Rəhman və Rəhim Allahın adıyla

1. Ha mim.

2. Rəhman, Rəhim nazil eləmiş bu Kitabı.

3. Ayələri anlayanlar üçün ərəbcə Qur'an olaraq birər-birər açıqlanan Kitabdır bu.

4. Mücdə verir, xəbərdarlıq eləyir. Bundan üz çevirmiş əksər adamlar. Eşitməz olmuşlar haqq kəlamını.

5. «Bağlıdır ürəyimiz sənin çağırdığına, ağırlıq var qulaqlarımızda, pərdə var səninlə aramızda. Sən öz işində ol. Biz də öz işimizdəyik» dedilər.

6. De ki, «Mən də sizin kimi bir bəşərəm sadəcə. Mənə vəhy olunur, Tanrınız tək Tanrıdır. Ona doğru düzlənin, Ondan məğfirət diləyin». Vay halına müşriklərin!

7. Zəkat verməz onlar. Məhz onlardır axirəti dananlar.

8. O kəslər ki, iman gətiriblər, saleh işlər görüblər, əyərsiz-əskiksiz bir əcir gözləyir onları.

9. De ki, «Yeri iki gündə [bazar və bazar ertəsi] yaradanımı danırsız, Onamı şəriklər qoşursuz? Aləmlərin Rəbbidir O».

10. Möhkəm duran dağlar qurdu yer üzündə, bol sulu, sərvətli-bərəkətli elədi yer üzünü və dörd günün [çərşənbə axşamı, çərşənbə] tamamında paylaşdırdı yer üzünün yetirdiyi qidaları ruzi istəyənlər üçün.

11. Sonra göyə yönəldi. Dumandı, buxardı göy. Göyə, yerə «Gəlin Mənim buyruğuma könüllü ya könülsüz» dedi. «Könüllü gəldik» dedilər.

12. İki günün içində [cümə axşamı, cümə] göyü yeddi elədi. Hər göyə öz işini vəhy ilə bildirdi O. Ulduzlarla bəzədik yaxın göyü, şeytanın şərindən qoruduq onu. Belə qərar vermişdi güclü olan, hər şeyi bilən Allah.

13. Haqdan üz döndərsələr, de ki, «Ad və Səmud qövmünü məhv eləmiş ildırıma bənzər bəlanın sizin də başınıza gələcəyini artıq xəbər verdim sizə».

14. Elçilər keçmişdilər onların qabağından, dalından, Demişdilər: «Təkcə Allaha ibadət eləyin». «Rəbbimiz diləsəydi əgər, mələkləri göndərərdi bizə. Sizinlə göndəriləni biz danırıq» demişdi onlar.

15. Ad qövmünə gəlincə, yer üzündə haqsız yerə təkəbbürlük etmişdilər. Demişdilər: «Kimdir bizdən güclü olan?» Onları yaradan Allahın özlərindən daha güclü olduğunu bilmirdilər, deyilmi? Ayələrimizi danırdılar beləcə.

16. Güclü bir qasırğa göndərdik nəhs günlərdə üstlərinə. Göndərdik ki, bu dünya həyatında rəzillik əzabını dadızdıraq onlara. Axirət əzabısa daha çox alçaldıcıdır. Yardım eləməzlər onlara.

17. Səmud qövmünə gəlincə isə, Biz onlara doğru yolu göstərmişdik. Gəlməkdənsə doğru yola, kor olmağı daha üstün tutdular. Qazandığı günahlara görə alçaldıcı əzabın ildırımı vurdu onları.

18. Xilas elədik iman gətirənləri, Allahdan çəkinənləri.

19. Allahın düşmənlərini o gün yığıb bir yerə cəhənnəmə sürərlər.

20. Çatdılarmı oraya, onların gördükləri işlər barədə qulaqları, gözləri və dəriləri şəhadət verər.

