Rəhman və Rəhim Allahın adıyla

1. Ey iman gətirənlər! Əməl edin sazişlərə. Sizə deyilənlərdən savayı yerdə qalan hər bir heyvan halal sayılmış sizə. Ancaq əyninizdə ihram [həcc və umra ziyarəti zamanı geyinilən geyim] varkən ov ovlamaq halal sayılmaz. İstədiyi hökmü verir Allah.

2. Ey iman gətirənlər! Allahın mərasimlərinə, haram aya, [Kə'bəyə] hədiyyə olan qurbanlığa, boyunbağı ilə bəzədilmiş qurbanlıqlara və Rəblərinin lütfünün və rizasının ardınca Beyti harama gələnlərə siz nəbadə hörmətsizlik edəsiz. İhramı soyunandan sonra ov ovlaya bilərsiz. Məscidi harama gələn zaman qarşınızı kəsən kəslərə qarşı bəslədiyiniz kin sizi təcavüz etməyə qızışdırmasın. Yaxşılıq və taqva naminə girin ünsiyyətə bir-birinizlə. Günah işlədəcəksinizsə, düşmənçilik edəcəksinizsə girməyin ünsiyyətə bir-birinizlə. Qorxun Allahdan. Allahın cəzası şiddətlidir.

3. Leş, qan, donuz əti, Allahdan qeyrisi adına kəsilənlər, canı çıxmazdan öncə kəsməmiş olsanız boğulmuş, bir yerindən vurularaq öldürülmüş, yıxılıb ölmüş, buynuz zədəsilə ölmüş və qurbangahlar üstündə kəsilmiş heyvanları yemək və fal oxlarıyla pay qazanmaq haram bilinmiş sizə. Əxlaqsızlıq deməkdir bunu qəbul etməmək. Sizi dininizdən döndərməkdən üzmüş artıq ümidini kafirlər bu gün. Onlardan qorxmayın, Məndən qorxun. Bu gün sizin dininizi, sizə olan ne'mətimi tamamladım və sizin üçün din olaraq İslamı bəyəndim. Aclıqdan əziyyət çəkən bunlardan yeyə bilər günaha meyl etmədən. Şübhəsiz, bağışlayandır, Rəhimdir Allah.

4. Səndən soruşarlar, nələr halaldır onlara? De ki, «Sizə halal bilinmiş təmiz və yaxşı şeylər. Allahın sizə öyrətdiyindən öyrədərək əhliləşdirdiyiniz ov itlərinin tutduğunu yeyin və anın Allahın adını. Qorxun Allahdan. Şübhəsiz, hesabı tez aparandır Allah.

5. Bu gün halal bilinmiş sizə təmiz və yaxşı şeylər. Kitab verilənlərin yediyi sizə halaldır. Sizin yediyiniz də onlara halaldır. Namus gözləyib əxlaqsızlığa yol verməsəniz, mə'şuqəniz olmasa sizə halal bilinər mö'min olan namuslu subay qadınlar və sizdən öncə Kitab verilənlərdən olan namuslu subay qadınlar. İmanı danan adamın boşa çıxar işləri, axirətdə də ziyana düşənlərdən olar».

6. Ey iman gətirənlər! Namaza qalxan zaman yuyun üzünüzü, yuyun dirsəyə qədər əllərinizi, başınıza çəkib sürtün əllərinizi, yuyun topuğa qədər ayaqlarınızı. Təmiz deyilsinizsə paklanın. Xəstə olsanız, yaxud yol üstə olsanız, yaxud ayaq yolundan gəlmisinizsə, yaxud da qadınla yaxınlıq etmisinizsə - su tapa bilməsəniz təmiz qumla təyəmmüm edin: əllərinizə, üzünüzə sürtün qumu. Bərkə salmaq istəməz sizi Allah. O istər pak etsin sizi, tamamlasın sizə olan ne'mətini, siz də şükr eləyəsiz Ona.

7. Anın Allahın sizə olan ne'mətini, Ona verdiyiniz sözü. «Eşitdik, itaət elədik» demişdiniz. Qorxun Allahdan. İçinizdə olanları bilir Allah.

8. Ey iman gətirənlər! Allah xatirinə insafla şahidlik eləyin. Bir dəstə adama bəslədiyiniz kin sizi insafdan çəkindirməsin. İnsaflı davranış taqvaya daha yaxındır. Çəkinin Allahdan. İşləklərinizdən, şübhəsiz, xəbərdardır Allah.

9. İmana gələnlərə, əməli salehlərə məğfirət və böyük əcir və'd etmiş Allah.

