Rəhman və Rəhim Allahın adıyla

1. Artıq yaxınlaşmış əmri Allahın, Onu tələsdirməyin. Ona qoşduqları şəriklərdən ucadadır, ucalardan ucadır O.

2. Bəndələrindən istədiyi kimsələrə vəhy aparan mələkləri göndərir O. Kafirlərə xəbərdarlıq eləyin, bildirin, Məndən başqa tanrı yoxdur. Qorxun Məndən.

3. Göyləri, yeri haqq olaraq yaratmış, Ona qoşduqları şəriklərdən ucalarda qərar tutmuş O.

4. Nutfədən yaratmış insanı Allah. İnsan da ki, açıqca düşmən kəsilmiş Ona.

5. Heyvanları da sizdən ötrü yaratmış. Yunlarıyla, tükləriylə qızınırsınız. Başqa şeylərdə də karınıza gölirlər. Ətlərini yeyirsiniz.

6. Axşamlar otlaqdan gətirəndə də, səhərlər otlağa aparanda da ayrı bir zövq verir heyvanlar sizə.

7. Daşıyırlar yükünüzü bu şəhərdən o şəhərə. Özünüz daşımalı olsanız əgər, çox əziyyət bahasına başa gələr bu sizə. Şübhəsiz, çox şəfqətlidir, Rəhimdir Rəbbiniz sizin.

8. Miniyiniz, bəzəyiniz olalar deyə atları, qatırları, ulaqları yaratmış. Bilməzsiniz daha nələr yaradar O.

9. Doğru yolu bəyan eləmək Allahın öhdəsində. Bu yoldan sapan da var. Allah diləsəydi əgər, hamınızı yönəldərdi doğru yola.

10. Odur sizdən ötrü səmadan su endirən. İçdiyiniz bu sudandır. Heyvanlarınızı yemlədiyiniz bitkilər də bu sudan içib bitir.

11. Və bu suyla sizdən ötrü əkin yerləri, zeytunluqlar, xurmalıqlar, üzümlüklər və hər cür meyvə ağacları yetirər O. Bunlarda, şübhəsiz, ayələr var düşünən kəslər üçün.

12. Gecəni, gündüzü, günəşi, ayı sizə taba eləmiş. Ulduzlar da boyun əymiş Allaha. Bunlarda, şübhəsiz, ayələr var düşünüb-daşınanlar üçün.

13. Rəngarəngdir sizdən ötrü yer üzündə yaratdığı nə varsa. Bunda da, şübhəsiz, bir ayə var görüb-götürənlər üçün.

14. Sizdən ötrü dənizi də ram eləmiş təptəzə ət [balıq] yeyəsiniz, bəzək-düzək çıxararaq dənizdən bəzənib düzənəsiniz. Görürsən suları yara-yara necə üzür gəmilər. Allahın lütfündən pay diləyin, Ona şükr eləyin.

15. Yer üzündə möhkəm duran dağlar qurmuş ki, ayağınız altından yer qaçmasın [ayağınızı torpağa bərk basasınız]. Çayları, yolları var eləmiş ki, yolunuzla yollanasız.

16. Yer üzündə əlamətlər, göy üzündə ulduzları yaratmış ki, tapalar öz səmtlərini.

17. Yaradanla yaratmayan taymı tutular məgər biri-birinə? Bir ağıl işlətsəniz!

18. Allahın ne'mətlərini saymaq istəsəniz də saya bilməzsiniz heç. Şübhəsiz, günahlardan keçəndir, Rəhimdir Allah.

19. Demədiyinizi də, dediyinizi də bilir Allah.

20. Allahı qoyub o tanrılara tapınırlar ki, heç nəyi xəlq etməz onlar, özləri xəlq olunurlar.

21. Diri də deyillər, ölüdürlər, bilməzlər nə zaman bir daha diriləcəklər.

22. Tanrınız tək Tanrıdır. Və o kəslər ki, axirətə inanmayırlar, küfrlə yüklü olur ürəkləri onların, təkəbbürlük edirlər.

