Rəhman və Rəhim Allahın adıyla

1. Haqq olan gün!

2. Nədir o haqq olan gün?

3. Sən nə biləsən o haqq olan gün nədir?

4. Başlarına bəla gətirəcək günü danmışdı Səmud və Ad qövmləri.

5. Güclü bir gurultuyla məhv edildi Səmud qövmü.

6. Hər şeyi qabağına qatıb aparan vıyıltılı bir yel ilə məhv edildi Ad qövmü.

7. Yeddi gecə, səkkiz gün bu yeli üstlərinə aramsız əsdirdi Allah. Görürsən kökündən qopmuş xurma ağacları kimi necə sərilmişlər yerə.

8. Görəsən onlardan bir sağ qalan varmıdır?

9. Fir'on, ondan öncəkilər və alt-üst olmuş şəhərlərin camaatı da günahlara batmışdılar.

10. Rəblərinin elçisinin əleyhinə çıxmışdılar. Çox şiddətli bir əzaba uğratdı onları Allah.

11. Sular coşub daşan zaman Biz idik üzən gəmidə sizi daşıyan.

12. Bunu sizdən ötrü ibrət dərsi elədik ki, eşidən hər qulaq eşidib anlaya bunu.

13. Elə ki, bir dəfə çalındı sur

14. və yerlə dağlar birdən-birə dağıldı,

15. olacaq o gün olar, qiyamət o gün qopar,

16. göy yarılıb zəif düşər.

17. Göyün ətrafında olar o gün mələklər. Səkkiz mələk daşıyar Rəbblərinin ərşini.

18. Rəbbinizin hüzuruna gətirərlər o gün sizi. Gizli qalmaz heç nəyiniz.

19. Əməl dəftəri sağ əldən verilən kəs deyər: «Yazımı alın, oxuyun.

20. Mən, şübhəsiz, bu günü görəcəyimə əmindim».

21. Razı qalacağı bir ömür yaşayar,

22. ali cənnət bağına qovuşar.

23. Bir əl uzadımındadır bu cənnətin meyvələri.

24. «Nuşcanlıqla yeyin, için. Ötüb-keçmiş günlərdə gördüyünüz işlərin əvəzidir bu» deyilər onlara.

25. Əməl dəftəri sol əldən verilən kəs deyər: «Kaş ki, bu dəftəri mənə verməyəydilər,

26. bilməyəydim hesabımı,

27. hər şeyə son qoyaydı ölüm.

28. Malımın da bir yararı olmadı,

29. gücüm getmiş əlimdən.

30. Cəhənnəm mə'murlarına əmr edilər: «Onu tutun, zəncirləyin,

31. sonra cəhənnəmə vasil eləyin,

32. sonra da yetmiş arşın zəncirlə sarıyın.

33. Uludan ulu Allaha inanmazdı,

34. yoxsulları yedirtməyə meyl eləməzdi.

35. Bu gün bircə dostu da yoxdur burada.

36. Xörəyi də irin olar.

37. Yalnız suçlular yeyər belə xörəyi».

38. And içirəm sizin görə bildiyinizə

39 və görə bilmədiyinizə,

40. nəcib bir Elçinin gətirdiyi kəlamdır Qur'an.

41. Bir şair kəlamı deyil. Ancaq yenə azdır ona inamınız.

42. Bir kahin kəlamı deyil. Ancaq yenə aldığınız öyüdlərin faydası azdır sizə.

43. Aləmlərin Rəbbinin gendərməsidir bu Qur'an.

44. Demədiyimiz bə'zi kəlamı adımıza çıxsaydı Peyğəmbər əgər,

45. öncə gücünü alardıq onun,

46. sonra da kəsərdik şah damarını.

47. Və heç biriniz qoruya bilməzdi onu.

48. Şübhəsiz, bu Qur'an bir öyüddür, müttəqilərdən ötrüdür.

49. Biz bilirik içinizdə Qur'anı dananlar da var.

50. Kafirlərin ürəyinə bir həsrət yükünü çökdürər Qur'an.

51. Şübhəsiz, haqq olan olacağı bildirəcəkdir Qur'an.

52. Uca tutuludan ulu Rəbbinin adını.