Rəhman və Rəhim Allahın adıyla

1. O kəslər ki, özləri kafirlik eləyiblər, başqalarını da ayırıblar Allah yolundan, onların yaxşı işlərini boşa çıxarar Allah.

2. O kəslər ki, imana gəliblər, saleh işlər görüblər və Rəblərindən Muhammədə haqq olaraq göndərilənə iman gətiriblər, günahlarından keçər, işlərini düzəldər onların Allah.

3. Çünki batilə uymuş kafirlik eləyənlər, Rəblərindən gələn haqqa tabe olmuş iman gətirənlər. İnsanların kimliyini beləcə anladar onlara Allah.

4. Kafirlərlə savaşda üz-üzə gələn zaman vurun boyunlarını. Çox qırıb-tökdünüzmü əl saxlayın, tutduğunuz əsirlərin əl-qolunu bağlayın. Yerə qoydularmı kafirlər silahlarını, təmənnasız olaraq, yaxud da əvəzində fidyə alıb əsirləri azad buraxın. Allah istəsəydi əgər, onlardan intiqamı Özü alardı. Ancaq sizləri bir-birinizlə imtahana çəkmək istəyər O. Onun yolunda öldürülənlərin işlərini boşa çıxarmaz Allah.

5. Doğru yola yetişdirər onları, düzəldər işlərini onların.

6. Öncədən tanıtdığı cənnətə salar onları.

7. Ey iman gətirənlər! Allahın dininə yardım etsəniz, yardım əlini uzadar sizə, möhkəmlədər addımlarınızı Allah.

8. Yox olsunlar kafirlər! Onların işlərini boşa çıxarar Allah.

9. Allahın göndərdiyindən xoşları gəlməmiş onların. Onların işlərini batil eləmiş Allah.

10. Bir gəzələr, dolaşalar yer üzünü, baxalar necə olmuş axırı öncəki nəsillərin. Məhv eləmiş onları Allah. Kafirlərin də başına kələr belə işlər.

11. Çünki iman gətirənlərin dostudur Allah. Və çünki kafirlərin dostu yoxdur.

12. İman gətirənləri, əməli salehləri içindən çaylar axan cənnətlərə salar Allah. Kafirlərsə barınarlar dünyanın ləzzətindən, heyvan kimi yeyərlər, sonra od içinə girərlər.

13. Məhv etmişik neçə-neçə şəhəri. Onların camaatı səni didərgin saldıqları şəhərin [Məkkənin] camaatından güclü idilər. Bir kimsə tapılmaz yardım edə onlara.

14. Əlində Rəbbinin dərgahından aşkar bir dəlili olan kimsə ilə pis əməli öz gözünə bərbəzəkli görünən kəs birmidir? Öz nəfsinin əsiridir bu kəslər.

15. Müttəqilərə və'd verilən cənnət budur: çirkab götürməyən sulu çaylar, dadı dəyişməyən südlü çaylar, içənlərə ləzzət verən şərab çayları, təmiz bal çayları axırlar orada. Hər meyvə növündən varlarıdır orada. Rəbləri də bağışlamış onları. Onların bu vəziyyəti, məgər od içində əbədilik qalan, qaynar su içizdirilən və bu sudan bağırsaqları doğranan kimsələrin düşdüyü halət ilə birmidir?

16. Bunlardan elələri var sənə qulaq kəsilərlər. Səndən aralanantək elmli kimsələrdən «Bir az öncə o nə dedi?» soruşarlar. Belələrinin ürəyini möhürləmişdir Allah. Öz nəfsinin əsiridir belələri.

17. Doqru yolda olanların imanını artırar, taqva duyğusunu gücləndirər Allah.

18. Qiyamətin qəflətən gəlməyinimi gözləyir onlar? Artıq gəlib yetişmiş onun əlamətləri. Qiyamətin özü gəlib çıxdımı, daha öyüd almağın onlara nə faydası?

