Rəhman və Rəhim Allahın adıyla

1. Əlif ləm mim.

2. Şübhə yoxdur, bu Kitabı aləmlərin Rəbbi nazil eləmiş.

3. «Bunu özündən uydurmuş o» deyirlər, eləmi? Axı Rəbbindən haqq olaraq gəlmiş bu Kitab. Gəlmiş ki, səndən öncə peyğəmbəri olmamış bir qövmə gəlib olacağı xəbər verəsən və onlar da doğru yola gələlər.

4. Allahdır göyləri, yeri, bunların arasında olanları altı gündə yaradan, sonra ərşdə bərqərar olan. Ondan başqa sizə nə bir dost tapılar, nə də bir iltimasçı. Bunu düşünməzmisiniz?

5. Göylə yer arasında olan işlərə əncam çəkər Allah. Sonra sizə min il gələn bircə günün içində verər hökmünü.

6. Görülməzi, görüləni biləndir, güclüdür, Rəhimdir O.

7. Allahdır yaratdığı hər şeyi gözəl yaradan, insanı ilk öncə gildən xəlq eləyən,

8. sonra onun nəslini zəif su damcısından [nutfədən] var eləyən,

9. sonra ona görkəm verən və Öz ruhundan ona üfürən. Qulaqları, gözləri, ürəkləri sizlərə verən Odur. Ancaq yenə az-az şükr eləyirsiz Ona.

10. «Torpağa qarışaraq yox olandanmı sonra yenidən var olacağıq?» deyərlər. Rəblərinə qovuşmağı danar belələri.

11. De ki, «Canınızı almağa vəkil edilən o ölüm mələyi gəlib sizi vəfat etdirər, sonra da Rəbbinizin dərgahına dönərsiz».

12. Görəydin bir suçlular o zaman nə hala düşür. Rəblərinin hüzurunda baş əyərlər, «Rəbbimiz! Gördük, eşitdik artıq. Qaytar bizi geriyə, yaxşı işlər görərik. Biz artıq qət'i olaraq Sənə iman gətirmişik» deyərlər.

13. İstəmiş olsaydıq əgər, doğru yola gətirərdik hər kəsi. Ancaq Mən söz vermişəm cinlərlə, insanlarla cəhənnəmi başdan-başa doldurum.

14. «Gördüyünüz işlərin əvəzini dadın di, bu günlə üzləşəcəyinizi unutmuşdunuz. Biz də sizi unutduq. İşləklərinizə görə verdiyimiz o əbədi əzabı dadın» deyərik.

15. Bizim ayələrə o kəslər inanar ki, bunlardan ibrət götürüb səcdəyə qapanarlar, Rəblərini həmd eləyib öyərlər, təkəbbürlük eləməzlər,

16. yataqdan qalxıb duraraq qorxuyla, ümidlə yalvararlar Allaha, verdiyimiz ruzidən Allah yolunda sərf eləyərlər.

17. Gördüyü işlərə görə gözaydınlığı olaraq özünə veriləcək şeydən heç kəsin xəbəri yox.

18. Məgör mö'minlə sapmış adam bərabərmi tutular? Təbii, tayı deyil bunlar biri-birinin.

19. Ancaq o kəslər ki, iman gətiriblər, saleh işlər görüblər, gördükləri işlərinin qarşılığı olaraq cənnət mənzillərində yerləri var onların.

20. Doğru yoldan sapmışların gedəcəyi yer isə od içidir. Hər dəfə istəyəndə çıxalar od içindən, geriyə qaytararlar onları. «Bir zaman od əzabını danırdınız, indi onu dadınız!» deyilər onlara.

21. Bəlkə yollarından dönələr deyə o böyük əzabı daddırmamış dünyanın əzabından daddırarıq onlara.

22. Rəbbinin ayələri söylənilərkən bunlardan üz çevirəndən daha zalım kim ola? Biz intiqam alacağıq suçlulardan, şübhəsiz.

23. Musaya Kitab verdik. Nəbadə şəkk gətirəsən onunla görüşəcəyinə. İsrail oğullarına yol göstərən elədik Musanı.

24. Səbr göstərən, ayələrimizə iman gətirən kimsələri başçılar seçdik onlara. Doğru yola çəkirdilər soydaşlarını.

25. Mübahisə etdikləri şeyləri barəsində Rəbbin qiyamət günü verəcək Öz hökmünü.

26. Arxayın-arxayın gəzib dolaşırkən öz yurdlarında yox elədik neçə-neçə nəsilləri. Bu damı gətirməz doğru yola onları? Şübhəsiz, bunda da bir ayə var. Yoxsa eşitmir qulaqları?

27. Məgər görməzmidirlər, qurumuş torpağa su göndəririk, bu suyla bitki bitiririk, bu bitkini özləri də yeyir, heyvanları da. Yoxsa görmür gözləri?

28. «Doğru sözlü, düz əməlli kimsələrsinizsə, deyin, nə vaxt veriləcək hökm?» deyərlər mö'minlərə.

29. De ki, «Hökm veriləcək gün imana gəlsələr də kara gəlməz kafirlərin imanı. Möhlət də verilməz onlara».

30. Sən onlardan üz çevir, gözlə. Onlar da gözləyirlər nə vaxt bir bəla gələ sənin başına.