Rəhman və Rəhim Allahın adıyla

1. Səninlə əri barədə danışan qadının söhbətini eşitmiş Allah. Şikayət eləyirdi Allaha bu qadın. Söhbətinizi eşidirdi Allah. Şübhəsiz, eşidəndir, görəndir hər şeyi Allah.

2. Sizlərdən o kəslər ki, arvadlarını boşamaq üçün onları öz analarına bənzədərək haram sayırlar, bilsinlər, arvadları anaları deyillər. Yalnız onları doğanlardır anaları. Pis sözdür, yalan sözdür dedikləri söz. Şübhəsiz, əfv edəndir, günahlardan keçəndir Allah.

3. Arvadını bu yolla boşamaq istəyən, sonra da sözündən dönən kəs onunla yenidən təmasa girməzdən öncə bir köləni azad etməli. Bu, sizə bir öyüddür. İşləklərinizdən xəbərdardır Allah.

4. Azad ediləsi bir köləsi olmasa, arvadıyla təmasa girməzdən öncə iki ay dalbadal oruc tutmalı. Buna gücü çatmayan altmış nəfər yoxsulu doyuzdurmalı. Bunlar ondan ötrüdür ki, iman gətirəsiz Allaha və Rəsuluna. Deyilənlər Allahın qoyduğu sədlərdir. Ağrılı bir əzab gözləyir kafirləri.

5. Öncə gəlib-getmiş olan kimsələr necə alçaldılıbsa, Allaha və Rəsuluna qarşı çıxan kəslər də eləcə alçaldılacaq. Aşkar ayələrdir nazil elədiklərimiz, alçaldıcı bir əzab gözləyir bunları dananları.

6. O gün ki, hamını diriltdi Allah, bildirər onlara nə iş tuturdularsa. İşləklərini birər-birər hesaba almış Allah. Özlərisə hər bir şeyi unutmuş. Hər şeyə şahiddir Allah.

7. Göylərdə nə varsa, yerdə nə varsa bilir Allah. Bunu bilməzmi oldun? Üç nəfər gizli söhbət edən yerdə dördüncü mütləq Odur. Beş nəfər gizli söhbət edən yerdə altıncı mütləq Odur. İstər bundan az olsunlar, istər də çox, fərqi yox, harada olsalar onların yanındadır O. Və axır qiyamət günü bildirər onlara nə iş tuturdularsa. Şübhəsiz, hər şeyi biləndir Allah.

8. Məgər görməzmi oldun o kəsləri ki, gizli söhbətlər eləmək yasaq ikən onlara, bundan əl çəkmirdilər, günah işlətmək, düşmənçilik eləmək, Rəsula qarşı çıxmaq barədə sözləşirdilər. Yanına gələn zaman, Allahın səni salamlamadığı sayaq səni salamlayarlar [«əs-sələmu aleyk» əvəzinə «əs-səmu aleyk», yə'ni «ölüm olsun sənə» deyərlər]. «Dediklərimizə görə bizi əzaba uğratmalı deyildimi Allah məgər?» deyərlər özlərinə. Vasil olacaqları cəhənnəm bəs eləyər onlara. Pisdən pisdir onların gedəcəkləri yer!

9. Ey iman gətirənlər! Gizlində danışan zaman bir-birinizlə günah işləmək, düşmənçilik eləmək, Rəsula qarşı çıxmaq barədə sözləşməyin, yaxşı bir iş barədə, taqvalı iş barədə söhbətlər eləyin. Qorxun Allahdan, Onun hüzurunda cəm olacaqsız.

10. Gizli söhbətlər şeytan işidir, o istər mə'yus eləyə bu söhbətlər iman gətirənləri. Allahın izni olmadan bir zərər verə bilməz onlara şeytan. Qoy Allaha güvənsin mö'min olan kimsələr.

11. Ey iman gətirənlər! Məclislərdə təzə gələnlər üçün «Yer verin» deyiləndə sizə, onlara yer verin ki, genişlik bəxş eləyə Allah sizə, vüs'ət verə işinizə. «Qalxın» deyildimi, qalxın ki, sizlərdən iman gətirən, elm alan kimsələri uca-uca məqamlara yüksəldə Allah. Gördüyünüz işlərdən xəbərdardır Allah.

12. Ey iman gətirənlər! Rəsul ilə məhrəmanə söhbət eləmək istəyəndə öncə yoxsullara sədəqə verib gəlin. Sizin üçün belə daha yaxşı olar, daha çox pak olarsız [yə'ni Peyğəmbərlə söhbətə günahlardan qismən də olsa təmizlənib gəlməyiniz məsləhətdir]. Sədəqə verməyə heç nə tapa bilməsəniz, qəmlənməyin, bilin, günahlardan keçəndir, Rəhimdir Allah.

13. Rəsul ilə məhrəmanə söhbətə gəlməzdən öncə kasıb düşəcəyinizdənmi qorxaraq sədəqə vermədiniz? Tövbənizi qəbul buyurmuş Allah. Namaz qılın, zəkat verin, Allaha və Rəsuluna itaət eləyin. İşləklərinizdən xəbərdardır Allah.

14. Allahın qəzəbinə düçar olmuş bir qövmün adamlarını özlərinə dost bilən o kəsləri məgər tanımazmısan? Nə sizdəndir, nə onlardan o kəslər. Bilə-bilə yalandan and içərlər.

15. Şiddətli bir əzab hazırlamış onlara Allah. Nə pis iş görürdülər!

16. Qalxan elədilər özlərinə andlarını, azdırdılar mö'minləri Allah yolundan. Alçaldıcı bir əzab gözləyir onları.

17. Nə malları, nə oğul-uşağı yarar verməz onlara Allahın dərgahında. Cəhənnəmlikdir onlar. Od içində əbədilik qalarlar.

18. Allahın hamını dirildəcəyi gün sizə and içdikləri kimi Ona da and verərlər və elə bilərlər dünyada olduğu sayaq axirətdə də karlarına gələr yalan. Bilin, onlardır yalançılar!

19. Tabe etmiş özünə onları şeytan. Allahı anmağı unutdurmuş onlara. Şeytanın tərəfdarlarıdır belələri. Şeytanın tərəfdarlarıdır itkiyə uğrayanlar.

20. Allaha və Rəsuluna qarşı çıxanlar alçaq kimsələrin sırasındadır.

21. «Mən və peyğəmbərlərim mütləq qalib gələcəyik» deyə yazmış hökmünü öncədən Allah. Şübhəsiz, qüvvətlidir, güclüdür Allah.

22. Allaha və axirət gününə inanan elə qövm tapmazsan ki, Allaha və Rəsuluna qarşı çıxan kimsələrlə dostluq edələr. Ataları, oğulları, qardaşları, qohumları olsa belə bu kimsələr onların. İmanı ürəklərinə yazmış Allah, dərgahından göndərdiyi nur ilə yardım eləmiş onlara. İçindən çaylar axan cənnətlərə salar Allah onları, oralarda əbədilik qalarlar. Razı qalar onlardan Allah. Onlar da razı qalar Allahın ne'mətindən. Allah firqəsinin adamlarıdır belələri. Bilin, Allah firqəsinin adamlarıdır uğura uğrayanlar!