Rəhman və Rəhim Allahın adıyla

1. Ta sin. Bunlar Qur'anın, haqqı aşkar bildirən bir Kitabın ayələridir.

2. Yol göstərir, müjdə verir mö'minlərə,

3. o kəslərə ki, namaz qılar, zəkat verər, axirətə yə'qinliklə inanarlar.

4. Axirətə inanmayan kəslərə bərbəzəkli göstərmişik gördükləri işlərini, çaşqınlıq içində vurnuxar onlar.

5. Pis bir əzab gözləyir belələrini, axirətdə də ən çox itirən onlar olacaq.

6. Şübhəsiz, bu Qur'anı müdrik olan, hər şeyi bilən Allahın dərgahından qəbul edirsən.

7. Ailəsinə bir zaman Musa demişdi: «Bir od gördüm uzaqda. Gedib ordan sizə bir xəbər gətirəcəm, yaxud da bir parça od gətirəcəm qızınasız».

8. Oraya çatan kimi səslədilər onu: «Odun yanında və ətrafında olanlara xeyir-dua vermiş Allah. Ucalardan ucadır aləmlərin Rəbbi Allah.

9. Ey Musa! Güclü və müdrik olan Allah Mənəm, Mən!

10. Əlindəki əsanı yerə at». Görəndə ki, ilan kimi qıvrılaraq sürünür əsa, arxasına baxmadan qaçmağa üz tutdu Musa. «Ey Musa! Qorxma, Mənim hüzurumda qorxmaz elçilər.

11. Zülm eləyəndən sonra pisi yaxşıyla əvəzləyən kimsənin də günahından keçərəm, ona Rəhim olaram.

12. Əlini qoltuğuna sal, çıxar, Fir'ona və qövmünə göndərilən doqquz ayədən [mö'cüzədən] biri olaraq qüsursuz, bəmbəyaz görünər əlin. Sapmış bir qövmdür onlar».

13. Ayələrimiz aydın-aşkar görünəndə onlara, «Bu açıqca bir cadudur» dedilər.

14. Yrəyində ayələrə şəksiz inanmışdılar. Fəqət zalımlığı, lovğalığı üzündən ayələri bilərəkdən dandılar. Bax necə olur sonu pozğunçuların.

15. Biz elm vermişdik Davuda və Suleymənə. Həmd olsun Allaha, bizi mö'min bəndələrinin çoxundan üstün tutmuş dedilər.

16. Davudun varisi oldu Suleymən. «Ey insanlar! Quş dili öyrədilmiş bizə, Hər şey verilmiş bizə. Bunlar Allahın lütfündən açıq-aşkar pay olaraq verilmiş» dedi.

17. Cinlərdən, insanlardan, quşlardan ibarət bir ordu quruldu Suleymən üçün. Hamısı dəstə-dəstə yürüyürdülər.

18. Qarışqalar yaşayan bir vadiyə çatdılar. «Ey qarışqalar, girin yuvalarınıza, qoymayın əzsin sizi Suleymənin ordusu. Əzəndə də bunu heç duymaz onlar söylədi» bir qarışqa.

19. Eşidib bu sözləri güldü Suleymən. «Mənə, atama və anama verdiyin ne'mətə görə Sənə şükr eləyə bilim deyə və rizanı qazanmaq üçün saleh bir iş görüm deyə ilham ver mənə, rəhmətinlə saleh bəndələrinin sırasına sal məni, Rəbbim!» dedi.

20. Quşları nəzərdən keçirib dedi: «Şanapipiyi niyə görmürəm? Yoxsa ki, qeyb olmuş o?

21. Aşkar bir dəlil [üzrlü səbəb] gətirməli o mənə. Gətirməsə şiddətli bir əzaba uğradaram, yaxud üzərəm başını».

22. Çox keçmədi uçub gəldi şanapipik, dedi: «Sənin bilmədiyini öyrənib gəlmişəm. Səbə'dən mən sənə doğru xəbər götirmişəm.

23. Orada bir qadın gördüm, məlikədir, hər şey verilmiş ona, böyük bir taxt yiyəsidir.

24. Gördüm o da, qövmü də Allahı qoyub günəşə səcdə eləyir. Tutduqları işləri bərbəzəkli gestərmiş şeytan onlara, doğru yoldan kənar salmış onları, doğru yolda deyillər.

