Rəhman və Rəhim Allahın adıyla

1. And olsun səf-səf düzülən mələklərə,

2. önündəkiləri sürdükcə sürən mələklərə,

3. Qur'an oxuyan kimsələrə,

4. birdir Tanrınız!

5. Göylərin, yerin, bunların arasında olanların Rəbbidir O. Şərqlərin, qərblərin Rəbbidir O.

6. Biz yaxın səmanı ulduzlarla bəzədik.

7. Hər dikbaş şeytanın şərindən qoruduq onu.

8. Şeytanları qoymazlar qulaq asalar yuxarı aləmlərə. Göyün hər tərəfindən odlu daşlar tullayarlar başlarına.

9. Qovarlar onları. Əbədi bir əzab gözləyir onları.

10. Mələklərdən bircə söz gizlincə eşidib qapdımı şeytan, dalınca düşər onun, haqlayıb deşər onu odlu daş.

11. Kafirlərdən soruşsana, onlarmı, Bizim yaratdıqlarımızmı daha möhkəm olar? Onların özlərini yapışqan bir gildən yaratmışıq Biz axı.

12. Sən təəccüb qaldın ki, danırlar səni, onlar da sənin təəccüb qalmağına güldülər.

13. Onlara fayda verməz öyüd dinləmək.

14. Bir mö'cüzə görəndə bununla əylənərlər.

15. Deyərlər: «Bu açıqca bir cadudur.

16. Öləndən sonra, sümüyümüz torpağa qarışandan sonra bizmi diriləcəyik,

17. öncə gölib getmiş olan atalarımızmı?»

18. De ki, «Bəli, hamınız diriləcəksiz. Sonra da alçalacaqsız».

19. O surun bircə kərə səslənişilə qəbirlərdən qalxarlar, başlarına gələnlərə baxarlar.

20. Deyərlər: «Yazıqlar olsun bizə!» Mələklər də onlara «Bu, qiyamət günüdür!» deyərlər –

21. «Bu, mö'minlərlə kafirlərin bir-birindən ayrıldığı gündür. Bu günü siz danırdınız».

22. Mələklərə əmr edilər: «Çəkin məhşər ayağına zalımları, onların taylarını, tapındıqları tanrıları,

23. Allahsızlıq edirdilər. Cəhənnəmə yola salın onları.

24. Yol üstündə bir əyləyin onları, tutduğu işlərə gerə cavab verməlidirlər».

25. «Nə oldu sizə, niyə bir-birinizə yardım eləmirsiniz?» deyə soruşarlar onlardan.

26. Onlar bu gün hamılıqla təslim olmuşlar.

27. Bir-birinin üzünə durarlar, bir-birilə sözləşərlər.

28. Tabelikdə olanlar başçılara deyərlər: «Yanımıza sağ tərəfdən gəlirdiniz [haqlı olduğunuza bizi inandırmışdınız, bizi aldatmışdınız]».

29. Onlar da deyərlər: «Siz iman gətirən kimsələr deyildiniz.

30. Biz sizin üstünüzdə hakim deyildik. Siz özünüz azğın kimsələrdiniz.

31. Və artıq Rəbbimizin dediyi o əzab bizim üçün haqq olmuş. İndi də əzabı dadmalıyıq, şübhəsiz.

32. Bəli, sizi azdıranlar biz idik. Çünki biz azğınlar idik».

33. O gün əzab içində tay olarlar bir-birinə hamısı.

34. Bax belə edərik günahkarlara,

35. «Allahdan başqa tanrı yoxdur» deyiləndə onlara təkəbbürlük edərdilər.

36. «Dəli bir şairə görəmi tapındıqlarımızı tərk etməliyik?» deyərdilər.

37. O isə haqq gətirmişdi, təsdiq eləmişdi öncəki elçilərin peyğəmbərliyini.

38. Şübhəsiz, dadacaqsız o ağrılı əzabı.

