Rəhman və Rəhim Allahın adıyla

1. Yaxınlaşmış qiyamət saatı, yarılmış ay.

2. Bir ayə görsələr belə haqdan üz döndərərlər. «Əzəlki cadudur bu» deyərlər.

3. Danarlar Peyğəmbəri, uyarlar öz nəfslərinə. Hər şey tutar öz yerini.

4. İbrət dərsli neçə-neçə əhvalatlar danışıldı onlara.

5. Bütöv bir hikmətlə yoğruludur hərəsi. Xəbardarlıq eləməyin, görünür, yox faydası.

6. O inkar elədiklərinə carçı çağıran gün, onlardan üz çevir sən.

7. Gözləri təlaşla dolu qəbirlərdən çıxarlar, çəyirtkələr tək ətrafa dağılarlar.

8. Carçıya sarı tələsərlər. «Bu gün çox çətin gündür» deyər kafirlər.

9. Bunlardan da öncə Nuh qövmünün adamları danmışdılar bəndəmizi. «Bu dəlidir» demişdilər. Əlacsız qalmışdı Nuh.

10. Yalvardı Rəbbinə: «Mən məğlubam, yardım elə».

11. Açdıq göyün qapılarını, göydən leysan yağdı yerə.

12. Bulaqlar qaynatdıq yerin yarıqlarından. Allahın əmrini yerinə yetirmək üçün göylə yerin suları birləşib axın oldu.

13. Taxtadan, mıxdan qayırılmış bir gəmiyə mindirdik Nuhu.

14. Danılmış peyğəmbərə yardım olaraq gözümüz önündə üzürdü gəmi.

15. Biz bunu elədik ki, ibrət ola sonrakı nəsillərə. Bu ibrətdən kim barınmaq istəyir?

16. Axır gördülərmi verdiyim əzab nə imiş, bildilərmi elədiyim xəbərdarlıq nə imiş?

17. Biz Qur'anı yaddaş üçün asan elədik, sadə elədik. Kim barınmaq istəyir bu Qur'andan?

18. Ad qövmü də danmışdı peyğəmbərini. Axır gördülərmi verdiyim əzab nə imiş, bildilərmi elədiyim xəbərdarlıq nə imiş?

19. Başdan-başa nəhs olan bir gündə vıyıltılı sərt külək göndərdik üstlərinə.

20. Kökündən qopmuş xurma ağacları kimi adamları qatıb qabağına aparırdı külək.

21. Axır gördülərmi verdiyim əzab nə imiş, bildilərmi elədiyim xəbərdarlıq nə imiş?

22. Biz Qur'anı yaddaş üçün asan elədik, sadə elədik, Kim barınmaq istəyir bu Qur'andan?

23. Xəbərdarlıq eləyən peyğəmbərini Səmud qövmü də dandı.

24. Dedilər: «Öz içimizdən olan bir bəşərin ardıncamı biz hamımız getməliyik? Getsək, sapqınlıq içindəyik, dəliyik, deməli.

25. İçimizdə təkcə onamı vəhy verilmiş? Yalançının, lovğanın biridir o».

26. Sabah [qiyamət günü] hökmən biləcəklər kim yalançı, kim lovğadır.

27. Onları sınaqdan keçirmək üçün dəvəni göndərən Biz idik. Salihə demişdik: «Gözlə gör nə iş görəcəklər, səbr elə nə eləsələr.

28. Və bildir ki, bulağın suyundan onların da, dəvənin də növbə ilə payı var».

29. Çağırdılar özlərinin bir dostunu, bu da alıb qılıncını kəsdi dəvəni.

30. Axır gördülərmi verdiyim əzab nə imiş, bildilərmi elədiyim xəbərdarlıq nə imiş?

31. O tək gurultunu göndərdik üstlərinə. Çörə-çöpə, çubuğa çevrildilər.

32. Biz Qur'anı yaddaş üçün asan elədik, sadə elədik. Kim barınmaq istəyir bu Qur'andan?

33. Lut qövmü də danmışdı xəbərdarlıq eləyən peyğəmbərini.

34. Daş yağdıran yel göndərdik üstlərinə. Yalnız Lutun ailəsini bəladan qurtardıq səhər çağı.

35. Bu bir ne'mət idi verdik ona dərgahımızdan. Beləcə mükafatlandırırıq Allaha şükr eləyən kimsələri.

36. Lut onları qorxuzmaq istəmişdi əzabımızla. Onlarsa şübhəylə yanaşdılar onun xəbərdarlığına.

37. Ona qonaq gələn mələklərə onların gözü düşdü. Kor elədik gözlərini. «Di dadın əzabımı, bilin, elədiyim xəbərdarlıq nə imiş».

38. Bir səhər qovuşdular əbədi bir əzaba.

39. «Di dadın əzabımı, bilin, elədiyim xəbərdarlıq nə imiş».

40. Biz Qur'anı yaddaş üçün asan elədik, sadə elədik. Kim barınmaq istəyir bu Qur'andan?

41. Fir'on ailəsinə xəbərdarlıq gəlib çatdı.

42. Ayələrimizin hamısını dandılar. Biz də güclü, müqtədir Allahın əzabına uğratdıq onları.

43. Siz [Qüreyş bütpərəstlərinə müraciətlə] kafirlər onlardan artıqmısınız? Bəlkə ilahi Kitablarda sizə əzabdan bəraət yazılmış?

44. Yoxsa [Peyğəmbərə müraciətlə] «Biz qalib bir dəstəyik» deyirlər?

45. Dağılacaq dəstələri, baş götürüb qaçacaqlar.

46. Onlara və'd edilən əzabın və'dəsidir qiyamət saatı. Çox dəhşətli, çox acıdır bu saatın əzabı.

47. Bir sapqınlıq, bir çılğınlıq içindədir suçlular.

48. Yzü üstə od içinə sürüklənən gün, «Di dadın cəhənnəm əzabını» deyilər onlara.

49. Bir ölçü gözləyərək yaratmışıq hər şeyi.

50. Bir göz qırpımında əmrimiz yetər yerinə.

51. Sizin kimi neçə-neçə nəsilləri məhv eləmişik. Bir kimsə tapılarmı dərsini ala bundan?

52. Görülən hər bir iş qeydə düşər əməl kitablarında.

53. Xırda-iri nə varsa, yazılar sətir-sətir.

54. Cənnətlər içindədir, çaylar qırağındadır müttəqilər.

55. Müqtədir hökmdarın dərgahındakı haqq məclisində əyləşmiş onlar.