21. Dərilərinə deyərlər: «Niyə əleyhimizə şəhadət verirsiniz?» «Bizi Allah danışdırdı, hər şeyi dindirmiş O. Sizi ilk dəfə yaradan da Odur. Onun da dərgahına dönəcəksiz axırı» deyər dərilər.

22. Gördüyünüz pis işlərdən əl çəkmirdiniz ki, qulaqlarınız, gözləriniz, dəriləriniz də əleyhinizə şəhadət verməyəydilər. Elə bilirdiniz elədiyinizin çoxundan xəbəri yox Allahın.

23. Rəbbinizin haqqında bu zənnə görə məhv elədi sizi O. İtkiyə uğrayanların cərgəsində oldunuz.

24. İstər səbr eləsinlər, istər eləməsinlər, artıq od içidir yeri onların. İstəsələr də onlardan razı qalalar, alınmaz.

25. Onlara şeytanları dostlar elədik. Bərbəzəkli göstərdilər onlara dünyanın və axirətin işlərini. Cinlərin və insanların öncəki nəsillərinə verilmiş olan o və'd onlara da haqq oldu. İtkiyə uğradılar,

26. Kafirlər dedilər: «Bu Qur'ana qulaq asmayın. Oxunurkən boş-boş sözlər danışın, səsinizi qaldırın, bəlkə üstün gələsiz, oxuyanın səsini kəsəsiz».

27. Şiddətli bir əzab daddıracağıq kafirlərə, gördükləri işlərin ən pisinə qarşılıq olaraq verəcəyik cəzalarını.

28. Cəhənnəmdir cəzası Allahın düşmənlərinin, od içində əbədiyyət evi vardır onların.

29. Kafirlər od içində dedilər: «Rəbbimiz! Hansı cin, hansı insan azdırmış bizi, göstər, ayağımız altına alaq onu, alçaldaq onu».

30. «Rəbbimiz Allahdır» deyəndən sonra doğru yolu tutanların yanına mələklər can almağa gələn zaman deyərlər: «Qorxub eləməyin, qəm-qüssə də yeməyin. Sizə və'd verilən cənnətin mücdəsilə sevinin.

31. Dünya həyatında da, axirət evində də biz sizə dost-yoldaşıq. Yrəyinizdən nə keçirsə, meyliniz nə çəkirsə var orada sizdən ötrü.

32. Bunların hamısına sizi qonaq eləyər günahlardan keçən, Rəhim Allah».

33. Allah yoluna çağıran, yararlı bir iş görən və «Mən özümü Allaha təslim edənlərdənəm» söyləyəndən daha gözəl kim söz deyər?

34. Yaxşılıqla pislik bir deyil. Pisliyi daha gözəl xislət ilə dəf elə. Bir də baxarsan düşmən kəsilən kəs yaxın bir dost olmuş sənə.

35. Təkcə səbr yiyəsinə verilən vergidir, təkcə böyük savab yiyəsinə verilən vergidir gözəl xislət.

36. Yolundan çıxarmaq istəsə səni şeytan, sığın Allaha. Hər şeyi eşidən, hər işi bilən Odur.

37. Onun varlığının dəlillərindəndir gecəylə gündüz, günəşlə ay. Nə günəşə, nə aya səcdə qılmayın. Allaha ibadət eləyirsizsə, bunları yaradana səcdə qılın.

38. Təkəbbürlük göstərsələr, üzülmə, bil, Rəbbinin dərgahında olan mələklər gecə-gündüz usanmadan öyərlər Onu.

39. Qupquru görürsən torpağı, bir də baxırsan su göndərdik üstünə, canlandı, qabardı torpaq. Torpağa can verən Allah ölüləri də dirildəndir, şübhəsiz. Bu, Allahın qüdrətinin dəlillərindəndir. Şübhəsiz, hər şeyə qadirdir O.

40. Yayınmaz gözümüzdən ayələrimizi yalan sayıb bunlardan yayınanlar. Kimin vəziyyəti daha yaxşıdır, qiyamət günü od içinə atılanınmı, arxayın-arxayın bu günə gələninmi? Nə istəyirsizsə eləyin, işləklərinizi görəndir O.

