Rəhman və Rəhim Allahın adıyla

1. Mö'minlər uğura uğrayandırlar,

2. Namaz vaxtı itaətkar olandırlar.

3. Boş şeylərdən qaçandırlar.

4. Zəkatlarını verəndirlər.

5. Məhrəm yerlərini qoruyandırlar

6. zövcələrindən və cariyələrindən savayı haram olan hamıdan. Bunlar tərəfindən qınanmayandılar –

7. Bunları qoyub başqa yolla kam alanlar hədlərini aşandırlar –

8. Əmanətlərinə, əhdlərinə sadiq qalandırlar.

9. Namazlarına riayət edəndirlər.

10. Onlar varis olanlardır

11. Firdous cənnətlərinə. Oralarda əbədilik qalanlardır.

12. Süzülmüş bir gildən yaratdıq insanı.

13. Sonra nutfəyə döndərib e'tibarlı bir yerdə [balalıqda] yerləşdirdik onu.

14. Sonra nutfədən qan laxtacığı düzəltdik, qan laxtacığından bir parça ət yaratdıq, bir parça əti sümüklərə çevirdik, sümüklərə ət geydirdik. Sonra da ruh verib ona ayrı bir xilqət olaraq yaratdıq insanı. Bərəkətlidir, uludur ən gözəl məxluqun xaliqi Allah.

15. Bütün bunlardan sonra siz mütləq öləcəksiz.

16. Sonra qiyamət günü diriləcəksiz.

17. Başınız üstə yollar yaratdıq yeddi qatda. Bunların altındakı xilqətin işlərindən Biz xəbərsiz deyilik.

18. Qədərincə göndərdik səmadan suyu. Və torpaqda bərqərar elədik bu suyu. Şübhəsiz, bunu aradan qaldırmağa da qadirik.

19. Sizin üçün xurmalıqlar, üzümlüklər yetişdirdik bununla. Barlı-bəhərlidir bu bağlar, meyvəsindən yeyirsiniz.

20. Turi Sinayda bitən, yeyənlərçün yağ verən zeytun ağacını da bu su ilə var elədik.

21. Şübhəsiz, heyvanlarda da sizə ibrət olası əlamətlər var. Südündən içirsiniz, bir çox işinizdə karınıza gəlirlər, ətindən də yeyirsiniz.

22. Bunlar da, gəmilər də sizin miniyinizdir.

23. Öz qövmünə göndərmişdik Nuhu elçi olaraq. «Ey qövmüm! Təkcə Allaha ibadət eləyin. Ondan başqa tanrı yoxdur. Ondan çəkinməzmisiniz?» dedi.

24. Qövmündən olan kafir kübarlar dedilər: «Bu da sizin kimi bir bəşərdir sadəcə, istəyir ağalıq eləyə sizə. Allah istəsəydi, mələkləri göndərərdi, bunu yox. Biz dədə-babadan belə şey eşitməmişik.

25. Bunda bir dəlilik var, fikir verməyin, bir müddət gözləyin, bəlkə vaxtı gələ, ölə o».

26. «Rəbbim, mənə yardım elə, məni danırlar» dedi Nuh.

27. Biz də ona vəhy elədik: «Gezümüz önündə bir gəmi düzəlt. Əmrimiz yetişəntək təndir qaynayan zaman öncə dediklərimiz kimsələrdən savayı öz ailəni, arvadlı-uşaqlı hamını mindir gəmiyə. Və zalımlar barədə bir daha Mənə xitab eləmə. Suda boğulacaqlar.

28. Ey Nuh, elə ki, sən və səninlə olanlar rahatladız yerinizi gəmidə, «Həmd olsun Allaha, bizi xilas eləmiş zalım qövmün əlindən» söylə.

29. «Mübarək bir yerə göndər məni, Rəbbim, Sən göndərənlərin ən yaxşısısan» söylə.