25. Şeytan belə eləmiş ki, göylərin, yerin gizlisini üzə çıxaran, içinizi, çölünüzü bilən Allaha səcdə qılmayalar.

26. Allah təkdir, Ondan başqa tanrı yoxdur, böyük ərşin Rəbbidir O».

27. Suleymən dedi: «Doğrumu söylədin, yalanmı dedin, baxarıq.

28. Apar bu yazımı at onlara, sonra çəkil bir kənara. Gör nə edəcəklər».

29. Məlikə dedi: «Ey ə'yanlar! Çox mühüm bir məktub atmışlar mənə.

30. Suleyməndən gəlmiş, Rəhman və Rəhim Allahın adıyla başlayır o.

31. Deyir mənə qarşı çıxmayın, mənə təslim olaraq yanıma gəlin».

32. Dedi: «Ey ə'yanlar! Söyləyin nə eləyim? Hər hansı iş barədə sizsiz hökm vermərəm».

33. «Bizlər güc sahibləriyik, güclü sərkərdələrik. Əmr sənindir, sən də ver əmrini» dedilər.

34. Dedi: «Girdikləri şəhəri xaraba qoyar, camaatın ən nüfuzlu şəxslərini alçaldar hökmdarlar. Beləcə davranarlar.

35. İstəyirəm onlara bir hədiyyə göndərim, görüm nəylə dönəcək elçilərim oradan».

36. Elçilər gəldilər Suleymənin yanına. Dedi: «Siz dünya malıylamı mənə yardım edirsiz? Allahın mənə vergisi sizə verdiyindən daha verimli. Siz də hədiyyənizlə hələ bir sevinirsiz.

37. Hədiyyənizlə qayıdın geriyə, bildirin, önündə tab gətirməyəcəkləri bir orduyla gələcəyik, alçaldaraq, kiçildərək yurdlarından qovacağıq onları».

38. Dedi: «Həzərat! Onlar mənə hələ təslim olmamış məlikənin taxtını sizdən hansı biriniz gedib gətirə bilər?»

39. Cinlərdən olan ifrit dedi: «Sən yerindən qalxmamış mən taxtı gətirərəm. Əmin ola bilərsən, buna gucüm yetər mənim».

40. Kitabdan elm almış olan bir başqası dedi: «Bir göz qırpımında gətirərəm o taxtı». Taxtı yanında görüb «Rəbbimin lütfündən pay olaraq gəlmiş bu. Məni imtahana çəkir görsün şükrmü, nankorluqmu eləyirəm. Ancaq öz xeyrinə şükr eləyər şükr eləyən. Nankor kəs də bilməli, varlıdır, kəramətlidir Rəbbim» dedi Suleymən.

41. «Məlikənin taxtını bir hala salın ki, görəndə tanıya bilməsin. Baxaq, doğru yola gəlirmi, gəlməyirmi?» dedi.

42. Gəlib çıxdı məlikə. Taxtı göstərib «Beləmiydi sənin taxtın?» dedilər. «Oxşayır» dedi. «Biz öncədən elm almışıq, Allaha təslim olmuşuq» dedi Suleymən.

43. Allahdan başqaları adına tapındığı şeylərdi məlikəni imanından döndərən. Kafirlərin içindən çıxmışdı o.

44. «Buyurun qəsrin içinə» dedilər ona. Qəsrə girəntək elə zənn elədi dərin suya ayaq basır. Çəkdi ətəyini, göründü baldırları. «Bu, şüşələrdən işlənmiş bir qəsrdir, altından da su axır» dedi Suleymən. «Rəbbim! Zülm etmişəm özümə. Suleymənlə bərabər təslim oldum aləmlərin Rəbbi Allaha» dedi məlikə.

45. Biz Səmud qövmünə göndərdik Salihi, onların öz qardaşını elçi olaraq. «Allaha ibadət eləyin!» dedi onlara. Bir-birilə çəkişən iki zümrəyə ayrıldı onlar.

