Rəhman və Rəhim Allahın adıyla

1. Bu bir surədir, onu nazil edərək vacib buyurmuşuq hökmlərini. İbrət alasız deyə aydın ayələr nazil eləmişik bu surədə.

2. Zinaya yol vermiş qadına və kişiyə - hər birinə yüz sayda kötək vurun. Allaha və axirət gününə iman gətirmisizsə, Allahın dininin buyurduğu bu cəzaya görə nəbadə onlara rəhminiz gələ. Bir dəstə mö'min də şahidlik eləsin onların aldığı bu cəzaya.

3. Zinakar kişi yalnız zinakar ya bütpərəst qadınla evlənə bilər. Zinakar qadın da yalnız zinakar ya bütpərəst kişiyə ərə getməli. Onlar mö'minlərə haram bilinmiş.

4. İsmətli qadınları zinada ittiham eləyən və sonra dörd şahid gətirə bilməyən kimsələrə səksən sayda kötək vurun. Onların şahidliyini heç vaxt qəbul eləməyin. Sapmışlardır belələri.

5. Ancaq sonra tövbə eləsələr, düzəlsələr bu başqa. Şübhəsiz, günahlardan keçəndir, Rəhimdir Allah.

6. Arvadını zinada ittiham eləyən və şahidləri olmayan ər dörd dəfə and içərək Allaha şəhadət gətirər ki, dedikləri doğrudur.

7. Beşinci dəfə də Allaha şəhadət verərək deyər ki, yalan danışarsa əgər, onda qoy Allah ona lə'nət eləsin.

8. Arvad da dörd dəfə and içərək Allaha şəhadət gətirsə ki, ərinin dedikləri yalandır, cəzadan azad olar.

9. Beşinci dəfə isə Allaha şəhadət verər ki, əri düz danışırsa əgər, onda qoy Allahın qəzəbinə arvadın özü düşsün.

10. Fəziləti, rəhməti olmasaydı Allahın, günahkarın cəzasını verərdi dərhal. Şübhəsiz, tövbələri qəbul edəndir, müdrikdir Allah.

11. Sizin öz içinizdən olan bir güruhdur o böhtanı [Peyğəmbərin zövcəsi həzrət Aişəyə atılan böhtan nəzərdə tutulur] atanlar. Şər iş bilməyin bunu siz özünüzə, bu sizin öz xeyrinizə. Qazandığı günaha görə hər biri çatacaq öz cəzasına. Onlardan günaha ən çox batan kəsi isə böyük bir əzab gözləyir.

12. Bunu eşidən zaman sizdən olan mö'min kişilər, qadınlar öz gümanını xeyirliyə yozmamalıydılarmı, «Bu açıqca yalandır» deməli deyildilərmi?

13. Dörd şahid gətirməli deyildilərmi? Nə qədər ki, şahidləri gətirməmişlər, yalançılar olaraq tanınarlar Allahın dərgahında.

14. Dünyada və axirətdə fəziləti, rəhməti olmasaydı Allahın, böyük bir əzaba uğrayardınız yaydığınız yalana görə.

15. Düşməyirdi dilinizdən o yalan. Bilmədiyiniz şeyi söyləyirdi diliniz. Siz elə bilirdiniz mə'nasız bir şeydi bu. Mə'nası böyükdür bunun Allahın dərgahında.

16. Bunu eşidən zaman «Bu barədə danışmaq bizə yaraşan deyil. Ucalardan ucasan! Bu böyük bir böhtandır!» deməli deyildinizmi?

17. Əgər mö'minsinizsə, nəbadə bir də belə iş tutasız. Bunu sizə tövsiyə edir Allah.

18. Ayələrini sizə aydınca açıqlayır Allah. Biləndir hər şeyi, müdrikdir Allah.

19. O kəslər ki, istəyirlər əxlaqsızlıq yayıla mö'minlər arasında, ağrılı bir əzab gözləyir dünyada və axirətdə onları. Bunu Allah bilər, siz bilməzsiniz.

20. Fəziləti, rəhməti olmasaydı Allahın, sizin cəzanızı verərdi dərhal. Şübhəsiz, şəfqətlidir, Rəhimdir Allah.

21. Ey iman gətirənlər! Yeriməyin yerişini şeytanın. Şeytanın yerişini yeriyən kəs əxlaqsızlığı, fənalığı əmr edər. Fəziləti, rəhməti olmasaydı Allahın, heç hansınız heç zaman paklana bilməzdi heç. Ancaq istədiyi kimsəni paklayar Allah. Eşidəndir hər şeyi, biləndir hər şeyi Allah.