23. Şübhə yox ki, onların demədiyini də, dediyini də bilir Allah. Təkəbbürlük edənləri sevməz O.

24. «Rəbbinizin nazil elədiyi nədir?» deyiləndə onlara «Bizdən əvvəlkilərin əfsanələri!» deyərlər.

25. Və qiyamət günü daşıyarlar bütövlükdə özlərinin günah yüklərini. Eləcə də daşıyarlar cahillik üzündən azdırdıqları kəslərin bə'zi günah yüklərini. Nə pis bir şey imiş daşıdıqları!

26. Onlardan öncə gəlib-gedənlər də quramalar qurmuşdular. Evlərinin təməlinə yetişdi Allahın əmri, başlarına çökdü evlərinin damları! Gözləmədikləri yöndən yetişdi onlara bu əzab.

27. Sonra qiyamət günü alçaldar onları Allah və deyər: «Hanı Mənim o şəriklərim ki, onların üzündən mö'minlərlə ixtilafda idiniz?» «Bu gün rəzillik, pislik düşər kafirlərin payına!» deyər elmli kəslər.

28. Özlərinə zülm eləyən kimsələrin canlarını mələklər alan zaman təslim olar, «Biz ki, bir pislik eləməmişdik!» söyləyər onlar. Gördüyünüz işləri, şübhəsiz, bilir Allah.

29. «Cəhənnəmin qapılarından içəri girin, orada əbədilik qalacaqsınız». Nə pis bir yuva imiş təkəbbürlük edənlərin yeri!

30. «Rəbbinizin nazil elədiyi nədir?» deyildi müttəqilərə. «Xeyir!» dedilər. Bu dünyada yaxşılıqlar edənlərin nəsibi yaxşılıq olar. Axirət evisə onlar üçün daha yaxşı. Nə gözəl evi varmış müttəqilərin.

31. İçindən çaylar axan Adn cənnətlərinə girər onlar. hər nə istəsələr var orada onlar üçün. Müttəqiləri beləcə mükafatlandırır Allah.

32. Yaxşıların canlarını almağa gələn zaman «Salam olsun sizə, gördüyünüz işlərə qarşılıq olaraq girin cənnətə!» deyər mələklər.

33. Mələklərinmi gəlməyini, Allahın əmrininmi [əzabının] gəlməyini gözləyir küfr eləyən kimsələr? Onlardan öncəkilər də belə iş tuturdular. Onlara Allah zülm eləmirdi, özləri özlərinə eləyirdilər.

34. Elədikləri pisliklərin cəzasına çatdılar, ələ saldıqları şey yaxaladı onları.

35. Ona şərik qoşanlar dedilər: «Allah diləsəydi əgər, Ondan başqa heç nəyə nə biz tapınardıq, nə də ata-babamız və Onun əmri olmadan haram da qılmazdıq bizlər heç nəyi». Onlardan öncəkilər də belə iş tuturdular. Peyğəmbərlərin borcu məgər hər şeyi açıqca çatdırmaqdan ibarət deyilmi yalnız?

36. «Allaha ibadət eləyin, şeytandan uzaq olun» deyərək peyğəmbər göndərmişdik hər bir ümmətə. O ümmətlərdən bə'zisini Allah doğru yola yönəltdi, bə'zisini də sapqınlıq haqladı. Gəzin, dolaşın yer üzünü, görün bir necə olmuş aqibəti peyğəmbərlərini danan kəslərin.

37. Sən nə qədər istəsən də doğru yola gələlər, bil, azdırdığı kimsəni doğru yola gətirməz Allah. Yardım göstərən də olmaz belələrinə.

38. Var gücləriylə Allaha and içdilər: «Ölən bir kimsəni dirildən deyil Allah». Xeyr, elə deyil, öləni dirildər O, bu Onun haqq və'didir. Ancaq bunu bilməyir əksər adamlar.

