Rəhman və Rəhim Allahın adıyla

1. Öz qövmünə göndərdik Nuhu elçi olaraq. Nə qədər ki, ağrılı bir əzab gəlib çıxmamış, qövmünə xəbərdarlıq elə söylədik ona.

2. Dedi: «Ey qövmüm, mən sizə göndərilmiş bir elçiyəm, olacağı açıqca xəbər verəcəm.

3. Təkcə Allaha ibadət eləyin, qorxun Ondan. Və mənə də itaətdə olun

4. keçsin suçlarınızdan, yazılı bir əcələ qədər möhlət versin sizə O. Allahın tə'yin elədiyi əcəl göldimi, tə'xirə salınan deyil. Bunu bilsəydiniz».

5. Dedi: «Rəbbim! haqq yoluna çağırdım gecə-gündüz qövmümü.

6. Çağırdıqca imandan qaçardılar.

7. Suçlarından keçəsən deyə hər dəfə haqq yoluna çağıranda onları, barmaqlarını qulaqlarına tıxadılar, paltarlarını başlarına çəkdilər, inadlarından dönmədilər, artdı təkəbbürləri.

8. Sonra haqq yoluna onları səslədim ucadan.

9. Və açıqda da, gizlində də haqqı təlqin elədim.

10. Dedim: «Rəbbinizdən məğfirət diləyin, günahlardan keçəndir O.

11. Göydən sizə bol yağmur yağdırar,

12. mal-dövlət, oğul-uşaq verərək sizə yardım eləyər, sizə bağ-bağat yaradar, çaylar axıdar.

13. Axı nə olmuş sizə, nəyə görə yaraşdırmaq istəmirsiz böyüklüyü Allaha.

14. Bir şəkildən başqa şəklə sala-sala sizi O yaratmış axı.

15. Məgər görməzmisiniz, yeddi göyü bir-birinin üstündə necə yaratmış Allah?

16. Aya aydınlıq, günəşə də işıq vermiş bu geylərin içində.

17. Torpaqdan yaratmış, bitki tək bitirmiş sizi Allah.

18. Yenə torpağa qaytarar, yenə də oradan çıxarar sizi.

19. Yer üzünü sizinçün döşəmiş Allah.

20. Döşəmiş ki, üstündəki geniş-geniş yollar ilə gedəsiz».

21. Nuh dedi: «Rəbbim! Əleyhimə çıxmışlar. Mal-dövləti, oğul-uşağı yalnız zərərini artıran bir kimsəyə uymuşlar.

22. Əleyhimə bir-birindən böyük hiylələr qurmuşlar.

23. Camaata demişlər: «Tanrılarınızı nəbadə tərk eləyəsiz. Vadd, Suva, Yəğus, Yəuq və Nəsr bütlərinə ibadətdən qalmayın».

24. Bir çoxunu beləcə azdırmışlar yolundan. Sən də bu zalımların artır sapqınlığını».

25. Günahları üzündən sulara qərq oldular. Sonra da onları od içinə saldılar. Allahsız qaldılar deyə bir kimsə də tapılmadı onlara yardım eləyə.

26. Nuh dedi: «Rəbbim! Kafirlərdən bir kəsi də yer üzündə qoyma qala.

27. Sağ buraxsan onları, azdırarlar yolundan bəndələrini, ya da artırarlar sayını əxlaqsız kafirlərin.

28. Rəbbim! Atamı, anamı, evimə mö'min olaraq girən kimsəni, mö'min kişilərlə qadınları bağışla. Zalımları məhv elə!»