Rəhman və Rəhim Allahın adıyla

1. Həmd olsun Allaha, Onundur göylərdə nə varsa, yerdə nə varsa. Axirətdə də həmd edilməli təkcə Odur. Müdrikdir, hər şeydən xəbərdardır O.

2. Yerə nə girirsə, yerdən nə çıxırsa, göydən nə düşürsə, göyə nə qalxırsa bilir O. Günahlardan keçəndir, Rəhimdir O.

3. «Bizim üçün qiyamət saatı gəlməyəcək» dedi kafirlik eləyən kimsələr. De ki, «Elə deyil. And olsun görülməzi bilən Rəbbimə, mütləq haqlayacaq sizi qiyamət». Nə göylərdə, nə yerdə bir zərrə belə və zərrədən istər kiçik olsun, istər böyük heç bir şey Ondan gizli qalan deyil. Bunların da hamısı aşkar bir Kitabda artıq yazılmış.

4. Yazılmış ki, iman gətirənlərə, əməli salehlərə mükafat verə Allah. Məğfirət gözləyir, bol-bol ruzilər gözləyir onları.

5. Yazılmış ki, ayələrimizi zəiflətməyə çalışan kimsələrə qarşılıq verə Allah. İyrənc, ağrılı bir əzab gözləyir onları.

6. Haqdır Rəbbinin sənə göndərdiyi, güclü və həmd edilməyə layiq olanın yolunu nişan verər o göndərdiyi. Bunu yaxşı bilir elm alan kimsələr.

7. Kafirlərsə deyərlər: «Parça-parça olub yoxa çıxandan sonra yenidən diriləcəyinizi xəbər verən bir kişini sizlərə göstərəkmi?

8. Allahın adına yalanmı yaxır, dəliliyimi var onun?» Əzab içində, dərin bir sapqınlıq içində vurnuxar axirətə inanmayan kimsələr.

9. Məgər görməzmidirlər başları üstündə göyü, ayaqları altında yeri? İstəsək yerin təkinə gömərik onları, istəsək göyün bir parçasını başlarına salarıq. Şübhəsiz, bunlarda bir ayə var Allaha doğru qayıdan hər bəndə üçün.

10. Peyğəmbərlik, Kitab vermişdik Davuda dərgahımızdan. «Ey dağlar və quşlar! Allahı öydükcə Davud, səs verin səsinə» demişdik. Onun əlində dəmiri yumşaq eləmişdik.

11. Dəmirdən zirehlər düzəlt, halqaları toxuyanda ölçü gözlə» demişdik. Yararlı işlər görün, nə iş görürsünüzsə Mən görənəm.

12. Küləyi də Suleymənə tabe eləmişdik. Səhərlər əsəndə bir aylıq yol gedərdi, axşamlar əsəndə bir aylıq yol gələrdi külək. Mis əritdik onun üçün. Ona tabe elədik Rəbbinin iznilə yanında işləyən cinləri. Əmrimizdən çıxdımı bu cinlərdən birisi, ona od əzabını dadızdırardıq.

13. Nə istəsə onun üçün eləyərdi bu cinlər. Mə'bədlər ucaldar, heykəllər düzəldər, böyük hovuzlara bənzəyən qablar, ağır qazanlar və tiyanlar qayırardılar. Ey Davud sülaləsi! Allaha itaətdə olub şükr eləyin. Bəndələrimdən az-az adam şükr eləyir.

14. Biz ölüm hökmünü verəndə Suleymənə əsaya söykənib qalmışdı o. Əsanı içindən qurd yeyib qurtarantək yerə yıxıldı. Və yalnız bu zaman cinlərə aşkar oldu ki, görülməzi bilsəydilər alçaldıcı əzabın [ağır əziyyətli işin] içində qalmazdılar.

15. Səbə' əhlinin yaşadığı yurdun sağında və solunda bir ayəyə dönəcək iki bağ var idi. «Rəbbinizin ruzisindən yeyin, Ona şükr eləyin. Gözəl şəhəriniz var, bağışlayan Rəbbiniz var» deyilmişdi onlara.

16. Onlarsa şükr eləmədilər. Böyük sel göndərdik üstlərinə, o iki bağın yerinə iki başqa bağ gətirdik. Meyvələri acı idi. Azacıq da sidr ağacı vardı bu bağların içində.

