Yasamal rayonunda görüş-müzakirə

Din və Demokratiya Mərkəzi 2013-cü il mayın 25-də Bakının Yasamal rayonunda “Quran islamı cəhalət və terrora qarşıdır” adlı tədbir keçirib. Layihənin rəhbəri Vasif Sadıqlı “Quran islamı və cəhalət” mövzusunda məruzə edib. O bildirib ki, dinimizə görə, dinimizə görə, elmlənmək bir ibadətdir. “Quranda ən böyük elm sahibi olaraq Allah göstərilir. Müqəddəs Kitabımızda tez-tez təkrar olunan «Allah bilir» ifadəsi sonrakı müsəlman teologiyası və elminə əhəmiyyətli təsir göstərib. Bilməyin, elm sahibliyinin Allaha xas sifət olması elmə şərəflər şərəfi verir, kiçik yaradıcı olan insanı düşüncə və axtarışlara təhrik edirdi”.

İslamda elm və biliyə yeni yanaşmanı ortaya qoyan mənəvi və intellektual atmosfer nəticəsində uzun əsrlər islam dünyasında güclü elmi tərəqqi olub. Natiq qeyd edib ki, sonralar “elm” sözü semantik təxribata uğradılıb, bir sıra hallarda elm dini və dünyəvi deyə bölünüb, ikincisi hətta küfr elan edilib. “Təəssüf ki, ölkəmizdə də bir sıra hallarda elmə yanlış yanaşmanı təbliğ edən dini qrupların fəallığının şahidi oluruq. Təhsildən yayınma halları bəzi ailələrdə olan dini mövhumatçılıq ənənəsi və qonşu ölkələrdən idxal edilən yanlış dini təsəvvürlərlə şərtlənir”. Sonra V.Sadıqlı “dini” mülahizələrdən qaynaqlanan dünyəvi elmlərə biganəlikdən danışıb, ölkəmizdə təhsildən yayınma və erkən nikahlarla bağlı statistikanı açıqlayıb.
Daha sonra DDM üzvü Pəri Qasımzadə çıxış edib. Gənclərimizin fundamentlist qruplara cəlb edilməsi təhlükəsindən danışan natiq deyib ki, bəzən gənclərimiz gizli terrorizmin toruna düşür və hesab edirlər ki, bunu islam naminə edirlər. İslam təlimini bilmədiklərindən anlamırlar ki, onlar islam norma və dəyərlərini pozurlar. “Terrorçuların bir tərəfdən özünü rahatlatmaq, digər tərəfdən cəmiyyətin simpatiyasını qazanmaq üçün dini dəyərlər də daxil hər cür vasitəni işlətmək istəməsi təbiidir. Amma heç bir müsəlman həm müsəlman qalıb, həm də Allahın cızdığı yolun tərsi olan bir yolla gedə bilməz. Vətəndaş cəmiyyəti din adından hər cür sui-istifadənin qarşısınının alınması işinə öz töhfəsini verə bilər”, deyə P.Qasımzadə bildirib.
Tədbirin sonunda iştirakçıları maraqlandıran suallar cavablandırılıb.
Tədbir Azərbaycan Respublikasının Prezidenti yanında QHT-lərə Dövlət Dəstəyi Şurasının dəstəyilə həyata keçirdiyimiz “Gənclərin intellektual və mənəvi inkişafını mənfi təsirlərdən qorumaq yönümündə maarifçilik tədbirləri” layihəsi çərçivəsində gerçəkləşdirilib.