10. Ayələrimizi yalan sayıb dananlarsa cəhənnəm adamlarıdır.

11. Ey iman gətirənlər, anın Allahın sizə olan ne'mətini. Sizə tərəf uzadanda təcavüzkar əllərini bir qövm, o əlləri geriyə çəkmişdi Allah. Çəkinin Allahdan. Qoy Allaha güvənsin mö'min bəndələr.

12. İsrail oğullarından söz almışdı Allah. On iki başçı seçdik onların arasından. «Mən, şübhəsiz, sizinləyəm. Namaz qılsanız, zəkat versəniz, elçilərimə inansanız, onlara yardım göstərsəniz, Allaha gözəl bir borc versəniz, yuyaram günahlarınızı, salaram sizi içindən çaylar axan cənnətlərə. Bundan sonra da sizlərdən kim küfr eləyərsə doğru yoldan sapmış olur» dedi Allah.

13. Verdikləri sözü pozduqlarına görə onları lə'nətlədik, qəlblərini qəddar elədik. Dəyişdirərək kəlmələrin yerlərini təhrif eləyir mə'nanı onlar. Unudublar onlara xatırladılan şeylərin bir hissəsini. Hələ də xəyanət görürsən onların bir çoxundan. Ancaq necə olsa da əfv et, bağışla onları. Allah sevər gözəl davrananları.

14. «Biz xristianıq» deyənlərdən də və'd almışdıq. Unutdular onlara xatırladılan şeylərin bir hissəsini və qiyamətə qədər düşmənçilik, kin-küdurət saldıq onların arasına. Onların nə iş tutduğunu özlərinə xəbər verəcək Allah.

15. Ey Kitab əhli! Sizə Bizim Rəsul gəlib, Kitabdan gizlədiyiniz şeylərin çoxunu açıqlayır sizə o və çoxunun da üstündən keçib o. Sizə Allahdan bir nur gəlib, aydın bir Kitab gəlib.

16. Allahın rizasını qazanmaq istəyənləri bu Kitabla salamat yollara və Öz izniylə qaranlıqdan aydınlığa çıxarar Allah. Doğru yola yönəldər onları O.

17. Küfr elədi o kəslər ki, «Məryəm oğlu Məsihdir Allah» dedilər. «Elə isə kimin Allahlıqdan nəyi var ki, çıxsın Onun qabağına məhv etmək istərsə Məryəm oğlu Məsihi, onun anasını və yer üzündə yaşayanın hamısını» söylə. Göylərin, yerin və göylərlə yer arasının yiyəsi Allahdır. İstədiyini yaradır O. Hər şeyə qadirdir Allah.

18. Yəhudilər və xristianlar «Biz Allahın oğullarıyıq, Onun sevimliləriyik» dedilər. «Elə isə bəs niyə əzab verir sizə günahlarınıza görə Allah? Siz də Onun yaratdığı bəşərsiniz» söylə onlara. İstədiyini bağışlar, istədiyinə əzab verər Allah. Göylərin, yerin və göylərlə yer arasının yiyəsi Allahdır. Onun da dərgahına dönəcək axır hamı.

19. Ey Kitab əhli! Kəsilmişdi elçilərin gəlişinin arası, sizə Bizim Rəsul gəlmiş aydınlatsın hər şeyi. «Bizə mücdə verən, öyüd verən bir peyğəmbər gəlməmiş» deməyəsiz. Mücdə verən, öyüd verən peyğəmbər gəlmiş sizə. Hər şeyə qadirdir Allah.

20. Musa öz qövmünə belə demişdi: «Ey qövmüm, anın Allahın sizə olan ne'mətini. İçinizdən peyğəmbərlər yaratdı, sizə hökmdarlıq verdi, aləmlərdə kimsəyə vermədiyini sizə verdi Allah.

21. Ey qövmüm, girin o müqəddəs torpağa ki, onu taleyinizə yazıb Allah. Geriyə getməyin, yoxsa hər şeyi itirib dönərsiniz geriyə».

22. «Ey Musa, böyük bir qövm var orada, onlar çıxmayınca biz oraya girmərik. Çıxarlarsa girərik» demişdilər.

23. Allahdan qorxanlardan olan və Onun ne'mət verdiyi iki adam «Qapıdan girib onların üstünə yüyürün, zəfər sizin olar qapıdan girsəniz. Əgər mö'minsinizsə, di Allaha təvəkkül eləyin» demişdi.

24. «Ey Musa, nə qədər ki, oradadırlar, oraya girmərik biz. Sən Rəbbinlə birlikdə gedin savaşın, əyləşib gözləyərik biz burada» dedilər.