17. Kafirlik elədiklərinə görə cəza verdik onlara. Yalnız nankor kimsəyə cəza verilər.

18. Bərəkətli elədiyimiz şəhərlərlə onların yurdları arasında gözə çarpan qəsəbələr yaratmışdıq müsafirlər üçün. «Gecələr, gündüzlər arxayın gəzin, dolaşın buralarda» demişdik.

19. Ancaq onlar «Yollarımızı uzaq elə, Rəbbimiz!» dedilər və özlərinə zülm elədilər. Nağıla döndərdik, darmadağın elədik Biz də onları. Şübhəsiz, bunlarda ayələr var hər səbr yiyəsi üçün, tez-tez şükr eləyən hər kəs üçün.

20. Onların gümanını doğruya yozmuşdu iblis. Mö'minlərin bə'zisindən savayı hamı qoşuldu iblisə.

21. Əslində insanların üstündə bir hökmü yox iblisin. Fəqət bununla Biz onları sınağa çəkərik, bilərik axirətə kim inanır, kim şəkk gətirir. Hər şeyi göz önündə saxlayıb hifz eləyəndir Rəbbin sənin.

22. De ki, «Allahdan başqaları adına tanrılar olaraq tapındıqlarınızı çağırın gəlsinlər köməyinizə. Nə göylərdə, nə yerdə zərrə qədər bir şeyin yiyəsi deyil onlar. Nə göylərdə, nə yerdə Ona şərik qoşmaq üçün bir şeyi yox onların. Onun da bütlərdən olan heç bir yardımçısı yox».

23. İltimas eləməkçün Allahın izn verdiyi kəsdən savayı heç kimin iltiması fayda gətirə bilməz Allahın dərgahında. Qorxu yox olanda ürəklərindən, bir-birindən soruşarlar: «Rəbbiniz nə söyləmiş?» «Haqq söyləmiş. O ucadan ucadır, uludan ulu» deyərlər.

24. De ki, «Göylərdən, yerdən sizə ruzi göndərən kimdir?» De «Allahdır! Və doğru yolda olan kimdir, bu yoldan açıq-aşkar sapmış kimdir, bizik, yoxsa siz?»

25. De ki, «Bizim günahlara görə siz cavabdeh deyilsiz. Biz də cavab daşımarıq sizin işləklərinizə görə».

26. De ki, «Əvvəl-axır bir yerə cəm edər bizi Rəbbimiz. Sonra da aramızda haqq ilə hakimlik edər. Təkcə Odur haqq ilə hakimlik edən, hər şeyi bilən».

27. De ki, «Ona qoşduğunuz şəriklər hanı, göstərin mənə. Göstərə bilməzsiniz, yoxdur onlar. Təkcə Allahdır güclü olan, müdrik olan».

28. Müjdə verən, xəbərdarlıq eləyən bir peyğəmbər göndərdik səni bütün insanlar üçün. Amma bunu bilməyir onların çoxu.

29. «Doğru sözlü, düz əməlli kimsələrsinizsə, deyin o və'din və'dəsi nə vaxt gələcək?» deyərlər.

30. De ki, «Vaxtınız çatan zaman həmin günü bircə saatlığa belə nə ötürə bilərsiz, nə qabaqlaya».

31. «Nə bu Qur'ana, nə də bundan öncəki Kitablara biz inanan deyilik» dedi kafirlik eləyən kimsələr. Rəblərinin hüzurunda dayanan zaman zalımların halına bir baxaydın! Bir-birinin üstünə atar günahlarını. Zəiflər [başçıların tabeliyində olanlar] təkəbbürlük edənlərə [başçılara] deyərlər: «Əgər siz olmasaydız, biz mö'min olasıydıq».

32. Təkəbbürlük edənlər zəiflərə deyərlər: «Doğru yol göstəriləndən sonra bizmi sizə mane olduq gələsiniz bu yola? Xeyr, siz özünüz özünüzü batırmısız günaha».

33. Zəiflər də təkəbbürlük edənlərə deyərlər: «Siz bizə gecə-gündüz quramalar qururdunuz, Allahı danmağı, Ona şəriklər qoşmağı bizə buyururdunuz». Əzabla üzləşəntək, tərəflər içlərində peşmançılıq çəkərlər. Zəncirlər vurarıq kafirlərin boynuna. Məgər öz işləklərinə görə deyil, başqa bir şeyə görəmi çəkirlər cəzalarını?

34. Biz hansı bir şəhərə xəbərdarlıq eləyən elçi göndərmişiksə, oranın varlı olan başçıları «Biz sizinlə göndərilən şeyləri danırıq» demişlər.

