Rəhman və Rəhim Allahın adıyla

1. Rəhman

2. öyrətmiş Qur'anı,

3. yaratmış insanı,

4. öyrətmiş ona nitqi, bəyanı.

5. Bir hesaba görədir günəşlə ayın doğmaq anı, batmaq anı.

6. Ulduzlar, ağaclar baş əyər Ona.

7. Ucaya qaldırmış göyü. Hər şey üçün var eləmiş tərəzini-mizanı.

8. Həddinizi aşmayın, hər şeydə gözləyin tərəzini-mizanı.

9. hər şeyi insafla çəkin, əskik çəkməkdən çəkinin, gözləyin tərəzini-mizanı.

10. Yeri yaradan zaman buradakı hər canı nəzərə almış Allah.

11. Meyvələr, salxımları sallanan xurma ağacları var burada.

12. Daddırmış canlılara dənli bitkilərin, ətirli otların dadını.

13. Elə isə hansı ne'mətini danırsınız Rəbbinizin, deyin bunun adını.

14. Saxsı qablar sayaq bişmiş gildən yaratmışdır insanı.

15. Və tüstüsüz bir oddan yaratmış cin tayfasını.

16. Elə isə hansı ne'mətini danırsınız Rəbbinizin, deyin bunun adını.

17. İki şərqin, iki qərbin [yay və qış aylarında] Rəbbidir O.

18. Elə isə hansı ne'mətini danırsınız Rəbbinizin, deyin bunun adını.

19. Şirin sulu, acı sulu iki dəniz yaratmış, qovuşuq görünür gözə onlar.

20. Qovuşa bilmirlər biri-birinə, maneə kəsibdir aranı.

21. Elə isə hansı ne'mətini danırsınız Rəbbinizin, deyin bunun adını.

22. Bu dənizlərdən çıxarırlar incini və mərcanı.

23. Elə isə hansı ne'mətini danırsınız Rəbbinizin, deyin bunun adını.

24. Dənizdəki dağ əzəmətli gəmilər Onun əmrilə atırlar addımlarını.

25. Elə isə hansı ne'mətini danırsınız Rəbbinizin, deyin bunu adını.

26. Fanidir həyatı yer üzündə hamının.

27. Təkcə cəlal yiyəsi, kərəm yiyəsi Rəbbin qalandır.

28. Elə isə hansı ne'mətini danırsınız Rəbbinizin, deyin bunun adını.

29. Hər şeyi Ondan istər göylərdə, yerdə olan kimsələr. Hər zaman iş başındadı.

30. Elə isə hansı ne'mətini danırsınız Rəbbinizin, deyin bunun adını.

31. Ey iki ağır varlıq olan insan və cin! Sizlərə də vaxt taparıq, sizlərin də apararıq hesabını.

32. Elə isə hansı ne'mətini danırsınız Rəbbinizin, deyin bunun adını.

33. Ey insanlar və cinlər! Göylərlə yerin ətrafından o yana aşa bilərsizsə aşın görüm necə aşırsız. Aşa da bilməzsiniz Allahın verdiyi bir güc olmadan.

34. Elə isə hansı ne'mətini danırsınız Rəbbinizin, deyin bunun adını.

35. Tüstüsüz od, odsuz tüstü göndərilər üstünüzə. Görməzsiniz bir kimsənin yardımını.

36. Elə isə hansı ne'mətini danırsınız Rəbbinizin, deyin bunun adını.

37. Yarılarsa göy, qızıl gül kimi pardaxlanarsa göy, yağ kimi əriyərsə göy, necə olar halınız?

38. Elə isə hansı ne'mətini danırsınız Rəbbinizin, deyin bunun adını.

39. Batdığı günaha görə sorğuya tutmazlar o gün nə cini, nə insanı.

40. Elə isə hansı ne'mətini danırsınız Rəbbinizin, deyin bunun adını.

41. Yzlərindən tanınar suçu olan kimsələr. Yapışarlar onların saçından, ayağından.

42. Elə isə hansı ne'mətini danırsınız Rəbbinizin, deyin bunun adını.

43. Suçluların dandığı cəhənnəm budur.

44. Vurnuxarlar arasında qaynar suyla cəhənnəm odunun.

45. Elə isə hansı ne'mətini danırsınız Rəbbinizin, deyin bunun adını.

46. İki cənnət gözləyir Rəbbinin iki əli arasında durmaqdan qorxan adamı.

47. Elə isə hansı ne'mətini danırsınız Rəbbinizin, deyin bunun adını.

48. Növ-növ ağaclar var hər ikisində.

49. Elə isə hansı ne'mətini danırsınız Rəbbinizin, deyin bunun adını.

50. İki bulaq axar oralarda.

51. Elə isə hansı ne'mətini danırsınız Rəbbinizin, deyin bunun adını.

52. Hər meyvədən növ-növ yetişər hər ikisində.

53. Elə isə hansı ne'mətini danırsınız Rəbbinizin, deyin bunun adını.

54. Qalın ipəkdən biçili yorğan-döşək içində dincələrlər. Hər iki cənnətin dəriləsi meyvələri bir əl uzadımında.

55. Elə isə hansı ne'mətini danırsınız Rəbbinizin, deyin bunun adını.

56. Gözlərini yalnız öz taylarına zilləyən hurilər var orada. Onlara öncədən dəyməmiş heç nəfəsi nə cinin, nə insanın.

57. Elə isə hansı ne'mətini danırsınız Rəbbinizin, deyin bunun adını.

58. Bu hurilər andırır yaqutu və mərcanı.

59. Elə isə hansı ne'mətini danırsınız Rəbbinizin, deyin bunun adını.

60. Yaxşılıq olmazmı məgər mükafatı yaxşılığın, ehsanın?

61. Elə isə hansı ne'mətini danırsınız Rəbbinizin, deyin bunun adını.

62. Bunlardan savayı daha iki cənnət də var.

63. Elə isə hansı ne'mətini danırsınız Rəbbinizin, deyin bunu adını.

64. Yamyaşıldır hər ikisi.

65. Elə isə hansı ne'mətini danırsınız Rəbbinizin, deyin bunun adını.

66. İki fəvvarə fışqırır oralarda.

67. Elə isə hansı ne'mətini danırsınız Rəbbinizin, deyin bunun adını.

68. Oralarda dadarlar növ-növ meyvələrin, xurmanın, narın dadını.

69. Elə isə hansı ne'mətini danırsınız Rəbbinizin, deyin bunun adını.

70. Gözəl əxlaqlıdır, xoş sifətlidir oraların hər qadını.

71. Elə isə hansı ne'mətini danırsınız Rəbbinizin, deyin bunun adını.

72. Qərar tutmuş bu hurilər çadırlarında.

73. Elə isə hansı ne'mətini danırsınız Rəbbinizin, deyin bunun adını.

74. Onlara öncədən dəyməmiş heç nəfəsi nə cinin, nə insanın.

75. Elə isə hansı ne'mətini danırsınız Rəbbinizin, deyin bunu adını.

76. Gözəl-gözəl xalçaların üstündə yaşıl-yaşıl yastıqlara söykənər cənnət əhli hurilərlə yan-yana.

77. Elə isə hansı ne'mətini danırsınız Rəbbinizin, deyin bunun adını.

78. Ucalardan ucadır cəlal yiyəsi, kərəm yiyəsi Rəbbin sənin.