39. Yalnız öz işləklərinizə görə alacaqsız cəzanızı.

40. Yalnız Allaha sadiq qalan bəndələrə verilməz o cəza.

41. Mə'lum ruzilər gözləyir onları.

42. Meyvələr... Möhtərəm kimsələrdən sayılar onlar,

43. ne'mət cənnətlərində.

44. Taxtların üstündə üzbəüz əyləşərlər.

45. Qədəhlərlə hər birinin başına dolanarlar. Qədəhləri arxlardan doldurarlar.

46. Ağappaq bir içkidir bu, içiləndə ləzzətlidir,

47. başağrısı verməyir, ağlı başdan çıxarmayır.

48. Yanlarında irigözlü qadınlar var, yalnız öz taylarına zillənmiş baxışları.

49. Əl dəyməmiş yumurta sayaq bəmbəyazdılar.

50. Dünyadakı işlərdən danışar bir-birinə cənnətdəkilər.

51. Biri söyləyər: «Mənim bir dostum vardı.

52. Deyərdi sən dəmi doğrudan inanırsan

53. öləndən sonra, sümüyümüz torpağa qarışandan sonra bizə cəza verəcəklər?»

54. Baxmaq istəyirmisiniz indi nə haldadır o?»

55. Baxıb görər cəhənnəmin ortasındadır.

56. Deyər: «Allaha and olsun, az qala məni də yolumdan azdırıb məhv eləmişdin.

57. Mənə mərhəmətini əsirgəsəydi Rəbbim sənin kimi cəhənnəmlik olardım».

58. «Bir daha ölmərik biz, deyilmi?

59. Yalnız bir kərə ölmüşük, sonra da dirilmişik. Bir də əzab görmərik».

60. Budur o böyük qurtuluş.

61. Çalışanlar qoy buna çalışsınlar.

62. Qalmaq üçün buramı yaxşıdır, zəqqum ağacı olan yermi?

63. Zalımlara göz dağı elədik bu ağacı [yə'ni deyirdilər ki, od içində ağac olmaz, yanıb gedər].

64. Cəhənnəmin dibində bitən bir ağacdır bu.

65. Şeytan başı kimidir tumurcuqları.

66. Yeyərlər meyvəsindən, doldurarlar qarınlarını.

67. Gedib üstündən də qaynar-qaynar su içərlər.

68. Sonra yenə cəhənnəmə dönərlər.

69. Sapmışlardı ataları. 70. Ancaq yenə onların yoluyla getməyə tələsdilər.

71. Öncəki nəsillərin çoxu sapmışdı doğru yoldan.

72. Biz hələ onlara xəbərdarlıq eləyən elçilər də göndərmişdik.

73. Xəbərdarlıq almış olan kafirlərin axırı gör nə olmuş.

74. Ancaq Allaha sadiq qalan bəndələrin axırı başqa olmuş.

75. Köməyə çağırmışdı Nuh Bizi. Necə gözəl bir tərzdə onun duasını Biz müstəcəb elədik.

76. Çox böyük bir bəladan qurtardıq onu ailəsilə.

77. Bu dünyada onun ancaq nəsli qaldı.

78. Yaxşı bir ad qoyub getdi gələcək nəsillərə.

79. Aləmlər içində Nuha salam olsun Bizdən!

80. Yaxşıları mükafatlandırırıq beləcə.

81. Şübhəsiz, mö'min bəndələrimizdəndi Nuh.

82. Axır qərq elədik sulara kafir olan digər soydaşlarını.

83. Şübhəsiz, Nuhun ardıcılıydı İbrahim.

84. Təmiz bir ürəklə iman gətirmişdi Rəbbinə.

85. Bir zamanlar atasına, soydaşlarına demişdi: «Görün bir nələrə tapınırsız?

86. Allahı qoyub uydurma tanrılaramı tapınmaq istəyirsiz?

87. Aləmlərin Rəbbi barədə nədir fikriniz?»

88. Nəzər saldı ulduzlara İbrahim.

89. «Xəstələnmişəm!» dedi.

