Rəhman və Rəhim Allahın adıyla.

1. Ha mim.

2. Ayn sin qaf.

3. Beləcə vəhy eləyir sənə və vəhy eləmiş səndən öncəkilərə güclü və müdrik olan Allah.

4. Onundur göylərdə nə varsa, yerdə nə varsa. Ucadan ucadır, uludan ulu Allah.

5. Kafirlərin küfrünün ucbatından az qala çatlaya bilərdi göylər. Həmd oxuyur Rəblərinə, məğfirət diləyir yer üzündə olanlara mələklər. Günahlardan keçəndir, Rəhimdir Allah.

6. Allahdan ayrısını özlərinə dost arayıb seçənlərin işləklərinə göz qoymuş Allah. Sən onlara vəkil olan deyilsən.

7. Biz sənə Qur'anı ərəbcə vəhy elədik olacaqla qorxuzasan şəhərlərin anası Məkkə əhlini və ətrafda olanları. Və bir yerə cəm olacaqları gün barədə - şübhə yoxdur gələcək o gün - xəbər verəsən onlara. Cənnətə girər bə'ziləri, alovlanan od içinə - bə'ziləri.

8. Allah istəsəydi əgər, vahid ümmət yaradardı hamını. Yalnız istədiyi kimsəni salar O rəhmətinin yazısına. Zalımlarınsa nə bir dostu olar, nə də bir yardımçısı.

9. Deməli, Allahdan başqasını dost seçirlər özlərinə. Dost təkcə Allah olar. Ölüləri dirildər O. Hər şeyə qadirdir O.

10. Mübahisə etdiyiniz hər şeyin barəsində hökmü yalnız Allah verər. Budur mənim Rəbbim Allah. Mən Ona güvənirəm, Ona tuturam üzümü.

11. Sizə öz canınızdan taylar, sizinçün dişili-erkəkli heyvanlar var eləmiş göyləri, yeri yaradan. Beləcə sizi çoxaldır O. Misli yoxdur Onun. Hər şeyi eşidəndir, hər işi biləndir O.

12. Göylərin, yerin açarları Ondadır. İstədiyi kimsəyə ruzini bol-bol verər, istədiyi kimsəyə müəyyən miqdarda verər. Hər şeyi biləndir O.

13. Nuha qanun bildiyini sizə də din olaraq buyurmuş Allah. «Dininizdə bütöv olun, bölünməyin!» deyə vəhy elədik sənə, buyurduq İbrahimə, Musaya və İsaya. Müşrikləri də'vət elədiyin şey çox böyük görünmüş onlara. İstədiyi kimsəni Özü üçün seçər Allah. Ona sarı üz tutanı doğru yola yönəldər O.

14. Elm alandan sonra ayrı-ayrı dəstələrə təkcə ona görə bölündülər ki, zəhlələri gedirdi bir-birindən onların. Və əgər yazılı əcəl barədə Rəbbinin öncədən dediyi bir sözü olmasaydı, dərhal bitərdi çəkişmələri. Kitabın sonrakı varisləri də Peyğəmbərə şəkk gətirirlər.

15. Və buna görə sənə əmr edilən sayaq birliyə çağır, möhkəm ol, sabit ol çağırışında. Tabe olma onların istəklərinə. De ki, «Allahın göndərdiyi Kitaba mən iman gətirmişəm. Mənə əmr olunub sizin aranızda ədalətlə hakimlik edim. Bizim də Rəbbimiz sizin də Rəbbiniz Allahdır. Bizim öz işimiz var, sizin də öz işiniz. Elə bir ədavət yox aranızda. Hamımızı bir yerə cəm edər Allah. Onun da dərgahına axır dönəcək hamı».

16. Müstəcəb oldumu Peyğəmbərin duası, demək Allah barədə mübahisə edənlərin dəlilləri Rəblərinin dərgahında məqbul sayılmaz. Onun qəzəbinə düçar olarlar. Şiddətli bir əzab gözləyir onları.

17. Kitabı haqq olaraq və ölçünü-mizanı ədalət olaraq göndərən Allahdır. Nə bilirsən, bəlkə də qiyamət saatı lap yaxındadır.

