Rəhman və Rəhim Allahın adıyla

1. Ey örtüyünə bürünən!

2. Qalx ayağa, xəbərdarlıq elə.

3. Uca tut Rəbbinin adını,

4. Təmiz saxla paltarını.

5. Çirkindən uzaq ol.

6. Elədiyin yaxşılığı çox görüb minnət qoyma heç kimə.

7. Rəbbinin yolunda səbrli ol.

8. Sur çalınan zaman

9. gələn gün çətin bir gün olacaq,

10. kafirlər üçün asan bir gün olmayacaq.

11. Yalqız yaratdığım o kimsəni burax Mənim öhdəmə.

12. Bol-bol sərvət verdim ona,

13. sağlam, güclü oğullar verdim ona.

14. Hər şeydən bol verdim ona.

15. Yenə də tamahı var verdiyim ne'mətləri onun üçün artırım.

16. Xeyr, artıran deyiləm. Ayələrimizə qarşı natərəslik eləyənin biridir.

17. Cəhənnəmin dikinə dırmaşdıracam onu.

18. Düşündü, daşındı, ölçdü, biçdi.

19. Ölüm olsun ona, nə pis ölçüb-biçdi o.

20. Bir də ölüm olsun ona, nə pis ölçüb-biçdi o.

21. Sonra baxdı,

22. turşutdu üz-gözünü, tökdü qaş-qabağını,

23. arxa çevirdi dinə, təkəbbürlə yaxasını çəkdi kənara.

24. Dedi: «Cadubazlardan gələn bir cadudur bu Qur'an.

25. Yalnız bəşər kəlamıdır bu Qur'an».

26. Cəhənnəmə salacağam onu.

27. Nə biləsən cəhənnəm nədir.

28. Bir şeyi sağ buraxmaz,

29. dəriləri yandırar.

30. Cəhənnəmin on doqquz mə'muru var.

31. Cəhənnəm mə'murlarını mələklərdən elədik. Saylarını bildirdik ki, kafirləri bununla sınağa çəkək, Kitab verilən kimsələr inansınlar buna, imana gələnlərin artsın imanı, Kitab verilən və mö'min kimsələr şübhəyə düşməsinlər, ürəyi azarlılar və kafirlər qoy desinlər: «Bunu söyləməkdə nədi qəsdi Allahın?» İstədiyi kimsəni azdırar, istədiyi kimsəni də doğru yola yənəldər beləcə Allah. Əslində Rəbbinin ordusunun [mələklərin] sayını təkcə Onun Özü bilər. O cəhənnəm misalı da bəşərə pis aqibəti xatırlatmaq üçündür.

32. Xeyr, təkcə bunun üçün deyil. And olsun aya,

33. and olsun qayıdıb gələn gecəyə,

34. işıqlanan səhərə,

35. bəlaların böyüyüdür cəhənnəm,

36. bəşərə xəbərdarlıqdır o.

37. İrəliləmək, geriləmək istəyənlərinizə öncədən verilir onun xəbəri.

38. Hər kəsin öz taleyi qazandığı suçlarına bağlıdır.

39. Əməl dəftəri sağ əldən verilən kimsələrin taleyisə başqadır.

40. Onlar cənnətdədirlər. Soruşarlar

41. suçlulardan:

42. «Sizi bu cəhənnəmə nə gətirib çıxarmış?»

43. Suçlular da deyərlər: «Namaz qılan kimsələrdən deyildik.

44. Yoxsulları yedirtməzdik.

45. Batilpərəst kimsələrlə bərabər biz də vurnuxardıq batil işin içində.

46. Danardıq qiyamət gününü.

47. Və axır haqladı ölüm bizi».

48. Və artıq onlardan ötrü iltimas edənlərin iltimasının olmaz heç bir faydası.

49. Elə isə bunlara nə olub ki, verilən öyüdlərdən üz döndərirlər.

50. Sanki vəhşi eşşəklərdir,

51. ürküşüb qaçırlar şir qabağından.

52. Hərəsi özünə ayrıca bir Kitab istər verilə.

53. Onlar axirətdən qorxan deyillər.

54. Şübhəsiz, bir öyüddür bu Qur'an.

55. İstəyən oxuyub ondan öyüd ala bilər.

56. Və Allahın istəyi də olmadan heç kəs öyüd ala bilməz. Hamı Ondan çəkinməli. Ondan çəkinənlərin suçlarından keçər O.