Rəhman və Rəhim Allahın adıyla

1. Əlif ləm mim.

2. Basıldı rumlar

3. yaxın bir ərazidə. Bu məğlubiyyətdən sonra qalib gələcək onlar

4. bir neçə il içində. Əvvəldə də, axırda da Allahındır əmr, verər əmrini. Və sevinər mö'minlər o gün.

5. Allahın yardımıyla sevinmiş onlar. İstədiyi kimsəyə yardım edər, güclüdür, Rəhimdir O.

6. Allah və'd vermişdi bu qələbəni. Və'dini pozan deyil Allah. Fəqət bunu bilməyir əksər adamlar.

7. Dünya həyatını üzdən bilər, axirətdən büsbütün xəbərsiz olar onlar.

8. Məgər öz-özlüyündə düşünməzmidilər, göyləri, yeri, bunların arasında olanları yalnız haqq olaraq yaratmış Allah və hər şeyə bir əcəl tə'yin eləmiş. İnsanların bir çoxu da Rəblərinə qovuşmağı danırlar.

9. Bir gəzələr, dolaşalar yer üzünü, baxalar necə olmuş axırı öncəki nəsillərin. Bunlardan güclü idi o nəsillər. Torpağı əkib-becərərdilər, bunlardan çox tikərdilər, qurardılar. Peyğəmbərlər gəlmişdilər onlara, aşkar dəlillər gətirmişdilər onlara. Onlara zülm eləyən Allah deyildi, özləri özlərinə eləyirdilər.

10. Və pisliklər eləyən kəslərin axırı çox pis olmuş. Danmışdılar Allahın ayələrini, məsxərəyə qoymuşdular bunları.

11. Bir şeyi yaratmağa başlayır, yaradır, sonra onu təkrar yaradır Allah. Onun da dərgahına axır dönəcəksiniz.

12. Mə'yus düşər suçlular qiyamət qopan zaman.

13. Onlar üçün iltimas eləyən çıxmaz qoşduqları şəriklərdən. Bunları danar onlar o zaman.

14. Qiyamət qopan gün dəstələrə bölünərlər.

15. Cənnət bağlarında şadyanalıq eləyər iman gətirən, saleh işlər görən kəslər.

16. O kəslər ki, kafirlik eləyiblər, Bizim ayələri və Mənimlə axirətdə görüşməyi danıblar, əzabla üz-üzə gələcək onlar.

17. Axşamlar, səhərlər öyün Allahı.

18. Günorta da, günortadan sonra da göylərdə və yerdə həmd edilib öyülməli təkcə Odur.

19. Ölüdən dirini, diridən ölünü çıxarar, torpağa ölümündən sonra dirilik verər O. Siz də diriləcəksiz beləcə.

20. Sizi torpaqdan yaratmış. Sonra siz insanlar yer üzünə səpələnmisiz. Bunlar Onun qüdrətinin dəlilləridir.

21. Sizin özünüzdən sizlər üçün taylar yaratmış ki, rahatlıq tapasız taylarınızla. Sevgiylə mərhəmət bərqərar eləmiş aranızda. Bunlar Onun qüdrətinin dəlilləridir. Şübhəsiz, bunlarda ayələr var düşünənlər üçün.

22. Göyləri, yeri yaratmış, dillərinizi, rənglərinizi fərqli eləmiş. Bunlar Onun qüdrətinin dəlilləridir. Şübhəsiz, bunlarda ayələr var elmli kəslər üçün.

23. Gecələr, gündüzlər dincəlirsiniz, gündüzlər Onun lütfündən pay olaraq ruzi arayırsınız. Bunlar Onun qüdrətinin dəlilləridir. Şübhəsiz, bunlarda ayələr var qulaq asanlar üçün.

24. Sizə şimşəyi göstərib canınıza qorxu salır, gözünüzə ümid verir, sonra səmadan su endirir, bu suyla dirildir ölmüş torpağı. Bunlar Onun qüdrətinin dəlilləridir. Şübhəsiz, bunlarda ayələr var düşünüb-daşınanlar üçün.

25. Onun əmrinə müntəzir dayanmış yerlə göy. Torpaqdan çağırantək sizləri qəbirlərdən çıxarsız. Bunlar Onun qüdrətinin dəlilləridir.

26. Onundur göylərdə nə varsa, yerdə nə varsa. Hamı boyun əymiş Ona.

27. Bir şeyi öncə yaradan, yaratdığını öləndən sonra dirildən Odur. Onun əlində bu çox asan bir işdir. Göylərdəki, yerdəki ən gözəl adlar Onundur. Güclüdür, müdrikdir O.

28. Sizə özünüzü nümunə çəkər Allah. Heç razılıq verərmisiz sizə verdiyimiz ruzilərə şərik çıxa əmriniz altında olan kimsələr? Özünüz kimi azad adamlardan necə qorxursunuzsa bunlardan da qorxursunuz eləcə. Düşünüb-daşınanlar üçün açıqlayırıq ayələri birər-birər beləcə.

29. Elmsizlik üzündən əsir olmuş zalımlar istəklərinə. Allahın azdırdığı kimsəni kim yönəldər doğru yola. Bir nəfər də tapılmaz beləsinə yardım edə.

30. Haqq dininə tut üzünü, Allahın fitrətilə yoğrulu dinə doğru. İnsanları yaradanda onların fitrətini bu dinlə yoğurmuş O. Allahın dini dəyişməzdir. Doğru yola biçili bir dindir bu. Fəqət Onun birliyini bilməyir əksər adamlar.

