Rəhman və Rəhim Allahın adıyla

1. Ey iman gətirənlər! Mənə də, sizə də düşmən kəsilən kəsləri dost tutmayın özünüzə. Hələ də sevgiylə yanaşırsız onlara. Sizə gələn haqqı danmışlar axı. Rəbbiniz Allaha iman gətirdiyiniz üçün Rəsulu da, sizi də qovurlar yurdunuzdan axı. Mənim yolumda cihad eləmək, rizamı qazanmaq naminə yurdunuzdan didərgin düşmüsüzsə, onlarla gizlində necə dostluq edirsiz? Demədiyinizi də, dediyinizi də Mən bilirəm. İçinizdən onlara xəbər çatdıran varsa, doğru yoldan sapmışın sapmışıdır həmin kəs.

2. Kafirlərin əlinə keçmiş olsanız, düşmən kəsilər sizə, əl qaldırar üstünüzə, ağzına nə gəldi söyləyər sizə bu cür kimsələr. Çox istərlər siz də kafir olasız.

3. Nə bütpərəst qohumlarınız, nə övladlarınız qiyamət günü sizin üçün yarar verən deyillər. Aranızı ayırar Allah. İşləklərinizi görəndir Allah.

4. Gözəl bir nümunə qoyub getmiş sizlərə İbrahim və onunla bir olanlar. Qövmlərinə demişdilər: «Biz sizdən və Allahı qoyub tapındığınız tanrılardan uzağıq. Biz sizin dininizi danırıq. Təkcə Allaha iman gətirməsəniz, aramızda əbədilik düşmənçilik və nifaq olacaq». Amma İbrahimin atasına dediyi «Allahdan sənin üçün məğfirət diləyəcəm, fəqət Allahın verəcəyi əzabı səndən sovuşdurmağa mənim gücüm yetməyəcək» sözləri nümunə ola bilməz heç cür sizlərə. «Rəbbimiz! Sənə güvəndik, Sənə tutduq üzümüzü, Sənin dərgahına axır dönəcək hamı».

5. «Kafirlərin əliylə imtahana çəkmə bizi, suçumuzdan keç bizim Rəbbimiz! Güclü və müdrik olan təkcə Sənsən, Sən, Rəbbimiz».

6. Gözəl bir nümunə qoyub getmiş onlar sizlərə, sizlərdən Allaha və axirət gününə qovuşmağı arzulayan kimsələrə. Allahdan üz döndərən kəs bilsin, varlıdır, öyülməlidir Allah.

7. Düşmənçilik elədiyiniz kimsələrlə aranıza bəlkə sevgi saldı Allah. Hər şeyə qadirdir Allah. Günahlardan keçəndir, Rəhimdir Allah.

8. Din yolunda sizinlə savaşmayan, sizi yurdunuzdan çıxarmayan kimsələrə yaxşılıqlar eləməyi, insaflı olmağı sizə yasaq yazmamış Allah. Şübhəsiz, insaflıları sevər Allah.

9. Ancaq din yolunda sizinlə savaşan, sizi yurdunuzdan çıxaran kimsələrlə və didərgin salınan zaman onlara yardım eləyən kəslərlə dost olmağı sizə yasaq yazmış Allah. Onları özlərinə dost tutanlar zalımlardır ki var.

10. Ey iman gətirənlər! Yanınıza hicrət eləyən mö'min qadınları imtahana çəkin. Onların necə dindar olmağını Allah daha yaxşı bilir. Öyrənib bilsəniz mö'mindir bu qadınlar, kafirlərin yanına qaytarmayın onları. Halal olmaz bu qadınlar kafirlərə. Kafirlər də bunlara halal deyil. Kafir ərlərinin bunlara verdikləri mehirlərini kafirlərin özlərinə qaytarın. Mehir verib bunlarla evlənsəniz, batmazsınız günaha. Kafir qadınlarla bağladığınız nigahı pozun. Onlara verdiyiniz mehri geri istəyin. Kafir ərlər də hicrət eləmiş mö'min qadınlara verdikləri mehirləri qoy geri istəsinlər. Allahın hökmü belədir. Aranızda hakimlik eləyən Odur. Hər şeyi biləndir, müdrikdir Allah.

11. Kafir zövcələrə sərf edilmiş şeylərdən pənah apardıqları kafirlərin payına nə düşərsə, bunun miqdarında da mö'min ərlərə kafirlərdən aldığınız qənimətdən pay verin. İnandığınız Allaha qarşı çıxmaqdan çəkinin.

12. Ey Peyğəmbər! Sənə bey'ət gətirməkçün yanına gölən mö'min qadınlar gərək and içələr ki, heç nəyi Allaha şərik qoşmayacaqlar, oğurluq, zinakarlıq eləməyəcəklər, uşaqlarını öldürməyəcəklər, başqasının uşağını öz ərlərindən sanıb böhtan atmayacaqlar, qayda-qanun gözləyərək sənin əmrindən çıxmayacaqlar. Bu şərtlərlə qəbul buyur bey'ətlərini. Allahdan məğfirət dilə onlara. Günahlardan keçəndir, Rəhimdir Allah.

13. Ey iman gətirənlər! Allahın qəzəbinə düçar olmuşları dost tutmayın özünüzə. Qəbirdə yatanlarla görüşəcəklərinə ümidi olmayan mə'yus kafirlər kimi bunlar da axirətdən üzmüşlər ümidlərini.