35. «Mal-dövləti, övladları ən çox olan bizlərik, biz əzaba uğrayan deyilik» demişlər.

36. De ki, «İstədiyi kimsəyə ruzini bol-bol verər, istədiyi kimsəyə müəyyən miqdarda verər Rəbbim. Amma bunu bilməyir əksər adamlar».

37. Nə mal-dövlətiniz, nə də övladlarınız elə bir şey deyillər ki, sizi Mənə yaxın edələr. Ancaq iman gətirənlərin, əməli salehlərin haqqını ikiqat qaytararıq gördüyü işlərə görə. Asudə yaşayarlar cənnət mənzillərində.

38. O kəslər ki, çalışırlar ayələrimizi zəiflədələr, əzabla üz-üzə qoyarıq Biz onları.

39. De ki, «Bəndələrindən istədiyi kimsəyə ruzini bol-bol verər, istədiyi kimsəyə müəyyən miqdarda verər Rəbbim. Nəyi xərcləmisizsə, bunun əvəzini yetirər sizə. Ruzi verənlərin ən yaxşısıdır O».

40. Müşrikləri hamılıqla bir yerə cəm etdiyi gün «Bunlarmı sizlərə tapınırdılar?» deyər Allah mələklərə. 41. «Sənsən təkcə ucalardan uca olan. Sənsən bizim dostumuz, onlar deyil. Bizlərə yox, cinlərə tapınırdılar, cinlərə inanırdı onların çoxu» deyər mələklər.

42. «Bu gün bir-birinizə nə yarar, nə zərər verməyə halınız yox. Bir zaman od əzabını danırdınız, indi bunu dadınız» deyərik zalımlara.

43. Aydın ayələrimiz onlara oxunan zaman «Bu kişinin qəsdi budur atalarınızın tapındıqlarından sizi çəkindirə sadəcə» deyərlər. «Bu Qur'an Allahın adına uydurulan yalandır» deyərlər. «Bu açıqca bir cadudur» demişdi haqq gəlib yetişəndə haqqı danan kimsələr.

44. Bunlara öyrənmək üçün bir kitab verməmişdik. Səndən öncə bunlara xəbərdarlıq eləyən peyğəmbər göndərməmişdik.

45. Bunlardan öncəkilər də haqqı danmışdılar. Onlara verdiyimizin onda birini belə bunlar qazanmamışdılar. Ancaq onlar da danmışdılar Mənim ayələrimi. Mən də göstərdim onlara necə olur axırı Məni danmağın.

46. De ki, «Sizə olan məsləhətim təkcə budur, Allah xatirinə iki-iki, tək-tək qalxın ayağa, sonra da yaxşı-yaxşı düşünün. Biləcəksiz dəlilikdən əsər yox yoldaşınızda [Muhamməddə]. Şiddətli bir əzabın göləcəyini öncədən bildirərək, sizə yalnız xəbərdarlıq eləyir».

47. De ki, «Buna görə mən sizdən bir əcir də ummaram, əcir qoy sizin olsun. Əcrimi Allah verər, hər şeyə şahiddir O».

48. De ki, «Haqq göndərər istədiyi bəndəsinə görülməzləri bilən Rəbbim».

49. De ki, «Haqq üzə çıxmış, batil yoxa çıxmış, batildən bir iz də yox».

50. De ki, «Haqdan dönüb sapsam əgər, bu mənim öz əleyhimə. Doğru yolda olsam əgər, belə vəhy eləmiş mənə Rəbbim deməli. Şübhəsiz, hər şeyi eşidəndir, hamıya yaxındır O».

51. Görəydin bir necə təşvişə düşür onlar. Can qurtarıb qaçmağa macalları yox. Yaxın bir məkanda [qəbirlərdə] yaxalarlar onları.

52. «Qur'ana iman gətirdik» deyərlər. Axirət kimi uzaq olan məkandan dünyada olan Kitaba necə iman gətirərlər görəsən?

53. Qur'anı öncədən danmışdılar. Dünya kimi uzaq olan məkandan görülməz barədə nə gəldi danışmışdılar.

54. İstədikləri şeydən artıq ayrı düşərlər. Bir vaxt da onların məsləkdaşları ayrı-ayrı firqələrə ayrılaraq bir-birindən ayrı düşmüşdülər, şəkk-şübhə içində vurnuxurdular.