46. Dedi: «Ey qövmüm, yaxşılıq gəlməmişkən pisliyin gəlməyini niyə tələsdirirsiz? Olmazmı Allahdan məğfirət diləyəsiz, bəlkə sizə rəhm edilə?»

47. Dedilər: «Sənin və sənə tabe olanların üzündən uğursuzluğa uğradıq». Dedi: «Allahın dərgahındadır bunun səbəbi. Siz sınağa çəkilən bir qövmsünüz».

48. O şəhərdə doqquz adam vardı ki, yer üzünün nizamını pozandılar, düzəldən deyildilər.

49. Allaha and içərək dedilər: «Ona və ailəsinə gecə ikən basqın edəcəyik, sonra da dostuna deyəcəyik ki, onları öldürəni görməmişik. Biz doğru sözlü, düz əməlli kimsələrik».

50. Bir qurama qurdular. Biz də hiylə qurduq onlara. Bunu duymaz oldular. 51. Bax necə olmuş axırı onların bu hiyləsinin. Onları da, qövmünü də darmadağın elədik.

52. Odur çökmüş evləri, zalımdı yiyələri. Şübhəsiz, bu da ibrət olmalı anlayan bir qövm üçün.

53. O kəslər ki, iman gətirmişdilər, Allahdan qorxurdular, onları xilas elədik.

54. Lutu da göndərdik elçi olaraq. Öz qövmünə dedi: «Zinayamı yol verirsiz göz-görəti?

55. Qadınları qoyub kişilərlə şəhvətə uğraşırsız. Siz cahil bir qövmsünüz».

56. Təkcə bunu deyə bildi soydaşları cavabında: «Qovun öz yurdunuzdan Lutun ailəsini. Paklanmaq istəyən kimsələrdir onlar, şübhəsiz».

57. Onu və ailəsini xilas elədik. Yalnız arvadını xilas eləmədik, geridə qoyduq onu.

58. Daş yağışı yağdırdıq soydaşlarının başına. Nə pis bir yağışdı, yağırdı xəbərdarlıq alsa da doğru yola gəlməyən kimsələrin başına.

59. De ki, «Həmd olsun Allaha, salam olsun Allahın seçdiyi bəndələrinə. Allahmı yaxşıdır, Ona qoşduqları şəriklərmi?»

60. Göyləri, yeri yaradan, sizin üçün səmadan su endirən, bircə ağacını belə bitirməyə güc yetirmədiyiniz gözəl-gözəl bağçaları bu su ilə var edənmi? Allaha tay tutulan başqa tanrımı? Tapındığı bütlərisə Ona tay tutar onlar.

61. Yer üzünü yaşamaqçün yaradan, üstündə çaylar axıdan, möhkəm duran dağlar quran, iki dəniz arasına bir maneə qoyanmı? Allaha tay tutulan başqa tanrımı? Çoxlarısa bilməyirlər birliyini Allahın.

62. Dar ayaqda yalvarana əl tutan, düşdüyü bəladan qurtaran və sizləri yer üzünün xəlifələri eləyənmi? Allaha tay tutulan başqa tanrımı? Bu barədə az-az düşünürsünüz.

63. Qurunun və dənizin qaranlıqlarında sizə yol göstərən, arxasınca rəhmətinin gələcəyi küləkləri müjdəçilər olaraq göndərənmi? Allaha tay tutulan başqa tanrımı? Qoşduqları şəriklərdən ucalardadır Allah.

64. Bir xilqəti yaradan, sonra onu təkrar yaradan, sizə göydən və yerdən ruzilər yetirənmi? Allaha tay tutulan başqa tanrımı? De ki, «Doğru sözlü, düz əməlli kimsələrsinizsə, gətirin dəlilinizi» .

65. De ki, «Göylərdə və yerdə olan kimsələr bilməzlər görülməzi. Bunu təkcə Allah bilər». Və bilməzlər nə zaman diriləcəklər.

66. Bəlkə axirət barədə yetərincə biliyi var onların? Axı axirətə şəkk gətirirlər, onu qavramaqçün yoxdur bəsirətləri.

67. Kafirlər dedilər: «Biz də, atalarımız da torpağa dönəndənmi sonra çıxacağıq qəbirdən?

68. Bizə olan sayaq atalarımıza da əvvəllər belə və'd verilmişdi. Öncəki nəsillərin əfsanələrindən başqa bir şey deyildir bu deyilənlər».