22. Sizlərdən fəzilət sahibləri, sərvətli kəslər and içməsinlər ki, qohumlarına, yoxsullara, Allah yolunda hicrət etmiş kimsələrə bir şey verməyəcəklər. Onları əfv eləsin, bağışlasınlar. Məgər istəməzmisiniz günahlarınızdan keçə Allah? Günahlardan keçəndir, Rəhimdir axı Allah.

23. Zinanı ağlına belə gətirməyən ismətli qadınları zinada ittiham eləyən kimsələr lə'nətə gəlmişlər dünyada və axirətdə. Böyük bir əzab gözləyir onları.

24. O gün dilləri, əlləri və ayaqları onların işləri barədə şəhadət verəcəklər.

25. Layiq olduqları cəzanı verəcək o gün Allah. Və onlar biləcəklər açıq-aşkar haqdır Allah.

26. Pis qadınlar pis kişilərə, pis kişilər pis qadınlara tay olarlar. Və yaxşı qadınlar yaxşı kişilərə, yaxşı kişilər yaxşı qadınlara tay olarlar. Haqlarında pislər nə söyləyirsə, yaxşılara yapışmaz. Məğfirət gözləyir yaxşıları.

27. Ey iman gətirənlər! Özgənin evinə nəbadə icazəsiz, sahibinə salamsız girəsiz. Belə daha yaxşı olar sizin üçün. Bəlkə bu barədə düşünəsiniz?

28. Bir kimsəni tapmasanız o evdə, yenə də icazə almamışkən içəriyə keçməyin. «Qayıdın!» deyilsə sizə, qayıdın. Belə daha yaxşı olar sizin üçün. Gördüyünüz işləri bilir Allah.

29. İçində heç kimin yaşamadığı və sizə gərəkli olan şeylər tapdığınız evlərə icazəsiz girsəniz, günaha batmazsınız. İçinizi, çölünüzü bilir Allah.

30. Mö'min kişilərə söylə naməhrəm şeylərdən çəksinlər gözlərini, qorusunlar məhrəm yerlərini. Belə daha yaxşı olar onlar üçün. Şübhəsiz, onların işlərindən xəbərdardır Allah.

31. Mö'min qadınlara söylə naməhrəm şeylərdən çəksinlər gözlərini, qorusunlar məhrəm yerlərini. Görünən ziynətlərindən savayı heç bir ziynətini göstərməsinlər. Baş örtüklərini bağlayıb sallasınlar boyunlarına, sinələrinə. Ərləri, ataları, qaynataları, oğulları, ərlərinin oğulları, qardaşları, qardaşlarının oğulları, bacılarının oğulları, müsəlman qadınlar, cariyələr, qadınların məhrəm yerlərini anlamayan uşaqlardan savayı heç kimə göstərməsinlər ziynətlərini. Ayaqlarını yerə vurmasınlar ta onların gizlədiyi ziynətləri cingiltidən aşkar ola. Ey iman gətirənlər! Tövbə edin hamılıqla Allaha, qayıdın Onun yoluna, uğura uğrayarsız.

32. İçinizdəki ərsiz azad qadınları və arvadsız azad kişiləri, kölələrinizdən və cariyələrinizdən əməli düz olanları bir-birilə evləndirin. Əgər yoxsuldurlarsa, Allah kəramətilə varlandırar onları. Lütfü genişdir, hər şeyi biləndir Allah.

33. Evlənmək imkanı tapmayanlar abır-ismət gözləsinlər, Allah kəramətilə varlandırar onları. Kölələrinizdən hansı biri sizdən yazı [özünü satın almaq üçün azad olandan sonra ödəyəcəyi məbləği və ödənc müddətini nəzərdə tutan saziş] istəsə və əgər əmin olsanız ki, bu yazıya gücü çatacaq, onun istəyinə əməl eləyin. Allahın malından da ona bir sərmayə verin. İffətini qoruyan cariyələrinizi dünyanın gəldi-gedərini qazanmaq naminə zorla vadar eləməyin zinaya. Bunu eləyən kəs bilsin, zorlanan qadınları bağışlar, onlara qarşı Rəhimdir Allah.

