Rəhman və Rəhim Allahın adıyla

1. O gələcək əzab barədə sual vermiş birisi.

2. Kafirlərə nəsib olar o əzab. Bir kimsə tapılmaz ki, o əzabı dəf eləyə.

3. Allahın, ali pillələrin yiyəsinin dərgahından göndərilər o əzab.

4. Əlli min il sürən bir gündə Allahın hüzuruna qalxar o pillələrlə mələklər və Cəbrail.

5. Yaxşı-yaxşı səbr elə.

6. Kafirlər əzabı çox uzaqda görürlər.

7. Biz isə əzabı lap yaxında görürük.

8. O gün gümüştək əriyər göy,

9. didilmiş yun kimi olar dağlar.

10. Dost dostun hayına qalmaz,

11. bir-birinin üzünə baxıb qalar dostlar o gün. Əzabdan qurtula deyə suç yiyəsi hazırdır qurban verə oğul-uşağını,

12. arvadını, qardaşını,

13. ona yaxınlarda yer vermiş olan qohumlarını.

14. Yer üzündə kim varsa hamını fəda eləyər özünün nicatı üçün.

15. Cəhənnəm odundan heç nə xilas etməz onu.

16. Dərisini, ətini bişirib qoparar bu od.

17. Çağırar, çəkər özünə cəhənnəm haqqa arxa çevirən, haqdan üz döndərən kimsəni,

18. bir kəsin haqqını vermədən sərvət yığan kimsəni.

19. Qorxaq yaranmışdır insan binadan.

20. Bir şərə tuş gəldimi, dərhal düşər həşirə.

21. Bir xeyir qazandımı verməz heç kəsin payını.

22. Belələrinə aid deyil namaz qılanlar,

23. namazına ara verməyənlər,

24. mallarından mə'lum qədər pay ayırıb

25. kasıba, ehtiyacı olana verənlər,

26. haqq-hesab çəkilən günün gələcəyini təsdiq eləyənlər,

27. Rəblərinin əzabından qorxanlar.

28. Şübhəsiz, Rəblərinin əzabına uğramayacaqlarına onlar əmin deyillər.

29. O kəslər ki, məhrəm yerlərini qoruyurlar hamıdan

30. və yalnız zövcələrindən, cariyələrindən qorumurlar, qınamazlar onları.

31. Qoyulan bu yasaqları pozmaq istəyənlər hədlərini aşanlardır sadəcə.

32. O kəslər ki, saxlayarlar aldıqları əmanətləri, yerinə yetirərlər verdikləri əhdləri,

33. o kəslər ki, şahidliyi gərəyincə edərlər,

34. o kəslər ki, ötürməzlər namazı,

35. cənnətlər içində möhtərəm kimsələrdən sanılar onlar.

36. Kafirlərə nə gəlib ki, sənə doğru qoşurlar –

37. dəstə-dəstə sağından və solundan.

38. Ne'mət cənnətinə girməyimi umur səndən hər biri?

39. Xeyr, bu deyil istəkləri. Biz onları özləri də bildiyi bir şeydən yaratmışıq.

40. Məşriqlərin, məğriblərin Rəbbinə and içirəm, Biz qadirik

41. onların yerinə daha yaxşı kimsələri gətirək. Bir kimsə də çıxa bilməz qarşımıza bu işdə.

42. Nə qədər ki, və'd edilən o günə qovuşmayıblar, qoy başları qarışsın oyunlarına.

43. O gün qəbirlərdən tez-tələsik çıxarlar. Əzabı görməyə tələsər sanki onlar.

44. Zillət bürümüş gözlərini zilləyərlər aşağı. Onlara və'd verilən gün budur!