Rəhman və Rəhim Allahın adıyla

1. Sayalıdır bütün varlıqların yiyəsi Allah. Hər şeyə qadirdir O.

2. Ölümlə dirimi qoşa yaratmış ki, sınağa çəksin sizi, hansınızın daha gözəl işlə çalışdığını bəlli eləsin. Güclüdür, günahlardan keçəndir O.

3. Yeddi göyü qat-qat yaradan Odur. Bir uyğunsuzluq görməzsən Onun yaratdığında. Yaxşı-yaxşı bax, varmı göyün bir çatlağı?

4. Gözlərini təkrar-təkrar zillə göyə. İstədiyini tapmayaraq baxışların pərt və yorğun bir halda dönər geriyə.

5. Ulduzlarla bəzədik Biz yaxın göyü. Yanar daşlar var elədik bu göydə şeytanları qovmaq üçün. Alovdan bir əzab hazırladıq onlara.

6. Cəhənnəm əzabı gözləyir Rəblərini dananları. Pisdən pis yerdir ora!

7. Elə ki, atdılar cəhənnəmə onları, bir anqırtı eşidərsən onun qaynar yerindən.

8. Kafirlərə qəzəbindən az qalır parçalana cəhənnəm. Hər dəfə kafirlərin bir dəstəsi oraya atılanda, cəhənnəm mə'murları onlara «Məgər sizə xəbərdarlıq eləyən bir elçi gəlməmişdimi?» deyərlər.

9. Bunlar da cavabında «Bəli, xəbərdarlıq eləyən bir elçi gəlmişdi bizə, dandıq onu, söylədik heç nəyi nazil etməmiş Allah və siz də ki, böyük bir sapqınlıq içində vurnuxursuz.

10. Dinləmiş olsaydıq haqqı, anlamış olsaydıq haqqı, düşməzdik alov əhlinin içinə» deyərlər.

11. E'tiraf eləyərlər suçlarını beləcə. Allahın rəhmətindən uzaq olsun alov əhli!

12. Məğfirət gözləyir, böyük bir əcir gözləyir Rəblərini görməyə-görməyə Ondan qorxan kimsələri.

13. Sözünüzü deməsəniz də, desəniz də birdir. Yrəklərin içini O biləndir.

14. Hər şeyin xaliqimi bilməz olar? Həssasdır, hər şeydən xəbərdardır O.

15. Odur yeri sizə ram eləyən. Gəzin, dolaşın üstündə yerin. Allahın verdiyi ruzidən yeyin. Qəbirlərdən çıxaraq Onun dərgahına axır dönəcəksiniz.

16. Məgər əminmisiniz, sizi yerə gömməyəcək göydə olan. Bir də görəcəksiniz yer tərpənir, qalxır başınız üstə.

17. Məgər əminmisiniz, başınıza daş yağdırmayacaq göydə olan? Onda biləcəksiniz elədiyim xəbərdarlıq nə imiş.

18. Bunlardan öncəkilər də haqqı danmışdılar. Gördülərmi necə olur Məni danmağın axırı.

19. Başları üstündə qanad gərən, qanad çalan quşları görməzmidilər? Yalnız Rəhmandır onları göydə tutub saxlayan. Hər şeyi görəndir O.

20. Rəhmandan başqa sizə yardım edəcək bir tərəfdar varmı, kimdir o? Aldanmış kimsələrdir kafirlər yalnız.

21. Göndərdiyi ruzini kəsərsə Allah, kimdir o kəs ki, sizə ruzi gətirə? Lovğalıqdan, dinsizlikdən kafirlər əl çəkməmiş.

22. Yzü üstə sürünənmi, düz yolda düz yeriyənmi daha doğru yoldadır?

23. De ki, «Sizi inşa eləyən, sizinçün qulaqlar, gözlər, ürəklər düzəldən Odur. Siz də ki, az-az şükr eləyirsiz Ona».

24. De ki, «Sizi yaradaraq yer üzündə yayan Odur. Onun da dərgahında axır toplaşacaqsız».

25. «Doğru sözlü, düz əməlli kimsələrsinizsə əgər, söyləyin, nə vaxt gələr və'dəsi bu toplanışın?» deyərlər.

26. De ki, «Bunu təkcə Allah bilir. Mənsə yalnız xəbərdarlıq eləyənəm olacağı açıqca».

27. Görəndə ki, artıq yaxınlaşmış əzab, kafirlərin üzləri eybəcərləşib qaralar. «Budur sizin inanmaq istəmədiyiniz o əzab» deyilər onlara.

28. De ki, «Lap tutalım məni və mənimlə olanları məhv eləsin, yaxud halımıza acısın Allah, söyləyin, ağrılı bir əzabdan kafirləri bəs kim qoruyar?»

29. De ki, «Odur Rəhman, inancımız, güvəncimiz. Axır biləcəksiniz aşkar bir sapqınlıq içində vurnuxan kim idi».

30. De ki, «Yerə çöküb quruyarsa suyunuz, kim yerdən çıxarar sizə içməli suyu?»