25. «Rəbbim, başqa kimsəm yoxdur mənim, bir özüməm, bir qardaşım. Yoldan sapmış o qövm ilə aramızı ayır bizim» dedi Musa.

26. «O yer qırx il müddətinə haram oldu onlara. Çaşqınlıq içində dolaşarlar yer üzünü. Yolsuzların üzündən üzülməyəsən» dedi Allah.

27. Haqq olaraq oxu onlara Adəmin iki oğlunun hekayətini. Hər ikisi gətirmişdi qurbanlığını. Qəbul edilmişdi qurbanların biri, edilməmişdi o biri. Qurbanı qəbul edilməyən «Səni öldürəcəyəm» demişdi öz qardaşına. Bu da cavab olaraq demişdi: «Yalnız müttəqilərdən qəbul edər qurbanı Allah.

28. Ystümə əl qaldırsan öldürəsən məni, üstünə əl qaldırmaram öldürəm səni. Çünki mən qorxaram Allahdan, aləmlərin Rəbbindən!

29. İstərəm mənim günahımı da yükləyib öz üstünə cəhənnəmlik olasan. Budur zalımların cəzası».

30. Nəfsi sövq elədi onu [qurbanı qəbul edilməyən] qardaşını öldürməyə, öldürdü qardaşını. İtgiyə uğradı o.

31. Qardaşının cəsədini necə basdıracağını göstərmək üçün yeri eşələyən bir qarğa göndərdi Allah. «Vay halıma, bir qarğa qədər də olmadım ki, qardaşımın cəsədini necə basdıra bilim» dedi və peşmançılıq çəkənlərdən oldu.

32. Buna görə belə yazdıq taleyinə İsrail oğullarının: «Bir kimsəyə qıymayan, yer üzündə pozğunçuluq yaymayan adamı kim qətlə yetirirsə, sanki bütün insanlığı öldürür o. Kim ölümdən qurtarırsa elə adamı, sanki bütün insanlığa həyat verir». Aşkar dəlillər götirdi elçilərimiz insanlara. Amma yenə də yer üzündə həddini aşır çoxu onların.

33. Allahla, Rəsuluyla cəng edənlərin, yer üzündə pozğunçuluq yayanların cəzası belə olmalı: ya öldürülməli, ya asılmalı, ya da əlləri, ayaqları çarpaz kəsilməli, ya da qovulmalı yurdundan onlar. Bu cəzalar onlar üçün dünyada bir rəzillik payıdır alarlar. Böyük əzab gözləyir onları axirətdə.

34. Ancaq əlinizə keçməzdən öncə tövbə edənlər onlara aid deyil. Bilin, günahlardan keçəndir, Rəhimdir Allah.

35. Ey iman gətirənlər, Allahdan çəkinin, Ona doğru yol arayın və Onun yolunda cihad eləyin ki, uğura uğrayasız.

36. Yer üzündə nə varsa və bir o qədər də üstəlik kafirlərin olarsa, qiyamət gününün əzabından qurtulmaq üçün fidyə kimi versələr də bunları qəbul olunmaz fidyələri. Ağrılı bir əzab gözləyir onları.

37. İstərlər çıxalar oddan. Çıxa bilməzlər oddan. Əbədidir əzabı onların.

38. Kişi və qadın oğrunun əməllərinə görə Allahdan bir cəza olaraq kəsin əllərini. Güclüdür, müdrikdir Allah.

39. Haqsızlığa yol verəndən sonra tövbə eləyib düzələn kimsə bilsin, tövbəsini, şübhəsiz, qəbul edər Allah. Bağışlayandır, Rəhimdir Allah.

40. Allahdır göylərin, yerin yiyəsi. İstədiyinə əzab verir, istədiyini bağışlayır. Bunları bilməzmisən? Hər şeyə qadirdir Allah

41. Ey Rəsul, qoy Səni heç üzməsinlər kafirlikdə birbirilə yarışanlar, ağzında «İman gətirdik» deyib ürəyində inanmayanlar, yəhudilərdən olanlar. Yalana qulaq verər, Sənə qoşulmayan başqa qövmə qulaq verər, kəlmələrin yerlərini dəyişdirib mə'nanı təhrif edər onlar. «Əgər bu sizə verilirsə alın, verilmirsə həzər edin ondan» deyərlər. Çaşdırmaq istəsə kimsəni Allah, Ona qarşı üsyana qalxmaqdan ötrü nə eləsə bir şey gəlməz beləsinin əlindən. Onlar o kəslərdir ki, Allah istəməz təmizləyə ürəklərini. Onların cəzası rəzillikdir dünyada. Böyük əzab gözləyir onları axirətdə.

