Rəhman və Rəhim Allahın adıyla

1. Kəf hə yə ayn sad.

2. Bu bir anımdır, bəndəsi Zəkəriyyəyə Rəbbinin verdiyi rəhmətlə bağlıdır.

3. Rəbbinə gizlicə yalvarmışdı,

4. demişdi: «Rəbbim, zəifləmiş sümüklərim ağarmış başım. Rəbbim, Sənə yalvara-yalvara heç vaxt baxtsız olmadım.

5. Qorxuram ki, dinimizi dəyişə məndən sonra yerimə keçəcək yaxınlarım. Arvadım da sonsuzdur. Bir oğul bəxş elə mənə Öz dərgahından

6. mənim və Yaqub oğullarının varisi olsun. Rəbbim, Sən onu bir insan elə ki, ondan razı qalasan».

7. «Zəkəriyyə! Biz sənə bir oğulun müjdəsini veririk. Adı Yəhyədir. Bundan öncə bu adda heç kimi var etməmişik» dedi Allah.

8. «Rəbbim, qocalıq haqlamış məni, arvadım da sonsuzdur, oğlum necə ola bilər?» dedi o.

9. «Elədir» dedi Allah - «Amma Rəbbin belə demiş: «Bu Mənim əlimdə asan bir işdir. Sən öncə bir heç idin, səni heçdən var elədim».

10. «Rəbbim, elə isə buna dair bir əlamət göstər mənə» dedi o. «Sən lal olmasan belə üç gün, üç gecə insanlarla danışmamalısan - bu da sənin əlamətin» dedi Allah.

11. Mə'bəddən qövmünün qabağına çıxaraq işarəylə bildirdi ki, səhər-axşam həmd etsinlər Allahı [namaz qılsınlar]

12. «Ey Yəhyə, Kitabdan möhkəm yapış» deyə hikmət öyrətmişdik hələ uşaqkən ona.

13. Bir mərhəmət duyğusu, bir paklıq da vermişdik ona dərgahımızdan. Taqva yiyəsiydi o.

14. Atasına-anasına yaxşı idi, Rəbbinə asi olan bir yekəpər deyildi.

15. Doğulduğu gündə də, öləcəyi gündə də, diriləcəyi gündə də Biz onu salamlayırıq.

16. Məryəmi də an Kitabda. Ailəsindən kənarlaşıb şərqə doğru çəkilmişdi.

17. Özü ilə onların arasında bir pərdə çəkmişdi. Biz də ruhumuzu [Cəbraili] göndərdik onun yanına. Kamil bir bəşər kimi göründü ruhumuz ona.

18. «Rəhman Özü məni səndən qorusun, taqva yiyəsisənsə dəymə mənə» dedi Məryəm.

19. «Mən Rəbbinin elçisiyəm, gəldim sənə pak bir oğlan uşağını bağışlayam» dedi ruh.

20. «Mənə bir bəşərin əli dəyməmiş, pozğun qadın da deyiləm, oğlum necə ola bilər?» dedi Məryəm.

21. «Elədir. Amma Rəbbin belə demiş: «Bu Mənim əlimdə asan bir işdir. İnsanlara bir mö'cüzə olaraq, dərgahımızdan onlara rəhmət payı olaraq Biz onu var edəcəyik. Öncədən belə bir qərar vermişik» dedi ruh.

22. Beləcə o uşaqla yükləndi Məryəm.

23. Doğum sancısı onu bir xurma ağıcının altına çəkdi. «Bundansa kaş öləydim, unudulub gedəydim» dedi o.

24. Bir səs [ruh] onu aşağıdan səslədi: «Yzmə özünü, Rəbbin içindəkini nəcabətli eləmiş.

25. Xurma ağacını özünə çək, silkələ, üstünə tərtəzə xurmalar tökülsün.

26. Ye, iç, gözün aydın olsun! İnsanlardan kimi görsən söylə ki, «Mən bu gün orucam, Rəhmanın adına susmağı nəzir demişəm, kimsəylə kəlmə kəsmərəm».

27. Uşağı qucağında qövmünün içinə gəldi. Dedilər: «Ey Məryəm, görünməmiş bir iş gördün.

28. Ey Hərunun bacısı, pis kişi deyildi atan, əxlaqsız deyildi anan».

29. Əli ilə uşağı göstərdi o. «Beşikdəki uşaqla necə danışmaq olar?» dedilər.

30. Uşaq dilləndi: «Mən şübhəsiz, Allahın bəndəsiyəm, mənə Kitab [İncil] vermiş O, məni peyğəmbər eləmiş.

31. Harda olursam olum, mənim qədəmlərimi O mübarək eləmiş. Bir də buyurmuş sağ durduqca namaz qılım, zəkat verim.

32. Və anama da yaxşı olum. Bədbəxt bir yekəpər yaratmamış məni O.

33. Doğulduğum gündə də, öləcəyim gündə də, diriləcəyim gündə də salam olsun mənə».

34. Məryəm oğlu İsa budur. Şübhə elədikləri o gerçək kəlam budur.

35. Övlad götürən deyil Özünə Allah. Ucalardan ucadır O. Hər nəyi istəsə, «Ol» desə olasıdır.