30. Bunda, şübhəsiz ayələr var. Və insanları beləcə imtahana çəkirik.

31. Onlardan sonra başqa-başqa nəsilləri qurub yaratdıq.

32. Bir elçi göndərdik onlara öz içindən. «Təkcə Allaha ibadət eləyin. Yoxdur sizin Ondan başqa tanrınız. Ondan çəkinməzmisiniz?» dedi.

33. Bu elçinin qövmündən olub kafirlik eləyən, axirətə qovuşmağı danan o kübarlar ki, biz onlara dünya həyatında bolluca ne'mət vermişdik, dedilər: «Bu da sizin kimi bir bəşərdir sadəcə, yediyinizdən o da yeyər, içdiyinizdən o da içər.

34. Özünüzün bənzəri bir bəşərə itaətdə olsanız, ziyana düşərsiniz.

35. Bumu və'd verir sizə öləndən və torpağa, bir yığın sümüyə dönəndən sonra qəbirdən çıxacaqsız.

36. Heyhat! Heyhat... Sizə və'd verilən sizdən nə qədər uzaq!

37. Həyatımız yalnız bu dünyadadır. Yaşayırıq, ölürük. Bir də dirilən deyilik.

38. Allahın adına yalnız yalan yaxır bu, biz buna inanan deyilik».

39. «Rəbbim, mənə yardım elə, məni danırlar» dedi.

40. «Çox keçməz ki, peşmançılıq çəkərlər» dedi Allah.

41. Və haqq olaraq haqladı onları o uğultu. Çörə-çöpə çevirdik onları. Rəhmətdən iraq olsun, məhv olsun zalım qövm!

42. Onlardan sonra da başqa-başqa nəsilləri qurub yaratdıq.

43. Əcəlini nə qabaqlaya, nə də ötürə bilər hər hansı ümmət belə.

44. Sonra bir-birinin ardınca Biz elçilər göndərdik. Hər dəfə öz peyğəmbəri gələndə bir ümmətə danardılar onu. Bir-birinin ardınca yox elədik o ümmətləri, nağıllara döndülər. Rəhmətdən iraq olsun, məhv olsun imansızlar!

45. Ayələrimizlə və aşkar bir dəlillə göndərmişdik sonra Biz Musanı və qardaşı Hərunu

46. Fir'onun və onun ə'yanlarının yanına. Təkəbbürlük elədilər, lovğa bir qövm idilər.

47. «Bizim kimi bəşərdirlər sadəcə, qövmləri də quldular bizə, bunlaramı inanmalıyıq?» dedilər.

48. Onları dandılar, sonra da məhv oldular.

49. Soydaşları doğru yola gələlər deyə Musaya Biz Kitab verdik.

50. Məryəm oğlunu da, anasını da Biz mö'cüzə elədik. Yüksəklikdə yerləşən, axarlı-baxarlı bir məkanda sığınacaq verdik hər ikisinə.

51. Ey elçilər! Təmiz-təmiz şeylərdən yeyin, yararlı işlər görün. İşinizdən xəbərdaram, şübhəsiz.

52. Bu, sizin vahid olan ümmətiniz, Mən də sizin Rəbbiniz. Qorxun Məndən!

53. Ayrı-ayrı firqələrə ayrıldılar, dinlərini bir-birindən ayırdılar. Hər firqə öz dinində sevinc tapar.

54. Əcəlləri gələnə qədər burax onları vurnuxsunlar özlərinin burulğanında.
55. Bəlkə elə bilirlər bu dünyada mal-dövlət, oğul-uşaq veririksə

56. deməli, çalışırıq onlara tez-tələsik yaxşılıqlar eləyək? Duymazlar ki, bu verdiklərimizlə sınayırıq onları.

