Rəhman və Rəhim Allahın adıyla

1. Ha mim.

2. Güclü, hər şeyi bilən Allah nazil eləmiş bu Kitabı,

3. günahlardan keçən, tövbələri qəbul edən, cəzası şiddətli olan, ne'məti bol olan Allah. Ondan başqa tanrı yoxdur. Onun da dərgahına axır dönəcək hamı.

4. Kafirlərdən savayı heç kəs Allahın ayələri barədə mübahisə eləməz. Qoy səni çaşdırmasın onların bu ölkədə arxayın gəzməsi, arxayın dolanması.

5. Onlardan öncə Nuh qövmü də, bundan sonra gələn ayrı-ayrı tayfalar da danmışdılar peyğəmbərləri. Hər ümmət öz peyğəmbərini öldürmək istəmişdi. Haqqı batil ilə yoxa çıxarmaq üçün mübahisə edərdilər. Mən də yaxaladım onları. Göstərdim onlara nə imiş verdiyim cəza.

6. Kafirlərin od əhli olduqları barədəki Rəbbinin sözü gerçəkləşdi beləcə.

7. Həmd oxuyar Rəblərinə ərşi daşıyanlar, onun dövrəsində olanlar. İnanırlar Allaha, məğfirət diləyirlər iman gətirənlərə: «Rəbbimiz! Hər şeyi bürümüş rəhmətin, elmin Sənin. Tövbə edənləri, Sənin yolunla gedənləri bağışla. Cəhənnəm əzabından qoru onları!

8. Rəbbimiz! Söz verdiyin Adn cənnətlərinə sal onları, atalarını, zövcələrini, soylarından əməli saleh olanları. Təkcə Sənsən güclü olan, müdrik olan.

9. Pisliklərdən qoru onları. O gün pisliklərdən kimi qoruyursansa, rəhmət eləmiş olursan ona deməli. Budur o böyük qurtuluş!»

10. «Bir-birinizə bəslədiyiniz kin-küdurətdən Allahın qəzəbi daha böyükdür. Sizi imana çağırırdılar, sizsə küfr eləyirdiz» deyilər kafirlərə.

11. «Rəbbimiz! Bizi iki dəfə öldürdün, iki dəfə diriltdin. E'tiraf elədik suçlarımızı. Bizdən ötrü çıxış yolu varmıdır?» deyər kafirlər.

12. «Allahın adı tək olaraq ayrıca çəkiləndə buna küfr eləyirdiz. Ona şərik qoşulanda inanırdız. Ucadan uca Allahındır, uludan ulu Allahındır bu gün hökm» deyilər onlara.

13. Odur sizə mö'cüzələr göstərən, göydən ruzi göndərən. Allaha üz tutan kimsələrdən savayı ibrət alan tapılmaz.

14. Təkcə Allaha dua eləyin, təkcə Ona könül verin, Kafirlərəsə bu xoş gəlmir gəlməsin.

15. Bəndələrindən istədiyi birisinə vəhy eləyir kəlamını ərşin yiyəsi, ən ali məqam yiyəsi Allah. Vəhy eləyir ki, hamıya öncədən bildirsin bu bəndəsi o görüş gününün gəlməyini.

16. O gün hər şey faş olar, heç kimsənin bir şeyi gizli qalmaz Allaha. «Kimdir bu günün yiyəsi?» «Tək olan qəhhar Allahdır!»

17. Hər kəsə öz əməlinə görə verilər cəza bu gün. Heç kimə haqsızlıq edilməz bu gün. Hesabı tez aparandır Allah.

18. Yaxınlaşmaqda olan qiyaməti xəbər ver onlara. Yrəkləri ağızlarına gələr, qəhərdən boğular o gün onlar. Zalımlara o gün nə bir dost tapılar, nə də sözü eşidələcək bir iltimasçı.

19. Gözlərin xəyanətini, ürəklərin gizlisini bilir Allah.

20. Haqq ilə hökm eləyər Allah. Allahdan başqaları adına tapındıqlarısa heç nəyə hökm eləyən deyillər. Şübhəsiz, təkcə Allahdır hər şeyi eşidən, hər şeyi görən.