36. «Şübhəsiz, Allah mənim də Rəbbimdir, sizin də Rəbbinizdir. Ona ibadət eləyin. Doğru olan yol budur».

37. Çəkişməyə başladı bir-biriylə ayrı-ayrı firqələr. O böyük günü görəcək kafirlərin vay halına!

38. Yanımıza gələn gün qulaqları elə yaxşı eşidəcək, gözləri elə yaxşı görəcək ki! Fəqət zalımlar bu gün aşkar bir sapqınlıq içindədirlər.

39. Həsrət günü [dünya həyatında yaxşı işlər görməyin həsrətini çəkəcəkləri qiyamət günü] barəsində onlara xəbərdarlıq elə. Yoxsa onlar qəflətdə ikən, imana gəlməmişkən birdən yaxalanarlar, iş işdən keçmiş olar.

40. Yer üzünün və burada olanların varisi, şübhəsiz, Bizik. Və Bizim dərgahımıza qayıdar onlar.

41. İbrahimi də an Kitabda. Çox doğrucul insandı, peyğəmbərdi, şübhəsiz.

42. Bir zaman atasına demişdi: «Atacan, axı nəyə görə nə eşidən, nə görən və nə sənə bir yararı, ya zərəri olan şeylərə ibadət eləyirsən?

43. Atacan, sənə gəlməyən elm, şübhəsiz, mənə gəlmiş. Mənə tabe ol səni doğru yola yönəldim.

44. Atacan, şeytana tapınmayasan. Rəhmana çox asi olmuş o şeytan.

45. Atacan, doğrusu, mən qorxuram Rəhmanın əzabı sənə toxuna və şeytana yoldaş olaraq qalasan»
46. Atası dedi: «Ey İbrahim, mənim tanrılarımdan dönməkmi istəyirsən? Düşündüyündən daşınmasan, səni daşa basacam. Uzun bir müddətliyə məndən uzaq ol».

47. İbrahim dedi: «Salam olsun sənə. Sənin üçün Rəbbimdən məğfirət diləyəcəyəm. Şübhəsiz, mənə qarşı yaxşıdır O.

48. Allahı qoyub tapındığınız bütlərlə sizi tərk eləyib gedirəm. Rəbbimə yalvararam. Rəbbimə yalvara-yalvara, güman ki, baxtsız olmaram».

49. Allahı qoyub tapındıqları bütlərlə onları tərk eləyib gedəndən sonra İshaqı və Yaqubu İbrahimə bəxş elədik, hər birini peyğəmbər elədik.

50. Onlara pay verdik rəhmətimizdən, hər dildə, hər dində xatırlatdıq onları.

51. Musanı da an Kitabda. Pak olan bir insandı, göndərilmiş peyğəmbərdi, şübhəsiz.

52. Tur dağının sağ yanından onu səslədik. Və özümüzə onu yaxın saldıq ki, dediyimizi eşidə bilsin.

53. Rəhmətimizdən pay kimi qardaşı Hərunu bəxş elədik Biz ona peyğəmbər olaraq.

54. İsməili də an Kitabda. Və'dinə sadiq qalan bir insandı, göndərilmiş peyğəmbərdi, şübhəsiz.

55. Namaz qılmağı, zəkat verməyi əmr edərdi əhlinə. Ondan razı idilər Rəbbinin dərgahında.

56. İdrisi də an Kitabda. Çox doğrucul bir insandı, peyğəmbərdi, şübhəsiz.

57. Ali bir məqama ucaltdıq onu.

58. Bunlar o peyğəmbərlərdilər ki, ne'mət vermişdi onlara Allah. Adəmin, Nuhla birgə gəmidə daşıdıqlarımızın, İbrahim və İsrailin nəslindəndi, doğru yola yönəltdiyimiz və seçdiyimiz kimsələrdəndi bu şəxslər. Rəhmanın ayələri oxunanda bunlara səcdəyə qapanıb ağlayardılar.

59. Bunlardan sonra gələn nəsillər namazdan əl çəkdilər, şəhvətlərə uydular. Düşəcəklər cəhənnəmin içinə.

60. Tövbə eləyən, iman gətirən, saleh işlər görənlərsə girərlər cənnətə, onların haqlarında bir haqsızlıq edilməz.

61. Girərlər Adn cənnətlərinə. Bunları bəndələrinə qaibanə və'd etmiş Rəhman. Şübhəsiz, Onun və'di yerinə yetəcəkdir.

62. Oralarda boş sözlər yox, yalnız salam eşidərlər. Səhər-axşam ruziləri oralarda hazır olar.

63. Budur o cənnət ki, bəndələrimizdən müttəqi olanları ona varis edərik.

64. «Yalnız Rəbbinin buyruğuyla nazil olarıq biz mələklər. Gələcək, keçmiş və indiki işlərimizi təkcə O bilər. Rəbbin unutqan deyil».