42. Yalana qulaq verərlər, haram yeyərlər. Yanına gəlsələr sənin, istəsən hakimlik elə aralarında, istəsən də onlardan üz çevir. Yz çevirsən, bir zərəri dəyməz sənə onların. Hakimlik eləsən ədalətlə hökm ver. Adilləri sevər Allah.

43. İçində Allahın hökmü olan Tövrat onlarda var ikən əvvəl-əvvəl səni hakim seçə-seçə sonra nə üzlə hökmünlə razılaşmayıb səndən üz döndərirlər. Bunlar mö'min deyillər.

44. Həqiqətən, Biz göndərdik Tövratı. Göstərir və nurlandırır doğru yolu bu Kitab. Yəhudilərə hökm verərdi bu Kitabla özlərini Allaha təslim etmiş peyğəmbərlər. Rəblərinin qulu olan zahidlər və alimlər də Allahın Kitabından öyrənib əzbərlədiklərilə hökm verərdilər. Tövrata şahiddi onlar. Buna görə insanlardan qorxmayın, Məndən qorxun və Mənim ayələrimi dəyər-dəyməzinə satmayın! Allahın göndərdiyilə hakimlik etməyənlər kafirlərdir deməli.

45. İntiqam almağı yazdıq onlara o Kitabda - cana can, gözə göz, buruna burun, qulağa qulaq, dişə diş və yaraya yara. Kim qisasdan əl çəkərsə, bu öz günahlarının yuyulması deməkdir. Allahın göndərdiyilə hakimlik etməyənlər zalımlardır deməli.

46. Onların ardınca Məryəm oğlu İsanı göndərdik təsdiq etsin ondan öncə gəlmiş olan Tövratı. Ona İncili verdik. Göstərir, nurlandırır doğru yolu o Kitab. Tövratı təsdiq edir, müttəqilərə yol göstərir, öyüd verir o Kitab.

47. Qoy Allahın ondakı yazıları ilə hakimlik eləsin İncil əhli. Allahın göndərdiyilə hakimlik etməyənlər fəsiqlərdir deməli.

48. Öncəki Kitabları təsdiq üçün və onları qorumaq üçün Biz sənə də bu Kitabı nazil etdik haqq olaraq. Allahın göndədiyilə hakimlik elə sən İncil əhli arasında. Sənə gələn gerçəkdən geri çəkilərək uyma onların istəklərinə. Biz sizlərdən hər kəs üçün bir qanun və yol göstərdik. Tək bir ümmət edərdi sizi istəsəydi əgər Allah. Ancaq O verdiyini verib ki, sınağa çəksin sizi. Xeyirli işlər görməyə tələsin. Allahın dərgahına dönəcəksiz axırı. Və O da bildirəcək sizə nədən çəkişirdiniz.

49. Allahın göndərdiyilə hakimlik elə, uyma onların istəklərinə və ayıq ol ki, çaşdırıb döndərməsinlər səni Allahın sənə göndərdiyi Qur'anın bir hissəsindən. Səndən üz çevirsələr, bil, bə'zi günahları üzündən bəlaya salmaq istər onları Allah. Əslində insanların çoxu çıxmış yolundan.

50. Yoxsa cahiliyyə çağının hökmünü istəyirlər? Allahdan daha gözəl kim hökm verə bilər e'tiqadlı bir qövm üçün?

51. Ey iman gətirənlər, yəhudiləri və xristianları özünüzə dost eləməyin. Bir-birinin dostudur onlar. Sizdən kimsə onları dost tutarsa özünə o da onlardan olar. Zalımları doğru yola çəkməz Allah.

52. Yrəyi azarlılar görürsən necə canfəşanlıq edib «Qorxuruq ki, bizlərə bir fəlakət üz verə» deyirlər. Ola bilər onlara zəfər verə, yaxud bir şey verə Allah Öz dərgahından. Yrəklərində gizlətdiklərinə görə peşmançılıq çəkərlər.

53. «Sizinlə birgəyik biz» deyə and içənlər bunlarmıdır» deyər iman gətirənlər. Boşa çıxmış əməlləri, ziyana uğramış belələri.

54. Ey iman gətirənlər! Kim dinindən dönərsə, bilsin, Allah bir qövm yetirər ki, O onları sevər, onlar Onu. Mö'minlərə itaət, kafirlərə güc göstərər, Allah yolunda cihad eləyər, töhmətçinin töhmətindən qorxmaz onlar. Bu, Allahın lütfüdür, dilədiyinə verir onu. Hər şeyi tutmuş Allah, hər işi bilir Allah.

