Rəhman və Rəhim Allahın adıyla

1. Əlif ləm mim ra. Bunlar Kitabın ayələridir. Rəbbindən sənə nazil olan Qur'an haqdır. Amma buna inanmayır əksər adamlar.

2. Allahdır görə biləcəyiniz dirəklərsiz göyləri ucaltmış olan, sonra ərşdə qərar tutan və mə'lum bir müddətliyə hərəkətdə olan günəşi və ayı buyruğu altına alan. İşləri yoluna qoyan ayələri birər-birər açıqlayar bəlkə iman gətirəsiz Rəbbinizə qovuşmalı olduğunuza.

3. Yer üzünü döşəyib düzənləyən, orada möhkəm duran dağlar quran, axar çaylar var eləyən, hər meyvədən cüt-cüt yetişdirən, gecəni-gündüzə bürüyən Odur. Şübhəsiz, bunlarda ayələr var düşünən kimsələr üçün.

4. Bir-birinə qonşu olan sahələr, üzüm bağları, tarlalar, çox kök üstə, tək kök üstə bitən xurma ağacları mövcuddur yer üzündə. Hamısı da bir su ilə sulanır, amma dadına görə üstün tuturuq bir-birindən onları. Şübhəsiz, bunlarda ayələr var düşünüb-daşınanlar üçün.

5. Təbii, təəccüb eləyəcəksən, təəccüblüdür onların bu sözləri: «Biz torpağa qarışandan sonramı yenidən xəlq olacağıq?» Rəblərini dananlardır belələri. Zəncirlər vurulmuş boyunlarına. Od əhlidir onlar, od içində əbədilik qalarlar.

6. Yaxşılıqdan öncə pislik gözləyirlər səndən tələsik. Özlərindən öncəki oxşarları da almışdılar cəzalarını. İnsanların zülmünü, şübhəsiz, bağışlar Rəbbin. Və şübhəsiz, cəzası da şiddətlidir Rəbbinin.

7. «Göndərməli deyildimi Rəbbi ona [Muhammədə] bir ayə?» deyər küfr eləyən kimsələr. Sən ancaq öncədən xəbərdarlıq eləyənsən. Hər qövmün özünün yol göstərən peyğəmbəri var.

8. Hər dişinin nəylə yükləndiyini, balalığının düşürdüyünü, böyütdüyünü bilir Allah. Hər şey miqdar ilədir Allahın dərgahında.

9. Görülməzi, görüləni biləndir, uludur, ucalardan ucadır O.

10. Sizlərdən sözünü deməyən də, deyən də, gecələr gizlənən də, gündüzlər görünən də bəllidir Ona.

11. İnsanı irəlidən, arxadan izləyən mələklər var, Allahın əmrilə hifz eləyirlər onu. Nə qədər ki, öz halını dəyişdirmir adamlar, dəyişdirməz onların halını Allah. Bir qövmə pislik etmək istədimi, alınmaz qarşısı Onun qəsdinin. Allahdan başqa bir hamisi də olmaz onların.

12. Yrəyinizə qorxu salan, gözünüzdə ümid işığı yandıran şimşəyi göndərən Odur. Yağışla yüklü buludları meydana gətirən Odur.

13. Onu alqışlayır göy gurultusu, mələklər də həmd eləyirlər Ona Onun qorxusundan. Allahın barəsində mübahisə eləyən kimsələrin üstünə ildırımlar göndərir O, istədiyi kimsəni vurur O. Hamıdan güclüdür O.

14. Haqqa doğru çağırış [«lə iləhə illə-llah» - «Allahdan başqa tanrı yoxdur»] təkcə Ona doğru yönəlmiş. Və o kəslər ki, Ondan başqasına dua edirlər, duası müstəcəb olmaz onların. Onların o kəsə bənzəri var ki, su içmək üçün ovuclarını suya uzadar. Suya doğru əyilməsə, ovcuna su ala bilməz. Boşa çıxar kafirlərin duası.

15. Göylərdə kim varsa, yerdə kim varsa səcdə edər Allaha könüllü ya könülsüz. Səhər ertə, axşamçağı hamının kölgəsi də səcdə edər Allaha.