21. Bir gəzələr, dolaşalar yer üzünü, baxalar necə olmuş axırı öncəki nəsillərin. Bu nəsillər onlardan daha güclü idilər, onlardan daha çox qurub yaratmışdılar yer üzündə. Günahlarına görə yaxaladı onları Allah. Allahın əzabından bir qoruyan tapılmadı onları.

22. Aşkar dəlillərlə gələn peyğəmbərlərini danmışdılar. Allah da yaxaladı onları. Şübhəsiz, güclüdür O, şiddətlidir cəzası.

23. Ayələrimizlə, aşkar bir dəlillə göndərmişdik Musanı

24. Fir'onun, Həmənin və Qarunun yanına. «Fırıldaqçı cadubazdır» dedilər.

25. Haqq gətirib gəlmişdi dərgahımızdan. Dedilər: «Öldürün onunla bir iman gətirənlərin oğullarını, sağ buraxın qadınlarını». Kafirlər özlərini işə salıb saparlar doğru yoldan.

26. «Qoyun öldürüm Musanı, o da çağırsın Rəbbini. Qorxuram sizləri dininizdən döndərə, yer üzündə fəsad törədə» dedi Fir'on,

27. «Təkəbbürlü olan, haqq-hesab çəkilən günə inanmayan hər kimsənin şərindən məni Allah Özü qorusun. Sizin də, mənim də Rəbbimdir O. Mən Ona sığınıram» dedi Musa.

28. Fir'on ailəsindən olan və imanını saxlayan bir mö'min kişi söylədi: «Rəbbim Allahdır» deyən kimsənimi öldürmək istəyirsiz? Aşkar dəlillər gətirmiş sizə öz Rəbbinizdən. Yalan danışarsa əgər, yalanı öz şərinə. Düz danışarsa əgər, sizə dediklərinin bə'zisi başınıza gələ bilər. Həddini aşan fırıldaqçını doğru yola yönəltməz Allah.

29. Ey qövmüm! Bu gün yer üzündə [Misirdə] hökmranlıq sizindir. Qalib gələn sizsiniz. Ancaq Allahın qəzəbinə düşərsək, kim bizə yardım edəcək?» Fir'on dedi: «Bundan başqa sizə bir yol görmürəm. Sizə yalnız doğru yolu göstərirəm».

30. O mö'min kimsə dedi: «Ey qövmüm! Qorxuram siz də ayrı-ayrı firqələri andıran o qövmlərin gününə düşəsiz,

31. Nuh, Ad və Səmud qövmlərinin və onlardan sonrakıların başlarına gələnlər sizin də başınıza gələ. Bəndələrə zülm diləyən deyil Allah.

32. Ey qövmüm, sizdən ötrü hay-haray yüksələn günün gəlməyindən qorxuram,

33. Arxaya baxmadan qaçacağınız o gün bir kimsə tapılmaz qoruya sizi Allahın əzabından. Allahın azdırdığı kimsəni doğru yola heç kim yönəldə bilməz.

34. Daha öncə Yusuf da aşkar dəlillərlə gəlmişdi sizə. Sizsə şəkk gətirirdiz onun gətirdiyinə. O həlak olan zaman «Ondan sonra peyğəmbər göndərməz daha Allah» demişdiniz. Həddini aşan şəkkakı beləcə azdırar Allah.

35. Əllərində dəlil-fərman olmadan mübahisə eləyirlər Allahın ayələri barədə. Bu, Allahı da, iman gətirənləri də qəzəbləndirər. Və hər təkəbbürlü yekəpərin ürəyini möhürlər Allah».

36. Fir'on dedi: «Ey Həmən, bir qüllə ucalt mənim üçün, bəlkə oradan göyə çıxa bilim,

37. göylərin yollarına yetişə bilim, Musanın Tanrısını görə bilim. Əlbəttə ki, mən onu fırıldaqçı sanıram». Bərbəzəkli göründü Fir'ona pis əməli, kənar düşdü doğru yoldan beləcə. Mütləq boşa çıxacaqdı Fir'onun qurğusu.

38. O mö'min adam dedi: «Ey qövmüm, mənim ardımca gəlin doğru yola çəkim sizi.

39. Ey qövmüm, bu dünya həyatı gəlimli-gedimlidir. Axirət evisə qalımlıdır. 40. Kim pis bir iş görərsə, gördüyü qədər də alar öz cəzasını. İman gətirib yaxşı işlər görənlər, istər qadınlar olsun, istər kişilər, cənnətə girərlər. Və hesabsız ruzi verilər onlara orada.