57. O kəslər ki, Rəblərinin qorxusundan titrəyirlər,

58. o kəslər ki, Rəblərinin ayələrinə iman gətirirlər,

59. o kəslər ki, Rəblərinə şərik qoşmayırlar,

60. o kəslər ki, Rəblərinin dərgahına dönəcəklər deyə verdiklərini ürəkləri əsə-əsə verirlər –

61. yaxşılıq eləməkdə yarışar onlar, Allahın yaxşılığını qabaqlar onlar.

62. Gücü yetən qədər yükləyirik hər kəsi. Haqq söyləyən bir Kitab var dərgahımızda. Heç kimin haqqında bir haqsızlıq edilməz.

63. Kafirlərin qəlbləri bu Qur'andan xəbərsiz. Başqa-başqa işlərlə məşğuldur onlar. Çalışırlar işlərini çatdıralar axıra.

64. Və nəhayət, əzaba salan zaman onların böyüklərini, fəryad qopararlar.

65. «Fəryad qoparmayın bu gün. Bizdən yardım görməzsiniz.

66. Sizə ayələrim oxunan zaman bunlara siz arxa çevirirdiniz,

67. axşamlar yığışaraq lovğa-lovğa ağzınıza gələnləri deyirdiniz».

68. Deyilənləri dərk eləməzmi onlar? Yoxsa atalarına gəlməyən bir şeymi gəlmiş onlara?

69. Bəlkə peyğəmbərlərini tanımamışlar deyə danırlar onu.

70. Bəlkə onların dediyi doğrudur, onda bir dəlilik var? Xeyr. Onlara haqq gətirmiş o. Onların da çoxunun haqdan xoşu gəlməyir.

71. Haqq onların istəyincə olsaydı, göylərin, yerin, bunlarda olanların nizamı pozulardı. Biz onlara öyüd verən, şərəf gətirən Kitab gətirmişik, onlar da bu öyüddən, şərəfdən üz döndərirlər.

72. Bəlkə sən onlardan bir vergi umursan? Rəbbinin vergisi daha verimli. O ruzi verənlərin ən yaxşısıdır.

73. Sən əslində onları doğru olan bir yola çağırırsan.

74. Bu yoldan kənardadır axirətə imanı olmayanlar.

75. Hallarına acıyaraq düşdükləri sıxıntıdan çıxarsaq da onları, azğınlıq içində vurnuxub qalar yenə onlar.

76. Biz əzaba uğratmışdıq onları, yenə Rəblərinə boyun əyməmişdilər, Ona yalvarmamışdılar.

77. Nəhayət, şiddətli bir əzabın qapısını açdıq onların üzünə, ümidləri hər xeyirdən üzüldü.

78. Odur qulaqları, gözləri, ürəkləri sizdən ötrü var eləyən. Siz də ona az-az şükr eləyirsiz.

79. Odur sizi yer üzündə yaradan, Onun da dərgahına axır cəm olacaqsız.

80. Can verən, can alan Odur. Onun əmrilədir gecəylə gündüzün növbələşməsi. Bunu düşünməzmisiz?

81. Yenə də öncə gəlib getmişlərin dediyini deyərlər.

82. Öncəkilər deyərdilər: «Öləndənmi, torpağa və bir yığın sümüyə dönəndənmi sonra diriləcəyik?

83. Bizə olduğu sayaq atalarımıza da belə bir və'd verilmişdi. Bu, öncəki nəsillərin əfsanələrindən başqa bir şey deyildir».

84. De ki, «Bilirsizsə deyin, kimindir yer üzü və burda olanlar?»

85. «Allahındır» deyəcəklər. De ki, «Elə isə sizə dərs olmazmı bu?»

86. De ki, «Yeddi göyün Rəbbi kimdir, böyük ərşin Rəbbi kimdir?»

87. «Allahdır!» deyəcəklər. De ki, «Elə isə Ondan çəkinməzmisiniz?»

88. De ki, «Bilirsizsə deyin, kimin əlindədir hər şeyin hakimliyi, o hansı varlıqdır - himayə edilməyən, himayə eləyəndir?»

