Rəhman və Rəhim Allahın adıyla

1. Əlif ləm ra. Bunlar Kitabın, haqqı, batili aşkarlayan Qur'anın ayələridir.

2. Qiyamət günü küfr eləyən kəslərin ürəyindən keçər ki, kaş müsəlman olaydılar.

3. Qoy yesinlər, içsinlər, dünyadan kam alsınlar, ümidlə yaşasınlar. Görəcəklər nə imiş tutduqları işlərinin axırı.

4. Məhvə düçar etdiyimiz hər hansı bir şəhərin mə'lum əcəl yazısı var.

5. Nə qabaqlaya, nə də ötürə bilər bir ümmət öz əcəlini.

6. Dedilər: «Ey zikr göndərilən kəs, sən məcnunsan, şübhəsiz.

7. Doğru sözlü, düz əməlli kimsəsənsə, bizə mələkləri di gətirsənə».

8. Yalnız haqqı yetirmək naminə nazil olar mələklər, kafirləri göz açmağa qoymaz belə mələklər.

9. Şübhəsiz, Qur'anı göndərən də Bizik, Qur'anı qoruyan da.

10. Səndən əvvəl də peyğəmbərlər göndərmişdik öncəki nəsillərdən olan firqələrə [müxtəlif ümmətlərə].

11. İstehzayla yanaşdılar hər gələn peyğəmbərə.

12. Beləcə salırıq Biz suçluların ürəyinə kafirlik mərəzini.

13. Onlar iman gətirməzlər Rəsula. Öncəki ümmətlər də beləcə danırdılar peyğəmbərləri.

14. Göydən bir qapı açsaydıq əgər onların üzünə və göyə çıxsaydılar,

15. deyərdilər: «Gözlərimiz qapanmış, artıq cadulanmışıq».

16. Göydə bürclər var etmişik. Ulduzlarla bəzəmişik onları zillənən gözlər üçün.

17. Hər qovulmuş şeytandan qorumuşuq onları alovlu şö'lələrlə.

18. Göylərə oğru-oğru qulaq kəsilən kəsi tə'qib edər parlaq alov şö'ləsi.

19. Döşəyib düzənləmişik yer üzünü. Möhkəm duran dağlar qurmuşuq burada. Münasib biçimdə bitirmişik hər bir şeyi burada.

20. Dolanışıq düzəltmişik burada sizin üçün və sizin ruzi verə bilmədikləriniz üçün.

21. Bizdədir hər şeyin xəzinələri. Yalnız mə'lum miqdar ilə göndəririk hər şeyi.

22. Biz küləyi mayalandıran olaraq göndərmişik. Səmadan su endirmişik, onu içizdirmişik sizə. Sizdə deyil bu suyun xəzinələri.

23. Can alıb can verənlər, əlbəttə ki, Bizik, Biz! Gerçək varislər də Bizik [ölməyən, daimi olan, hər məxluqa varis olan Bizik],

24. Sizdən öncəkilərdən də, sonrakılardan da Bizim xəbərimiz var.

25. Onları bir yerdə cəm eləyən, şübhəsiz, Rəbbindir sənin. Müdrikdir, hər şeyi biləndir O.

26. Quru gildən, qara palçıqdan yaratdıq Biz insanı.

27. Öncə cinləri yaratmışdıq tüstüsüz oddan.

28. Bir zaman sənin Rəbbin mələklərə demişdi: «Mən quru gildən, qara palçıqdan bir bəşər xəlq eləyəcəm.

29. Onu düzəldəndən sonra, Öz ruhumdan ona üfürəndən sonra əyilərək səcdə eləyin ona».

30. Mələklər hamılıqla ona səcdə elədilər.

31. Təkcə iblis eləmədi, istəmədi səcdə edənlərdən ola.

32. «Ey iblis, səni səcdədən edən nədir?» dedi Allah.

33. «Quru gildən, qara palçıqdan yaratdığın bəşərə səcdə eləyən deyiləm» dedi iblis.

34. «Elə isə çıx oradan, sən artıq qovulmuşsan» dedi Allah -

35. «Qiyamət gününə qədər lə'nətə gələcəksən!»

36. İblis dedi: «Rəbbim! İnsanların təkrar diriləcəyi günə qədər möhlət ver mənə barı».

37. Allah dedi: «Di götür, sən möhlət alanlardansan

38. o mə'lum vaxtın günü gələnə qədər».

39. İblis dedi: «Rəbbim! Məni azdırdığına görə mən də onlara mütləq bərbəzəkli göstərərəm günah işləri və doğru yoldan azdıraram hamısını

40. Sənə sadiq bəndələrdən savayı».

41. Allah buyurdu: «Qorumalı olduğum doğru yol budur.

42. Sən güc gələ bilməzsən Mənim bəndələrimə. Hökmün yalnız sənə uyan sapmışlara yetə bilər».

43. Şübhəsiz, bu kəslərin hamısına və'd olunan yerdir cəhənnəm.

44. Onun yeddi qapısı [qatı] var. Hər qapının kafirlərindən ayrılmış olan öz payı var.

45. Cənnətlərdə, bulaqlar başındadır müttəqilər, şübhəsiz.

46. «Daxil olun oralara salamatlıq, arxayınlıq içində».