39. Bununla mö'minlərlə mübahisə etdikləri şeyləri açıqlayar kafirlərə O və onlar da bilərlər ki, yalan sözlər imiş söylədikləri.

40. Biz nəyi diləsək, «Ol» desək olasıdır.

41. Zülm çəkəndən sonra Allah yolunda Hicrət edən kəslərə [Həzrət Muhamməd və əshabı] gözəl bir yurd [Mədinə] verərik. Axirət əcri isə daha böyükdür. Kaş ki, bunu biləydilər!

42. Bunlardır səbr eləyib dözən kəslər, Rəblərinə güvənən kəslər.

43. Yalnız vəhy verdiyimiz kişiləri göndərmişdik səndən öncə peyğəmbərlər olaraq. Bunu bilmirsinizsə, zikr əhlindən [Tövrat və İncil üləmasından] soruşun.

44. Aşkar dəlillər və Kitablar verib göndərmişdik onları. Sənə də bu Qur'anı Biz nazil elədik ki, açıqlayıb bildirəsən insanlara nazil olan hökmləri. Bəlkə düşünərək öyüd alalar.

45. Pis hiylələr quranlar məgər əminmidirlər yerə gömdürməyəcək onları Allah, yaxud gözləmədikləri yöndən gəlməyəcək onlara o əzab?

46. Yaxud işində-gücündə ikən yaxalamayacaq onları o əzab - aciz qoya bilməz onlar Allahı, -

47. yaxud da yox olmaqdan qorxa-qorxa uğramayacaq onlar o əzaba. Həqiqətən, çox şəfqətlidir, Rəhimdir Rəbbiniz sizin [yə'ni hələ ki, onları cəzasız qoyub].

48. Məgər görmürlərmi ki, Allahın yaratdığı şeylərin kölgələri sağa-sola sürünərək səcdə edirlər Allaha.

49. Canlı adına göylərdə nə varsa, yerdə nə varsa, səcdə qılar Allaha. Mələklər də eləcə. Təkəbbürlük etməz onlar.

50. Onlardan ucalarda qərar tutan Rəblərindən qorxarlar, onlara əmr edilən şeyləri yerinə yetirərlər. 51. «İki tanrıya tapınmayın. O ancaq tək Tanrıdır. Ancaq Məndən qorxun!» dedi Allah.

52. Onundur göylərdə nə varsa, yerdə nə varsa. Təkcə Ona itaətdə olmalı. Siz Allahı qoyub başqasındanmı qorxursunuz?

53. Sizə çatan hər ne'mət yalnız Allahdan çatar. Bundan sonra sizə bir sıxıntı üz verən zaman yalnız Ona üz tutaraq yalvarırsınız.

54. Sizdən o sıxıntını uzaq etdimi, içinizdən bə'ziləri dərhal Ona şərik qoşmağa başlar,

55. küfr eləyər verdiyimiz ne'mətə. Nə eybi, işinizdən qalmayın, sonra biləcəksiniz bunun axırı nə imiş!

56. Aləmdən bixəbər bütlərə pay ayırırlar verdiyimiz ruzidən. Allaha and olsun ki, atdığınız şərə görə [bütlərə pay ayırmağı Allahın adı ilə bağladığınıza görə] mütləq cavab verməli olacaqsınız.

57. Qızları [mələkləri] Allahın övladları sanırlar. Bunun fövqündədir O. Özlərisə oğlan uşaqlarını arzulayırlar.

58. Doğulan çağasının qız olduğu xəbəri müjdə verilən zaman onlardan bir kimsəyə hirsindən qəmə batar, üzü qapqara qaralar.

59. Bu pis müjdə üzündən qövmündən qaçaraq gizlənər o. Bilməz utana-utanamı alsın əlinə, torpağamı basdırsın o çağasını! Bax necə pis fikrə düşübdür onlar [yə'ni Allaha layiq bildiyi məxluqatı, qızları özlərinə layiq bilmirlər].

