanunlar
cənnətdə də işləkdir.
Sual
245: Cənnətdə qadınlara da kişi veriləcəyi deyilir. Bunu bildirən
ayə varmı?
Cavab: Bir sıra ayələr
var. Nümunə olaraq Yasin surəsinin 55-57-ci ayələrinə baxa bilərsiniz:
“Bu gün şadyanalıq eləyir, əylənir cənnət əhli. Kölgəliklərdə
qurulan taxtlar üstündə taylarıyla bərabər mütəkkələrə söykənmişlər.
Meyvələr var, istədiklərindən hər nə desən var orada onlar üçün”.
Sual
246: Quranın ən çox vurğuladığı, üzərində durduğu mövzu nədir?
Cavab: Allah-insan
dialoqu.
Sual
247: Ateistlər israrla "Allah" sözünün islamdan əvvəl
Ərəbistanda Ay Tanrısını ifadə ettiyini deyirlər. Bu, belədirmi?
Cavab: Önəmli olan
bu sözə Quranın verdiyi mənadır. Ərəbcədə bu və ya digər mənada
işlənməsinin əhəmiyyəti yoxdur.
Sual
248: Peyğəmbərlərin çox iztirab və səbr içində yaşadıqları aydın
olur. Bu, onları yuxarıya bağlayan bir ruhi vəziyyətdirmi?
Cavab: Bəli, dedikləriniz
Qurana uyğundur.
Sual
249: Ölən uşaqların heç bir günahı olmadığı üçün cənnətə gedəcəyi
deyilir. Dünya imtahan yeridirsə, imtahan başlamamış dünyanı
tərk edənlərin cənnəti qazanması doğrudurmu?
Cavab: Ölən uşaqların
haraya getdiyini bildirən Quran bəyanı yoxdur.
Sual
250: Quranda məlum aylarda həccə gedin deyilir. Hansı aylardır?
Cavab: Bunlar şəvval,
zilqədə, zilhiccədir (Bəqərə 197).
Sual
251: Luqmən surəsinin 34-cü ayəsinə görə, gələcəyi yalnız Allah
bilir. Onda necə olur ki, bəzi insanların və cinlərin gələcəyi
bildiyi iddia edilir?
Cavab: Nə insan, nə
də cin qeybi bilməz. Quran bunu çox açıq şəkildə deyir.
Sual
252: Quranda digər planetlərin Yerin ətrafında fırlandığı deyilir.
Bu astronomik səhv deyilmi?
Cavab: Quranda elə
bir ayə yoxdur. Sadəcə, bütütn planetlərin hərəkətdə olduğu
deyilir. Diqqətlə oxuyun.
Sual
253: Quranın Allah tərəfindən qorunduğu deyilir. Bəs Tanrı əvvəlki
Kitabları niyə qorumayıb?
Cavab: Əvvəlki kitablardakı
təhrifləri sonradan gələn peyğəmbər düəldirdi. Peyğəmbərimiz
sonuncu olduğu üçün Quran insanların təhriflərindən qorunur.
Sual
254: Həccə gedənlərin o vaxta qədərki bütün günahlarının bağışlandığı
haqda deyilənlər doğrudurmu?
Cavab: Belə bir inanc
Quran tərəfindən təsdiq olunmur.
Sual
255: Bütün peyğəmbərlərin Ərəbistan yarımadasından çıxmasının
səbəbi nədir?
Cavab: Bütün peyğəmbərlər
yox, bəziləri Orta Şərqdən çıxıb. Quran bütün cəmiyyətlərə peyğəmbərlər
gəldiyini deyir, amma bunların bir qismindən danışır.
Sual
256: Bir sıra kitablarda Adəmin 6 min il əvvəl yaşadığı deyilir.
Amma elm neçə yüz min il əvvələ aid insan sümükləri aşkar edib.
Elmə inanmaqda haqlıyammı?
Cavab: Quranda Adəmin
yaradılış tarixi göstərilməyib. Ona görə elmi nailiyyətləri
qəbul etmək Qurana uyğundur.
Sual
257: Müsəlman olmayanlar məsciddə öz ibadətlərini icra edə bilərlərmi?
Cavab: Məscidə büt
kimi şeylər gətirməməklə edə bilərlər. Peyğəmbərimizin vaxtında
belə hallar olub.
Sual
258: Ta-hə surəsinin 113-cü ayəsinə istinad edib Quranın hər
zaman yeni olduğu deyə bilərikmi?
Cavab: Düşüncəniz tamamilə
doğrudur.
Sual
259: Qurandakı surə adlarını kim qoyub?
Cavab: Surələrin adları
peyğəmbərimiz tərəfindən müəyyən olunub.
Sual
260: Hər dəfə ölümü düşünəndə daxilimdən bir qorxu keçir. Bu,
günahdırmı?
Cavab: Ölümdən qorxmaq
insani bir duyğudur, günah deyil.