90. İbrahimdən üz döndərib getdilər.

91. Bütlərə yaxın gələrək dedi: «Qoyduqları yeygidən niyə yemirsiz?

92. Niyə dillənmirsiz?».

93. Güclü zərbəylə qırıq-qırıq elədi o bütləri.

94. Bütpərəstlər qaça-qaça gəldilər.

95. Dedi: «Yonaraq düzəltdiyiniz şeylərəmi tapınırsız?

96. Sizi də, bu düzəltdiyiniz şeyləri də Allah yaratmış».

97. Bütpərəstlər bir-birinə dedilər: «Od tiyanı düzəldin, atın onu od içinə».

98. Bir iş açmaq istədilər İbrahimin başına, Biz də işlərini boşa çıxarıb alçaltdıq onları.

99. Dedi: «Mən Rəbbimin yanına gedirəm. Doğru yola yetişdirər məni O.

100. Yaxşılardan olacaq bir övlad bəxş elə mənə, Rəbbim!»

101. Həlim xasiyyətli bir oğlan uşağının müjdəsini verdik ona.

102. Böyüdü, Safə-Mərva arası qaçışa başladı atasıyla bərabər. İbrahim dedi: «Oğlum, yuxumda görmüşəm ki, boğazını üzürəm. Görəsən nə ola bu?» «Atacan, sənə nə buyursalar, yetir yerinə. Allah qoysa görərsən mən necə səbirliyəm» dedi oğlu.

103. İkisi də özünü təslim etdi Allaha. Oğlunun alnını yerə dirədi qurbangahda İbrahim.

104. Səslədik onu: «Ey İbrahim!

105. Sən yuxunu haqq elədin. Yaxşıları mükafatlandırırıq bax beləcə».

106. Əslində açıq-aşkar imtahana çəkmişdik onları.

107. Kəsilməli oğlunun əvəzinə böyük bir qurbanlıq yetirdik İbrahimə.

108. Yaxşı bir ad qoyub getdi gələcək nəsillərə.

109. Salam olsun İbrahimə.

110. Yaxşıları mükafatlandırırıq beləcə.

111. Şübhəsiz, mö'min bəndələrimizdəndi İbrahim.

112. Yaxşıların arasından seçib peyğəmbər göndərdiyimiz İshaqın müjdəsini verdik ona.

113. Ona da, İshaqa da verdik xeyir-duamızı. Onların nəslində yaxşılar da var, özlərinə açıqca zülm eləyənlər də.

114. Biz Musaya və Həruna da peyğəmbərlik vermişdik.

115. Onları da, qövmlərini də böyük bir bəladan xilas eləmişdik.

116. Yardım yetirmişdik onlara, qalib gəlmişdi onlar.

117. Aydın anlamlı Kitab vermişdik hər ikisinə.

118. Doğru yola yönəltmişdik onları.

119. Yaxşı ad qoyub getdi hər ikisi gələcək nəsillərə.

120. Salam olsun Musaya və Həruna.

121. Yaxşıları mükafatlandırırıq beləcə.

122. Mö'min bəndələrimizdəndi hər ikisi.

123. İlyəs də göndərilmiş elçilərdəndi.

124. Bir zamanlar öz qövmünə demişdi: «Allahdan çəkinməzmisiniz?

125. Yaradanların yaradanını qoyub Bə'l bütünəmi tapınırsız?

126. Allah sizin də Rəbbinizdir, öncə gəlib-getmiş atalarınızın da».

127. Dandı onu soydaşları. Cəhənnəmlik olacaqdı hamısı

128. Allaha sadiq qalan bəndələrdən savayı.

129. Yaxşı bir ad qoyub getdi gələcək nəsillərə.

130. Salam olsun İlyəsə.

131. Yaxşıları mükafatlandırırıq beləcə.

132. Mö'min bəndələrimizdəndi o.

133. Lut da göndərilmiş elçilərdəndi.

134. Onu da, ailəsini də hamılıqla xilas elədik

135. əzab içində qalan qarısından savayı.