60. Axirətə iman gətirməyən kəslərin pisdən pisdir sifətləri. Allaha aiddir ən ali sifətlər. Güclüdür, müdrikdir O.

61. Hər haqsız işə görə insanlara cəza versəydi Allah bir canlı da qalmazdı yer üzündə. Ancaq bəlli bir əcələ qədər möhlət verər onlara O. Əcəlləri gəldimi, bircə saatlığa belə vaxtı nə ötürə bilərlər, nə qabaqlaya.

62. Allaha layiq görürdülər bəyənmədiklərini. Dilləri də «Dünyanın ən gözəl son ucu onlarındır» deyə yalan söyləyər. Əslindəsə oddur onların nəsibi, od içinə sürüklənib girərlər.

63. Allaha and olsun, Səndən öncəki ümmətlərə də peyğəmbərlər göndərmişdik. Bərbəzəkli göstərdi gördükləri işlərini onlara şeytan. Bu gün də onların dostudur şeytan. Ağrılı bir əzab gözləyir onları.

64. Biz sənə Kitabı nazil elədik ki, mübahisə etdikləri mətləbi açıqlayıb bildirəsən onlara. Və iman götirənlər üçün yol göstərsin, rəhmət versin bu Kitab.

65. Ölmüşdü torpaq, səmadan su endirdi, diriltdi onu Allah. Şübhəsiz, bunda bir ayə var eşidən kəslər üçün.

66. Heyvanlarda da ibrətamiz şeylər vardır sizin üçün. Qarınlarından, mə'də-bağırsaqdakılarla qan arasından çıxardığımız xalis süd [yə'ni nə yarımçıq həzm edilən qida, nə də qan iyi, tamı verən maye] içənlərin boğazından asan keçən südü içirdirik sizə.

67. Xurmalardan, üzümlərdən də şərbət və gözəl ruzilər alırsınız. Şübhəsiz, bunda bir ayə var düşünüb-daşınanlar üçün.

68. Rəbbin vəhy eləmiş bal arısına: «Dağlarda, ağaclar arasında və insanların sənin üçün düzəltdiyi şeylərdə yuvalar qur özünə.

69. Sonra da barınaraq hər meyvədən uç Rəbbinin yollarında». İnsanlara şəfa gətirən rəngarəng bir bal çıxar bu arının qarnından. Şübhəsiz, bunda bir ayə var düşünən kimsələr üçün.

70. Allah sizi yaratmış. Sonra sizdən can alar O. Sizlərdən bə'zi kimsələri ömrün rəzil çağına yetirər ki, bir az bilik almış olsalar belə heç nəyi bilməsinlər. Şübhəsiz, hər şeyi bilir Allah, hər şeyə qadirdir O.

71. Ruzilər verən zaman bə'zinizi bə'zinizdən üstün tutar da Allah. Ruzisi çox düşənlər bu ruzidən verməyirlər əlləri altında olan kəslərə. Yoxsa ki, ruzisini almaqda birdir hamı [yə'ni heç kim başqa bir bəndəni bəsləmir, hamını bəsləyən Allahdır və hər bir adam Allah bəndəsidir]. Allahınmı ne'mətini danırlar?

72. Sizin canlarınızdan sizlər üçün taylar yaratmış Allah. Bu taylardan övladlar, nəvələr var eləmiş sizin üçün. Gözəl-gözəl ruzilər vermiş sizə. Belədirsə, batiləmi inanarlar, Allahınmı ne'mətinə küfr eləyərlər?

73. Allahı qoyub bütlərəmi tapınırlar? Nə göylərdə, nə yerdə insanlara verilməli ruzisi olmaz onların. Onlar heç nəyə qadir deyillər.

74. Allahın adına bənzətmələr qoşmayın! Özünün bənzərsiz olduğunu Allah bilər, siz bilməzsiniz!

75. Heç nəyə özünün gücü yetməyən, özgösinin malı olan köləni gözəl ruzi verdiyimiz, bu ruzidən gizlində və açıqda xərcləyən bir kimsə ilə tutuşdurdu Allah. Məgər taymı tutular bunlar biri-birinə? Yalnız Allahı həmd etməli. Çoxlarının xəbəri yox işlərin axırından.