55. Sizin dostlarınız ancaq Allahdır, Onun Rəsuludur, namaz qılan, zəkat verən, ruku edən mö'minlərdir.

56. Allahı, Onun Rəsulunu özünə dost bilən kimsə bilsin, yalnız Allah firqəsinə qatılanlardır qələbəyə çatanlar.

57. Ey iman gətirənlər, sizdən öncə Kitab verilənlərin və kafirlərin sırasında olub dininizi ələ salan, əyləncə bilən kimsələrlə dostlaşmayın, Əgər mö'minsinizsə, çəkinin Allahdan.

58. Siz namaza çağırdınız, ələ salıb əyləndilər. Axı, düşüncəsizdilər.

59. De ki, «Ey Kitab əhli, Allaha, bizə və bizdən öncə göndərilənə iman gətirmişik deyəmi bizdən gəlməyir xoşunuz? Yolsuzlardır çoxunuz».

60. De ki, «Allah dərgahında bundan daha pis qarşılığın olacağını sizə xəbər verimmi?» Kimə lə'nət eləyibsə, kimə hirslənibsə Allah, kimləri meymunlara, donuzlara, şeytanların qullarına döndəribsə Allah, onların yeri daha pisdir Allahın dərgahında. Doğru yoldan azıb uzaq düşənlərdir belələri.

61. Yanınıza gələn zaman «İmana gəldik» deyərlər. İçinizə küfrlə girmiş, küfrlə də çıxıb getmiş onlar. Allah daha yaxşı bilir onların iç üzünü.

62. Görürsən bir-birilə necə yarışır onların çoxu günah işləməkdə, düşmənçilik eləməkdə, haram yeməkdə. Nə pis iş tutur onlar.

63. Günah söz söyləməkdən, haram yeməkdən çəkindirməli deyilmiydi məgər onları rəbbanilər və xaxamlar. Nə pis iş tutur onlar

64. Yəhudilər «Əliaçıq deyil Allah» dedilər. Və yumuldu öz əlləri, lə'nətə gəldi onlar. İki əli də açıqdır Allahın. Dilədiyi kimi sərf eləyir ne'mətini. Onların çoxunun azğınlığını və küfrünü mütləq artıracaq Rəbbindən Sənə gendərilən. Qiyamətə qədər sürəcək düşmənçilik və kin-küdurət salmışıq onların arasına. Onlar yandıranda hər dəfə hərb odunu, Allah söndürər onu. Pozğunçuluq törədərlər yer üzündə. Pozğunçuları sevməz Allah.

65. İmana gəlsəydi, Allahdan çəkinsəydi Kitab əhli, keçərdik suçlarından, bol ne'mətli cənnətlərə salardıq onları.

66. Tövrata, İncilə və Rəblərinin göndərdiyi Qur'ana əgər gərəyincə əməl eləsəydilər, başlarının üstündə yetişən, ayaqlarının altında bitən ne'mətlərdən yeyərdilər. Mö'tədil bir zümrə vardı onların arasında. Ancaq pis işlərlə məşğuldu çoxu onların.

67. Ey Rəsul! Təbliğ elə Rəbbindən sənə nazil olanı. Bunu eləməsən, Onun göndərdiyi yazını çatdırmırsan deməli. Səni insanlardan qoruyur Allah. Kafir qövmü doğru yola çəkməz Allah.

68. De ki, «Ey Kitab əhli! Tövrata, İncilə və Rəbbinizdən sizə nazil olana əməl eləməsəniz, bir özülün üzərində deyilsiniz deməli». Onlardan bir çoxlarının azğınlığını və küfrünü Rəbbindən sənə nazil olan Qur'an mütləq artıracaq. Elə isə kafirlərin üzündən üzülməyəsən.

69. İmana gələnlər, yəhudilər, sabiilər və xristianlardan kim inanırsa Allaha və axirət gününə, yaxşı işlər görürsə, onlara zaval yoxdur, dərd əlindən üzülməzlər.

70. İsrail oğullarından söz almışdıq, peyğəmbərlər göndərmişdik onlara. Hər dəfə peyğəmbərlər onlara xoş gəlməyən bir şeyi gətirəndə, bə'zisinə yalan yaxır, bə'zisini öldürürdü onlar.

71. Elə zənn edirdilər bir fitnə olmayacaq. Kor oldular, kar oldular. Sonra tövbələrini qəbul buyurdu Allah. Yenə də kor oldu, kar oldu bir çoxları. Onların işləklərini görür Allah.

