Rəhman və Rəhim Allahın adıyla

1. And olsun bir-birinin ardınca göndərilən yellərə,

2. and olsun şiddətlə əsən yellərə,

3. and olsun yağış yayan yellərə,

4. and olsun haqqı batildən ayıran ayələrə,

5. and olsun vəhy gətirən o mələklərə

6. ki, yaxşılara Allahın məğfirətini, pislərə xəbərdarlığını çatdırarlar.

7. Şübhəsiz, sizə və'd edilən qiyamət qopacaqdır.

8. Sönər ulduzlar o zaman,

9. yarılar göy o zaman,

10. dağılar dağlar o zaman

11. və peyğəmbərlərə öz ümmətləri barədə şəhadət vermək vaxtının çatdığı bildirilər o zaman.

12. Hansı günə yazılmış onların şəhadəti?

13. Hökm veriləcək günə!

14. Nə biləsən hökm veriləcək gün nədir?

15. O gün vay halına haqqı danan kimsələrin.

16. Öncəki nəsilləri məhv etmədikmi?

17. Sonrakı nəsilləri də Biz qatarıq onlara.

18. Suçluların cəzasını Biz eləcə verərik.

19. O gün vay halına haqqı danan kimsələrin.

20. Sizi zəif bir mayedən yaratmadıqmı?

21. Bu mayeni möhkəm bir məkana [balalığa] salmadıqmı?

22. Burada mə'lum bir vaxta qədər onu saxlamadıqmı?

23. Bunlara yetmədimi gücümüz? Bax nə qədər gözəl yetər hər bir şeyə gücümüz!

24. O gün vay halına haqqı danan kimsələrin!

25. Yer üzünü məskən eləmədikmi

26. dirilərə, ölülərə?

27. Burada uca-uca dağlar yaratmadıqmı? Şirin-şirin suları sizə içirtmədikmi?

28. O gün vay halına haqqı danan kimsələrin!

29. «Di tərpənin dandığınız haqqa tərəf.

30. Cəhənnəm dumanının üç şaxəli kölgəsinə tərəf gedin.

31. Sərinlik gətirən deyil, oddan xilas edən deyil bu duman».

32. İri-iri qəsrlər böyüklüyündə qığılcımlar saçar bu od.

33. Qapqara dəvələrə bənzəyər bu qığılcımlar.

34. O gün vay halına haqqı danan kimsələrin!

35. Nitqi tutulan gündür o gün onların.

36. İzn də verilməz onlara üzr bəyan edələr.

37. O gün vay halına haqqı danan kimsələrin!

38. «Bu gün sizi və öncəki nəsilləri bir yerə yığdığımız gündür, hökm verilən gündür.

39. Mənə qarşı hansı tədbiriniz varsa, əməl eləyin».

40. O gün vay halına haqqı danan kimsələrin!

41. Şübhəsiz, müttəqilər gölgəliklərdədir, bulaqlar başındadır,

42. ürəkləri istəyən meyvələrin içindədir.

43. «Gördüyünüz işlərə əvəz olaraq nuşcanlıqla yeyin, için».

44. Beləcə mükafat veririk yaxşılara.

45. O gün vay halına haqqı danan kimsələrin!

46. «Yeyin, bir az zövq-səfa çəkib dolanın. Siz, şübhəsiz, günaha batmış kimsələrsiniz».

47. O gün vay halına haqqı danan kimsələrin!

48. «Əyilin» deyiləndə əyilməzdilər.

49. O gün vay halına haqqı danan kimsələrin!

50. Qur'ana da inanmazsa, bəs hansı kəlama inanar onlar?