41. Ey qövmüm, bu nə işdir, mən sizi qurtuluşa çağırıram, sizsə məni od içinə də'vət eləyirsiz.

42. Siz məni Allahı danmağa, bilmədiyim bir şeyi Ona şərik qoşmağa çağırırsız, mənsə sizi güclü olan, çox günahdan keçən Allahın yoluna də'vət edirəm.

43. Şübhəsiz, ibadət eləməyə çağırdığınız o bütlər dünyada da, axirətdə də cavabsız qoyarlar yalvarışları.

44. Bir zaman anarsız sizə dediklərimi. Allaha tapşırıram mən öz işimi. Şübhəsiz, bəndələri görəndir Allah!»

45. Onların qurğusunun pis axırından o mö'min kimsəni qorudu Allah. O pis əzab isə haqladı Fir'onun adamlarını.

46. Səhər-axşam yanar odu göstərərlər onlara. Elə ki, yetişdi qiyamət günü mələklərə əmr olunar: «Ən şiddətli əzaba salın Fir'onun adamlarını».

47. Od içində bir-birilə mübahisə edərkən zəiflər təkəbbürlü başçılara deyərlər: «Bizlər sizə tabe olan kimsələrdik. İndi yetərmi gücünüz bir qədər azaldasız əzabımızı?»

48. Təkəbbürlü başçılarsa deyərlər: «Hamımız od içindəyik. Artıq bəndələrə hökmünü vermiş Allah».

49. «Rəbbinizə yalvarın heç olmazsa bircə günlüyə azaltsın əzabımızı» söyləyər od içində olanlar cəhənnəm mə'murlarına.

50. «Məgər aşkar dəlillərlə sizə gəlməmişdimi peyğəmbərləriniz?» söyləyər onlara cəhənnəm mə'murları. «Bəli, gəlmişdi» deyərlər. «Elə isə di özünüz yalvarın» deyər mə'murlar. Boşa çıxar kafirlərin yalvarışı.

51. Dünya həyatında da, şahidlərin şahidlik edəcəyi gündə də mütləq yardım eləyərik peyğəmbərlərə, iman gətirənlərə.

52. Zalımların üzrxahlıq etməyinin o gün artıq nə mə'nası. Lə'nət düşər, axirət evinin ən pis bir əzabı düşər nəsibinə onların.

53. Doğru yolu nişan verən peyğəmbərlik bəxş elədik Musaya. Tövrata varis elədik İsrail oğullarını.

54. Doğru yolu göstərir, öyüd verir ağlı olan kəslərə o Kitab.

55. Səbrli ol, haqdır Allahın və'di. Günahının bağışlanmasını dilə. Səhər-axşam öy Rəbbini.

56. O kəslər ki, əllərində dəlil-fərman olmadan Allahın ayələri barədə mübahisə eləyirlər, heç vaxt nail ola bilməyəcəkləri bir böyüklük gəzdirərlər ürəklərində. Sən Allaha sığın. Hər şeyi eşidən, hər şeyi görən Odur.

57. Göylərlə yerin yaradılması insanların yaradılmasından daha böyük bir şeydir. Ancaq bunu bilməyir əksər adamlar.

58. Korla görən, iman gətirib saleh işlər görənlə pislik eləyən bir deyil. Bu barədə az-az düşünürsünüz.

59. Şübhə yox, mütləq gələcək qiyamət günü. Amma əksər adamlar inanmayır o günə.

60. «Mənə dua eləyin duanıza cavab verim. O kəslər ki, Mənə ibadət eləməkdən təkəbbürlə yayınırlar, alçalaraq cəhənnəm içinə girərlər» deyə buyurmuş Rəbbiniz.

61. Gecəni sizinçün rahatlıq zamanı, gündüzü iş zamanı eləyən Allahdır. Lütfkardır insanlara Allah. Amma onların çoxu naşükürlük eləyirlər Allaha.

62. Hər şeyi yaradan Rəbbiniz budur. Ondan başqa tanrı yoxdur. Bəs niyə aldanaraq imandan yayınırsız?

63. Allahın ayələrini danan kimsələr aldanaraq imandan yayınırlar beləcə.

64. Sizinçün yeri məskən, göyü uca bina eləyən, sizə görkəm verən, görkəminizi gözəl eləyən, tərtəmiz şeylərdən sizə ruzilər verən Allahdır. Rəbbiniz Allah budur. Ucalardan ucadır, aləmlərin Rəbbidir Allah.

