Rəhman və Rəhim Allahın adıyla

1. Vay halına ölçüdə, çəkidə aldadan kimsələrin!

2. O kimsələrin ki, başqalarından bir şeyi alan zaman ölçüb, çəkib tam alarlar,

3. özlərisə bir şeyi satan zaman ölçüdə, çəkidə aldadarlar.

4. Məgər bilməzmidirlər diriləcəklər

5. o böyük gün gələndə.

6. Qəbirlərdən qalxaraq aləmlərin Rəbbinin hüzuruna axışar insanlar o gün.

7. Siccinin [«siccin» şeytanların və kafirlərin əməlləri yazılan bir kitab] içindədir, şübhəsiz, pis əməlli kimsələrin əməl dəftəri.

8. Nə biləsən, siccin nədir?

9. Rəqəmli bir yazıdır.

10. O gün vay halına haqqı danan kimsələrin!

11. O kimsələrin ki, danırlar haqq-hesab gününü.

12. Həddini aşan suç yiyəsindən savayı kimsə danmaz o günü.

13. Ayələrimiz ona oxunan zaman «Öncəki nəsillərin əfsanələridir bunlar» deyər.

14. Xeyr, elə deyil! Qazandığı günahlardan pas atmış kafirlərin ürəyi.

15. Əlbəttə, o gün Rəblərinin rəhmətindən ayrı düşəcəklər,

16. sonra cəhənnəmə vasil olacaqlar.

17. Və sonra da deyiləcək onlara: «Dandığınız şey budur».

18. İlliyyunun [«illiyyun» mələklərin, mö'minlərin əməlləri yazılan kitab] içindədir, şübhəsiz, düz əməlli kimsələrin əməl dəftəri.

19. Nə biləsən illiyyun nədir?

20. Rəqəmli bir yazıdır.

21. Allaha yaxın olan mələklər yalnız görə bilərlər həmin kitabı.

22. Şübhəsiz, naz-ne'mət içindədir düz əməlli kimsələr.

23. Söykənərək taxtlara ətrafa baxarlar.

24. Yzlərindəki aldıqları ne`mətlərdən razılıq işartısı tanışdır sənə.

25. Ağzı bağlı qablarda gətirilən saf şərabdan içizdirərlər onlara.

26. İçib qurtarana yaxın müşk qoxusu gələr o içkidən. Bunlara çatmaq üçün çalışsın, çarpışsın hamı.

27. Təsnim suyu qatarlar o içkiyə.

28. Bu bir bulaqdır, suyundan Allaha yaxın kimsələr içərlər.

29. İman gətirənlərə gülərdi suç yiyələri.

30. Mö'minlərin yanlarından ötəndə bir-birinə göz vurardılar.

31. Bundan zövq alardılar, öz əhlinin yanına kefləri saz dönərdilər.

32. Mö'minləri görən zaman «Bunlar sapmışlardır» deyərdilər.

33. Gözətçi göndərməmişlər mö'minlərə onları.

34. Bu gün də mö'minlər gülərlər kafirlərə,

35. taxtlara söykənərək baxarlar onların halına.

36. Gördükləri işlərə əvəz olaraq nə oldu, axır aldılarmı kafirlər cəzalarını?