Xətai rayonunda görüş-müzakirə

Din və Demokratiya Mərkəzi 2013-cü il iyunun 28-də Bakının Xətai rayonunda “Quran islamında elm və cihad anlayışları” adlı tədbir keçirib. Layihənin rəhbəri Vasif Sadıqlı “Quran islamı və elm” mövzusunda məruzə edib. O bildirib ki, Qurana görə, elm Allahın varlığına şahidlik edən ən etibarlı güclərdən biridir. Müqəddəs Kitabımız insanı yaradıcılığa, bütün aspektlərdə – canlı və cansız təbiətdə, insanın özündə olan ayətlərin araşdırılmasına çağırır. «Şübhəsiz, dərindən düşünənlər üçün ayələr var yer üzündə və sizin öz xilqətinizdə. Görməzmisiniz bunları?» (Zəriyət, 20-21), deyə o fikrini Quran ayəsi ilə əsaslandırıb. Dinimizə görə, elmlənmək bir ibadətdir, müsəlman sivilizasiyasının bütün uğurları Quranın elmə verdiyi dəyərdən güc alıb, deyə natiq vurğulayıb. Ölkəmizdə təhsildən yayınma hallarının bəzi ailələrdə olan dini mövhumatçılıq ənənəsi və qonşu ölkələrdən idxal edilən yanlış dini təsəvvürlərlə şərtlədiyini qeyd edən V.Sadıqlı “dini” mülahizələrdən qaynaqlanan dünyəvi elmlərə biganəlikdən danışıb, təhsildən yayınma və erkən nikahlarla bağlı statistikanı açıqlayıb.
Daha sonra DDM üzvü Pəri Qasımzadə çıxış edib. O bildirib ki, “cihad”ın kökü olan “cəhd” Qurani-Kərimdə törəmələriylə birlikdə qırxa yaxın yerdə işlənilib və qərarlı və şüurlu çalışma deməkdir. İslam ədəbiyyatında bu çalışmanın bədəni olanına «cihad», ruhi olanına «mücadilə», fikri və elmi olanına «ictihad» deyilir. Quran terminologiyasında «cihad» dediyimiz üç tip cəhdin hamısını ifadə edəcək şəkildə işlədilir. Quran bunu «Allah yolunda çalışmaq» şəklində ifadə edir.

Amma təəssüf ki, indi cihad deyəndə ilk ağıla gələn silahlı mücadilədir, deyə Qasımzadə bildirib: “Şəhərlərin qələbəlik küçələrində mülki şəxsləri, qadın, uşaq və yaşlıları qətl edən, binaları uçuran, girov aldığı məsum insanları işgəncə ilə öldürən kəslərin bu işə cihad adı vermələri doğru deyil. Səsini çatdırmaq üçün məsum insanları öldürmək kimi çirkin mücadilə yolunu müsəlmanlar icad etməyib. İndiyə qədər bu aksiyalardan müsəlmanlar bir fayda da görməyiblər. Əksinə, islamın və müsəlmanların elm, irfan, haqq və ədalət, sevgi və sülh imicinə böyük zərbə vurulub. İnsanların zehnində islam və müsəlmanlarla terror arasında bir əlaqə qurulub ki, islama bundan böyük bir zərbə vurula bilməzdi”.
Tədbirin sonunda iştirakçıları maraqlandıran suallar cavablandırılıb.
Tədbir Azərbaycan Respublikasının Prezidenti yanında QHT-lərə Dövlət Dəstəyi Şurasının dəstəyilə həyata keçirilən “Gənclərin intellektual və mənəvi inkişafını mənfi təsirlərdən qorumaq yönümündə maarifçilik tədbirləri” layihəsi çərçivəsində gerçəkləşdirilib.