65. O diridir, əbədidir. Ondan başqa tanrı yoxdur. Təkcə Ona ibadət eləyin, təkcə Ona könül verin. Həmd olsun Allaha, aləmlərin Rəbbinə.

66. De ki, «Allahdan başqaları adına tapındığınız şeylərə ibadət eləmək mənə yasaq yazılmış. Mənə aşkar dəlillər gəlmiş Rəbbimin dərgahından. Mənə əmr edilib təslim olum aləmlərin Rəbbinə».

67. Sizi torpaqdan, sonra nutfədən, sonra da qan laxtasından yaradan, sonra çağa olaraq dünyaya çıxaran, sonra yetkinlik çağına yetişdirən, sonra da qocaldan Odur. Bə'ziniz qocalmadan vəfat eləyir. Yazılı bir əcələdək yaşayırsız hamınız. Bəlkə bunları bir düşünəsiz?

68. Can verən, can alan Odur. Nə istəsə, «Ol» desə olasıdır.

69. Məgər görməzmi oldun, Allahın ayələri barədə mübahisə eləyən kimsələr necə kənar salınırlar imandan?

70. Kitabı dananlar, göndərdiyimiz elçilərə verdiklərimizə inanmayanlar mütləq görəcəklər cəzalarını.

71. Buxovlar, zəncirlər vurular boyunlarına, sürərlər onları

72. qaynar suyun içinə, sonra da od içində yandırarlar onları.

73. Və onlardan soruşarlar: «Hanı bəs o şəriklər ki,

74. qoşurdunuz Allaha? «Gözümüzdən itmişlər. Biz əslində əvvəllər heç nəyə ibadətdə deyildik» deyərlər. Kafirləri beləcə azdırar Allah.

75. «Ona görə verilir ki bu əzab, nahaqqa tapınırdınız, bunda sevinc tapırdınız, şadlıq keçirirdiniz» deyilər onlara –

76. «Cəhənnəmin qapılarından keçin içəri. Əbədilik qalacaqsız orada. Pisdən pisdir təkəbbürlük edənlərin yuvası!»

77. Səbrli ol, haqdır Allahın və'di, Onlara və'd etdiyimiz əzabın bir qismini sənə göstərsək də, yaxud bundan öncə səni vəfat etdirsək də qaçılmazdır onların düçar olacağı o əzab. Bizim dərgahımıza axır dönəcəklər axı.

78. Biz səndən öncə də peyğəmbərlər göndərmişdik. Kimindən danışdıq sənə, kimindən danışmadıq. Hər bir elçi hər hansı bir ayəni yalnız Allahın iznilə gətirməyə qadir idi. Allah əmrin verəndə ədalətlə bitər iş. Və ziyana uğrayar batilpərəst kimsələr.

79. Miniyiniz olalar deyə, ətlərindən yeyəsiz deyə heyvanları sizdən ötrü yaradan Allahdır.

80. Başqa işlərdə də karınıza gələr onlar. Yrəyinizin istəyinə çatdırarlar bellərində sizi. Bir yerdən başqa yerə daşıyar sizi heyvanlar və gəmilər.

81. Sizə Öz dəlillərini göstərir Allah. Onun dəlillərindən hansılarını, deyin danırsız?

82. Bir gəzələr, dolaşalar yer üzünü, baxalar necə olmuş axırı öncəki nəsillərin. O nəsillər bunlardan daha güclü idilər, yer üzündə daha çox qurub-yaratmışdılar. Bir fayda gətirməmiş onlara qazancları.

83. Aşkar dəlillərlə peyğəmbərləri gələn zaman onlara, lağ etdilər elçilərin elminə. Və haqladı onları lağa qoyduqları o əzab.

84. Gücümüzü görən zaman dedilər: «Təkcə Allaha iman gətirdik. Ona qoşduğumuz şəriklərə küfr elədik».

85. Gücümüzü görən zaman gətirdiyi imanları fayda vermədi onlara. Bu, Allahın bəndələri barədəki əzəli qanununa görə belə oldu. İtirən kafirlər oldu, nə oldusa onlara oldu.