Rəhman və Rəhim Allahın adıyla

1. And olsun örtüyülə hər şeyi bürüyən gecəyə,

2. and olsun görünən gündüzə,

3. and olsun erkəyi, dişini yaradana,

4. ayrı-ayrı şeylərə sizlər can atırsınız.

5. O kəs ki, vermiş Allahın haqqını, qorxmuş Allahdan,

6. təsdiq eləmiş ən gözəl sözləri [«Allahdan başqa tanrı yoxdur»],

7. yüngülü yüngülləşdirərik onun üçün [cənnətə gedən yolunu asan edərik].

8. O kəs ki, xəsislik eləmiş, var yığmış

9. və danmış o ən gözəl sözləri,

10. ağırı yüngülləşdirərik onun üçün [cəhənnəmə gedən yolunu asan edirik].

11. Od içinə düşdümü, yığdığı mal-dövlətin bu kimsəyə nə faydası.

12. Şübhəsiz, doğru yolu nişan vermək Bizim öhdəmizdədir.

13. Şübhəsiz, axirətin də, dünyanın da təkcə Bizik yiyəsi.

14. Alovlanan bir odla Mən sizi təhdid elədim.

15. Bu odun içinə yalnız bədbəxt kimsə vasil olar.

16. Haqqı danan, haqdan dönən bir kimsə.

17. Bu oddan uzaq olar Allahdan qorxan kimsə.

18. Paklıq tapmaq xatirinə öz malından verən kimsə.

19. Heç kəsdən bir təmənna gözləmədən eləyər yaxşılığı beləsi.

20. Yalnız Rəbbinin rizasını qazana deyə yaxşılıq eləyər.

21. Əlbət ki, razı qalacaq alacağından.