34. Aydın-aydın ayələr, sizdən öncə gəlib-getmişlərdən nümunələr və müttəqilər üçün öyüdlər nazil etmişik bu surədə.

35. Göylərin, yerin nurudur Allah. Onun nuru içində çıraq olan bir qəndildir elə bil. Bir şüşənin içindədir o çıraq. Şüşə isə inci kimi parlayan bir ulduzdur elə bil. Nə şərqdə, nə qərbdə bitən mübarək zeytun yağıyla yanar bu çıraq. Od dəyməsə də bu yağa, hazırdır aləmi nurlandırmağa. Nur [od nuru], Allahın nuru üstündə nur! İstədiyi kimsəni Öz nuruna qovuşdurar Allah. İnsanlara neçə-neçə misallar çəkər Allah. Hər şeyi bilir Allah.
36. Allahın izni ilə Onun adı anılan, uca tutulan evlərdə səhər-axşam Onu öyərlər.

37. Allahı anmaqdan, namaz qılmaqdan, zəkat verməkdən qoymaz bu adamları ticarət, alış-veriş. Yrəklərinin bərk döyünəcəyi gündən, gözlərinin sağa-sola döyükəcəyi gündən qorxar onlar.

38. Gördükləri işlərinin ən gözəlinə görə verər mükafatını onlara Allah. Artıqlamasıyla verər onlara kəramətindən. İstədiyi kimsəyə hesabsız ruzi verər Allah.

39. Çöllükdə görünən səraba bənzər kafirlərin işləri. Su təşnəsi su zənn edib buna yaxın gələntək yoxa çıxmış görər suyu. Bir də baxar Allahla üz-üzədir. Və Allah da dərhal çəkər beləsiylə haqq-hesabını. Hesabı tez aparandır Allah.

40. Yaxud da dənizin ənginliklərində qaranlıqlar kimidir kafirlərin işləri. Qalaq-qalaq qalanmış dalğalar, dalğalar üstünə qalanmış qara buludlar. Qaranlıq üstündə qaranlıqlar. Öz əlini görə bilməz bir kimsə bu zülmətlər içində. Allahın nur vermədiyi kimsənin nuru olmaz.

41. Məgər görməzmi oldun, göylərdə, yerdə olan kimsələr, göydə qanad gərən quşlar öyürlər Allahı. Hər biri də Allahı necə anacağını, Onu necə öyəcəyini bilir. Onların nə etdiyini bilir Allah.

42. Allahdır göylərin, yerin yiyəsi. Onun da dərgahına axır dönəcək hamı.

43. Məgər görməzmi oldun, Allah cövlan etdirir buludları, sonra bir yerə gətirib üst-üstə yığır onları. Görürsən necə yağış yağır buludların içindən. Və sonra səmadan dalğalar kimi buludlar göndərir, buludlardan dolu endirir. İstədiyi kimsəni döyür doluyla, istədiyi kimsədən sovuşdurur dolunu. Şimşək elə çaxır parıltısı az qalır gözləri kor eləyə.

44. Gecəni gündüzə, gündüzü gecəyə qatar Allah. Şübhəsiz, bunda Onun qüdrətinin nişanəsi var bəsirətli kəslər üçün.

45. Bütün canlıları sudan yaratmış Allah. Kimi qarnı üstə sürünür, kimi ikiayaqlıdır, kimi də dördayaqlı. Dilədiyi xilqəti yaradır Allah. Hər şeyə qadirdir Allah.

46. Aydın-aydın ayələrdir göndərdiyimiz. İstədiyi kimsəni doğru yola yetirər Allah.

47. «Allaha və Rəsula iman getirdik, itaət elədik» deyər münafiqlər. Sonra da bə'ziləri bu sözlərdən dönərlər. Onlar mö'min deyillər.

48. Allahın hökmü ilə mübahisələrini həll etmək üçun Allaha və Rəsuluna üz tutmaq istəyən zaman onlar, bundan üz döndərər içlərindən bə'ziləri.

49. Haqq onların xeyrinə olanda isə itaətkar-itaətkar, tez-tələsik gələrlər Rəsulun yanına.

50. Azarmı var, şübhəmi var ürəklərində, yoxsa qorxurlar Özünün Rəsulu ilə onlara bir haqsızlıq yetirə Allah? Xeyr, o kimsələr zalımlardır sadəcə.

51. Allahın hökmü ilə mübahisələrini həll etmək üçün Allaha və Rəsuluna üz tutaraq «Eşitdik, itaət elədik» sözlərini yalnız mö'minlər deyər, bu onların sözləridir. Məhz onlardır uğura uğrayanlar.

52. Allaha və Rəsuluna itaət eləyən, Allahdan qorxan, Ondan çəkinən kimsələrdir qurtuluş qazananlar.

53. Savaşmaq barədə əmr versən əgər münafiqlərə, var güclərilə and içərlər savaşa çıxacaqlarına. De ki, «And içməyin, mə'lumdur itaətiniz. İşləklərinizdən xəbərdardır Allah».

