Rəhman və Rəhim Allahın adıyla

1. Əlif ləm mim.

2. Bunlar hikmət dolu Kitabın ayələridir.

3. Yol göstərir, rəhmət verir yaxşılara bu Kitab.

4. Namaz qılar, zəkat verər, axirətə iman gətirər onlar.

5. Rəblərinin yolunda olanlardır, uğura uğrayanlardır onlar.

6. İnsanlardan eləsi var elmsizlik üzündən boş-boş söhbətlərilə azdırar adamları Allah yolundan, rişxənd edər bu yola. Alçaldıcı bir əzab gözləyir belələrini.

7. Ayələrimiz oxunanda ona təkəbbürlə yaxasını kənara çəkər. Qulaqlarında ağırlıq var elə bil, eşitməyir elə bil. Ağrılı bir əzabın müjdəsini ver ona.

8. O kəslər ki, iman gətiriblər, saleh işlər görüblər, ne'mətli cənnətlər gözləyir onları.

9. Oralarda əbədilik qalarlar. Bu, Allahın haqq və'didir. Güclüdür, müdrikdir O.

10. Göyləri görə biləcəyiniz dirəklərsiz var eləmiş. Ayağınız altından yer qaçmasın deyə yer üzündə möhkəm duran dağlar yaratmış. Hər canlıdan xəlq eləyib yer üzünə yaymış O. Səmadan su endirərək hər cür gözəl bitkidən Biz növ-növ bitirmişik.

11. Bunlar Allahın işidir. Bəs Ondan başqaları nəyi yarada bilmiş, göstərin Mənə. Açıq-aşkar bir sapqınlıq içində vurnuxar zalım kimsələr.

12. Luqmənə hikmət verdik şükr eləyə Allaha. Öz xeyrinə şükr eləyər şükr eləyən. Naşükürlük eləyən də bilməli, varlıdır, öyülməlidir Allah.

13. Bir zamanlar oğluna öyüd verərək Luqmən demişdi: «Nəbadə Allaha şərik qoşasan. Allaha şərik qoşmaq çox böyük bir zülmdür».

14. İnsana buyurmuşuq yaxşı olsun atasına, anasına. Zəifləyə-zəifləyə, əziyyətdən-əziyyətə qatlaşaraq bətnində gəzdirər, sonra da iki il süd verər ona anası. Demişik şükr eləsin Mənə, valideynlərinə. Mənim dərgahıma axır dönəcək hamı.

15. Əgər atanla anan səni qısnasalar ki, bilmədiyin bir şeyi Mənə şərik qoşasan, onlara itaət eləmə. Ancaq dünya həyatında çalış insaf gözləyəsən onlarla rəftarında. Mənə tövbə eləyib haqq yoluna qayıtmış kimsələrin yoluyla get. Mənim dərgahıma axır dönəcəksiniz. Mən də bildirərəm sizə nə iş görürdünüzsə.

16. Luqmən dedi: «Oğlum! Bir xardal dənəsi ağırlığında olsa belə, bir qaya içində, göylərdə, yerin təkində - harada olsa belə gördüyün pis bir işi üzə çıxarar Allah. Həssasdır, hər şeydən xəbərdardır Allah.

17. Oğlum! Namaz qıl, insaf buyur, fənalıqdan adamları ayır, başına gələnlərə səbr elə, döz. Bunlar sənə güc verər işini möhkəm tutasan.

18. Yz-gözünü turşutma adamlara, lovğa-lovğa yerimə yer üzündə. Ədəbazları, lovğaları sevməz Allah.

19. Yeriyəndə öz yerişini yeri, danışanda azalt səsini. Eşşək anqırtısıdır ən iyrənc səs, şübhəsiz».

20. Göylərdə nə varsa, yerdə nə varsa sizin üçün yaratmış Allah. Görülən, görülməz ne'mətini bol-boluna vermiş sizə. Bunları görməzmi oldun? İnsanlardan eləsi var bir bilgisi olmadan, doğru yolu tapmadan, nur paylayan bir Kitabı qavramadan mübahisə eləyər Allahın barəsində.

21. Belələrinə «Allahın göndərdiyinin ardınca gedin» deyiləndə «Biz atalarımızın yoluyla gedirik» deyərlər. Əgər atalarını od əzabına aparan yola çağırmışsa şeytan, onda necə?

22. E'tibarlı bir dəstəkdən yapışmış kimidir Allahı bir bilən düz əməlli bir adam. Allaha qalar bütün işlər.

23. Bir kimsənin kafirliyi üzündən üzülməyəsən. Bizim dərgahımıza axır dönəcək hamı. Biz də bildirərik onlara nə iş görürdülərsə. Şübhəsiz, ürəklərin içini bilir Allah.

24. Bir az dolandırarıq dünyada onları, sonra da ağır bir əzaba sürüklərik onları.

25. «Göyləri, yeri yaradan kimdir?» soruşsan «Allahdır!» deyəcəklər. De ki, «Həmd edilib öyülməyə layiq olan təkcə Allahdır». Ancaq bunu bilməyir onların çoxu.

26. Allahındır göylərdə nə varsa, yerdə nə varsa. Allahdır varlı olan, öyülməyə layiq olan.

27. Yer üzündə bitən bütün ağaclar qələmlərə dönsələr, dəniz də mürəkkəbə - yeddi dəniz də üstəlik mürəkkəb olsa belə yazılmaqla bitən deyil Allahın kəlamları. Şübhəsiz, güclüdür, müdrikdir Allah.

28. Sizi hamılıqla yaratmaq və sonra qiyamətdə diriltmək bircə canı xəlq eləmək və qiyamətdə diriltmək kimi asan bir işdir Allahın əlində. Eşidəndir, görəndir hər şeyi Allah.

29. Gecəni gündüzə, gündüzü gecəyə qatar Allah. Günəşlə ayı buyruğu altına almış O, müəyyən bir vaxta qədər hər biri axıb gedər. Bunları bilməzmisən? Gördüyünüz işlərdən xəbərdardır Allah.

30. Çünki Allah haqdır, Ondan başqa tapındıqları şeylərsə - batil. Ucadan ucadır, uludan ulu Allah.

31. Məgər görməzmisən, Allahın lütfüylə üzür dənizdə gəmilər. Varlığının dəlilini göstərir sizə Allah beləcə. Şübhəsiz, bunda bir ayə var səbr yiyələri üçün, tez-tez şükr eləyənlər üçün.

32. Başlarının üstünü dağlar kimi dalğalar alan zaman dənizdə, təkcə Onun dininə könül verərək yalvararlar Allaha. Elə ki, quruya çıxardıq onları, bə'zisi tərəddüd keçirər, bə'zisi qalar kafirliyində. Yalnız xain olan, nankor olan kimsələr Bizim ayələri inkar edərlər.

33. Ey insanlar! Çəkinin Rəbbinizdən, qorxun o gündən ki, ata oğulun, oğul atanın karına gəlməyəcək. Şübhəsiz, haqdır Allahın və'di. Qoy sizi aldatmasın dünya həyatı. Allahın əfv edəcəyilə qoy sizi aldatmasın şeytan.

34. Təkcə Allah bilər qiyamətin vaxtını. Yağışı da göndərən, bətnlərdə olanı da bilən Odur. Heç kim bilməz sabah onu nə gözləyir. Heç kim bilməz o harada öləcək. Hər şeyi bilən, hər şeydən xəbərdar olan yalnız Allahdır.