89. «Allahdır!» deyəcəklər. De ki, «Elə isə bəs niyə aldanırsız?»

90. Onlara haqq gətirmişik. Yenə yalan danışarlar.

91. Özünə bir övlad götürməmiş Allah. Başqa bir tanrı da olmamış yanında Onun. Olsaydı, hər tanrı öz məxluquyla çəkilərdi bir kənara, sonra bir-birinə güc gələrək çəkişərdilər. Onun adına dediklərindən ucalardadır Allah.

92. Görülməzi, görüləni biləndir O. Qoşduqları şəriklərdən ucalardadır.

93. De ki, «Rəbbim, onlara və'd ediləni mənə göstərəcəksən.

94. Rəbbim, bunu göstərən zaman salma məni zalım qövmün içinə».

95. Onlara və'd ediləni sənə göstərməyə, əlbəttə, Biz qadirik.

96. Pisliyi özündən kənar edəndə daha yaxşı bir üsulla bunu et. Biz daha yaxşı bilirik onlar nə çərənləyir.

97. De ki, «Rəbbim, Sən Özün qoru məni şeytanların şərindən.

98. Rəbbim, Sən Özün iraq elə məndən onları».

99. Onlardan hər kimi ölüm haqlayarsa, deyər: «Rəbbim, geriyə qaytar məni.

100. Yarımçıq qoyduğum işimi tamamlaram, yaxşı işlər görərəm». Bir sözdür deyir o, deməyin nə faydası? Diriləcəkləri günə qədər bir maneə dayanar onların arxasında.

101. Sur çalınan gün əsil-nəsəb deyilən şey qaldırılar aradan və bir-birindən bu barədə soruşmaz onlar.

102. Kimlərin ki, ağır gəlmiş çəkisi, uğura uğramış onlar.

103. Kimlərin ki, yüngül gəlmiş çəkisi, onlar itirmişlər özlərini, cəhənnəmdə əbədilik qalarlar.

104. Od yalayar üzlərini, tökülər qaş-qabaqları.

105. «Ayələrim sizə oxunan zaman danırdınız onları, deyilmi?» dedi Allah.

106. «Rəbbimiz! Bədbəxtliyimiz güc gəlmiş bizə, sapmışdıq yolumuzdan» dedilər –

107. «Rəbbimiz! Çıxar bizi buradan, bir daha günah eləsək zalımlarıq deməli».

108. «İtilin oraya, Mənimlə danışmayın» dedi Allah –

109. «Bəndələrimdən bə'zisi Sənə iman gətirdik, Rəbbimiz! Keç bizim suçumuzdan, acı bizim halımıza. Sən mərhəmətlilərin mərhəmətlisisən!» deyərdi.

110. Siz də lağa qoyurdunuz onları. Bu da unutdurdu sizə Məni anmağı. Gülürdünüz onlara.

111. Səbr elədiklərinə görə mükafat vermişəm bu gün onlara. Uğura uğramış onlar.

112. Deyin, neçə il qaldınız yer üzündə?»

113. «Bir gün, bəlkə daha az. Kim saymışsa ondan soruş» dedilər.

114. «Biləsiniz, yer üzündə lap azacıq qaldınız» dedi Allah –

115. «Elə bildiniz sizi boşuna yaratmışıq və bir daha dönməzsiniz Bizim dərgahımıza, deyilmi?»

116. Ucalardan ucadır varlıqların haqq yiyəsi olan Allah. Ondan başqa tanrı yoxdur. Uca ərşin Rəbbidir O.

117. Varlığının bir dəlili olmayan hər hansı bir tanrını kim Allaha tay tutarsa, Rəbbinin dərgahındadır beləsinin cəzası. Kafirlər uğura uğramazlar.

118. De ki, «Keç mənim suçlarımdan, acı mənim halıma, Sən mərhəmətlilərin mərhəmətlisisən, Rəbbim!»