Rəhman və Rəhim Allahın adıyla

1. Həmd oxuyar Allaha göylərdə nə varsa, yerdə nə varsa. Güclüdür, müdrikdir O.

2. Odur göylərin, yerin yiyəsi. Can verən, can alan Odur. Hər şeyə qadirdir O.

3. Əvvəl Odur, axır Odur, aşkar Odur, gizli Odur. Hər şeyi biləndir O.

4. Odur göyləri, yeri altı gündə yaradan, sonra ərşdə qərar tutan. Torpağa nə girirsə, torpaqdan nə çıxırsa, səmadan nə enirsə, səmaya nə qalxırsa bilən Odur. Harada olsanız sizin yanınızdadır. Tutduğunuz işləri görəndir Allah.

5. Odur göylərin, yerin yiyəsi. Allahdır bütün işlərin yiyəsi.

6. Gecəni gündüzə qatar, gündüzü də gecəyə. Yrəklərin içini biləndir O.

7. Allaha və Rəsuluna iman gətirin. Sizi varis elədiyindən xərcləyin Allah yolunda. Böyük bir əcir gözləyir iman gətirərək malını Allah yolunda sərf eləyən kimsələri.

8. Niyə də inanmayasız Allaha? Rəbbinizə iman gətirməyə çağırır sizi Rəsul. Axı sizdən əhd almışdı Allah. İmana gəlmək istəyirsinizsə qoşulun Rəsulun çağrışına.

9. Sizi qaranlıqlar içindən aydınlığa çıxarmaqçün bəndəsi Rəsuluna aşkar ayələr nazil eləyən Odur. Sizə qarşı şəfqətlidir, Rəhimdir.

10. Niyə də xərcləməyəsiz malınızı Allah yolunda? Göylərin, yerin varisi Allahdır axı. Məkkənin fəthindən öncə Allah yolunda malını sərf eləmiş və savaşmış kimsələrlə bundan sonra Allah yolunda malını sərf eləyən və savaşan kəslər bir deyillər. Bunlardan üstündür onlar. Hamısına cənnəti və'd eləmiş Allah. Gördüyünüz işlərdən xəbərdardır Allah.

11. Kim Allaha gözəl bir borc verərsə, qat-qat artıq qaytarar O borcunu. Səxavətlə veriləcək bir əcir gözləyir həmin kəsi.

12. Qiyamət günü görəcəksən mö`min kişilərlə qadınların önünə və sağına işıq salır iman nuru. O zaman müjdə verib deyəcəklər onlara: «İçindən çaylar axan cənnətlər sizindir bu gün. Oralarda əbədilik qalacaqsınız». Budur o böyük qurtuluş!

13. Münafiq kişilərlə qadınlar iman gətirənlərə «Bizi də gözləyin, sizə düşən işıqdan biz də alaq payımızı» deyən gün, «Qayıdın geriyə, özünüz özünüzə bir nur arayın» söyləyərlər onlara. Mö'minlərlə münafiqlər arasına bir sədd çəkilər o gün. Bu səddin bir qapısı var, iç tərəfi rəhmətlə, çöl tərəfi əzabla dolu.

14. İman gətirənlərə «Sizinlə bir deyilmiydik biz məgər?» deyər münafiqlər. «Elədir, ancaq siz özünüz özünüzü aldadırdınız, mö'minlərin nə vaxt həlak olmağını gözləyib dururdunuz, Allahın əmri gələnədək dinə şəkk gətirirdiniz, nəfsiniz aldatmışdı sizi və Allahın adıyla aldadıb azdırırdı sizi şeytan» deyər iman gətirənlər.

15. Nə sizin fidyəniz, nə də kafirlərin fidyəsi qəbul olunmaz bu gün. Od içidir yuvanız. Budur layiqli cəzanız. Pisdən pisdir getdiyiniz yer!

16. O kəslər ki, imana gəlmiş kimidir, ürəkləri çırpınmalı deyilmi Allahın adını anarkən onlar? Onun göndərdiyi haqq kəlamına ürəkdən bağlanmalı deyilmi onlar, vaxtı çatmayıbmı bunun? Öncədən Kitab verilən kimsələr kimi olmaya belələri. O kimsələrin başları üzərindən uzun bir zaman ötmüş [yə'ni peyğəmbərlərindən uzun müddət aralı düşmüşlər] Yrəkləri daşa dönmüş. Yolsuz kimsələrdir artıq bir çoxu.

