Rəhman və Rəhim Allahın adıyla

1. Göylərdə nə varsa, yerdə nə varsa həmd oxuyar Allaha. Güclüdür, müdrikdir O.

2. Kitab əhlindən olan kafirləri evlərindən çıxardaraq ilk dəfə sürgün eləyən Odur. Güman eləməzdiniz çıxalar evlərindən. Güman elədilər qurduqları qalaları Allahın əzabının qarşısını kəsəcək. Yrəklərinə qorxu salmışdı Allah. Dağıdırdılar evlərini öz əllərilə [qapı-pəncərəni və s. başqa yerə daşımaq üçün] Mö'minlər də əl qatırdı onlara. Alın dərsinizi, ey bəsirəti olanlar!

3. Talelərinə bu sürgünü yazmasaydı da başqa bir əzaba hökmən düçar edəcəkdi onları Allah. Od əzabı gözləyir axirətdə onları.

4. Allaha və Rəsuluna qarşı çıxmışdılar. Kim Allahın əleyhinə çıxarsa, bilsin, Allahın cəzası şiddətlidir.

5. O kafirlərin yurdunda xurma ağaclarını kəsməyiniz, yaxud da kəsməyərək öz kökləri üstündə qoyub getməyiniz Allahın iznilə idi. Yolsuzları beləcə cəzalandırar Allah.

6. Allahın Öz Rəsuluna yetirdiyi qəniməti qazanmaq üçün siz nə at çapdınız, nə də dəvə sürdünüz. Elçilərini istədiyi kəslərdən üstün tutar Allah. Hər şeyə qadirdir Allah.

7. Məqlub şəhərlərin əhalisindən olaraq Allahın Öz Rəsuluna verdiyi qənimətlər Allah, Rəsul, Rəsulun qohumları, yetimlər, yoxsullar, yolçular üçündür. Qənimət beləcə paylanar ki, sizdən olan varlıların arasında əldən-ələ ötürülən sərvətə çevrilməsin. Rəsul nə versə sizə, götürün, nəyi yasaq bilsə sizə, bundan əl götürün. Qorxun Allahdan. Şübhəsiz, Allahın cəzası şiddətlidir.

8. Allahın verdiyi bu qənimətlər xüsusən də yoxsul olan mühacirlər üçündür. Yurdundan, əmlakından ayrı düşmüşlər, Allahın lütfündən pay diləyirlər, Onun rizasını arzulayırlar, Allaha və Rəsuluna yardım eləyirlər. Doğru sözlü, düz əməlli kimsələrdir onlar.

9. O kəslər ki, yurd salmışdı Mədinədə öncədən, din-iman mərkəzinə döndərmişdi buranı, yanlarına hicrət eləyərək gələnləri sevər onlar. Bu kəslərə verilən qənimət mallara görə həsəd hissi keçirməzlər içlərində. Bu qənimət mallara möhtac olsalar belə, qənimət bölgüsündə özlərindən öndə tutarlar hicrət eləyənləri. Uğura uğrayanlardır nəfsinə güc gələnlər.

10. Onlardan [mühacirlərlə ənsardan] sonra gələnlər «Rəbbimiz! Bizi və bizdən öncə iman gətirmiş qardaşlarımızı bağışla, mö'minlərə qarşı kin-küdurət salma bizim ürəyimizə. Rəbbimiz! Sən, şübhəsiz, şəfqətlisən, Rəhimsən» deyərlər.

11. Kitab əhlindən olan kafir qardaşlarına münafiqlər görmədinmi nə deyirlər: «Elə ki, didərgin saldılar sizi, biz də sizinlə birgə mütləq çıxıb gedərik. Sizin əleyhinizə olan bir kimsəyə heç zaman itaətdə olmarıq. Savaşmaq zorunda qalsanız əgər, sizə mütləq yardım edərik». Allah Özü görür ki, bunlar yalançıdırlar.

12. Kafirlər didərgin salınarsalar, münafiqlər onlara qoşulan deyillər. Savaşmaq zorunda qalarsalar da münafiqlər onlara yardım edən deyillər. Yardımına yetişsələr onların, geri dönüb qaçarlar, özləri də bir yardım görməzlər daha.

13. Münafiqlərin ürəyinə qorxu salan Allahdan çox sizsiniz. Çünki onlar anlamaz kimsələrdir.

14. Onlar [yəhudilər nəzərdə tutulur] bir cəm halında yalnız qala divarlarıyla dövrələnmiş şəhərlərdə, divarlar arxasından savaşarlar sizinlə. Möhkəm düşmənçilik var aralarında. Sən onları bir bilirsən, ancaq ürəkləri bir-birindən ayrıdır. Düşüncəsizdir onlar.

15. Onların o kəslərə bənzəri var ki, bir az öncə gördükləri işlərinin cəzasını dadmışlar artıq [«Bədr» savaşı zamanı] Ağrılı bir əzab gözləyir həmin kəsləri.

16. Şeytana da bənzəri var münafiqlərin. İnsana «Küfr elə» deyər. Küfr eləyərsə insan, «Mən səndən uzağam, aləmlərin Rəbbi olan Allahdan mən qorxaram» deyər şeytan.

17. Od içində görəcək hər ikisi axırını. Od içində əbədilik qalarlar. Budur zalımların cəzası.

18. Ey iman gətirənlər! Qorxun Allahdan. Hər kəs baxsın sabahkı gününə özü üçün nə hazırlamış. Qorxun Allahdan. İşləklərinizdən xəbərdardır Allah.

19. Oxşamayın o kəslərə ki, unutmuşlar Allahı, Allah da özlərini unutdurmuş onlara. Yolsuzlardır belələri.

20. Cəhənnəmlə cənnət adamları bir deyillər. Məhz cənnət adamlarıdır ki var, qurtuluşa çıxanlar.

21. Bir dağın üstünə nazil eləsəydik Qur'anı, görərdin Allahın qorxusundan Ona baş əyərək parça-parça olur dağ. Düşünüb daşınalar deyə belə-belə bənzətmələr deyirik insanlara.

22. Odur Allah. Ondan başqa tanrı yoxdur. Görülməzi, görüləni bilən Odur. Rəhmandır, Rəhimdir.

23. Odur Allah. Ondan başqa tanrı yoxdur. Hər şeyin yiyəsi, pak, nöqsansız, peyğəmbərlik verən, hər şeyə göz olan, güclü, hər şeyi buyruğuna tabe eləyən, uludan ulu Odur. Ona qoşduqları şəriklərdən ucadadır.

24. Odur Allah, hər şeyi yaradan, yaratdığına gözəl görkəm verən. Ona aid olar ən gözəl adlar. Həmd oxuyar Ona göylərdə nə varsa, yerdə nə varsa. Güclüdür, müdrikdir O.