16. Söylə «Kimdir göylərin və yerin Rəbbi?» De «Allahdır!» De ki, «Onu qoyub nə yararı, nə zərəri olmayan bütlərimi dost seçdiniz özünüzə?» De ki, «Korla görən bir-birinə bərabərmi tutular? Yaxud, zülmətlə nur bir-birinə bərabərmi tutular?» Yoxsa ki, Allaha qoşduqları şəriklər də Onun kimi yaratmağa başlamışlar və müşriklər elə zənn eləmişlər bu şəriklər yaratdığını Onun kimi yaradırlar. De ki, «Hər şeyin xaliqi Allahdır. O hər şeyi qəhr eləyən tək Tanrıdır».

17. Göydən su endirər, dolub daşar dərələr. Sel alıb aparar üzə çıxan köpüyü. Bəzək-düzək, yaxud başqa bir şey düzəltməkçin odda əritdiklərinizin də üstündə buna bənzər köpük olar. Haqdan batili belə bir bənzətmə ilə ayırar Allah: köpük yox olasıdır, insanlara fayda verən şey isə yer üzündə qalasıdır. Misalları beləcə açıqlar Allah.

18. Gözəl bir əcir gözləyir Rəblərinin çağrışına səs verənləri. O kəslər ki, gəlməmişlər Onun çağrışına, yer üzündə nə varsa hamısını, üstəlik də bir o qədər onların olsa belə verərdilər bunları fidyə olaraq təki qurtulaydılar Allahın əzabından. Onlardır hesabına pislik düşən kimsələr. Cəhənnəmdir onların yuvası. Pisdən pis yataqdır ora!

19. Rəbbinin sənə göndərdiyinin haqq olduğunu bilən kimsə kor olan kimsəyəmi tay tutular? Ancaq ağıl yiyələri bunu düşünüb anlar.

20. O kəslər ki, yetirirlər yerinə Allaha verilən sözü, pozmayırlar andlaşmanı,

21. o kəslər ki, birləşdirilməsini Allahın buyurduğu şeyi birləşdirirlər [qohumlarla, mö'minlərlə əlaqəni üzmürlər, birini o birindən ayırmadan bütün peyğəmbərlərə inanırlar] və o ən pis hesabdan qorxurlar

22. və o kəslər ki, Rəblərinin rizasını diləyərək səbr eləyirlər, namaz qılırlar, verdiyimiz ruzidən gizlində-açıqda xərcləyirlər xeyirliyə və yaxşılıqlar edə-edə pisliyə güc gəlirlər - onlarındır bu dünyanın gözəl son ucu.

23. Adn cənnətlərinə girər onlar. Ata-anaları və arvad- uşaqlarından əməli düz olanlar da oralara girərlər. Mələklər də hər qapıdan girərək onların yanına

24. «Səbrinizə görə salam olsun sizlərə, nə gözəldir dünyanın son ucu» deyərlər.

25. O kəslər ki, Onunla əhdləşmədən sonra pozurlar Allaha verilən sözü, kəsirlər birləşdirilməsini Allahın buyurduğu şeyi və pozğunçuluq törədirlər yer üzündə - lə'nətə gələr onlar, onlar üçün hazırlanmış bu dünyanın pis son ucu.

26. Allah istədiyi kimsəyə ruzisini bol verər, istədiyi kimsəyə müəyyən miqdar ilə. Bu dünya həyatında sevinc tapmışdır onlar [Məkkə əhli]! Axirətin yanında ötəridir dünya həyatı.

27. «Göndərməli deyildimi Rəbbi ona bir ayə?» deyər küfr eləyənlər. De ki, «İstədiyi kimsəni azdırar, Ona üz tutan kəsi doğru yola yönəldər Allah».

28. O kəslər ki, iman gətirmişlər və Allahı ana-ana rahatlanmış ürəkləri, bilsinlər, yalnız Allahı anmaqla rahatlanar ürəklər.