72. Küfr elədi o kəslər ki, «Allah yalnız Məryəm oğlu Məsihdir» dedilər. «Ey İsrail oğulları! Rəbbim və Rəbbiniz olan Allaha ibadət eləyin. Allaha şərik qoşana cənnəti haram bilər Allah, od olar onun yuvası. Yoxdur zalımların bir yardımçısı» demişdi Məsih axı.

73. Küfr elədi o kəslər ki, «Allah üçün üçüncüsüdür» dedilər. Tanrı yalnız tək Tanrıdır. Dediklərindən dönməsələr, ağrılı bir əzaba düşər əlbəttə onlar.

74. Allaha tövbə qılıb Ondan əfv diləməzlərmi? Günahlardan keçəndir, Rəhimdir Allah.

75. Sadəcə bir elçidir Məryəm oğlu Məsih. Ondan öncə də elçilər gəlib getmiş. Haqq sözlüdür onun anası. Yemək yeyirdi hər ikisi [yə'ni yemək yediklərinə görə tanrı ola bilməzlər]. Gör bir necə açıqlayırıq ayələri onlara, sonra da gör necə haqdan üz döndərirlər.

76. De ki, «Allahı qoyub sizə nə zərəri, nə də yararı olan birisinəmi ibadət eləyirsiz?» Təkcə Allahdır hər şeyi eşidən, hər işi bilən.

77. De ki, «Ey Kitab əhli! Dininizdə həddinizi haqsız yerə aşmayın. Öncədən sapmışların, bir çoxunu sapdırmışların, düz yolu azmışların istəklərinə uymayın».

78. İsrail oğullarından küfr eləyən kimsələr Davudun və Məryəm oğlu İsanın diliylə lə'nətə gəlmişlər. Ysyana qalxmışdılar, düşmənçilik edirdilər.

79. Gördükləri pis işlərdən əl götürmürdülər. Nə pis iş tuturdular!

80. Görürsən, kafirlərlə dostluq edir onların bir çoxu. Nəfsləri onlara nə pis şey verib ki, Allahın qəzəbinə düşüblər və əbədilik qalacaqlar əzab içində.

81. İnanmış olsaydılar Allaha, Peyğəmbərə və ona nazil olana, kafirləri dost tutmazdılar. Onların bir çoxu yolsuzlardır.

82. Mö'minlərlə ən çox ədavətdə olan insanlar arasında yəhudilərə və Allaha şərik qoşanlara rast gələcəksən. Mö'minlərə ən çox sevgi bəsləyən insanlar arasında «Bizlər xristianlarıq» deyənləri tapacaqsan. Çünki keşişlər və rahiblər var bunların arasında. Təkəbbürlük etməz onlar.

83. Rəsula nazil olanı dinləyə-dinləyə haqqı öyrənib bildiklərinə görə onların göz yaşlarının daşdığını görürsən. Deyirlər: «Rəbbimiz, imana gəldik, şahidlərlə bir yazıya al bizi.

84. Axı nəyə görə inanmayaq Allaha və bizə gələn gerçəyə, bir halda ki, saleh qövmə qatılmağı umuruq Rəbbimizdən».

85. Bu sözlərinə görə içindən çaylar axan və içində əbədilik qalacaqları cənnətlər vermiş onlara Allah. Budur mükafatları gözəl davrananların.

86. Küfr eləyənlər, ayələrimizi yalan sayanlar cəhənnəm adamlarıdır.

87. Ey iman gətirənlər! Haram eləməyin o gözəl və təmiz şeyləri ki, halal buyurub sizə Allah. Həddinizi aşmayın. Həddini aşanları sevməz Allah.

88. Allahın sizə halal elədiyi təmiz, gözəl ruzilərdən yeyin. İman gətirdiyiniz Allahdan çəkinin.

89. Çərənləyərək içdiyiniz anda görə sizi sorğuya çəkər Allah. Pozulan anda görə günahı yumaq üçün ailənizə yedirdiyinizin orta hesabı ilə on fəqiri yedizdirmək, yaxud onları pal-paltarla tə'min etmək, yaxud da bir köləni azadlığa çıxarmaq gərək. Buna gücü çatmayan üç gün oruc tutmalı. Andlarınızın kəffarəsi bunlardır. And içəndə əməl edin andınıza. Ona şükr eləyəsiz deyə beləcə açıqlayır sizə ayələrini Allah.

90. Ey iman gətirənlər! Şərab, qumar, bütlər və fal oxları şeytan işidir, iyrənc əməldir. Bunlardan kənar durun ki, uğura uğrayasız.