47. Onların ürəyində kin deyilən nə varsa çıxarıb atmışıq. Taxtların üstündə qardaşlar sayaq üzbəüz əyləşiblər.

48. Yorğunluq bilməzlər nədir, oralardan çıxası da deyillər.

49. Bəndələrimə soraq ver, günahları bağışlayan, Rəhim olan təkcə Mənəm!

50. Ancaq verəcəyim əzab da çox ağrılı əzabdır! 51. İbrahimin qonaqlarından da eləcə sən onlara xəbər ver.

52. Gəldilər yanına, «Salam» dedilər ona. «Biz sizdən qorxuruq» dedi İbrahim.

53. «Qorxma, gəldik sənə müjdə verək, biləyən bir oğlun olacaq!» dedilər.

54. «Bu qoca vaxtımdamı məni müjdələdiniz? Görün bir nə xəbərlə məni müjdələyirsiz?!» dedi.

55. «Biz səni gerçəklə müjdələdik. Heç vaxt ümidsiz olma» dedilər.

56. «Sapmışlardan savayı axı kim üzər ümidini Rəbbinin rəhmətindən?» dedi.

57. «İşinizin adı nədir, elçilər?» dedi.

58. Dedilər: «Günahkar bir qövmün üstünə göndərilmişik.

59. Ancaq Lutun ailəsi onlardan deyil. Onu, ailəsini hamılıqla xilas edəcəyik.

60. Təkcə arvadının əzab içində qalmağına qərar vermişik».

61. Elçilər gələndə Lutun yanına

62. Lut dedi: «Tanımaq olmayır sizi, kimsiniz?»

63. Dedilər: «Qövmünün şübhə ilə yanaşdığı əzabı gətirib gəlmişik sənin yanına.

64. Haqq ilə gəlmişik yanına. Doğru sözlü, düz əməlli kimsələrik, şübhəsiz.

65. Gecənin bir yarısı ailəni evdən çıxarıb yola sal, özün də onların arxasınca düş. Nəbadə sizdən biriniz dönüb baxa arxaya. Hara deyilərsə sizə, qoşun oraya».

66. Ona vəhy elədik: «Sabahı açınca qövmünün adamları, kəsiləcək kökləri».

67. Şəhər əhli kefləri kök gəldilər.

68. Lut dedi: «Bunlar mənim qonaqlarımdır, məni biabır eləməyin!

69. Allahdan qorxun, məni xəcil eləməyin!»

70. «Özgələri qonaq qəbul etməyi yasaq bilmədikmi sənə?» dedilər.

71. «Etdiyinizi edəcəksinizsə, bu da mənim qızlarım» dedi.

72. Sənin həyatın haqqı, sərxoşluq içində kor-koranə vurnuxurdular.

73. Və dan yeri ağaran zaman yaxaladı onları o uğultu.

74. Alt-üst elədik yurdlarını, odda bişmiş daş yağdırdıq üstlərinə.

75. Bu deyilənlərdə, şübhəsiz, ayələr var görüb-götürənlər üçün.

76. Bir yolun üstündədir, durur o yerlər.

77. Bu da bir ibrət verir iman gətirənlərə.

78. Zalım olan kimsələrdi eykəlilər, şübhəsiz [Şüaybın soydaşları olan bu adamlar «eykə»də, yə'ni ağacları sıx meşəlikdə yaşayırdılar].

79. Və onlardan da Biz intiqam almışıq. Hər ikisinin [Sədumun və Eykənin] taleyi göz önündədir.

80. Hicr [Mədinə ilə Şam arasında yerləşən bu vadidə Səmud peyğəmbərin soydaşları məskunlaşmışdılar] camaatı danırdı peyğəmbərləri.

81. Onlara ayələrimizi vermişdik, bunlardan üz döndərirdilər.

82. Dağlarda arxayın-arxayın özlərinə evlər qururdular.

83. Və dan yeri ağaran zaman yaxaladı onları o uğultu.

84. Əzabı onlardan sovuşdurmadı əldə elədikləri [tikdikləri qalalar, yığdıqları mal-dövlət].

85. Yalnız haqq olaraq yaratmışıq göyləri, yeri və bunların arasında olanları. Qiyamət saatı, şübhəsiz, gələcəkdir! Və sən də öz qövmünə yumşaq ol, onlarla yaxşı dolan.

86. Şübhəsiz, hər şeyi yaradan, hər şeyi bilən sənin Rəbbindir, Rəbbin!

87. Biz sənə daima təkrarlanan yeddi ayəli Fatihəni və Qur'ani Əzimi vermişik.

88. Kafirlərdən bə'zilərinə verdiyimiz gəldi-gedər şeylərə dikməyəsən gözünü. Onların küfrü üzündən üzülməyəsən. Mö'minləri qanadının altına al,

89. de ki, «Allahın əzabının gəlməyini öncədən xəbər verən təkcə mənəm».

90. Hissələrə bölənlərə [yəhudilərə və xristianlara] də Biz əzab göndərmişik.

91. O kəslərə ki, hissələrə ayırıblar Qur'anı.

92. Rəbbinə and olsun, Biz onların hamısından cavab istəyəcəyik

93. tutduqları işlərin barəsində.

94. Sənə buyurulanları açıq-aşkar bəyan elə və müşriklərdən üz çevir.

95. Səni ələ salanlara Biz özümüz yetərliyik.

96. O kəslərə ki, başqa bir tanrını da tay tuturlar Allaha. Görəcəklər nə imiş tutduqları işlərinin axırı.

97. And olsun, bilirik, onların sözlərindən ürəyin sıxılır sənin.

98. Həmd edərək an Rəbbini və səcdə qılanlardan ol!

99. Və ölənə qədər ibadət elə Rəbbinə!