76. Bu iki adamı da misal çəkərək bir-biriylə tutuşdurdu Allah. Bunların biri laldır, kara gələn deyil, ağasına yükdür o. Doğru yolu tutaraq, insaf gözləyərək buyruq verən kimsəyə taymı tutular məgər beləsi?

77. Təkcə Allah bilər göylərin, yerin görülməzini. Bir göz qırpımında olar qiyamətin qopması, yaxud bundan tez olar. Şübhəsiz, hər şeyə qadirdir Allah.

78. Analarınızın bətnindən sizi çıxardanda Allah heç nəyi bilmirdiniz. Ona şükr edəsiz deyə qulaqlar, gözlər və ürəklər vermiş sizə.

79. Məgər görmürlərmi ki, göyün boşluğunda uçan quşlar necə boyun əymiş Rəblərinə. Allahdan savayı heç kim tutub saxlaya bilməz onları. Şübhəsiz, bunda ayələr var iman gətirənlər üçün.

80 Evlərinizi yaşayış yeri eləmiş Allah. Heyvan dərilərindən sizə çadırlar var eləmiş ki, daşımaq asan olsun səfərə çıxan zaman, yüngüllük gətirsin sizə bir yerdə qərar tutan zaman. Yunlarından [qoyun və dəvə yunundan], tüklərindən [keçi tükündən] bir müddət geyiləcək, döşəniləcək şeylər düzəltmiş sizə o.

81. Allah yaratdığı şeylərdən sizlər üçün kölgəliklər var eləmiş, sizdən ötrü dağlarda mağaralar, istidən-soyuqdan qoruyan paltarlar, zərbədən qoruyan zirehli geyimlər var eləmiş. Müsəlman olasız deyə sizə Öz ne'mətini tamamlayır beləcə.

82. Əgər üz döndərsələr, bil, hər şeyi açıqca bəyan etməkdir yalnız sənin vəzifən.

83. Allahın ne'mətini əvvəl-əvvəl tanırlar, sonra isə danırlar. Kafirlərdən ibarətdir onların çoxu.

84. Qiyamət günü hər ümmətdən bir şahid gətirərik. Və küfr eləmiş kimsələrə üzr belə istəməyə izn verilməz və üzrü də umulmaz onların əsla.

85. Zalımlıq eləmiş kimsələr əzabı gördülərmi, yumşaldılmaz əzabları və möhlət də verilməz heç onlara.

86. Ona şərik qoşanlar elə ki, gördülər şəriklərini, dedilər: «Rəbbimiz, Sənə yox, bunlara biz tapınırdıq, bunlardır şəriklərimiz». Şərikləri də onlara söz atdılar: «Siz yalan deyirsiniz».

87. Allaha təslim oldu müşriklər o gün və uydurduqları şeylər onlardan kənar düşdü.

88. O kəslər ki, kafirlik elədilər, döndərdilər adamları Allah yolundan, əzab dalınca əzab göndərdik onlara. Qarışıqlıq salırdılar.

89. O gün hər ümmətdən bir nəfəri özlərinə şahid tutarıq. Səni də öz ümmətinə şahid olaraq gətirmişik. Hər şeyi müsəlmanlara bəyan eləyən, yol göstərən, rəhmət verən, müjdə verən Kitabı Biz sənə göndərmişik.

90. İnsaflı olmağı, yaxşılıqlar eləməyi, əqrabaya öz haqqını verməyi buyurar Allah. Zinanı, fənalığı, zülmü yasaq buyurar Allah. Öyüd alasız deyə beləcə öyüd verər sizə O.

91. Allahla əhd bağlayandan sonra vəfa edin əhdinizə, pozmayın Allahın adına verdiyiniz andları. Allahı özünüzə şahid tutursuz axı. Tutduğunuz işləri, şübhəsiz, bilir Allah.