91. Şərabla, qumarla şeytan aranıza düşmənçilik, kin-küdurət salmaq istər, Allahı anmaqdan və namaz qılmaqdan çəkindirmək istər. Deməli, bunlardan əl çəkdiniz, deyilmi?

92. Allaha itaətdə olun, Rəsula itaətdə olun. Pisliklərdən həzər eləyin. Yoxsa, bilin, Rəsulumuzun borcu hər şeyi açıqca bildirməkdir ancaq.

93. İman gətirənlərin və əməli salehlərin - taqva edib, imana gəlib yararlı işlər görsələr və bir daha Allahdan çəkinib yaxşılıqlar etsələr - bir günahı qalmaz daha əvvəllər daddıqlarına görə. Gözəl davrananları sevər Allah.

94. Ey iman gətirənlər! Əllərinizin və nizələrinizin ovladığı ovla sizi Allah sınağa çəkər ki, bilsin kim çəkinir xəlvətdə Ondan. Bundan sonra kim həddini aşarsa, ağrılı bir əzab gözlər onu.

95. Ey iman gətirənlər! Əyninizdə ihram varkən ov ovlamayın. Kim qəsdən ov ovlayarsa, əvəzində mal-qarasından keçməli və bunların da miqdarının ovlanan ovun misli olduğuna içinizdən iki ədalətli adam qərar verməli. Bu mal-qara qurbanlıq kimi Kə'bəyə göndərilməli. Yoxsulları doyuzdurmaq və ya elədiyinin ağırlığını dadmaq üçün buna bərabər oruc tutmaq da kəffarə sayılır. Ötüb keçmiş günahlardan keçmiş Allah. Güclüdür, intiqam alandır Allah.

96. Dolanışıq üçün dənizdə ov ovlamaq və onu yemək sizə də, yolçulara da halal bilinmiş. Əyninizdə ihram varkən quruda ov ovlamaq sizə haram bilinmiş. Hüzuruna cəm olacağınız Allahdan çəkinin.

97. Kə'bəni, o müqəddəs Evi insanlara dayaq olaraq qurmuş Allah. Haram ayı Kə'bəyə hədiyyə olan qurbanlığı, boyunbağı ilə bəzədilmiş qurbanlıqları da meydana gətirmiş ki, biləsiniz - göylərdə nə varsa, yerdə nə varsa bilir Allah.

98. Bilin, Allahın cəzası şiddətlidir. Və bağışlayandır, Rəhimdir Allah.

99. Hər şeyi bəyan eləməkdir ancaq Rəsulun borcu. İçinizi, çölünüzü bilir Allah.

100. De ki, «Bərabər tutulmaz murdarla təmiz xoşuna gəlsə belə murdarın çoxu. Elə isə, ey ağıl sahibləri, Allahdan qorxun ki, uğura uğrayasız».

101. Ey iman gətirənlər! Sorğu-sual eləməyin o şeylərin barəsində ki, xoşunuza gəlməyəcək açıqlanarsa. Soruşun bu şeyləri Qur'an nazil olarkən, onlar açıqlanarlar sizə. Onların üstündən keçmiş Allah. Günahlardan keçəndir, həlimdir Allah.

102. Sizdən öncə gəlib gedən bir qövm soruşmuşdu bu şeyləri, sonra da küfr eləmişdi həmin şeylərə.

103. Nə bəhirə, nə səibə, nə vəsilə, nə də ham deyilən şeyləri yaratmış Allah. Yalnız küfr eləyənlər yalan uydururlar Allahın adına və çoxları da ağıl işlətmirlər.

104. «Gəlin itaət eləyin Allahın göndərdiyinə və Rəsula» deyiləndə onlara, «Atalarımızın qoyduğu özül yetər bizə» deyərlər. hətta bir şey bilmirdisə, doğru yolda deyildisə ataları, onda necə?

105. Ey iman gətirənlər! Siz öz hayınızda olun. Siz doğru yolu tutan zaman yolundan sapmış bir kimsə zərər verə bilməz sizə. Hamılıqla dönəcəksiz Allahın dərgahına. O da bildirər sizə nə iş görürdünüzsə.

106. Ey iman gətirənlər! Birinizi haqlayanda ölüm, aranızdan seçmə iki adil adam şahidlik eləsin onun vəsiyyətinə. Yaxud da yol üstündə ikən başınıza müsibət açsa ölüm sizlərdən olmayan iki başqa adam eləsin bu şahidliyi. Əgər şübhələnirsinizsə bu ikisindən, qoyun namazdan sonra and içsinlər Allaha: «Qohumlarla olsa belə dəyişmərik andımızı heç bir dəyərə, gizləmərik Allahın şahidliyini. Yoxsa günah yiyələrinin sırasında olarıq».

