Rəhman və Rəhim Allahın adıyla

1. And içirəm qiyamət gününə,

2. and içirəm peşmançılıq çəkən cana, insan öləndən sonra diriləcəkdir.

3. İnsan eləmi güman eləyir ki, sümüklərini bir yerə yığmağa çatmaz gücümüz?

4. Onu xırda barmaqlarına qədər təzədən yığmağa, əlbəttə, Biz qadirik.

5. Ancaq yenə qiyaməti danmaq istər,

6. soruşar: «Axı qiyamət günü nə vaxt gələcək?»

7. Elə ki, qamaşdı gözlər,

8. tutuldu ay,

9. bir yerə cəm oldu günəşlə ay,

10. o gün insan söyləyər: «Hara qaçım görəsən?»

11. Sığınmağa bir yeri olmaz o zaman.

12. Rəbbinin hüzurunda durar o gün.

13. O gün əvvəldən axıra qədər nə iş görmüşsə bildirilər insana birər-birər.

14. Görüb tanıyar insan o gün özünü.

15. Nə qədər dil töksə də yox faydası.

16. Sənə vəhy olunanda Qur'an, dərhal dillənmə, dinmə.

17. Onu sənin ürəyində cəm eləmək, onu sənə oxutdurmaq Bizim öhdəmizdədir.

18. Biz bunu охuyanda izlə

19 Sonra bunun açımı bizim öz öhdəmizdə,

20. Siz bu ötəri dünyanı sevirsiniz,

21. axirətlə işiniz yox.

22. Kiminin üzündən nur yağır o gün,

23. Rəblərinə baxırlar.

24. Kiminin də üzündən qaş-qabaq tökülür o gün.

25. Bilirlər qırılacaq belləri.

26. Boğaza yığılanda insanın canı

27. başının üstündəkilər deyərlər: «Bundan ötrü çarə tapan yoxmu məgər?»

28. Və artıq yəqin eləyər labüddür dünyadan ayrılmağı.

29. Qıçları dolaşar bir-birinə.

30. Rəbbinin hüzuruna sürülər o gün hamı.

31. Haqqı təsdiq eləmədi, namaz qılmadı.

32. Dandı haqqı, döndü haqdan.

33. Sonrada qayıtdı ailəsinin içinə özünü darta-darta.

34. Yazıqlar olsun sənə, yazıqlar!

35. Bir də yazıqlar olsun sənə, yazıqlar!

36. Yoxsa insan elə güman eləyir rahat qoyacaqlar onu?

37. Axan dölün damlası deyildimi?

38. Sonra qan laxtasına dönmədimi, Allah onu yaradıb düzəltmədimi?

39. Ondan bir-birinin taylarını, kişiylə qadını Allah yaratmadımı?

40. Ölüləri diriltməyə məgər qadir deyilmi bunları edən Allah?