18. Qiyamətin qopmağına inanmayan kimsələr bunu tələsdirirlər. İnanan kəslərsə qorxudan əsirlər, bunun haqq olduğunu bilirlər. Bilin, dərin bir sapqınlıq içindədir qiyamət saatı barədə mübahisə eləyən kimsələr.

19. Bəndələrinə qarşı lütfkardır Allah. Ruzi verər istədiyi kimsəyə. Qüvvətlidir, güclüdür O.

20. Axirət qazancını güdən kimsənin artırarıq qazancını. Dünya qazancını güdən kimsəyə də istədiyindən verərik. Ancaq axirətdən bir nəsibi olmaz bu cür kimsənin.

21. Bəlkə onların şərikləri var və bu şəriklər də Allahın dində izn vermədiyi bir şeyi qanun bilmiş onlara. Qiyamət barədə öncədən verilən və'd olmasaydı, bu dünyanın özündəcə verilərdi cəzaları. Şübhəsiz, ağrılı bir əzab gözləyir zalımları.

22. Qazandığı günahlar çıxanda qabaqlarına, qorxudan titrəyən görürsən zalımları. O kəslər ki, iman gətiriblər, saleh işlər görüblər, cənnət bağlarındadır onlar. Rəblərinin dərgahında nə istəsələr varlarıdır. Onun böyük lütfü budur!

23. İman gətirən, saleh işlər görən bəndələrinə müjdə verir bunu Allah. De ki, «Buna görə mən sizdən bir əcir də ummuram. Umacağım odur ki, ehtiram gözləyəsiz mənim nəslimə». Artırarıq qazancını yaxşılıq qazanan kimsənin. Günahlardan keçəndir, qədirbiləndir Allah.

24. Yoxsa deyirlər Allahın adına yalan yaxmış o [Muhamməd]? Allah istərsə əgör, möhkəmlədər ürəyini, yox eləyər batili, üzə çıxarar haqqı Öz kəlamıyla. Yrəklərin içini biləndir O, şübhəsiz.

25. Bəndələrinin tövbəsini qəbul eləyən, günahları bağışlayan, işləklərinizi bilən Odur.

26. İman gətirən, saleh işlər görən kimsələrin duasına cavab verən, Öz lütfündən pay olaraq onların əcrini artıran Odur. Kafirlərin payınasa şiddətli bir əzab düşər.

27. Bəndələrinin hamısına ruzini bol versəydi Allah, yer üzündə azğınlıq edərdilər. Dilədiyi bir şeyi müəyyən miqdarda verər. Şübhəsiz, bəndələrindən xəbərdardır, onları görəndir O.

28. Ymidləri yağıntıdan kəsiləndən sonra onlara yağış göndərən, rəhmətini onlar üçün yayan Odur. Öyülməyə layiq olan dost Odur.

29. Onun qüdrətinin dəlillərindəndir göylərlə yerin yaranışı, hər birində canlıların yaradılıb yayılması. İstəsə, bunları bir yerə cəm etməyə də qadirdir O.

30. Başınıza nə müsibət gəlirsə, bu sizin öz əlinizin qazancı. Ancaq yenə günahların çoxunu əfv edər O.

31. Aciz qoya bilməzsiniz yer üzündə Allahı. Allahdan başqa nə bir dost tapılar, nə də bir yardımçı sizə.

32. Dağ əzəmətilə üzər dənizdə gəmilər. Bu Onun qüdrətinin dəlillərindən biridir.

33. Allah istərsə əgər, yatırdar küləyi, hərəkətsiz dayanar su üstündə gəmilər. Şübhəsiz, bunda ayələr var səbr eləyən, şükr eləyən hər kəs üçün.

34. Yaxud qazandığı suçlarının əvəzinə batırar gəmidəki adamları dənizə, ya da suçlarının bir çoxundan keçərək təkcə gəmiləri batırar O.