19. Bil, Allahdan başqa tanrı yoxdur. Özünün də, mö'min kişilərlə qadınların da günahlarının baqışlanmasını dilə Ondan. Gündüzlər, gecələr nəylə məşğul olduğunuzu bilir Allah.

20. «Kaş cihad barəsində bir surə nazil olaydı və savaşa qalxaydıq hamımız» deyər iman gətirənlər. Elə ki, bu barədə aşkar bir surə nazil oldu, görürsən, ölüm vahiməsiylə bayılacaq kimsələrtək dikmiş gözlərini sənin üzünə ürəyi azarlılar. Yaxşı olardı

21. itaət eləyəydilər, gözəl sözlər deyəydilər. Savaş başlanan zaman Allaha sadiq qalsaydılar, onlar üçün daha yaxşı olardı.

22. İmandan üz döndərsəniz, yer üzündə pozğunçuluqmu törədəcəksiz, əqrabalıq bağlarınımı qıracaqsız.

23. Bunlar o kəslərdir ki, lə'nətləmiş onları Allah, qulaqlarını kar eləmiş, gözlərini kor eləmiş.

24. Qur'anı gərəyincə düşünmürlər, nədir? Qıfılmı vurulmuş ürəklərinə?

25. Doğru yolu görüb biləndən sonra ona arxa çevirənləri şeytan azdırmış. Bərbəzəkli göstərmiş kafirliyi onlara, imandan dönməyi təlqin etmiş onlara.

26. Çünki Allahın göndərdiyindən xoşları gəlməyən kimsələrə «Biz bə'zi işlərdə sizə tabe olacağıq» demişdilər. Onların sirlərini bilir Allah.

27. Canlarını almağa gələn zaman mələklər, üzlərinə, kürəklərinə vuran zaman onların, necə olar halları?

28. Çünki Allahı qəzəbləndirən şeyə tabe olmuşdular, Onun rizasını qazanmaq istəməmişdilər. Onların işlərini batil eləmiş Allah.

29. Yoxsa ürəyi azarlılar elə bildilər onların gizlində bəslədiyi kini üzə çıxarmaz Allah?

30. İstəsəydik əgər, onları birər-birər sənə nişan verərdik, üzlərindən tanıyardın onları. Ancaq sən onları danışıqlarının ahəngindən də tanıya bilirsən. İşləklərinizi bilir Allah.

31. Biz sizi sınaqdan keçirərik üzə çıxaraq içinizdən mücahidləri, səbr yiyələrini, aşkar eləyək işlərinizi.

32. O kəslər ki, özləri kafirlik eləyiblər, başqalarını da ayırıblar Allah yolundan, doğru yolu görüb biləndən sonra Rəsulun əleyhinə çıxıblar, bir zərər verə bilməz onlar Allaha. Onların işlərini boşa çıxarar Allah.

33. Ey iman gətirənlər! Allaha itaətdə olun. Gördüyünüz işləri zay eləməyin.

34. O kəslər ki, özləri kafirlik eləyiblər, başqalarını da ayırıblar Allah yolundan və sonra da kafirlər olaraq ölüblər, suçlarından keçməyəcək onların Allah.

35. Sizlər daha üstün ikən zəiflik göstərməyin, sülhə də'vət etməyin, sizinlədir Allah. İşinizin savabını azaldan deyil Allah.

36. Bir oyundur, əyləncədir dünya həyatı. Əgər iman gətirsəniz, Allahdan çəkinsəniz, verər sizin əcrinizi, malınızın hamısını, sizdən zəkat istəməz.

37. Əgər malınızı sizdən israrla istəsə və siz də qızırğalansanız, gizlində bəslədiyiniz kini üzə çıxarar Allah.

38. Budur, sizi Allah yolunda malınızı xərcləməyə çağırırlar. İçinizdə eləsi var xəsislik eləyir. Xəsislik eləyən bilsin, xəsisliyi özünə eləyər. Allah varlıdır, siz fəqir. Və Ondan üz döndərsəniz, sizi aradan götürər, sizə bənzəməyən özgə bir qövmü yerinizə gətirər.