107. Əgər mə'lum olarsa ki, günah işlədib onlar, haqlarına təcavüz edilənlərdən şahidliyə daha çox layiq olan iki nəfər tutar onların yerini və «Bizim şahidliyimiz onların şahidliyindən daha doğrudur, haqqı tapdamadıq biz. Yoxsa zalımlardan olardıq» deyə and içərlər Allaha.

108. Şahidliyi qaydasınca eləmək, yaxud and içəndən sonra andın qəbul edilməyəcəyindən qorxuya düşmək üçün gərəkli olan budur. Allahdan qorxun və eşidin - yolsuzları doğru yola çəkməz Allah.

109. Peyğəmbərləri toplayacağı gün «Sizə nə cavab verildi?» deyər Allah. «Yox bizim bir bilgimiz, görünməyən şeyləri bilən təkcə Sənsən, Sən» deyərlər.

110. Allah demişdi: «Ey Məryəm oğlu İsa! Xatırla sənə və anana verdiyim ne'mətimi. Ruhul-Qüdslə yardım eləmişdim sənə. Beşik yaşında da, böyüyəndə də insanlarla danışırdın. Kitabı, hikməti, Tövratı və İncili öyrətdim sənə. Gildən quş şəklində bir şey düzəltmişdin Mənim iznimlə, üfləmişdin onu, iznimlə quş olmuşdu o. İznimlə sağaltmışdın anadan kor doğulmuşu, cüzamlını. İznimlə qaytarırdın ölüləri həyata. İsrail oğullarını qoymamışdım sənə yaxın düşələr. Sən aşkar dəlillər gətirəndə onlara aralarındakı kafirlər «Bu aşkar bir cadudan başqa bir şey deyildir» demişdilər.

111. «Mənə və peyğəmbərlərə iman gətirin» deyə əmr eləmişdim həvarilərə. «Biz iman gətirdik, müsəlman olduğumuza şahidlik elə» demişdilər.

112. «Ey Məryəm oğlu İsa, bizə göydən bir süfrə göndərə bilərmi Rəbbin» demişdi həvarilər. «Əgər mö'minsinizsə, qorxun Allahdan» dedi o.

113. «O süfrədən yemək istərik, sakitləşsin ürəyimiz, bilək ki, bizə dediyin doğru imiş və gözümüzlə görə bilək biz onu» dedilər.

114. İlahi, Rəbbimiz! Bizə və bizdən sonra gələcəklərə bayram və Səndən bir dəlil olaraq göydən bir süfrə göndər, ruzi ver bizə. Sən ruzi verənlərin ən xeyirlisisən» dedi Məryəm oğlu İsa.

115. «Onu göndərərəm sizə. Ancaq küfr eləyənə aləmlərdə heç kimə vermədiyim bir əzabı verərəm» dedi Allah.

116. «Allahdan başqa iki tanrı olaraq mənə və anama tapının» deyə sənmi buyurdun insanlara, ey Məryəm oğlu İsa?» və yenə dedi Allah, «Haşa, - dedi o - Sən ucasan. Haqqım yoxdur mənə görə haqq olmayan bir şeyi söyləməyə. Əgər söyləmişəmsə, bunu bilmiş olarsan. İçimdə nə varsa mənim, bilirsən. İçində nə varsa Sənin, bilməzəm. Görülməzləri bilən təkcə Sənsən, Sən.

117. «Mənim və sizin Rəbbiniz olan Allaha ibadət eləyin» deyə Sənin mənə buyurduuğundan savayı bir şey deməmişəm onlara. Nə qədər ki, onların içində idim, şahidlik eləyirdim onlara. Ancaq Sən məni vəfat etdirəndən sonra təkcə Sən göz oldun onlara. Sən hər şeyi görənsən.

118. Əzab verirsən ver onlara, Sənin bəndələrindilər. Keçsən günahlarından, demək təkcə Sənsən güclü və müdrik olan».

119. «Bu gün sadiqlərə sədaqətlərinin fayda gətirdiyi gündür. İçindən çaylar axan cənnətlər gözləyir onları, oralarda əbədilik qalarlar» dedi Allah. Razı qaldı onlardan Allah, onlar da Allahdan. Budur o böyük qurtuluş!

120. Göylərin, yerin və onlarda nə varsa onun yiyəsi Allahdır. hər şeyə qadirdir O