Rəhman və Rəhim Allahın adıyla

1. İnsanın [Adəmin] başı üstündən elə bir dövr keçmiş ki, o zaman heç yada düşən deyildi.

2. Qarışıq nutfədən yaratmışıq insanı. Və imtahana çəkmək üçün eşidən qulaqlar, görən gözlər vermişik ona.

3. Bizə şükr eləyəndə də, naşükürlük eləyəndə də doğru yolu göstərmişik insana.

4. Zəncirləri, dəmir boyunduruqları, cəhənnəm alovunu, şübhəsiz, kafirlər üçün hazırlamışıq.

5. Kəfur tamlı içkiylə dolu camlardan içər yaxşılar.

6. Bu bir bulaqdır, içər cənnətdə ondan Allahın bəndələri. İstədikləri yerə axıdarlar bu bulağı.

7. Dedikləri nəzirləri yetirər yerinə və şəri bütün məhşərə yayılacaq gündən qorxar onlar.

8. Öz yeməklərini yoxsula, yetimə və əsirə verər onlar.

9. «Allahın savabını qazanaq deyə sizi yedizdiririk. Sizdən buna bir əvəz, yaxud bir təşəkkür gözləmirik.

10. Yzlərdən qaş-qabaq töküləcək gündən qorxarıq, Rəbbinizdən qorxarıq».

11. Və o günün şərindən qorumuş onları, üzlərinə nur və sevinc çökdürmüş Allah.

12. Göstərdiyi səbrə mükafat olaraq girəcəkləri cənnət, geyəcəkləri ipək paltarlar gözləyir onları.

13. Taxtlara söykənərlər orada, nə bürkü, nə şaxta görərlər orada.

14. Cənnət ağaclarının kölgələri düşər üstlərinə, meyvələri bir əl uzadımında olar.

15. Gümüş qablarla, büllür camlarla dolanarlar ətraflarına.

16. Gümüş kimi parlaqdır büllur camlar, içənlərçün hesablanmış bir ölçüdə düzəldilmiş bu camlar.

17. Zəncəfil tamlı içkiylə dolu camlardan içərlər.

18. Bu bir bulaqdır, «Səlsəbil»dir adı.

19. Əbədilik cavan qalan oğlanlar dolanırlar ətraflarına. Baxanda sanırsan ətrafa səpələnmiş incilərdir bu oğlanlar.

20. Gözlərini sən haraya zilləsən, ne'mət görərsən, böyük bir səltənət görərsən orada.

21. Yaşıl, nazik ipəkdəndir paltarları. Gümüş bilərziklərlə bəzənmişlər. Rəbləri onlara tərtəmiz içkilər içirir.

22. «Gördüyünüz işlərə əvəz olaraq verilmiş bunlar sizə. Sə'ylərinizin qədri belə bilinmiş».

23. Qur'anı sənə göndərən, şübhəsiz, Bizik.

24. Rəbbin Öz hökmünü verənədək səbr elə. Onlardan suç yiyəsi, küfr yiyəsi olan bir kimsənin sözünə baxmayasan.

25. Səhər-axşam an Rəbbinin adını.

26. Gecələr də səcdədə ol, öy Allahı bol-boluna.

27. Ötəri dünyadır insanların sevdiyi, o ağır yüklü günlə isə yox işləri onların.

28. Onları yaradan da, qollarına güc verən də Bizik. İstərsək də onları aradan götürərik, yerlərinə onların oxşarı olan başqalarını gətirərik.

29. Bu deyilənlər yalnız bir öyüddür, o kimsədən ötrüdür ki, Rəbbinə doğru bir yol tutub getmək istər.

30. Allah bir şeyi istəməyincə, siz də istəməzsiniz. Hər şeyi biləndir, müdrikdir Allah.

31. İstədiyi kimsəni rəhmətinin yazısına salar O. Ağrılı bir əzab hazırlamış zalımlara.