54. De ki, «Allaha itaət eləyin, Rəsula itaət eləyin. Əgər üz çevirsəniz, bilin, Rəsul öz yükünə, siz də öz yükünüzə cavabdehsiniz. Ona itaətdə olsanız, doğru yolu taparsız. Onun hökmlərini sizə açıqca çatdırmaqdır Rəsulun borcu yalnız».

55. Sizlərdən iman götirən, saleh işlər görən kəslərə Allah və'd vermiş, yer üzündə onları xəlifələr edəcək. Onlardan öncəkiləri də xəlifələr eləmişdi bir zaman. Və'd vermiş, gücləndirəcək onlar üçün seçdiyi dini, arxayınçılıqla əvəz edəcək qorxularını. Çünki təkcə Mənə ibadət eləyər, heç bir şeyi Mənə şərik qoşmaz onlar. Bundan sonra kafirlik eləyən kimsələrsə sapmışlardır sadəcə.

56. Namaz qılın, zəkat verin, Rəsula itaət eləyin bəlkə sizə rəhm edilə.

57. Elə bilmə Bizi yer üzündə aciz qoymağa kafirlər güc yetirər. Od olar onların yuvası. Pisdən pis yerdir ora!

58. Ey iman gətirənlər! Kölələriniz, cariyələriniz və içinizdə həddi buluğa çatmamış olanlar sizdən hər gün üç dəfə icazə istəsinlər: bir sübh namazından öncə, bir günorta zamanı və bir də gecə namazından sonra paltarınızı soyunanda sizə xidmət üçün yanınıza gəlib-gedən vaxtlarda. Yç dəfə dincələ bilməyinizdən ötrü belə vacib bilinmiş. Başqa vaxtlarda isə bir-birinizin yanına nə qədər girib-çıxsanız günaha batmazsınız. Ayələri sizə beləcə açıqlayır Allah. Biləndir hər şeyi, müdrikdir Allah.

59. Yetkinlik çağına yetəndə uşaqlarınız, onlar da böyükləri kimi icazə istəsinlər hər dəfə. Ayələrini sizə beləcə açıqlayır Allah. Biləndir hər şeyi, müdrikdir Allah.

60. Ərə getmək ümidini itirmiş, qarımış qadınlar ziynətlərini göstərməmək şərtilə üst geyimlərini çıxarda bilərlər, bunda bir günah olmaz. Ancaq bundan da çəkinsələr daha yaxşı olar onlar üçün. Eşidir hər şeyi, bilir hər şeyi Allah.

61. Kor olan, topal olan, xəstə olan kimsələr hansı evə getsələr, orada yemək yeyə bilərlər. Öz evinizdə, atanızın evində, ananızın evində, qardaşınızın evində, bacınızın evində, əminizin evində, bibinizin evində, dayınızın evində, xalanızın evində, açarı sizdə olan evdə, dostunuzun evində yemək yeyə bilərsiz, bunda bir günah olmaz. Yeyəndə hamılıqla, yaxud ayrı-ayrılıqda yeyə bilərsiz, bunda bir günah olmaz. Evə girən zaman əhlinizi, özünüzü salamlayın, Allahdan bu evə sülh, bərəkət, gözəllik diləyin. Düşünüb-daşınasız deyə ayələri sizə beləcə açıqlayır Allah.

62. Bir iş barədə qərar çıxarmaq üçün Rəsulla bir yerə cəm oldularmı, Allaha və Rəsuluna iman gətirən mö'min kimsələr ondan rüsxət almamış bir yerə gedən deyillər. Allaha və Rəsuluna iman gətirən kimsələrdir səndən rüsxət istəyənlər. Bə'zi işlərinin dalınca getmək üçün səndən rüsxət istəsələr, rüsxəti istədiyin kimsəyə ver və ona Allahdan məğfirət istə. Şübhəsiz, günahlardan keçəndir, Rəhimdir Allah.

63. Siz Rəsulu bir-birinizi çağırdığınız kimi çağırmayın. İçinizdən sivişib aradan çıxanları tanıyır Allah. Başlarına bir bəlanın gəlməyindən, yaxud ağrılı bir əzaba uğramaqdan həzər eləsin Onun buyruğuna xilaf çıxanlar.

64. Bir baxın, göylərdə nə varsa, yerdə nə varsa Allahın deyilmi? Sizin bu gününüzü də, Onun dərgahına onların dönəcəyi günü də, şübhəsiz, bilir O. Gördükləri işləri onlara bildirər O. Hər şeyi bilir Allah.