136. Sonra da məhv elədik qalanlarını.

137. Bunların olduğu yerlərdən keçirsiz səhər –

138. axşam. Baxıb düşünməzmisiniz bunların aqibətini?

139. Yunus da göndərilmiş elçilərdəndi.

140. Qaçaraq minmişdi dolu gəmiyə.

141. Batmaq təhlükəsi yaranan zaman püşk atdılar. Yunusun bəxtinə düşdü püşk. Atdılar onu dənizə.

142. Balıq uddu onu. Rəbbindən iznsiz iş görmüşdü o.

143. Allahı öyən kimsələrdən olmasaydı

144. diriləcəyi günə qədər balığın qarnında qalacaqdı.

145. Quruya çıxartdıq onu, halsız-halsız uzanmışdı.

146. Bir qovun ağacı bitirdik ondan ötrü.

147. Yüz min, yaxud daha çox adama peyğəmbər göndərdik onu.

148. Ona iman gətirdilər. Biz də bir müddətliyə dolandırdıq onları.

149. Bütpərəstlərdən soruşsana, qızlar sənin Rəbbinin, oğlanlar onlarınmı?

150. Yoxsa mələkləri qız yaratmışıq və yaradan zaman da yanımızda idilər?

151. Bir sözdür söyləyirlər uydurub özlərindən.

152. «Allah doğmuş» deyərlər, yalan danışarlar.

153. Qızları oğlanlardan üstünmü tutmuş Allah?

154. Sizə nə olmuş, bu nə sözdür deyirsiz?

155. Düşüncəniz yoxmudur?

156. Yoxsa ki, əlinizdə açıq-aşkar dəlil var?

157. Doğru sözlü, düz əməlli kimsələrsinizsə, gətirin kitabınızı.

158. Allahı cinlərə qohum bildilər. Cinlər də bilirlər, cəhənnəmə sürüləcək bu sözləri deyənlər.

159. Ona qoşub dediklərindən ucalardadır Allah.

160. Yalnız Allaha sadiq qalan bəndələr cəhənnəmlik deyillər.

161. Tapındığınız bütlərlə

162. heç kimi azdıra bilməzsiniz.

163. Yalnız cəhənnəmlik kimsələri azdıra bilərsiniz.

164. Mələklər söyləyərlər: «Bizlərdən hər kimsənin özünün bəlli yeri var,

165. bizlər səf-səf düzülənlərik,

166. Allahı öyənlərik».

167. Bütpərəstlər deyərlər:

168. «Öncəkilər kimi bizim də bir kitabımız olsaydı,

169. Allahın sadiq bəndələrindən olardıq».

170. Kitaba küfr etdilər. Biləcəklər nə imiş küfrün axırı.

171. Göndərilmiş elçilərdən olan bəndələrimizə söz vermişdik,

172. mütləq yardım ediləcək onlara.

173. Şübhəsiz, qaliblər Bizim əsgərlər olacaq.

174. Müəyyən müddətliyə kafirlərdən üz çevir.

175. Sonra bax necə bir cəza verilir onlara. Görəcəklər nə imiş küfrün axırı.

176. Verəcəyimiz əzabı tələsikmi istəyirlər?

177. Elə ki, yurdlarına nazil oldu o əzab, pis günə düşər xəbərdarlıq almış kafirlər.

178. Müəyyən müddətliyə sən onlardan üz çevir,

179. Sonra bax necə bir cəza verilir onlara. Görəcəklər nə imiş küfrün axırı.

180. Ona qoşub dediklərindən ucalardadır güc yiyəsi olan Rəbbin.

181. Salam olsun göndərilmiş elçilərə.

182. Və həmd olsun Allaha, aləmlərin Rəbbinə!