Rəhman və Rəhim Allahın adıyla

1. Ey iman gətirənlər! Nəbadə qabaqlayasız Allahı və Rəsulunu. Qorxun
Allahdan. Allah eşidəndir hər şeyi, biləndir hər işi.

2. Ey iman gətirənlər! Peyğəmbər danışan zaman səsinizi ucaltmayın. Onu bir-
birinizi çağırdığınız kimi çağırmayın. Yoxsa özünüz də duymadan zay olub
gedər yaxşı-yaxşı işləriniz.

3. Allahın Rəsulunun yanında səslərini qısanların ürəyini taqva duyğusuyla
sınağa çəkər Allah. Məğfirət gözləyir, böyük bir əcir gözləyir onları.

4. Hücrələrin arxasından səni çağıranların çoxu ağılsız kimsələrdir.

5. Sən onların yanına çıxıncayadək səbr eləsəydilər, daha yaxşı olardı onlar
üçün. Bağışlayandır, Rəhimdir Allah.

6. Ey iman gətirənlər! Sizə bir xəbər gətirsə yolsuzun biri, öncə aydınlaşdırın
bu xəbərin doğruluğunu. Yoxsa cahillik üzündən başqalarının başına iş açarsız,
elədiyinizə peşman olarsız.

7. Bilin, aranızda Allahın Rəsulu var. Bir çox işlərdə sizin dediyinizi eləsəydi
o, pis günə qalardınız. Ancaq Allah sizə imanı sevdirmiş, onu ürəyinizə yatımlı
eləmiş. Küfrü, yolsuzluğu, asiliyisə nifrətamiz eləmiş ürəyinizə. Dinlərində
möhkəm olan kimsələrdir belələri

8. lütfü və ne'məti sayəsində Allahın. Tanıyandır hamını, müdrikdir Allah.

9. Mö'minlərdən ibarət iki tayfa bir-biriylə savaşsa, düzəldin onların aralarını.
Əgər biri digərinə təcavüz eləyirsə, təcavüzkar tərəflə savaşın ta Allahın əmrinə
tabe ola bu tayfa. Tabe olarsa ədalət gözləyib düzəldin aralarını, insaflı olun.
Şübhəsiz, insaflıları sevər Allah.

10. Mö'minlər bir-birinə qardaşdırlar. Elə isə düzəldin qardaşlarınızın arasını. Və
Allahdan qorxun ki, bəlkə sizə rəhm edilə.

11. Ey iman gətirənlər! Bir tayfa digərinə qoymayın lağ eləyə. Olsun ki, bu
digəri ondan daha üstündür. Qadınları da qoymayın başqa qadınları lağa qoyalar.
Olsun ki, bu başqaları onlardan üstündürlər. Bir-birinizin eyiblərini axtarmayın.
Bir-birinizə ayamalar qoşmayın. İman gətirəndən sonra yolundan çıxan kəsə
verilən fəsiq adı çox pis addır. Zalım olan kimsələrdir tövbə eləməyənlər.

12. Ey iman götirənlər! Adamlar barəsində müxtəlif gümanlarda olmaqdan
çəkinin. Günah gətirər bəzi gümanlar. Bir-birinizin günahlarını axtarmayın,
eyiblərinizi bir-birinizin üzünə vurmayın. Hansı biriniz ölmüş qardaşının ətini
yeməkdən zövq alar axı? Əlbəttə, heç biriniz. Bundan diksinirsiniz. Qorxun
Allahdan. Tövbələri qəbul eləyəndir, Rəhimdir Allah.

13. Ey insanlar! Biz sizləri bir kişidən, bir qadından yaratmışıq. Sizləri xalqlar
və qəbilələr eləmişik ki, bir-birinizi yaxından tanıyasınız. Şübhəsiz, Allahın
dərgahında sizlərdən ən möhtərəm olanı Allahdan qorxusu daha çox olan kəsdir.
Hər işi biləndir, hər şeydən xəbərdardır Allah.

14. «İman gətirdik» dedi bədəvilər. De ki, «İman gətirməyibsiz. Ona təslim
olmuşuq» deyin. Hələ ürəyinizə iman girməmiş. Allaha və Rəsuluna itaət
eləsəniz, işlərinizin savabından heç nəyi azaltmaz Allah. Günahlardan keçəndir,
Rəhimdir Allah.

15. «Mö'minlər o kəslərdir ki, Allaha və Rəsuluna iman gətirmişlər, sonra da
bir şübhəyə dalmamışlar, Allah yolunda mallarıyla, canlarıyla cihad eləmişlər.
Doğru sözlü, düz əməlli kimsələrdir onlar».

16. De ki, «Allahamı bildirmək istəyirsiz dininizi, imanınızı? Allah bilir axı
göylərdə nə varsa, yerdə nə varsa. Hər şeyi biləndir Allah».

17. Müsəlman olmuşlar deyə istəyirlər sənə minnət qoyalar. De ki, «Müsəlman
olmağınızla mənə minnət qoymayın. İmana gətirməklə sizi Allah Özü minnət
qoymuş üstünüzə. Doğru sözlü, düz əməlli kimsələrsinizsə, bunu mütləq
bilməlisiz».

18. Şübhəsiz, göylərin, yerin görülməzini bilir Allah. İşləklərinizi görür Allah.