29. O kəslər ki, iman gətiriblər, saleh işlər görüblər, xoşbəxt həyat, gözəl-gözəl yerlər gözləyir onları.

30. Biz səni də göndərdik bir ümmətə elçi olaraq. Neçə-neçə ümmət gəlib getmiş bundan öncə. Göndərdik ki, oxuyasan sənə vəh yetdiyimizi Rəhmana küfr eləyən kimsələrə. De ki, «Mənim Rəbbimdir O. Ondan başqa tanrı yoxdur. Ona güvəndim, Onun dərgahınadır mənim yönümüm».

31. Dağları yerindən tərpətsəydi də, torpağı parça-parça eləsəydi də, ölüləri danışdırsaydı da Qur'an, imana gəlməzdilər. Bütün işlər Allahın əlindədir. İmana gələn kəslər məgər bilməzmidilər, Allah istəsəydi əgər, insanları hamılıqla yönəldərdi doğru yola. İşlədiyi işləklərinə görə bəla döyər qapısını küfr eləyən kimsələrin, yaxud yurdlarına yaxın yerdə qərar tutar bu bəla. Beləcə davam edər onların güzəranı ta o vaxta qədər ki, gələr Allahın və'di axır. Və'dini pozan deyil Allah.

32. Səndən öncəki peyğəmbərlərə də istehzayla yanaşdılar. Möhlət verdim kafirlərə, sonra da yaxaladım onları. Görəydin bir Mən necə cəza verdim onlara!

33. Hər kəsin qazancına göz olan Allahlamı bərabər tutular hər şeydən bixəbər bütlər. Allaha şəriklər qoşan kəslərə de ki, «Bunların adları nədir, kimdir bunlar, deyin Ona? Yoxsa ki, yer üzündə Onun bilmədiyi bir şeyi Ona bildirirsiniz? Yoxsa boş-boş sözlər ilə aldadırsız özünüzü?» Bər-bəzəkli görünmüş küfr eləyən kəslərə işlətdiyi hiylələr. Sapmışlar doğru yoldan. Allahın azdırdığına yol göstərən tapılmaz.

34. Əzab görər belələri bu dünya həyatında. Axirət əzabı isə bundan daha ağır. Bir kimsə də tapılmaz Allahın əzabından qoruya bu kəsləri.

35. Müttəqillərə və'd edilən cənnət içində çaylar axır, yeygi də, kölgələr də daimidir burada. Müttəqilərin tale payı budur. Kafirlərinsə tale payı cəhənnəm odudur.
36. O kəslərə ki, Biz Kitab vermişdik, sənə nazil olana sevinər onlar. Əleyhdar qruplar içində isə eləsi var inkar edir Qur'anın bir qismini. De ki, «Mənə əmr olunub təkcə Allaha tapınım, Ona şərik qoşmayım. Ona doğru çağırıram hamını, Onun dərgahınadır mənim yönümüm».

37. Qur'anı ərəbcə bir hökm olaraq göndərdik beləcə. Sənə elm gələndən sonra kafirlərin istəklərinə uyacaq olsan, Allahın dərgahında sənə nə bir dost tapılar, nə də səni bir qoruyan.

38. Biz səndən öncə də elçilər göndərmişdik. Onlara da zövcələr, uşaqlar vermişdik. Elçilərdən heç biri Allahdan iznsiz gətirə bilməzdi hər hansı bir ayəni. Hər vaxtın bir yazısı var.

39. Dilədiyini pozub silər, dilədiyini sabit saxlayar Allah. Onun dərgahındadır yazıların anası.

40. Göstərsək də sənə onlara və'd etdiyimiz əzabın bir qismini, alsaq da sənin canını, sənin borcun haqqı bəyan eləməkdir, bizimki haqq-hesab çəkmək.

41. Məgər görməzmidilər, yer üzünə gələ-gələ onu necə daraldırıq Biz hər tərəfdən. Allahdır hökm vörən. Alınmaz qarşısı Onun hökmünün. Hesabı tez aparandır O.

42. Onlardan öncəkilər də quramalar qurmuşdular. Bütün quramaları qırar Allah. Hər kəsin nə qazandığını bilir O. Və kafirlər də biləcəklər kimindir bu dünyanın xoşbəxt son ucu!

43. «Sən elçi deyilsən» deyər küfr eləyənlər. De ki, «Mənimlə sizin aranızda şahidlik üçün təkcə Allah və Kitabı bilən kəslər bəs eləyər».