17. Bilin, torpaq öləndən sonra onu dirildər Allah. Ayələri beləcə sizə açıqlayırıq bəlkə bir düşünüb-daşınasız.

18. Sədəqə paylayan kişilərlə qadınlara və Allaha gözəl bir borc verənlərə qat-qat artıq qaytarılar verdiyinin əvəzi. Səxavətlə veriləcək bir əcir gözləyir onları.

19. Allaha və Rəsuluna iman gətirənlər doğru sözlü, düz əməlli kimsələrdir, şahidlərdir Allahın dərgahında. Əcir və nur veriləcək onlara. Kafirlik eləyib ayələrimizi danan kimsələrsə cəhənnəmlik olacaqlar.

20. Bilin, oyundur, əyləncədir, bəzənib-düzənməkdir, öz aranızda lovğa-lovğa güzəran keçirməkdir, mal-dövlət yığmaqdır, oğul-uşaq çoxaltmaqdır dünya həyatı. Yağışın bitirdiyi və əkinçilərə zövq verən bitkiləri andırır bunlar. Vaxt ötdükcə quruyur, saralır, çör-çöp olur bitkilər. Axirətdə şiddətli bir əzab da var, Allahın məğfirəti və rizası da. Yalnız göz aldadandı, gəldi-gedərdi dünya həyatı.

21. Tələsin Rəbbinizin məğfirətinə, göylə yer qədər geniş olan cənnətə. Allaha və Rəsuluna iman gətirənlər üçün hazırlanmış bu cənnət. İstədiyi kimsəyə Öz lütfündən verdiyi bir paydır bu. Böyük lütf yiyəsidir Allah.

22. Yer üzünə və sizin başınıza elə bir müsibət gətirmərik ki, dərgahımızdakı yazıda Biz bunu öncədən yazmamış olaq. Bu çox asan olar Allaha.

23. Bunu sizə deyirik ki, sizdən yoxa çıxanlara kədərlənməyəsiz, sizə verilənlərə çox sevinməyəsiz. Lovğalanıb öyünən kimsələrdən heç kimi sevməz Allah.

24. Bunlar o kəslərdir ki, özlərinin xəsisliyi bir yana, başqalarını da xəsisliyə sövq eləyərlər. Kim yerinə yetirmirsə öhdəsinə düşəni, bilsin, təkcə Allahdır hamıdan varlı olan, həmd olunan.

25. Aşkar dəlillərlə göndərdik elçiləri. Kitabı, mizanı onlarla nazil elədik. Hər şeydə insaf gözləyə bəlkə insanlar dedik. Möhkəm, davamlı, insanların bə'zi işlərində karına gələn dəmiri var elədik. Dedik qoy görsün Allah kim Ona yardım eləyir, kim arxa olacaq Onun peyğəmbərlərinə bunlar axirətə gedəndən sonra. Şübhəsiz, qüvvətlidir, güclüdür Allah.

26. Nuhu və İbrahimi göndərən Biz idik. Onların soyundan olan kimsələrə peyğəmbərlik, Kitab verdik. Doğru yoldadır soydaşlarının bə'ziləri, yolsuzdur bir çoxları.

27. Onların getdikləri yolla bir-birinin ardınca göndərdik elçiləri. Məryəm oğlu İsanı göndərdik, ona İncil verdik. Şəfqət və mərhəmət duyğusuyla yoğurduq ona tabe olanların ürəklərini. Rahibliyisə onlar özlərindən icad elədilər, Biz bunu onlara vacib bilməmişdik. Vacib bildiyimiz şey Allahın rizasını diləməkdi sadəcə. Heç rahibliyə də gərəyincə riayət eləmədilər. Onlardan iman gətirənlərin əcrini Biz vermişik. Yolsuzlardır bir çoxu.

28. Ey İsaya iman gətirənlər! Qorxun Allahdan, inanın Rəsuluna. Rəhmət payından ikiqat verər, yolunuzu aydınladan nur verər sizə, bağışlar sizi Allah. Günahlardan keçəndir, Rəhimdir Allah.

29. Kitab [Tövrat] əhlindən olan kimsələr [Peyğəmbərə inanmayan yəhudilər] bilsinlər, Allahın lütfündən heç bir şey qazana bilməyəcəklər. Bütün ne'mətlər Allahın Öz əlindədir. İstədiyi kimsəyə bunlardan verəsidir, Böyük lütf yiyəsidir Allah.