35. Ayələrimizi çək-çevirə salanlar bilsinlər, qaçmağa bir yeri olmaz onların.

36. Sizə nə verilərsə, dünya həyatının gəldi-gedər bir şeyidir sadəcə. Allahın dərgahında olanlarsa daha çox xeyir gətirər, daha çox qalımlı olar iman gətirənlər üçün, Rəblərinə güvənənlər üçün.

37. Və o kəslər üçün ki, böyük günahlardan, əxlaqsız əməllərdən kənar dururlar, qəzəbli olsalar belə bağışlaya bilirlər.

38. Və o kəslər üçün ki, Rəblərinin çağrışına cavab verirlər, namaz qılırlar, işlərini məşvərətlə həll eləyirlər, verdiyimiz ruzidən Allah yolunda xərcləyirlər.

39. Və o kəslər üçün ki, bəlaya düşdülərmi, yardım əli uzadırlar biri-birinə.

40. Pislik eləyən bir kimsənin cəzası elədiyi pisliyinin misli ilə verilər. Ystünü vurmayıb barışan kimsənin əcrinisə Allah verər. Zalımları sevməz O.

41. Zülm görəndən sonra yardım alan kimsənin önünü başqa yol kəsə bilməz.

42. Yalnız o kəslərin qarşısı kəsilər ki, yer üzündə nahaqdan insanları incidirlər, azğınlıq eləyirlər. Ağrılı bir əzab gözləyir belələrini.

43. Kim ki, səbr eləyib keçərsə bir günahdan, möhkəm tutmuş işini o deməli.

44. Allahın azdırdığı kimsəyə bir dost tapılmaz. Görürsən bir zalımları, əzabı gördülərmi «Geriyə dönəsi yoxmu yol məgər?» deyərlər.

45. Görürsən, oda tərəf aparırlar onları. Qorxu, zillət içində başlarını sallamışlar aşağı. Gözlərinin ucuyla oda tərəf baxırlar. «Qiyamət günü özlərini də, ailəsini də itirənlərdir itgiyə uğrayanlar» deyər iman gətirənlər. Bilin, əbədilik bir əzab içindədir zalımlar.

46. Allahdan başqa dostları da yoxdu ki, yardımına yetəydilər onların. Allahın azdırdığı kimsənin bir çıxış yolu olmaz.

47. O qaçılmaz gün Allahın dərgahından gəlməmiş Rəbbinizin çağrışına səs verin. Sizə bir sığınacaq tapılmaz o gün, sizin bir suçunuz danılmaz o gün.

48. Səndən üz çevirsələr, bilsinlər, Biz səni göndərməmişik göz qoyasan onlara. Sənin borcun yalnız bəyan eləməkdir verdiyimiz hökmləri. Dərgahımızdan bir rəhmət daddırantək insana, sevinər buna. Amma öz əliylə elədiyi üzündən pis bir işə düşən zaman, görərsən nankorun biridir insan.

49. Allahdır göylərin, yerin yiyəsi. İstədiyi bir kəsi yaradar O. İstədiyi kimsəyə qız uşağı, istədiyinə oğlan uşağı verər O.

50. Yaxud da həm oğlan, həm qız verər istədiyi kimsəyə. Və sonsuz da qoyar istədiyi kimsəni. Şübhəsiz, hər şeyi biləndir, hər şeyə qadirdir O.

51. Yalnız vəhy ilə, yaxud pərdə dalından danışar bəşərlə Allah. Yaxud da bir elçi göndərər, istədiyini Öz iznilə ona vəhy eləyər. Ucadan ucadır, müdrikdir O.

52. Sənə də beləcə vəhy vermişik, Öz əmrimizlə vəhyi sənə çatdırmaq üçün Cəbraili göndərmişik. Sən öncələr bilməzdin heç Kitab nədir, iman nədir. Ancaq bəndələrimizdən dilədiyimiz kimsəni doğru yola yönəltməkçün bu Kitabı nur olaraq var elədik. Sən aldığın vəhy ilə göstərirsən insanlara doğru yolu,

53. Allahın yolunu. Onundur göylərdə nə varsa, yerdə nə varsa. Bilin, Allaha qalar bütün işlər.