92. Bənzəməyin o qadına ki, əyirdiyi ipliklə möhkəm-möhkəm toxuyar, sonra da öz əliylə sökər toxuduğunu. Sayının, sərvətinin bir ümmətin digərindən çox olması naminə andlar içib aranızda qarışıqlıq salmayın, sınayar sizi Allah. Və qiyamət günü də mütləq bildirər sizə nədən çəkişirdiniz.

93. Allah diləsəydi əgər vahid bir ümmət yaradardı sizi. Fəqət istədiyi kimsəni azdırar, istədiyi kimsəni də doğru yola yönəldər O. Gördüyünüz işlərə görə mütləq cavab verəcəksiz.

94. İçdiyiniz andlarla aranızda qarışıqlıq salmayın. Yoxsa ayağınızı yerə möhkəm basmış ikən yer qaçar altınızdan. Pis bir əzab dadarsınız. Çünki Allah yolundan döndərirdiz adamları. Böyük bir əzab gözləyir sizləri axirətdə.

95. Allaha verdiyiniz əhdi dəyər-dəyməzinə satmayın. Allahın dərgahında onlar sizə daha çox xeyir gətirər. Kaş bunu biləydiniz.

96. Sizdəkilər gəldi-gedərdi, Allahın dərgahındakılar qalandı. Səbr göstərənlərə verəcəyimiz əcri gördükləri işlərinin ən gözəlinə əvəz olaraq verəcəyik.

97. Mö'min kişilərdən, qadınlardan saleh işlər görənləri gözəl bir ömürlə yaşadacağıq, verəcəyimiz əcrisə gördükləri işlərinin ən gözəlinə əvəz olaraq verəcəyik.

98. Qur'an oxumağa başlayan zaman Allaha sığın qovulmuş şeytanın şərindən qorunmaq üçün [«ə'uzu billahi minə-ş-şeytani-r-racim» söylə].

99. O kəslər ki, iman gətiriblər və Rəblərinə güvənirlər, ilişməz onlara şeytanın şəri.

100. Ancaq ona qulaq asanlara, müşriklərə ilişər şeytanın şəri.

101. Bir ayənin yerinə başqa bir ayəni Biz gətirəndə - Allah daha yaxşı bilir nəyi nazil etdiyini - deyərdilər: «Sən özündən uyduransan». Belə deyil. Fəqət haqqı bilməyir onların çoxu.

102. De ki, «İmana gələnlərə güc vermək üçün, müsəlmanlara yol göstərmək, müjdə vermək üçün Ruhu-l-Qüdsü [Cəbraili] nazil elədik Rəbbinin dərgahından».

103. «Biz bilirik, ona [Muhammədə] bir nəfər [bir xristian köləsi nəzərdə tutulur] tə'lim verir» söyləyər onlar. Onların dedikləri adamın dili əcəmidir, bu Qur'anın dilisə açıq, fəsih ərəbcədir.

104. Allahın ayələrinə iman gətirməyən kəsləri doğru yola yönəltməz Allah. Ağrılı bir əzab gözləyir onları.

105. Yalanı yalnız o kəslər uydurarlar ki, Allahın ayələrinə iman gətirməyirlər. Məhz onlardır yalançılar.

106. İman gətirəndən sonra Allahı danan - məcburiyyət qarşısında qalaraq diliylə küfr desə də ürəyi imanda rahatlıq tapan kəsə bu aid deyil, - küfrdə sevinc tapan kimsələr tutularlar Allahın qəzəbinə. Böyük bir əzab gözləyir onları.

107. Çünki dünya həyatını axirətdən üstün tutmuşdu onlar. Şübhəsiz, kafirlərin qövmünü doğru yola çəkməz Allah.

108. Onlardır ürəyinə, qulaqlarına, gözlərinə Allahın möhür vurduğu kəslər. Məhz onlardır qəflətdə olanlar.

109. İtkiyə uğrayar onlar, şübhəsiz, axirətdə.