65. Göylərin, yerin və bunların arasında olanların Rəbbidir O. Ona ibadət elə. Səbrli ol Ona ibadətində. Necə bilirsən, varmı Onun adaşı?

66. «Öləndən sonramı qəbirdən sağ çıxacam» deyər insan.

67. Məgər xatırlamazmı insan, öncə onu yaradan Biz idik, o sadəcə bir heç idi.

68. Rəbbinə and olsun ki, Biz onları şeytanlarıyla birgə bir yerə cəm edərik, sonra da diz çökdürərik onları cəhənnəmin çölündə.

69. Sonra isə hər dəstədən seçib ayırarıq Rəhmanın əleyhinə ən çox çıxan kəsləri.

70. Bir də ki, Biz çox yaxşı tanıyırıq kimlər daha layiqdir cəhənnəmə girməyə.

71. Sizlərdən hər biriniz ora mütləq girməli. Bu bir hökmdür, onu icra eləməyə Rəbbin Özü qərarlıdır.

72. Sonra müttəqilərə nicat verərik, zalımları diz üstə çökmüş halda tərk edərik.

73. Ayələrimiz açıqca oxunan zaman iman gətirənlərə «Bu iki dəstədən hansı birinin məqamı daha yaxşı, yeri daha gözəldir?» deyər küfr eləyənlər.

74. Bunlardan öncə də neçə-neçə nəsli yoxa çıxardıq. Onlar bunlardan daha varlı, daha görümlüydülər.

75. De ki, «Və'd edilən əzabı, ya qiyaməti görənədək sapqınlıq içində vurnuxanlara möhlət verər Rəhman. O zaman bilərlər kimin yeri daha pisdir, kimin tərəfdarları daha zəifdir».

76. Doğru yolda olanların doğruluğunu artırar Allah. Qalımlı olansa saleh işlərdir, bunların da daha çox xeyir gətirəcək savabı və bunlarla bağlı olan daha gözəl aqibət yazısı Rəbbinin dərgahındadır.

77. «Mənə mal-dövlət və övlad veriləcəkdir!» dedi ayələrimizi danan kəs. Gördünmü onu nə dedi?

78. Görülməzimi bilir, Rəhmanla bu barədə əhdmi bağlamış?

79. Xeyr! Nə deyirsə yazarıq, əzabını uzatdıqca uzadarıq.

80. Onun dedikləri şeylərə Biz özümüz varis olarıq, bunları tərk eləyib tək gələr o dərgahımıza.

81. Allahı qoyub başqalarına tanrılar olaraq tapındılar ki, Allahın dərgəhında bunlar öz nüfuzuyla onların xilası üçün iltimasçı olalar.

82. Xeyr! Onların ibadətini inkar edəcəklər, onların ziddinə gedəcəklər.

83. Kafirlərin üstünə şeytanlar göndərmişik. Bunlar da kafirləri Ona asi olmağa qızışdırarlar.

84. Onların işləklərinə görə darıxma, Biz onların günlərini bircə-bircə sayırıq.

85. Rəhmanın hüzurunda müttəqiləri bir hey'ət olaraq cəm edəcəyimiz gün,

86. suçluları susuzluqdan yana-yana cəhənnəmə sürəcəyimiz gün

87. ancaq o kəslər üçün iltimas edilər ki, Rəhmanla əhd bağlamış onlar.

88. «Bir övlad götürmüş Özünə Rəhman» dedilər.

89. Dəhşətli bir söz atdınız ortaya.

90. Az qala çatlayacaqdı göylər, yarılacaqdı yer, yıxılıb dağılacaqdı dağlar,

91. Rəhmana bir övlad calamaq istəmişdilər.

92. Rəhmana yaraşmaz Özünə övlad götürə.

93. Göylərdə kim varsa, yerdə kim varsa hamı Ona qul olaraq gələcək Rəhmanın dərgahına.

94. Onları birər-birər saymış O.

95. Qiyamət günü hamısı da təklənərək gələcək Onun dərgahına.

96. O kəslər ki, iman gətiriblər, saleh işlər görüblər, sevimli edəcək onları Rəhman.

97. Qur'anı sənin dilində nazil eləmişik ki, müttəqilərə müjdə verdiyin zaman, tərs olan kəslərə xəbərdarlıq edən zaman bir çətinlik çəkməyəsən.

98. Bunlardan öncə də, neçə-neçə nəsli yoxa çıxardıq. Gözünə dəyirmi heç birisi, qulağına gəlirmi heç birinin səsi?