“Quran islamında elm və cihad anlayışları” konfransı

Din və Demokratiya Mərkəzi 2013-cü il iyulun 6-da “Quran islamında elm və cihad anlayışları” adlı konfrans təşkil edib. Tədbirdə alimlərin, QHT rəhbərlərinin, ictimaiyyət nümayəndələri və ictimai rəyə təsir imkanı olan KİV təmsilçilərinin iştirakı ilə gənclərin intellektual və mənəvi inkişafını mənfi təsirlərdən qorumaq üçün səylərinin əlaqələndirilməsi məsələsi müzakirə edilib. Layihənin rəhbəri Vasif Sadıqlı “Quran islamında elm anlayışı” mövzusunda məruzə edib. O bildirib ki, dinimizə görə, elmlənmək bir ibadətdir. İslamda elm və biliyə yeni yanaşmanı ortaya qoyan mənəvi və intellektual atmosfer nəticəsində uzun əsrlər islam dünyasında güclü elmi tərəqqi olub. Amma ölkəmizdə bəzi gənclərimiz arasında çağdaş tərəqqi meyarlarına cavab verməyən, islamın tarixi-zahiri əlamətlərilə kifayətlənən, din dəyərlərinin gerçək məzmunu və elmi mündəricəsinə zidd düşən dini cərəyan və təriqətlər, bunların doğurduğu adət-ənənələr yayıla bilib. Mənfi təmayüllərdən biri qızların erkən nikaha girməsi hallarının artması ilə bağlıdır. O qeyd edib ki, rəsmi statistika görə, Azərbaycanda il ərzində təxminən dörd min erkən nikah baş tutur, belə nikahlardan üç min beş yüzə yaxın körpə dünyaya gəlir. 2005-2006-cı il¬lər¬də er¬kən ni¬ka¬ha gi¬rən¬lə¬rin ya¬şı 15-16 həd¬din¬də idisə, hazırda 13-14 yaş¬la¬rın¬da qız¬ları da valideynləri ai¬lə qu¬rmağa vadar edirlər. Son illərdə belə nikahların sayı 11 faiz artıb. “Təhsildən yayınma halları əsasən bəzi ailələrdə mövcud dini mövhumatçılıq ənənəsi və qonşu ölkələrdən idxal edilən yanlış dini təsəvvürlərlə şərtlənir. Yəni əsas səbəb cəmiyyətdə dinimizin əsl mahiyyəti haqda adekvat təsəvvürün olmamasıdır”, deyə Sadıqlı qeyd edib. Onun sözlərinə görə, erkən nikahlar həm də gənclərin elm, incəsənət və s. sahələrdə özünü realizə imkanından məhrum edilməsi, obrazlı şəkildə deyilsə, istedadların qətlə yetirilməsidir.

Daha sonra DDM üzvü Pəri Qasımzadə çıxış edib. Fanatizmin dini (fundamentalizm), siyasi, ideoloji, etnik, milli, irqi təzahürlərindən danışan natiq gənclərimizin fundamentlist qruplara cəlb edilməsi təhlükəsindən narahatlığını ifadə edib. “Hər hansı bir gəncin fundametalistlərin təsiri altına düşməsi hamımızın itkisidir, bunun üçün kollektiv məsuliyyət daşıyırıq” deyə Qasımzadə qeyd edib. Konfransda çıxış edən AMEA Şərqşünaslıq İnstitutunun əməkdaşı Mirzə Ənsərli isə İslam dininin inkişafı tarixi, türk xalqlarının orta əsrlərdə dünya elminə töhfələrindən danışıb.
Xəzər Universitetinin bölmə müdiri Əlövsət Əmirbəyli din haqqında yayılan yanlış təsəvvürlərin olduğunu deyərək İslamda demokratiyaya geniş yer verildiyini vurğulayıb.
Tanınmış alim Toğrul Cuvarlı tarixə ekskurs edərək İslam ölkələrində elmin inkişafından söz açıb. O həmçinin qeyd edib ki, İslam bütövlükdə cəmiyyət tərəfindən qorunmalıdır. Eyni zamanda sivil dünya dini dəyərlərin qorunmasında maraqlı olmalıdır. QHT Əməkdaşlıq Alyansının icraçı katibi Xanoğlan Əhmədov gənclərin inkişafına mənfi təsirlərin aradan qaldırılmasında vətəndaş cəmiyyəti institutların üzərinə düşən vəzifələrdən danışıb.
Tədbirin sonunda iştirakçıları maraqlandıran suallar cavablandırılıb.
Tədbir Azərbaycan Respublikasının Prezidenti yanında QHT-lərə Dövlət Dəstəyi Şurasının dəstəyilə həyata keçirdiyimiz “Gənclərin intellektual və mənəvi inkişafını mənfi təsirlərdən qorumaq yönümündə maarifçilik tədbirləri” layihəsi çərçivəsində gerçəkləşdirilib.