110. Əlbəttə, Rəbbin o kəslərə yardım edər ki, işkəncə çəkərək hicrətə üz qoyublar, sonra Allah yolunda cihad ediblər, səbr göstəriblər. Bütün bunlardan sonra günahlardan keçən görər, Rəhim görərsən Rəbbini.

111. Öz canının hayında vurnuxar hər kəs qiyamət günü. Hərəyə öz əməlinə görə verilər, haqsızlıq edilməz əsla bir kəsə.

112. Belə bir şəhəri misal gətirmiş Allah. Əmin-amanlıq içində yaşayırdı bu şəhər. Hər yerdən bolluca ruzi gəlirdi buraya. Fəqət küfr elədi bu şəhər Allahın ne'mətlərinə. Gördüyü işlərə əvəz olaraq aclığı, qorxunu ona daddırdı Allah.

113. Bir Rəsul gəlmişdi buraya onların öz içindən. Dandılar Peyğəmbəri, əzaba uğradılar. Zalımlardır onlar.

114. Siz Ona ibadət edirsinizsə, yeyin Allah verən halal, gözəl ruzilərdən, şükr eləyin Allahın ne'mətinə.

115. Leşi, qanı, donuz ətini və Allahdan qeyrisi adına kəsilən heyvanları sizə haram qılmış Allah. Məcburiyyət qarşısında qalan kəs başqasının payına əl uzatmadan və zərurət miqdarını aşmadan bunlardan yeyərsə əgər, bilsin, şübhəsiz, günahlardan keçəndir, Rəhimdir Allah.

116. Dilinizin söylədiyi yalanı təkrarlayaraq «Bu halaldır, o haram» deməyin. Yoxsa Allahın adına yalan yaxmış olarsız. Allahın adına yalan yaxanlar uğura uğramazlar.

117. Bir az zövq-səfa çəkər. sonra ağrılı bir əzaba uğrayar onlar.

118. Bundan öncə yəhudilərə də yasaq buyurmuşduq sənə dediklərimizi. Onlara Biz zülm eləmədik, özləri özlərinə eləyirdilər.

119. Bir də Rəbbin o kəslərə yardım edər ki, cahilliyi üzündən pis iş tutandan sonra tövbə eləyiblər, düzəliblər. Bütün bunlardan sonra günahlardan keçən görər, Rəhim görərsən Rəbbini.

120. İbrahim özlüyündə bir ümmət idi. Allaha itaətdə idi, üzü Ona doğru idi, müşriklərdən deyildi.

121. Şükr edərdi Onun ne'mətlərinə. Seçmişdi onu Allah, yönəltmişdi doğru yola.

122. Yaxşılıq vermişdik ona dünyada, yaxşılardan olaraq qalır o axirətdə.

123. «Haqqa doğru yönələn İbrahimin dininin yoluyla get, müşriklərdən deyil o» deyə sənə vəhy elədik.

124. Şənbəni ibadət günü eləmək o kəslərə vacib bilindi ki, bu barədə fikir ayrılığına düşdülər. Şübhəsiz, qiyamət günü Öz hökmünü verər Rəbbin və bildirər onlara nədən çəkişirdilər aralarında.

125. Hikmətlə, gözəl-gözəl öyüdlərlə də'vət elə onları Allah yoluna və onlarla mübahisə zamanı daha gözəl sözlər söylə. Şübhəsiz, Rəbbin daha yaxşı tanıyır Onun yolundan sapanı da, doğru yolu tapanı da.

126. Cəza vermək istəsəniz bir kəsə sizə vermiş olduğu əzabı qaytarın onun özünə. Əgər səbr göstərsəniz, bu daha yaxşı. Səbr xeyir gətirər səbr yiyələrinə.

127. Səbr elə, sənin səbr eləməyin Allahın yardımını diləməyindir. Onların kafirliyi üzündən üzülməyəsən. Qurduqları quramalardan sıxıntıya düşməyəsən.

128. Şübhəsiz, müttəqilərin, yaxşıların tərəfindədir Allah.