Rəhman və Rəhim Allahın adıyla

1. Qaf. And olsun bu Qur'ani Məcidə,

2. kafirlər görəndə ki, onlara öz içindən xəbərdarlıq eləyən bir peyğəmbər gəlib çıxmış, çaşbaş qalıb dedilər: «Bu çox qəribə işdir.

3. Öləndənmi sonra, torpağa dönəndənmi sonra diriləcəyik? Həyata qayıtmamız çox müşkül bir işdir».

4. Biz artıq bilirik onlardan kimlər yem olacaq torpağa. Dərgahımızda saxlanılan yazıda qeyd edilmiş hər şeyin barəsində.

5. Haqq gəldimi onlara, onu dərhal dandılar. Tərəddüd içindədir, çaşbaşdır onlar.

6. Başlarının üstündəki göyə bir nəzər salalar, görələr onu necə qurmuşuq, necə bəzəmişik. Bircə çat yeri də yoxdur bu göydə.

7. Yer üzünü də döşədik. Ystündə möhkəm dayanan dağlar yaratdıq, gözəl-gözəl bitkilərdən növ-növ bitirdik.

8. Allaha üz tutan hər bəndə üçün aşkar bil dəlil olaraq, öyüd olaraq Biz bunları elədik.

9. Xeyir-bərəkət daşıyan su göndərdik səmadan. Bu su ilə gözəl bağlar var elədik, biçinlik olan dənli bitkilər,

10. sıx salxımlı uca xurma ağacları yetirdik

11. bəndələrə ruzi olaraq. Və ölü bir ölkəni diriltdik. İnsanlar da beləcə qəbirlərdən çıxaraq dirilərlər.

12. Onlardan öncə də danmışdılar göndərilmiş elçiləri. Nuh qövmü, Ras camaatı, Səmud qövmü,

13. Ad qövmü, Fir'on, Lutun qardaşları,

14. əl-Eykə camaatı, Tubbə qövmü - hər biri danmışdı peyğəmbərini və və'd verdiyim o əzab haqlamışdı onları.

15. İlk xilqəti yaradanda məgər yorulduqmu Biz? Onlarsa bir daha xəlq olacaqlarına şəkk gətirirlər.

16. İnsanı yaradan Bizik, Biz də bilirik nəfsi ona nə pıçıldayır. Biz ona şah damarından daha yaxınıq.

17. Hər şeyi qeydə alan iki mələk əyləşmiş sağında və solunda.

18. Ağzından söz çıxdımı, hazırdırlar yanında bu gözətçi mələklər.

19. Vahimə gətirən ölüm haqdır. Bu sənin [kafirə müraciətlə] əzəldən bəri qorxub qaçdığın şeydir,

20. Sur çalınır. Bu, kafirlərə və'd verilmiş olan gündür.

21. Hər kəs öz yanında onu məhşərə çəkib aparan bir mələklə və onun əməllərinə şəhadət verən bir mələklə gəlib çıxır.

22. «Sən bundan dünyada xəbərsizdin. İndi qəflət pərdəsini üstündən götürmüşük, gözlərin artıq itidir».

23. «Budur əməllərinin yazısı» deyir yanındakı mələk.

24. «Aparıb tullayın cəhənnəmə hər natərəs kafiri,

25. xeyir işə əngəl olan, zalım olan, dinə şəkk gətirən hər kəsi.

26. O kəsi ki, başqa bir tanrını şərik qoşardı Allaha. Atın onu şiddətli əzab içinə».

27. «Rəbbimiz! Onu mən azdırmadım, dərin bir sapqınlıq içində vurnuxurdu özü öncədən» deyir yanındakı şeytan.

28. «Dərgahımda sözləşməyə son qoyun. Bu günün gələcəyini öncədən demişdim sizə.

29. Dediyim söz bir olar. Bəndələrə də zülm eləyən deyiləm» deyir Allah.

30. O gün cəhənnəmə: «Doldunmu?» deyərik. «Yenə varmı?» söyləyər.

31. Müttəqilərə cənnəti yaxın eləyərlər. Əslində heç uzaq da deyil o cənnət.

32. Onlara deyilər: «Bu, Allaha üz tutanlar üçün, Onun qoyduğu sədləri qoruyanlar üçün və'd edilən bir yerdir.

33. Bu, Rəhmanı görməyə-görməyə Ondan qorxan, Onun hüzuruna tərtəmiz ürəklə gələn kimsəyə və'd edilən bir yerdir.

34. Sağ-salamat girin oraya. Bu gün əbədiyyətə qovuşmaq günüdür».

35. Nə istəsələr taparlar orada. Hər şey artıqlamasilə var Bizim dərgahımızda.

36. Onlardan öncə neçə-neçə nəsilləri məhv eləmişik. Bu nəsillər onlardan daha güclü idilər, diyar-diyar dolaşaraq ölümdən qaçmağa yer gəzirdilər.

37. Şübhəsiz, bunda bir ibrət dərsi var döyünən ürəkli, eşidən qulaqlı, görən gözlü kimsə üçün.

38. Göyləri, yeri, bunların arasında olanları altı gündə yaratdıq bir yorğunluq duymadan.

39. Nə deyirlər desinlər, bas səbrini. Günəş çıxmamış, günəş batmamış həmd oxu öz Rəbbinə.

40. Gecə vaxtının namazları zamanı, sonra yenə həmd oxu öz Rəbbinə.

41. O gün carçının [İsrafil] yaxşı bir məkandan car çəkəcəyi sözlərə qulaq kəsil.

42. Haqq olan dirilmək əmrinin səslənməsini o gün eşidər hamı. O gün ölülərin qəbirlərdən çıxan günüdür.

43. Can verən də Bizik, can alan da Biz. Bizim də dərgahımıza axır dönəcək hamı.

44. O gün yer yarılar, hamı tez-tələsik qəbirlərdən ayrılar. Hamını bir yerə beləcə cəm edərik. Bizim əlimizdə bu çox asan bir işdir.

45. Biz daha yaxşı bilirik onlar nə söyləyirlər. Sənin işin onlara zor göstərmək deyildir. Verdiyim və'ddən qorxan kimsəyə yalnız öyüd ver sən bu Qur'anla.