Rəhman və Rəhim Allahın adıyla

1. Ey örtüyünə bürünən!

2. Qalx ayağa gecələr, yatmağını azalt bir az.

3. Gecənin yarısında, yaxud bundan bir az öncə,

4. yaxud bundan bir az sonra aram-aram Qur'an oxu.

5. Biz səni ağır bir kəlamla yükləyəcəyik.

6. Gecələr yuxudan ayılanda qulağın eşitdiyini ürəyin duyar, sözlər daha aydın olar.

7. Gündüzlər çoxlu-çoxlu işlər qatar başını [Qur'an oxumağa vaxtın az olar].

8. An Rəbbinin adını. Hər şeyi buraxıb təkcə Ona tut üzünü.

9. Şərqin, qərbin Rəbbidir O. Ondan başqa tanrı yoxdur. Vəkil elə Onu özünə.

10. Bütpərəstlər nə deyirlər desinlər, bas səbrini. Onlardan xoşluqla ayrılaraq uzaq ol.

11. Burax mənim öhdəmə haqqı danan var-dövlətli kimsələri. Bir az möhlət ver onlara.

12. Dərgahımızda ağır-ağır zəncirlər var, cəhənnəm odu var,

13. boğazda qalan təamlar var, ağrılı bir əzab var.

14. O gün lərzəyə gölər yerlə dağlar, dağlar toza dönüb dağılar.

15. Bir Elçi göndərmişik şahidlik eləsin işlərinizə. Fir'ona da bir elçi göndərmişdik beləcə.

16. Elçinin əleyhinə çıxdı Fir'on, şiddətli bir əzaba uğratdıq onu.

17. Küfrdən əl çəkməsəniz, uşaqları qocaldan o günün əzabından bəs necə qorunarsız?

18. Göy belə yarılar o günün dəhşətindən. Allahın və'd verdiyi yetər yerinə.

19. Bu deyilənlər yalnız bir öyüddür, o kəsdən ötrüdür ki, bir yol tutub Rəbbinə sarı getmək istər.

20. Şübhəsiz, Rəbbin bilir, sən və sənə tabe olanların bir dəstəsi bə'zən gecənin üçdə ikisinə azacıq yaxın vaxta qədər, bə'zən yarısına, bə'zən də üçdə birinə qədər ayaq üstə qalırsınız, qalxıb namaz qılırsınız. Gecənin, gündüzün vaxt ölçüsünü Allah bilər, siz bilməzsiniz. Buna görə tövbənizi qəbul buyurmuş Allah. Oxuyun Qur'andan nəyi bacarırsınız. Aranızda xəstələr var, bə'ziniz Allahın lütfündən pay qazanmaqçün yer üzünü dolaşır, bə'ziniz də Allah yolunda savaşır. Bunları bilir Allah. Oxuyun Qur'andan nəyi bacarırsınız. Namaz qılın, zəkat verin, Allaha gözəl-gözəl borc verin. Özünüzə elədiyiniz yaxşılığın əvəzini daha yaxşı bir savab olaraq, daha böyük bir əcir olaraq Allahın dərgahında tapacaqsınız. Allahdan məğfirət diləyin. Günahlardan keçəndir, Rəhimdir Allah.