31. Allaha qayıdın, qorxun Ondan, namaz qılın, Ona şərik qoşanlardan olmayın.

32. Ayıraraq bir-birindən dinlərini, ayrı-ayrı firqələrə ayrılar onlar. Hər firqə də öz işində sevinc tapar.

33. Bir sıxıntı üz verəndə insanlara qayıdıb yalvararlar Rəblərinə. Elə ki, rəhmətini onlara daddırdı Allah, bə'zisi yenə də başlayar Ona şərik qoşmağa,

34. verdiyimiz ne'mətə xor baxmağa. Dolanın kef içində. Onsuz da biləcəksiz axırı nə imiş bunun.

35. Yoxsa bir dəlil göndərmişdik onlara, Allaha şərik qoşmağı onlara deyən dəlil?

36. İnsanlara bir ne'mət dadızdıranda sevinərlər. Fəqət öz əllərilə gördükləri işlərin bəlasına düşəndə ümidini üzərlər rəhmətimizdən.

37. İstədiyi kimsəyə ruzini bol-bol verər, istədiyi kimsəyə müəyyən miqdarda verər Allah. Bilməzmi oldular bunu? Şübhəsiz, bunda ayələr var iman gətirənlər üçün.

38. Qohumun, yoxsulun, yolçunun haqqını ver. Allahın rizasını qazanmaq istəyənlər üçün bu savab olar. Uğura uğrayar onlar.

39. Malınızı artırmaq üçün faizlə verdiyniz şey gəlir gətirən deyil Allahın dərgahında. Fəqət Allahın rizasını qazanmaq üçün zəkat olaraq verdiyiniz Onun dərkahında sizə savab gətirər. Qat-qat artar savabları belələrinin.

40. Sizi öncə yaradan, sonra sizə ruzi verən, sonra öldürən, sonra da dirildən Allahdır. Ona qoşduğunuz şəriklərdən belə bir iş görən varmı? Ona qoşduqları şeylərdən ucadadır, ucalardan ucadır O.

41. Qazandığı günahları üzündən dənizdə, quruda bəla üz verər insanlara. Bə'zi işləklərinin əvəzini Allah onlara daddırar ki, bəlkə tövbə edələr, haqqa dönələr.

42. De ki, «Gəzin, dolaşın yer üzünü, baxın necə olmuş axırı öncəki nəsillərin. Çoxu da müşriklər idi».

43. Allahın o qaçılmaz günü nə qədər ki, gəlməmiş, doğru yola yönələn dinə doğru tut üzünü. O gün insanlar bir-birindən seçilib ayrılacaqlar.

44. Kafir kəsin küfrü onun zərərinə, əməli saleh kəsin işi bunun xeyrinə və cənnətdə yeri hazır olar.

45. Çünki iman gətirənlərə, əməli salehlərə Öz lütfündən pay olaraq mükafat verər Allah. Kafirləri sevməz O.

46. Küləkləri müjdəçilər olaraq göndərər ki, rəhmətindən dadızdırsın sizlərə. Gəmiləri Öz əmrilə üzdürər ki, Onun lütfündən pay umasız. Ona şükr eləyəsiz. Bunlar Onun qüdrətinin dəlilləridir.

47. Səndən öncə də hər qövmə öz içindən peyğəmbərlər göndərmişdik. Aşkar dəlillər gətirmişdilər soydaşlarına. Bunlar isə dandılar onları. Biz də intiqam aldıq günah yiyələrindən. Mö'minlərə yardım eləmək Bizim borcumuz idi.

48. Küləkləri göndərən, küləklərlə buludları həyəcana gətirən, buludları göy üzünə istədiyi kimi yayan Allahdır. Görürsən, buludların içindən necə süzülür yağış. Bəndələrindən dilədiyi kimsəyə göndərər bu yağışı, sevindirər onları.

49. Yağış yağmazdan öncə yağıntıdan ümidini üzmüşdülər.

50. Bir nəzər sal Allahın rəhmətinin izlərinə. Ölmüş torpağı gör necə dirildər O. Ölüləri dirildən tək Allahdır, şübhəsiz. Hər şeyə qadirdir O.

51. Yaşıllığı saraldan bir külək göndərsək əgər, başlayarlar nankor-nankor danışmağa.

52. Eşitməz səni ölülər, eşitməz səni üz çevirib gedən karlar.

53. Korları da sapqınlıqdan xilas eləyib doğru yola gətirməyə sənin gücün yetən deyil. Yalnız Bizim ayələrə iman gətirənlərə eşitdirə bilərsən kəlamlarını. Müsəlmandır onlar.

54. Sizi zəif yaradan, sonra sizə güc verən, sonra sizi zəiflədən, qocaldan Allahdır. Dilədiyini eləyəndir O. Hər şeyi biləndir. Hər şeyə qadirdir O.

55. Qiyamət qopan zaman suçlular and içərlər dünyada və qəbirdə qaldıqları bir saatdan çox olmaz. Dünyada aldanaraq beləcə haqdan dönərdi onlar.

56. Elmli, imanlı kimsələr «Qiyamətə qədər qaldığınız o müddət yazılmış öncədən Allahın yazısında. İndi bu gördüyünüz dirilmə günüdür. Siz bunu gözləmirdiniz».

57. Həmin gün zalımların üzrxahlıq etməsindən nə fayda. Zalımlardan heç tələb də olunmaz haqq yoluna qayıdalar.

58. Bu Qur'anda hər şeydən insanlara nümunələr çəkmişik. Ancaq yenə onlara bir ayə gətirən zaman, «Siz yalnız batil işlər yiyəsi kimsələrsiz» söyləyər kafirlər.

59. Bilməzlərin ürəyini möhürlər Allah beləcə.

60. Səbrli ol, haqdır Allahın və'di. Qoy sənin səbrini sarsıtmasın inanmayan kimsələr.