41. Qur'an gələn zaman onu dananların cəzasını verəcəyik. Qüdrətli bir Kitabdır o, şübhəsiz,

42. Ondan öncə və sonra bir kitab gəlməmiş ki, Qur'anı təkzib eləyə. Müdrik olan, öyülməyə layiq olan Allahın göndərməsidir bu Kitab.

43. İndi sənə deyilənlər səndən öncəki elçilərə də deyilmişdi bir zaman. Günahlardan keçəndir, ağrılı cəza verəndir Rəbbin, şübhəsiz.

44. Əcəmicə [qeyri-ərəb dilində] göndərsəydik Qur'anı, deyərdilər: «Bunu necə anlayaq, açıqlanmalı deyilmi məgər bu Kitabın ayələri birər-birər? Nəyə görə bu Qur'an əcəmicədir, Peyğəmbərsə ərəbdir?» De ki, «Doğru yolu göstərəndir bu Kitab iman gətirənlərə, şəfa verəndir ürəklərə». Ağırlıq var qulaqlarında, pərdə var gözlərində imansızların. Elə bil lap uzaqdan çağırırlar onları.

45. Musaya da Kitab verdik. Bu Kitabın barəsində çəkişməyə başladılar biri-birilə. Rəbbinin öncədən dediyi bir sözü olmasaydı, artıq verilmişdi hökm onların arasında. Bu Kitaba şəkk gətirib şübhə içində vurnuxurlar.

46. Kim saleh iş görərsə, bu onun xeyrinə, kim fəna iş tutarsa, bu onun şərinə. Şübhəsiz, bəndələrə zülm eləyən deyil Rəbbin.

47. Təkcə O bilir qiyamət nə vaxt qopacaq. Ondan xəbərsiz heç bir meyvə mayalıqdan çıxa bilməz, heç bir dişi hamilə qala bilməz, doğa bilməz. «Hanı bəs Mənə qoşduğunuz şəriklər?» deyilən gün onlara «Sənə bildirmişik ki, şərikinin olduğuna bizdən heç kim şahid deyil» deyərlər.

48. Əvvəllər ibadət elədikləri gözlərindən itmişlər. Artıq yə'qin etmişlər əzabdan qaçacaq bir yeri yoxdur daha onların.

49. Özünün xeyrinə olaraq dua eləməkdən usanan deyil insan. Bir şər iş ilişəndə ona, mə'yus olar, ümidsiz düşər.

50. Düşdüyü sıxıntıdan qurtarıb dadızdırsaq ona dərgahımızdan verdiyimiz rəhməti, «Bu mənim haqqımdır, güman eləmirəm qiyamət qopa. Rəbbimin dərgahına dönəcək olsam da belə, cənnətə girərəm orada» söyləyər. Nə iş tuturdularsa mütləq bildirəcəyik kafirlərə, ağır bir əzabı mütləq dadızdıracağıq onlara.

51. Elə ki, insana ne'mət veririk, böyüklük iddiasında olub Bizdən üz çevirir, ibadətdən kənar düşür. Və şər bir iş ilişəndə ona, yalvarır uzun-uzadı.

52. De ki, «Allahın dərgahından gəlmiş bu Qur'an. Sizsə onu danırsız. İndi deyin görüm, haqdan ayrılaraq uzaq düşəndən daha çox azmış kim ola?»

53. Nə qədər ki, Qur'anın haqq olduğu aydın olmamış insanlara, varlığımızın ətrafda və onların öz içində olan dəlillərini elə hey göstərəcəyik onlara. Yetməzmi hər şeyə Rəbbinin şahidliyi?

54. Bilin, Rəblərinə qovuşacaqlarına kafirlər şəkk gətirirlər. Bilin, hər şeyi almış içinə Onun bilgisi.