Rəhman və Rəhim Allahın adıyla

1. Nəyi soruşurlar biri-birindən?

2. O böyük xəbərimi?

3. Haqqında fikirləri bir-birilə düz gəlməyən xəbərimi?

4. Şübhəsiz, biləcəklər nə imiş axırı bu xəbəri danmağın.

5. Əlbəttə, axır biləcəklər.

6. Yer üzünü beşik eləmədikmi?

7. Dağları dirəklər təkin basdırmadıqmı?

8. Sizləri taylar olaraq yaratmadıqmı?

9. Yuxunuzu dincəlmək zamanı eləmədikmi?

10. Gecəni sizdən ötrü yorğan eləmədikmi?

11. Gündüzü dolanışıq zamanı eləmədikmi?

12. Ystünüzdə yeddi qat möhkəm göyü bina eləmədikmi?

13. Günəşi işıq saçan çıraq eləmədikmi?

14. Sıxaraq buludları yağış yağdırmadıqmı?

15. Bu yağışın suyuyla bitirmədikmi dənli, dənsiz bitkiləri,

16. sıx ağaclı bağ-bağatı?

17. Mükafat və cəza vaxtıdır hökm veriləcək gün.

18. Sur çalınan gün gələrsiz dəstə-dəstə.

19. Qapı-qapı açılar göy.

20. Yerindən oynayar dağlar, tozu qalar.

21. Tələ olar cəhənnəm

22. azğınlara, düşər onlar oraya.

23. Zaman-zaman əbədilik qalarlar orada.

24. Nə sərinlik dadarlar orada, nə sərin su içərlər,

25. içəcəkləri qaynar su olar, irin olar.

26. Gördükləri işlərə uyğun gələn cəza olar bu əzab.

27. Haqq-hesabdan qorxmurdular.

28. Ayələrimizi hey danırdılar.

29. Biz də hər şeyi yazmışıq, hər şeyin hesabını aparmışıq birər-birər.

30. «Di dadın əzabı. Sizin üçün başqa heç nəyi yox, yalnız əzabınızı bundan sonra artırarıq».

31. Qurtuluş tapar müttəqilər

32. bağlar və üzümlüklər içində,

33. sinələri düyünlənmiş yaşıd qızlar arasında,

34. camlara doldurulan içkilərin ləzzətində.

35. Mə'nasız söz, yalan söz eşitməzlər orada biri-birindən.

36. Rəbbinin artıqlamasilə verdiyi mükafatdır onlara bu verilənlər.

37. Göylərin, yerin, bunların arasında olanların Rəbbidir O. Hüzurunda hamının nitqi tutulan Rəhmandır O.

38. Sıraya düzüləndə önündə Cəbrail və mələklər Rəhmandan icazəsiz danışa bilməzlər. Danışanda da xoş niyyətli söz deyərlər.

39. Bax budur haqq olan gün. Bunu arzulayan kəs Rəbbinə doğru yönələn haqq yolunu tutub gedər.

40. Yaxındakı bir əzabın xəbərini verdik sizə. O gün hər kəs baxıb görər öz əlinin əməlini. Kafir də «Kaş torpağa dönəydim mən» söyləyər.