69. De ki, «Bir gəzib-dolaşın yer üzünü, baxın necə olmuş axırı günahkarların».

70. Onların üzündən üzülməyəsən. Yrəyin sıxılmasın məkrli işlərindən.

71. «Doğru sözlü, düz əməlli kimsələrsinizsə, deyin, bu və'din və'dəsi nə zaman gələr?» deyərlər.

72. De ki, «Tələsdirdiyiniz şeyin bir qismi bəlkə elə dərhal gəldi başınıza».

73. İnsanlara qarşı fəzilətlidir Rəbbin, şübhəsiz. Fəqət naşükürdür çoxu onların.

74. Onların içini də, çölünü də bilir Rəbbin, şübhəsiz.

75. Göydə, yerdə görülməz olan nə varsa, aydınca bir Kitabda yazılıdır hamısı.

76. Mübahisə etdikləri şeylərin çoxunu İsrail oğullarına, şübhəsiz, söyləyir bu Qur'an.

77. Yol göstərir, rəhmət verir mö'minlərə bu Qur'an.

78. Şübhəsiz, verəcəkdir hökmünü onlara Rəbbin. Güclüdür, hər şeyi biləndir O.

79. Allaha güvən! Açıq-aşkar haqq yolunun üstündəsən, şübhəsiz.

80. Eşitməz səni ölülər, eşitməz səni üz çevirib gedən karlar.

81. Sapqınlıqdan xilas edib korları doğru yola gətirməyə yetməz gücün. Yalnız ayələrimizə iman gətirən kimsələrə eşitdirə bilərsən haqq kəlamını. Müsəlmandır belələri.

82. Deyilən o əzab kafirlərin başına gələn zaman yerdən bir canlı çıxardarıq, insanlarla danışar, deyər ki, kafirlər ayələrimizə inanmırdılar.

83. O gün hər ümmətdən o kəsləri məhşərə çəkərik ki, ayələrimizi danırdılar. Bir-birinin ardınca düzərək apararlar onları haqq-hesab çəkilən yerə.

84. Bura gəlib çatdılarmı, «Mənimmi ayələrimi dandınız anlamaya-anlamaya bunları? Yoxsa ki, bu nə işdi tuturdunuz?» deyər Allah.

85. Zülm elədiyinə görə gələr başlarına deyilən o əzab, danışmağa da halı olmaz onların.

86. Gecəni dinclik zamanı, gündüzü iş zamanı elədik. Bunu görməzmidirlər? Şübhəsiz, bunda da ayələr var mö'minlər üçün.

87. Sur çalınan gün Allahın istədiyi kimsələrdən savayı hamı, göylərdə kim varsa, yerdə kim varsa hamı təlaş keçirər. Boyunları bükülmüş gələrlər Onun yanına.

88. Baxırsan dağlara, yerlərində donub qalmış zənn edirsən onları. Fəqət buludlar kimi yürüyər onlar. Bu, Allahın işidir. İşini möhkəm tutar O. Gördüyünüz işlərdən xəbərdardır O.

89. Kimlər yaxşılıq gətirərsə, bundan daha yaxşısını qazanarlar orada. Və təlaş keçirməzlər o günün qorxusundan.

90. Kimlər pislik gətirərsə, üzü üstə od içinə tullayarlar onları. Bəlkə elə bilirsiz elədiklərinizə görə deyil, başqa bir şeyə görə verirlər bu cəzanızı?

91. De ki, «Mənə əmr edilib bu müqəddəs şəhərin [Məkkənin] Rəbbinə, hər şeyin yiyəsinə tapınım, Mənə əmr edilib müsəlman olum

92. Qur'an oxuyum. Kim tutarsa doğru yolu, bu onun öz xeyrinə, kim saparsa doğru yoldan, bu onun əleyhinə». De ki, «Mən yalnız olacağı bildirən kimsələrdən biriyəm». De ki, «Həmd olsun Allaha. Ayələrini göstərəcək sizə O, tanıyacaqsız onları». Gördüyünüz işlərdən xəbərsiz deyil Rəbbin.